Marzo-Abril 2022
O ano 2022 foi declarado pola Asemblea Xeral da ONU como Ano Internacional do Vidro co obxectivo de dar visibilidade á súa importancia científica, ambiental e cultural como un dos materiais máis importantes, versátiles e transformadores da Historia. No comunicado emitido por esta institución destácase o papel fundamental deste material na evolución da arquitectura e das artes, así como en sectores destacados como son o aeroespacial e da automoción, o da enerxía, biomedicina, electrónica e comunicacións, no traballo de laboratorio e na óptica, no envasado e no almacenamento.
O IES Lucus Augusti, aproveitando esta efeméride, pon en valor o material de vidro do seu museo a través dunha exposición que leva por título “Material de vidro no museo. Un percorrido por pezas do laboratorio de química e de bioloxía de onte e de hoxe”. Este material, constituído por pezas do antigo gabinete de Física e Química conservadas actualmente no museo, forma parte dos fondos materiais que compoñen o patrimonio do noso centro, común ao de moitos outros Institutos Históricos.
