Educación Física

Día da Educación Física na casa

Mar, 28/04/2020 - 15:11 — IES A Sangriña

Hoxe, 28 de abril, celébrase o "Día da Educación Física na casa" (#DEFC2020) Durante o confinamento estase a demostrar que a Educación Física é moi importante para o mantemento do benestar físico e psíquico das persoas.
Desde o Departamento de EF do IES A Sangriña convidámosvos e animámosvos a participar enviando ao profesorado deste Departamento algunha foto ou vídeo curto voso practicando algunha das propostas que vos foron enviadas aos vosos correos, sós ou aínda mellor en familia!!! Difundirémolas nas redes sociais do instituto, reivindicando a importancia desta materia e amosando á sociedade esta outra forma de traballar a EF que o confinamento nos descubriu.

VISITA Á ESCOLA DE DESPORTO E LACER – UNIVERSIDADE DO MINHO

Mar, 19/11/2019 - 22:10 — IES A Sangriña

O pasado luns 11 de novembro, o alumnado de 1º de Bacharelato, acompañado do profesorado de Lingua Portuguesa (Carmen Saborido) e Educación Física (Susana Salvador e Amalio Verd), visitou a Escola de Desporto e Lacer da Universidade do Minho, en Melgaço (Portugal). Realizaron un percorrido polas instalacións e participaron en varias actividades: unha sesión de aerobic, xogos cooperativos e tests de forza de salto e de velocidade de lanzamento de bóla de béisbol.

Coloquio "Discamiño de Santiago" no IES A Sangriña

Ven, 15/11/2019 - 12:54 — IES A Sangriña

Esta semana tivemos a fortuna de contar no centro cuns conferenciantes moi especiais. Trátase dos participantes en "Discamiño de Santiago" un proxecto que naceu para facer realidade o soño de peregrinar de persoas con diferentes necesidades especiais. Arrancou no 2009 con Gerardo, un mozo xordo-cego que fixo o seu primeiro camiño de Santiago sobre un triciclo tándem. Foi unha actividade espectacular, emocionante e emotiva, e da cal o noso alumnado de 4º da ESO aprendeu moito sobre valores, solidariedade e espírito de superación.

Rafting en Arbo

Ven, 08/11/2019 - 11:03 — IES A Sangriña

A semana pasada o alumnado de 3º de ESO gozou dunha xornada de rafting en Arbo, coa empresa Arrepions. O profesorado acompañante foi Amalio Verd, Samantha Thurson (auxiliar de inglés) e Susana Salvador. Descenderon polo río Miño, pasando por varios rápidos con cinco balsas neumáticas.

Velaquí unha pequena mostra. Podedes ver máis fotos na nosa páxina de Facebook.