Guías de lectura Verán2015

Remata o curso escolar e as bibliotecas escolares galegas  comezan a difundir as súas recomendacións de lectura para este tempo de verán con títulos para toda a familia. Se alguén anda despistado e non sabe que ler, unha ollada a estas "guías de lectura" e poderá acudir a bibliotecas ou librarías cun bo feixe de recomendacións tanto de lectura como de música, cine, espazos web... Os profesionais das bibliotecas escolares axudando a construír sociedade lectora.  Velaquí algúns exemplos: 

COLABORACIÓNS:

Xornadas de Voluntariado de Lectura-A en Culleredo 2015

   Do 26 ao 29 de maio, o CRD da Coruña (Culleredo) acolleu ao alumnado de Voluntariado de Lectura-A de catro centros galegos que foran seleccionados entre os 42 que presentaron memoria de actividade, ao abeiro deste programa iniciado no curso 13/14 e que actualmente se integra no programa "Bibliotecas Escolares Solidarias".  Un total de 49 nenas e nenos de 5º e 6º de Primaria dos centros gañadores participaron nas XORNADAS DE CONVIVENCIA DO VOLUNTARIADO DE LECTURA cun programa intenso de actividades relacionados coa lectura o traballo cooperativo e a educación en valores de voluntariado e solidariedade.
 

A rapazada asistente a estas xornadas de convivencia procedían dos seguintes centros: 

  • CEIP Vales Villamarín, de Betanzos (A Coruña)
  • CEIP Ramón Falcón, de Castro de Rei (Lugo)
  • CEIP Carlos Casares, de Xinzo da Limia (Ourense)
  • CEP Altamira, de Salceda de Caselas (Pontevedra) 
O alumnado estivo acompañado en todo momento por unha profesora de cada centro e polos membros do equipo da Asesoría de Bibliotecas Escolares. Esta actividade está organizada pola Dirección Xeral de Centros e Recursos Humanos xunto coa Dirección Xeral de Xuventude e Voluntariado, e conta coa colaboración do Centro Residencial Docente de A Coruña.

VIII Xornada dos Clubs de Lectura - Materiais

 

O pasado 5 de xuño celebrouse en Compostela a VIII Xornada dos Clubs de Lectura, coa asistencia do profesorado que coordina clubs de lectura en 238 centros públicos de ensino postobrigatorio de Galicia (IES, CPIs centros de FP, Escolas Oficiais de Idiomas, CMUS e centros de ensinanzas de persoas adultas).

No transcurso da xornada, o escritor Agustín Fernández Paz recibiu o Premio dos Clubs de lectura 2015. 

Os materiais da xornada están dispoñibles no espazo redeBE. En breve completaranse cos vídeos gravados nas diferentes sesións.

 

Agustín Fernández Paz. Premio dos Clubs de Lectura 2015

Agustín Fernández Paz. Premio dos Clubs de Lectura 2015 from Bibliotecas Escolares de Galicia on Vimeo.

Gravación realizada na casa de Agustín Fernández Paz co gallo da concesión do Premio dos Clubs de Lectura 2015, que lle foi entregado no transcurso da VIII Xornada dos Clubs de Lectura, o pasado 5 de xuño en Compostela. Agustín non puido estar presente e no seu lugar recolleu o premio o seu amigo e editor, Manuel Bragado. Porén, os asistentes puideron escoitar ao escritor  as súas palabras de agradecemento e unha pequena disertación sobre o poder e a necesidade da lectura. 

VIII Xornada dos Clubs de Lectura

O venres 5 de xuño reunirá en Compostela ao profesorado que coordina os clubs de lectura presentes en máis de 230 centros educativos que matriculan alumnado de secundaria, bacharelato, formación profesional e ensinanzas de réxime especial (conservatorios, escolas oficiais de idiomas e ensinanzas de persoas adultas).

Esta VIII Xornada dos Clubs de lectura é unha oportunidade para a profundización en temáticas relacionadas coa lectura e os xéneros literarios, tamén para reflexionar sobre o papel dos clubs de lectura do ámbito educativo na construción da sociedade lectora, así como para intercambiar experiencias e actividades. Este encontro anual dos coordinadores e coordinadoras dos clubs de lectura é un espazo para reflexión conxunta, tamén para a creación e reforzo de vínculos profesionais arredor dos libros, a lectura e, finalmente, a educación. 

Esta VIII Xornada será tamén ocasión para entregarlle a Agustín Fernández Paz o Premio dos Clubs de Lectura 2015, tal e como se recolle na resolución do pasado 23 de abril, da D.X. de Centros e RRHH, pola que se establece este premio que se concederá cada ano ao autor ou autora galego que foi lido por un maior número de clubs de lectura no curso inmediatamente anterior. Agustín Fernández Paz recibirá pois este galardón dos lectores e das lectoras, e impartirá a conferencia inaugural da xornada. Acompañarán ao profesorado asistente, así mesmo, o xornalista e crítico literario César Lorenzo Gil, director de Biosbardia, e o escritor e crítico de cine e televisión, Miguel Anxo Fernández, que impartirá a conferencia final. Haberá ocasión para o intercambio de experiencias e a reflexión compartida arredor de diferentes temáticas que ocupan e preocupan ao profesorado que coordina os clubs de lectura nos centros de ensino secundario de Galicia. 

Letras Galegas 2015

Maio, Mes das Letras tamén nas bibliotecas escolares galegas. Alumnado e profesorado do CEIP Eduardo Pondal, de Vigo, fannos as súas recomendacións de lectura, como unha achega a esta festa das Letras que se estende por todo o país. Velaquí algúns exemplos da intensa actividade que se xera nos centros educativos, e concretamente nas bibliotecas, arredor desta data significativa para a valorización da lingua e a cultura de Galicia: 

Voluntariado de Lectura - A: centros seleccionados para as xornadas de convivencia 2015

 

Publicada no Portal Educativo a resolución de 13 de maio de 2015 pola que se comunica a selección de centros que, finalmente, participarán nas xornadas de convivencia do Voluntariado de Lectura-A (5º e sexto de primaria), que terán lugar no CRD da Coruña (Culleredo) entre o 26 e o 29 de maio. Un grupo de 50 nenas e nenos, en representación dos voluntarios e voluntarias da biblioteca escolar do seu centro, asistirá a estas xornadas nas que participarán en obradoiros e actividades diversas relacionadas coa lectura expresiva, a narración oral, os xogos cooperativos e tradicionais, o traballo colaborativo, a robótica, o teatro, as danzas do mundo ou bailes tradicionais. Visitarán, así mesmo a Biblioteca "Ágora" e o Museo Nacional de Ciencia e Tecnología (MUNCYT) na Coruña. Dos 45 centros inscritos neste curso presentaron memorias das súas actividades un total de 42 centros, con experiencia nas distintas modalidades (colaboración na biblioteca escolar, lecturas compartidas dentro do centro, lecturas compartidas fóra do centro). Estes"voluntarios de lectura" procederán dos seguintes centros:

  • CEIP Francisco Vales Villamarín (Betanzos, A Coruña)
  • CEIP Ramón Falcón (Castro de Rei, Lugo)
  • CEIP Carlos Casares (Xinzo da Limia, Ourense)
  • CEP Altamira (Salceda de Caselas, Pontevedra)


Libraría institucional na rede

 

A Xunta de Galicia vén de presentar a súa Libraría Institucional a través da rede, unha plataforma virtual dirixido a toda a cidadanía,  na que se recollen as publicacións das diferentes consellerías e organismos dependentes da Xunta. Esta Libraría dixital convértese así nun punto de acceso para a adquisición dos materiais dispoñibles nun amplo catálogo, sexan estes venais ou gratuítos.

As bibliotecas escolares poden atopar neste recurso materiais de interese e, ao tempo, é unha ferramenta para dar a coñecer aos distintos departamentos do centro.

+ Información 

 

 

 

Premio dos Clubs de Lectura 2015 ao autor máis lido nos clubs de lectura

O Portal Educativo publica hoxe, co gallo da celebración do Día Mundial do Libro, a Resolución da Dirección Xeral de Centros e Recursos Humanos, de 23 de abril de 2015, pola que se recoñece o autor galego máis lido polos clubs de lectura do ámbito educativo no curso precedente, galardón que se entregará nesta ocasión a Agustín Fernández Paz, no transcurso da que será a VIII Xornada dos Clubs de Lectura, que terá lugar o próximo 5 de xuño en Santiago de Compostela.

Profesoras e profesores que coordinan estes clubs de lectura nos centros de ensino secundario e postobrigatorio, amosaron o seu interese por recoñecer a aqueles autores e autoras que, cos seus libros, axudan á construción dos lectores. Uns creadores comprometidos coa lingua que achegan a materia prima coa que os clubs de lectura poden contribuír á extensión da lectura en galego. Establécese así o Premio dos Clubs de Lectura que, cada ano, outorgarase ao autor ou á autora de obra en galego que resultase seleccionado polo maior número de clubs de lectura no curso precedente.

Na VIII Xornada dos Clubs de Lectura, Agustín Fernández Paz recibirá a homenaxe do profesorado asistente e, por el representados, de todos os lectores e lectoras  participantes nos clubs de lectura dos centros de ensino secundario de Galicia. 

Día Mundial do Libro 2015

Coma en anos anteriores, as Bibliotecas Escolares de Galicia celebran o Día Mundial do Libro coa edición dun pequeno marcapáxinas en forma de díptico que acolle un texto inédito, neste caso da escritora María Solar, sobre a maxia dos libros, con referencias literarias evocadoras de aventuras e viaxes. Agradecemos a María Solar a súa xenerosidade e a súa recomendación para este día: "Ás veces o destino está no libro que tes ao lado. Só tes que abrilo e gozar". 

O mes de abril ferve xa nas bibliotecas escolares cunha gran variedade de actividades arredor do libro e a lectura. Velaquí algúns exemplos: 

Convocatoria do Plan de mellora de bibliotecas escolares para o curso 2015/2016

O DOG do 15 de abril publica a Orde de 30 de marzo de 2016 pola que se convoca o Plan de mellora de bibliotecas escolares para o curso 2015/2016, destinada a centros públicos non universitarios de titularidade da Consellería de Cultura, Educación e Ordenación Universitaria.

Trátase da undécima convocatoria dun programa polo que se estimula a renovación das bibliotecas escolares de cara a que cada centro conte cunha biblioteca que poida exercer as funcións que o sistema educativo e a sociedade de información demandan: un centro de recursos de lectura, información e aprendizaxe; pero tamén un espazo de encontro entre os distintos sectores da comunidade educativa, no que poder medrar e formarse como lectores e como usuarios da información. Bibliotecas que apoian a alumnado e profesorado en todos os procesos de aprendizaxe, que facilitan recursos variados e actualizados; favorecen a adquisición de competencias clave para o alumnado (lectura, aprender a aprender, competencia dixital, competencia informacional....); ofrecen formación específica para o uso e produción de información, e posibilitan o acceso a actividades de extensión cultural  como presentacións de libros, recomendacións, recitais, lecturas compartidas, clubs de lectura, etc. As modernas bibliotecas escolares son tamén laboratorios de ideas e espazos de experimentación no que alumnado, profesorado e familias poden compartir inquedanzas, formación e lecer e nas que a cultura impresa e a cultura dixital se integran de forma natural. O empeño de profesorado, os recursos, as orientacións, a difusión das boas prácticas e a formación permiten avances neste programa, incluído no PLAN LÍA  (Lectura, Información e Aprendizaxe) de Bibliotecas Escolares da consellería. 

Os centros integrados no Plan de mellora de bibliotecas escolares no curso 2014/2015 deben solicitar a continuidade no programa, se así o desexan. Os centros que aspiren a formar parte do PLAMBE (Plan de mellora de bibliotecas escolares) poderán, así mesmo solicitalo con data límite do 15 de maio (incluído). Recoméndase en ámbolos dous casos unha lectura detallada da orde de convocatoria.
 

A biblioteca, un espazo de colaboracións

A biblioteca pode ser un espazo de colaboración con outros departamentos e algunhas datas do calendario civil poden favorecer o deseño e realización de actividades que respondan a obxectivos de determinadas disciplinas, ao tempo que se lles dá voz aos mozos e mozas e se lles propón a participación en situaciones de reflexión e diálogo. Neste exemplo que nos chega desde o IES Blanco Amor, de Ourense, vemos tamén a participación do alumnado voluntario na biblioteca escolar, que colabora co seu traballo solidario na ampliación de información sobre o tema tratado e contribúe a que o instituto sexa un auténtico espazo de cultura cidadá. Co gallo do Día Internacional da Muller Traballadora,froito da colaboración entre o Departamento de Educación Física e a Biblioteca, recompilouse información sobre a muller no deporte e levouse a cabo unha mesa redonda coa participación de mulleres que destacan no deporte (algunhas delas alumnas do centro), para debater sobre a presenza da muller deportista nos medios de comunicación. O alumnado voluntario na biblitoeca escolar recompilou información dos medios sobre este tema e o resto do alumnado participou activamente na actividade. Velaquí a crónica desta experiencia:

2 de abril, Día Internacional do Libro Infantil

Os carteis e os textos que anualmente edita a IBBY (International Board on books for Young People), xunto coa OEPLI e as entidades colaboradoras (en Galicia, GALIX), arredor do mes de abril, permítennos coñecer autores e ilustradores de distintas sensibilidades e procedencias. Neste ano 2015, o Día Internacional do Libro Infantil, que se celebra o 2 de abril, en memoria do nacemento de Hans Christian Andersen, lévanos aos países árabes e á palabra e á imaxe creada por dúas mulleres representantes da literatura infantil e xuvenil desa parte do mundo: 

  • Moitas culturas, unha historia, é un texto  de Marwa Obaid Rashid Al Aqroubi, escritora e difusora dos libros infantís nos Emiratos Árabes Unidos.  Traballa pola creación dunha cultura de lectura e por proporcionar libros para nenos e nenas afectadas pola guerra, a inestabilidade política ou os desastres naturais na rexión de Asia Central e Norte de África:

"Falamos diferentes linguas e vimos de diferentes orixes, máis compartimos as mesmas historias"

Lectura de primavera 2015

Achégase un breve período vacacional e as bibliotecas escolares galegas aproveitan para publicar as súas recomendacións de lectura, cine, música, recursos electrónicos... Son as "lecturas de primavera":

 

 

 

 

 

 

21 de marzo, Día Mundial da Poesía

A primavera entra cun sorriso poético nas bibliotecas escolares galegas. O 21 de marzo, declarado pola UNESCO en 1999 como Día Mundial da Poesía, é unha data clave nas bibliotecas para tratar de vincular ao alumnado a un xénero literario dos que moitos adultos din "gustar" e poucos len. Existe tamén (nos adultos), o preconcepto de que "aos rapaces non lles gusta a poesía", que cae polo seu peso en canto se lles acompaña no acceso aos textos poéticos e se lles permite achegarse de forma libre á poesía. Velaquí algunhas das actividades levadas a cabo nestes días nas bibliotecas escolares do país: 

Materiais dos Encontros do Plan de mellora de bibliotecas escolares 2014/2015

Os pasados 12 e 13 de marzo de 2015 celebráronse en Santiago de Compostela os Encontros do Plan de mellora de bibliotecas escolares 2014/2015, coa asistencia de 550 profesoras e profesores, responsables das bibliotecas escolares integradas neste programa da consellería. 

En redeBE, o espazo moodle de Bibliotecas Escolares de Galicia, están dispoñibles xa os materiais destes encontros, co fin de que os equipos de bibliotecas e todo o profesorado interesado poida acceder ás presentacións dos relatores e a outras informacións de interese sobre os contidos do programa. En breve subiranse tamén os vídeos gravados nas diferentes sesións.

Entre os materiais dispoñibles, a versión pdf do cómic VIVIR NO SOLO, con guión de Marilar Aleixandre, editado co gallo da celebración do ano 2015 como Ano Internacional dos Solos. Esta publicación, da Delegación Territorial da Sociedade Española da Ciencia do Solo en Galicia, coa colaboración do concello de Santiago de Compostela, foi distribuída nos encontros de forma que puidese chegar, en formato impreso, a todas as bibliotecas do Plan de mellora. 

Nos encontros distribuíuse tamén o libro "Choven palabras no futuro" editado pola Xunta de Galicia (Secretaría Xeral de Cultura) en colaboración con GALIX, co gallo da conmemoración dos 25 anos desta Asociación Galega do Libro Infantil e Xuvenil. 

redeBE: materiais Encontros PLAMBE15

Maletas viaxeiras - Actualización

Dado o elevado número de maletas viaxeiras dispoñibles (xa son 29 coa última incorporación da maleta de Ciencias Secundaria A), fixemos unha pequena modificación na páxina.

Agora podemos ver a lista completa das maletas dispoñibles desde a parte superior da web, para facilitar así a busca desexada.

Nas vindeiras semanas seguiremos engadindo novas maletas a esta colección. Calquera suxerencia que nos desexedes facer chegar sobre este programa será benvida.

Aproveitamos para lembrar que estas maletas están localizadas nas dependencias da consellería, na Asesoría de Bibliotecas escolares, en Santiago de Compostela, polo que os centros que desexen participar deberán vir a recoller e devolver a maleta a esta localización (persoalmente ou a través dunha axencia de transporte), agás cando se desexe facer un intercambio directo entre os centros, tal e como se describe no Protocolo de  intercambio (PDF), previa consulta aos responsables da Asesoría de bibliotecas escolares. 

 

Premio "Francisco Fernández del Riego á colaboración no ámbito editorial e cultural" para Bibliotecas Escolares de Galicia

A Asociación Galega de Editores decidiu conceder o Premio "Francisco Fernández del Riego á difusión do ámbito editorial e cultural,  correspondente ao ano 2014,  ás Bibliotecas Escolares de Galicia. O pasado venres 13 de marzo, o conselleiro Cultura, Educación e O.U. recibiu o premio, no acto celebrado no Pazo da Cultura de Pontevedra, en representación  de todo o profesorado e das comunidades educativas que fan posible a existencia de bibliotecas activas e útiles nos centros educativos galegos.

Desde a Dirección Xeral de Centros e Recursos Humanos, e desde a Asesoría de bibliotecas escolares, agradécese aos editores galegos este recoñecemento. Xa en ocasións anteriores, os editores galegos amosaran interese polos programas de mellora das bibliotecas escolares e de fomento da lectura no contexto educativo ao convidar  a integrantes da Asesoría de bibliotecas escolares para participar no seu simposio anual do libro e da lectura, en diferentes anos, co fin de expoñer as características e os  logros destas iniciativas da administración educativa galega. Agradécense, así mesmo, estas ocasións para dar visibilidade a unha realidade educativa e cultural que contribúe á mellora dos índices de lectura da sociedade galega, e traballa por ofrecer oportunidades de aprendizaxe renovadoras e actuais a todo o alumnado.

Convocatoria do II Concurso de Traballos por Proxectos

Tralos bos resultados da primeira convocatoria, a Dirección Xeral de Centros e Recursos Humanos publica hoxe no Portal Educativo o II CONCURSO DE TRABALLOS POR PROXECTOS, para traballos realizados durante o curso 2014/2015. Poderán presentarse os centros non universitarios de titularidade da Consellería de Cultura, Educación e Ordenación Universitaria, de calquera tipoloxía.

O obxecto deste concurso é o de estimular, mediante o recoñecemento de boas experiencias de traballos por proxectos, o deseño e desenvolvemento de proxectos de carácter interdisciplinar ou de proxectos de investigación, baixo a coordinación do equipo de biblioteca escolar ou co apoio desta, na liña da metodoloxía de aprendizaxe baseada en proxectos (ou ABP).  Os centros poderán optar por algunha destas modalidades:

  1. Proxectos de carácter interdisciplinar, ou Proxectos Documentais Integrados , coordinados desde a biblioteca escolar, e que conten coa participación dun mínimo do 40% dos grupos-aula existentes no centro (ou un 40% dos departamentos). 
  2. Proxectos de investigación dirixidos por profesorado dun grupo, nivel, ciclo ou departamento, nas seguintes sub-modalidades:
    • Traballos de grupo/nivel
    • Traballos de ciclo/departamento
    • Proxectos realizados na materia de “Proxecto Interdisciplinar” de 1º curso de ESO

Todos estes traballos teñen que realizarse co apoio e colaboración da biblioteca escolar e contando cos seus recursos e posibilidades. A temática do proxecto escollida pode ser de calquera ámbito do coñecemento, pero se contemplará un apartado especial de traballos do ámbito científico.

O prazo de presentación de traballos remata o día 30 de xuño de 2015.  Os centros galardoados recibirán asignacións para a atención das necesidades da biblioteca escolar,  especialmente no ámbito da información. 

TEXTO DA CONVOCATORIA DO II CONCURSO DE TRABALLOS POR PROXECTOS

Biografía de Cleopatra para Kamishibai

Biografía de Cleopatra (PDF)

Desde o CEIP Milladoiro de Malpica achégannos esta biografía de Cleopatra elaborada polo alumnado do curso de 3ºA de primaria para o kamishibai, traballo elaborado para a conmemoración do Día da Muller - 8 de marzo.

8 de marzo de 2015, imprescindible data no calendario civil

Na véspera do 8 de marzo, Día Internacional dá Muller, que se vén celebrando por iniciativa da UNESCO desde 1975, iniciamos a recollida de propostas e actividades das bibliotecas escolares galegas que nos van chegando, como exemplo visible do que se está a facer nos centros co fin de sensibilizar ao alumnado e educalo nos valores de igualdade e xustiza.
A mensaxe de Irina Bukova, directora xeral da UNESCO, por mor deste día, afirma que "debemos apoiar o empoderamiento da muller como forza de transformación en favor dos dereitos humanos, o crecemento económico e a sustentabilidade, e facer da igualdade entre homes e mulleres un elemento central de todos os esforzos de desenvolvemento. "

 

Na imaxe, mozas lendo no IES Laxeiro (Lalín)

Novas maletas viaxeiras: Física e Química, Bioloxía e Xeoloxía, Poesía...

Son xa 28 as maletas viaxeiras postas a disposición dos centros educativos a través da plataforma MALETAS VIAXEIRAS, dispoñible tamén a través desta páxina. Incorpóranse agora 6 novas maletas: Poesía (2-Primaria), Física e Química (2- Secundaria) e Bioloxía e Xeoloxía (2- Secundaria).  

Estes materiais están tendo moi boa acollida por parte das bibliotecas escolares. No que levamos de curso 2014/2015, desde setembro ata hoxe, 5 de marzo, houbo un total de 99 solicitudes para distintos momentos do curso escolar e xa se levan feito un total de 69 préstamos. 

Lembramos que as maletas viaxeiras levan unha selección de materiais sobre determinadas materias co fin de apoiar as actividades das bibliotecas (exposicións, proxectos e outras iniciativas), así como dar a coñecer algúns materiais que poidan ser de interese para profesorado ou alumnado.  Estas maletas ofrécense en préstamo temporal máximo de un mes  e os centros deben asumir os custos de transporte. 

Encontros do Plan de mellora de bibliotecas escolares 2014/2015

Os vindeiros 12 e 13 de marzo terán lugar en Compostela (Palacio de Congresos) os Encontros do Plan de mellora de bibliotecas escolares, unha cita anual do profesorado que coordina e representa aos equipos de bibliotecas escolares dos centros integrados neste programa. No presente curso participan deste Rede de bibliotecas escolares que supón o PLAMBE, un total de 550 centros distribuídos por toda a xeografía do país.  

Coma en anos anteriores, a participación nos encontros será do seguinte xeito:

  • 12 de marzo: responsables das bibliotecas dos 33 centros que se incorporaron ao PLAMBE na convocatoria de 2014.
  • 13 de marzo: responsables do resto das bibliotecas do PLAMBE ata un total de 550. 
O programa elaborado desde a Asesoría de bibliotecas escolares, en colaboración co CAFI (Servizo de Formación do Profesorado), conta coa presenza de expertos como Casildo Macías (coordinador da Rede de bibliotecas escolares de Extremadura, coautor do Marco de referencia para las bibliotecas escolares- MEC,2011), Ana Garralón (experta e crítica de literatura infantil e xuvenil), Elisa Yuste (consultora con formación e experiencia no ámbito bibliotecario, editorial cultural e educativo), Ana Basterra (Asesora do ámbito socio-lingüístico no Berritzegune -centro de profesores- de Leioa, en Bizkaia, experta en metodoloxía de proxectos). Presentaranse experiencias de bibliotecas escolares de centros que salientan polas súas boas prácticas, e os participantes poderán tamén acudir a unhas reunións temáticas (sobre a formación audiovisual, as apps na biblioteca escolar , a colaboración entre as bibliotecas escolares e coas bibliotecas públicas ou sobre avaliación dos servizos da biblitoeca, entre outras). Poñerá o punto final aos encontros o catedrático de Mediciña Legal da USC, experto internacional en xenética e divulgador científico, Ángel Carracedo, autor do manifesto publicado no pasado novembro, con ocasión do Mes da Ciencia en Galego nas Bibliotecas. 

Somos Rosalía

A Asociación de Escritoras e Escritores en Lingua Galega convocaca unha vez máis á celebración do Día de Rosalía, concidindo coa data do seu aniversario, o 24 de febreiro. #eusonRosalía! inunda a rede de actividades arredor da escritora e enche o aire cos seus versos nas voces de grandes e pequenos. 
As bibliotecas escolares galegas levan anos aproveitando esta data para dar a coñecer ao alumndo os poemas e a figura de Rosalía de Castro. Velaquí algúns exemplos das actividades programadas este ano: 
Pola súa parte, a Secretaría Xeralde Cultura incorpora esta data ao Calendario do Libro e da lectura 2015. 
Para ilustrar esta entrada escollemos esta recreación de imaxe de Rosalía elaborado pola deseñadora Elba Fernández, recollida nesta nova de 2014 sobre a mirada de artistas actuais sobre a imaxe da poeta galega. 
« primeira‹ anterior…181920212223242526…seguinte ›última »