Alumnado de 1º Bacharelato realizou unha visita didáctica ao Centro de Investigación Forestal e Formación Agroforestal de Lourizán o luns 29 de abril. Acompañados do profesorado Loli Omil, Beatriz LLoret e Mario Sosa, coñeceron nunha visita guiada a este espazo onde souberon que o Tratado de París (1898) negocióuse na gran mesa de pedra do Pazo de Montero Ríos.
No paseo polo arboredo puideron admirar árbores senlleiras como a Sophora japonica, o Cedrus atlantica, a Sequoia sempervirens…entre outras, enclavadas nun entorno de beleza extraordinaria. Tamén lles ensinaron dúas especies de árbores coñecidas como fósiles antes que se atoparan na natureza: a Metasequoia glyptostroboides e a Wollemia nobilis. O profesorado e monitores do Centro de Formación contáronlles as experiencias na recuperación do bosque autóctono a partir dun eucaliptal. Tamén viron a maquinaria coa que o alumnado aprende: a hidro-sementeira, o viveiro de prácticas, con numerosas arboriñas procedentes de semente, a parcela de produción de plantas aromáticas e a experimentación que están a facer este curso coa posta en marcha do cultivo de cogumelos (Pleurotus ostreatus e Lentinula edodes) en troncos de árbores cortadas.
Unha proveitosa xornada que se completou cun paseo pola fermosa cidade de Pontevedra. A actividade foi organizada polo departamento de Tecnoloxía.
