Skip to Content

EDLG

EscribirARTE - Exposición da Microrrede de Bibliotecas Escolares da Mariña

Dom, 30/04/2023 - 17:48 — karina
O luns 8 de maio, ás 18h30 inaugúrase a exposición anual da Microrrede de Bibliotecas Escolares PLAMBE da Mariña á que pertencemos. 

A exposición conta con 16 cadros e dun conto artístico colaborativo, un por cada biblioteca da Microrrede, e poderá verse no salón multiusos do Concello de Viveiro de 18h a 20h do 8 ao 11 de maio de 2023.

As obras que aí se presentan transpasan as paredes da sala de exposición. Grazas á linguaxe dos códigos QR, achegan o/a visitante a temáticas dispares traballadas nos proxectos da Microrrede.

O cartel é obra da alumna de 2º de bach de Arte do IES Monte Castelo, Claudia García López que agradecemos por brindarnos a portada que abre as portas ao noso traballo colaborativo.

Accede o programa AQUÍ.

MICRORREDE DAS BIBLIOTECAS ESCOLARES DA MARIÑA

  1. EEI SAN ROQUE (Viveiro)
  2. CEP LOIS TOBÍO (Viveiro)
  3. CEIP de CELEIRO (Celeiro-Viveiro)
  4. CEIP Plurilingüe de COVAS (Covas-Viveiro)
  5. CEIP Plurilingüe SANTA RITA (Galdo-Viveiro)
  6. CEIP O VICEDO
  7. CEIP Plurilingüe PEDRO CASELLES ROLLÁN (Xove)
  8. CEIP PENÍNSULA DA PAZ (San Cibrao)
  9. CEIP de CERVO (Cervo)
  10. CEIP Plurilingüe VISTA ALEGRE (Burela)
  11. CEIP Fondo Nois
  12. CEIP GREGORIO SANZ (Ribadeo)
  13. IES MARÍA SARMIENTO (Viveiro)
  14. IES VILAR PONTE (Viveiro)
  15. IES ILLA DE SARÓN (Xove)
  16. IES MONTE CASTELO (Burela)
  17. IES PERDOURO (Burela)
  18. IES ALFOZ-VALADOURO
  • 161 lecturas

Día das Rapazas nas TIC

Mér, 26/04/2023 - 11:40 — miruca
O día 27 de abril de 2023 celébrase o Día Internacional das rapazas nas TIC, e como dende o 2013, ten lugar unha multiconferencia dende o Centro de Supercomputación de Galicia! 

O alumnado de 3º ESO participará nun coloquio mediante multiconferencia web na que estarán 4 profesionais galegas que traballan a diario coas tecnoloxías, que contarán, dun xeito ameno e polo miúdo a súa traxectoria, no que traballan, e o que a tecnoloxía pode aportar en diversos campos para mellorar a vida de tod@s. Aquí tedes información sobre:  

  • Mariamo Mussa Juane
  • Esther Medina
  • Alba Meijide
  • Carmela Troncoso

Dende os centros escolares de primaria e secundaria, rapazas e rapaces poderán enviarlles as súas preguntas e inquedanzas en directo para poder ter ese diálogo directo con elas. 

O horario do evento é o seguinte: 

10:45 – 10:50 Benvida á encontro virtual por parte do director do Centro de Supercomputación de Galicia (CESGA), Lois Orosa. 

10:50 – 11:00 Intervención da Conselleira de Promoción do Emprego e Igualdade da Xunta de Galicia, María Jesús Lorenzana Somoza. 

11:00 – 11:50 Visión e experiencia de catro galegas que traballan, emprenden e investigan empregando as TIC. Modera: María José Rodríguez Malmierca, coordinadora da área de e-learning do CESGA. 

11:50 – 12:30 Roldas de preguntas e dúbidas plantexadas or parte das/dos estudantes participantes conectadas/os.

Non sabedes o que é o Día Internacional das Rapazas nas TIC? É unha celebración a nivel internacional, orientada a motivar ás novas xeracións de mozas para que consideren o ámbito das TIC para o seu desenvolvemento académico, investigador e profesional. Aquí está toda a información do movemento a nivel internacional.

  • 111 lecturas

27 de marzo: Día Mundial do Teatro

Dom, 26/03/2023 - 23:42 — miruca

O 27 de marzo celébrase o Día dos Escritores Europeos e tamén o Día Mundial do Teatro. Para salientar esta última conmemoración, o alumnado de 1º de Bacharelato de Literatura Universal elaborou un par de libriños con títulos de obras teatrais. As palabras están representadas por emoticonas. A ver se as acertades!


 

 
  • 67 lecturas

Celebramos o Día dos Ecritores Europeos: 27 de marzo

Sáb, 25/03/2023 - 19:08 — karina
O luns 27 de marzo celébrase a 1ª edición do Día dxs Autorxs Europexs.

A biblioteca do IES Perdouro acollerá a Antía Yáñez, autora burelá, que falará da súa obra ao alumnado de 4º de ESO.

É unha iniciativa da Comisión Europea, dirixida polo Comisario Gabriel, para promover a lectura entre a rapazada e dar a coñecer a riqueza cultural e lingüística europea.

#ReadWithEurope

 

  • 52 lecturas

Día da Poesía 2023: videopoemas de Noriega Varela e Cabanillas

Mar, 21/03/2023 - 03:44 — miruca

Con motivo da celebración do Día da Poesía o alumnado de 2º de Bacharelato que cursa a materia de Literatura galega do século XX e XXI preparou algúns videopoemas de dous dos autores que inauguran o século XX: Antonio Noriega Varela e Ramón Cabanillas. 

Escoitar ou ler poesía fai que experimentemos emocións por tratarse dun xénero literario no que fundamentalmente se expresan sentimentos. Convidámosvos a ver e escoitar cada un destes videopoemas e deixar que afloren as vosas emocións. 

  • 65 lecturas

Celebración do I Día da Literatura Caboverdiana

Ven, 17/03/2023 - 01:50 — miruca

Neste ano 2023 cumpre 75 anos a primeira grande obra narrativa da literatura de Cabo Verde. Trátase de Chiquinho, unha novela escrita por Baltasar Lopes da Silva. A obra marcou o inicio da literatura caboverdiana, cubrindo temas locais e da cultura crioula. 

Este martes Burela acolleu a celebración do primeiro 'Día da Literatura Caboverdiana'. A partir das dez da mañá comezou na biblioteca do IES Perdouro unha lectura continuada de Chiquinho a cargo de duascentas persoas, entre as que se atopaban os alumnos e alumnas do centro. 
 
Na inauguración participaron unha estudante -Noemy dos Reis Cardoso Borges-, a profesora de Lingua Portuguesa -Vanesa Vila Verde-, o alcalde de Burela -Alfredo Llano- e a Conselleira de Cultura da Embaixada de Cabo Verde, Odete Alves.

I Día da Literatura caboverdiana

Lun, 13/03/2023 - 01:47 — miruca
O Departamento de Portugués organiza un encontro de lectura comunitaria do romance caboverdiano "Chiquinho" que será celebrado o 14 de marzo na biblioteca da nosa escola.

Non é por acaso que teñamos decidido organizar este encontro de lectura do romance Chiquinho, pois en Burela existe unha comunidade caboverdiana moi importante e consideramos que este tipo de encontros constitúen unha ferramenta necesaria para traballarmos na aproximación á cultura caboverdiana.

É por iso que consideramos moi importante a participación. Somos conscientes de que a participación presencial non é posible en moitos casos, por iso decidimos combinar esa modalidade coa participación online. Así, os participantes que non poidan asistir á lectura de forma presencial poderán ler conectando por videoconferencia ou ben participar enviando um vídeo gravado a:  modeloburela@gmail.com ou pola mensaxería privada do facebook.
 
  • 104 lecturas

Charla impartida polo alumnado de 1º de Bacharelato: Sobre saúde, dietas e azucres

Lun, 13/03/2023 - 01:46 — miruca
O día 17 de xaneiro o alumnado de 3º ESO asistimos a unha actividade organizada polos alumnos e alumnas de 1º de bacharelato.

A actividade levouse a cabo na biblioteca do instituto. A primeira parte da presentación trataba sobre a dieta saudable e mais as consecuencias que ten a alimentación na saúde.

Unha dieta saudable é aquela na que se consome a cantidade correcta de alimentos na proporción adecuada, obtendo deste modo os nutrientes que o corpo necesita. Ademais, unha alimentación sa reduce o risco de sufrir diabetes, hipertensión e incluso cancro.

De seguido, pasaron a falar dos azucres. A OMS (Organización Mundial da Saúde) recomenda consumir 25 gramos de azucre ao día. Porén, isto é practicamente imposible, polo que se establece como cantidade máxima uns 60 gramos en adultos e 40 gramos nos nenos.

Encontro con Antía Yáñez: a muller en Senlleiras

Xov, 09/03/2023 - 22:27 — miruca
Este venres teremos con nós a Antía Yáñez para que o alumnado de 1º Bacharelato poida compartir con ela as súas impresións sobre o papel da muller na súa novela Senlleiras. 

Trátase dunha actividade máis dentro da Semana da Muller, arredor do 8M. 

 
  • 67 lecturas

Cartel 8M do IES Perdouro

Mér, 08/03/2023 - 02:08 — miruca

Temos cartel Especial 8M!! Grazas a Zoe Arias Lamelas, alumna de 4º ESO, por achegarnos a súa proposta tan axeitada para a ocasión. Lembra: IGUALDADE!

  • 62 lecturas

O xogo da zoca: camiñando cara á igualdade

Lun, 06/03/2023 - 15:49 — miruca

Unha das actividades organizadas en torno ao 8 de marzo, Día da Muller, é este xogo ideado pola profe Carmen Sampedro para que poidamos aprender sobre mulleres salientables ao longo da Historia. Ela mesma, acompañada de alumnado do ciclo de Xestión Administrativa, pasará pola aulas para que poidades xogar e avanzar así cara á igualdade. De aí o lema do xogo: 

Con estas zoquiñas, máis libre camiñas!
 
  • 79 lecturas

Concursos AC Os Matos 2023

Ven, 24/02/2023 - 23:46 — karina

Convocamos os Concursos anuais da Asociación Cultural Os Matos.

Buscamos os mellores traballos de poesía, relato curto e debuxo en torno a seguinte temática "Unha vida de emocións".

 

Tedes ata o 31 de marzo para participar. 

Entregaremos dous premios en cada categoría.

Lembra: en lingua galega. 

XVI Concurso literario     
    + de relato curto  
    + de poesía
 
XIV Concurso de Imaxe

 

Tamén estamos á procura dos mellores debuxos ou composición fotográfica de temática libre para a portada e contraportada da revista escolar Maruxía n°29.

Tedes ata o 20 de abril para participar.

Lembra: en lingua galega.

 


 

 

 

 

 



 

 

  • 37 lecturas

Día de Rosalía 2023

Xov, 23/02/2023 - 02:40 — miruca
O 23 de febreiro celébrase o Día de Rosalía xa que é a data do aniversario do nacemento da autora. 

A AELG (Asociación de Escritores en Lingua Galega) propón regalar nesta data un libro e unha flor e ademais anímanos a ler o manifesto que prepararon para este ano 2023. 

Podes lelo e publicalo nas túas RRSS. Esta é a parte final do manifesto de Carme Adán que nos fai reflexionar sobre a necesidade de denunciar as inxustizas do noso tempo: 

"Dos moitos legados de Rosalía de Castro, destacamos un, o da filósofa que sabe libre o seu pensar e non cede ante as cadeas impostas. Rosalía ensinounos da liberdade do pensamento que se afunde na realidade para interrogala por un futuro mellor. Se só cantamos as pombas e as flores, as luces de cores dos nosos autorretratos dixitais, de que teremos a alma? 

Se desoímos os berros do noso tempo, de que teremos a alma?" 

Podedes descargar ou ler o manifesto completo neste enlace. 

Animade ao voso alumnado a ler poemas de Rosalía ou a parte que máis lles guste do manifesto anterior. Se o facedes na aula e o gravades, enviade os vídeos á vicedirectora para publicalos. 

#cumpriuseaxustiza #rdc_2023

  • 78 lecturas

Entroido 2023

Ven, 17/02/2023 - 20:01 — karina

Este ano retomamos a celebración do Entroido todxs xuntxs no patio con desfile e exhibición. O xurado tívoo difícil. Todas as actuacións foron grandiosas e divertidas: baile e música de hoxe e de onte, video-xogos, xuízo, emocións, deportes: fútbol, baloncesto, natación, desfile de moda, debuxos animados, ...

 

Os premios para os mellores grupos de Entroido foron para:

    1º premio: A granxa de 1º de bacharelato C
    2º premio: Indios e vaqueiros de 4º ESO A
    3º premio: KK Chanel de 1º de bacharelato B
  
Os premios para o mellor disfrace foron para: 

 
    1º premio: Manuela e Gabriela de 1º de bacharelato B
    2º premio: Marina de 1º de bacharelato B
    3º premio: María de 4º ESO A 

 

O premio Entroido Sostible foi para: 

    Premio Sostible: 1º ESO A

 

O premio á elegancia foi para : 

    Elegancia: David de 4º ESO A 

O grupo Os malotes do Perdouro representados polos profes tamén tiveron o seu premio de grupo e Rosa, portadora do estandarte, levou o premio ao mellor disfrace de profe.

Finalmente temos tres agradecementos moi especiais: felicitamos o profesorado e alumnado dos ciclos de Mecanizado e Mecatrónica, Peiteado e Cosmética Capilar e de Instalacións de Telecomunicacións que se preocuparon de fabricar os trofeos, maquillar o profesorado, da instalación da megafonía e da xestión acústica do evento.

Parabéns a todxs pola vosa participación e moitas grazas por vivir o Entroido con tanta alegría!!
 
Podes acceder ao álbum de fotos AQUÍ.

  • 88 lecturas

Amigo invisible polo día da amizade

Mar, 14/02/2023 - 23:55 — karina
Esta mañá, 14 de febreiro, chegou o gran momento da semana. Os emisarios de Cupido repartiron as cartas de amizade, un amor necesario para o benestar emocional. 

Houbo cousiñas lindas, debuxos, poemas, etc...

Promovendo a empatía para o un mundo máis xusto.

Máis fotos por aquí.

  • 59 lecturas
Distribuir contido


by Dr. Radut