Skip to Content

IES Leiras Pulpeiro

Educar en Xustiza - 22/23

A partir da grande experiencia educativa disfrutada no mes de maio, o alumnado de 3º da ESO participará durante este mes de outubro no programa Educar en Xustiza promovido polo TSXG. Esta actividade insírese no Plan de Acción Titorial do centro, e vai encamiñada a promover o desenvolvemento dunha cidadanía consciente por parte do alumnado e fornecer espazos para que se exerza de maneira activa, crítica e responsable.

O programa é o seguinte:

- 3ºA asiste o 3 de outubro ao Xulgado do Penal nº2  de Lugo

- 3ºB o 11 de outubro ao Xulgado de Instrución nº2 de Lugo

- 3ºC o 18 de outubro ao Xulgado de Instrución nº2 de Lugo

- 3ºD o 19 de outubro ao Xulgado do Instrución nº3 de Lugo

Participaremos en varios xuízos (en xeral, curtos) que terán lugar nesas salas, e o/a maxistrado/a ao final de cada xuízo dará as indicacións necesarias para seguir o procedemento xudicial e comentará a sentenza a ditar.

Na xornada do día 11 de outubro asistimos a cinco xuízos moi interesantes presididos pola xuíza Sandra Piñeiro que nos atendeu cunha amabilidade e unha adicación que queremos destacar. Falounos sobre os detalles de cada caso achegando explicacións históricas sobre o principio de igualdade e a consecución de dereitos. Tamén fixo reflexionar ao noso alumnado sobre as causas da delincuencia, moi ligadas ás adicións. Unha actividade de grande calidade educativa que, abofé,  inspirou vocacións entre os/as participantes.

Ópera Hits (07-10-2022)

Programa dedicado ás arias máis famosas da ópera.

Dirección: Nuria
Locutores: Nuria, Xabi
Control: Xabi

Talento Matemático no Leiras

O pasado xoves 29 de setembro tivo lugar no Salón de Plenos do Concello de Lugo un acto de recoñecemento a dous alumnos e dúas alumnas do noso centro educativo que veñen de colleitar un espectacular resultado en dous dos eventos matemáticos máis importantes a nivel galego e español do curso escolar: A Olimpíada Matemática e ESTALMAT. No acto estiveron presentes 4 representantes do departamento de Matemáticas e do equipo directivo do IES Leiras Pulpeiro, 2 representantes de ESTALMAT, 1 da Olimpíada, 3 concelleiros do Concello de Lugo, o noso alumnado homenaxeado e as súas familias.

 

A finais do curso 20-21 Martín Casanova Alonso foi nomeado como uns dos gañadores da Fase Final Española da Olimpíada Matemática. Martín xa acadara o primeiro posto na fase local e na fase galega e representou a Galicia nunha proba que tivo que se facer on-line debido á pandemia. Por este motivo e polas actividades propias do verán, quedara pendente por parte do Concello un acto de recoñecemento que finalmente se puido facer tras o éxito que un ano despois conseguirían os seus tres compañeiros.

 

Isabel López Quiroga, Ainara Prado Regueira e Iago Rodríguez Quintás presentáronse a finais do curso pasado ás probas de acceso a ESTALMAT, un programa organizado pola Facultade de Matemáticas en colaboración con outras institucións públicas e privadas que pretende, como o seu propio nome indica, estimular o talento matemático do alumnado seleccionado. Presentáronse máis de 300 candidatos e candidatas de toda Galicia para 30 prazas e 3 foron para este alumnado do Leiras, un verdadeiro orgullo para un instituto como o noso, que ten a atención á diversidade como prioridade fundamental e que pretende facela compatible con que o alumnado máis talentoso poda, de acordo cos seus intereses, desenvolver as súas capacidades en plenitude e de forma tan destacada como neste caso.

 

Queremos dar os parabéns a Martín, Isabel, Ainara e Iago, as súas familias responsables primeiras do que son e do que consigan no futuro, pero, sobre todo, darlles as grazas. O seu exemplo é vento nas velas para o noso Leiras.

Venres Musicais - Leiras Reloaded (30-09-2022)

Abrimos a porta da radio e aí están, Félix e os seus colaboradores, que levan agardando dende o último programa da festa de fin de curso pasado, e seguen con ganas de máis.

Dirección: Félix
Locutores: Samuel, Alexandre, Eva, Carla, Judith, Félix
Control: Xabi

 

Rosalía Bernárdez, Premio Extraordinario da ESO ao rendemento académico

O noso centro educativo ten unha grande diversidade que nos enriquece a todas e todos e que non supón obstáculo para que o alumnado encontre espazos nos que, de acordo cos seus intereses, poda desenvolver as súas capacidades en plenitude.

É o caso de Rosalía Bernárdez Riopedre, que acadou a maior puntuación de Galicia nos Premios extraordinarios de ESO ao rendemento académico que se suma a outros recoñecementos obtidos o ano anterior, nomeadamente ao seu enorme talento literario.

Un grande orgullo poder contar entre nós con referentes coma Rosalía, que nos mostren os froitos ao esforzo persoal, os camiños abertos e as ilimitadas posibilidades que se constrúen día a día nun centro educativo como o noso: público, humilde, de barrio, de tod@s e para tod@s.

Observación de planetas

Hoxe martes día 20 faremos unha actividade de observación de planetas no patio do centro, entre as 21:30 e 22:30.

Como o tempo está cambiante, se a esa hora está nublado, cancelarémolo.

 

Venres Musicais - One Hit Wonder (16-09-2022)

Programa dedicado a eses grupos que só tiveron un éxito e nunca máis se soubo deles.

Dirección: Xabi e José Manuel
Locutores: José Manuel e Xabi
Control: Xabi

 

Convocatoria Presentacións Curso 22-23

Podes acceder o documento de asignación de grupo e convocatoria para a presentación do curso 22/23 a través do curso Administración Alumnado da Aula Virtual. O documento encóntrase na sección Presentación Curso 22-23, no ficheiro de comentarios da tarefa Convocatoria Presentación Alumnado. O documento ten este aspecto:

Para entrar na Aula Virtual o teu usuario será o teu nome e apelidos en minúscula sen espazos e o teu contrasinal a túa data de nacemento sen barras separadoras.

Exemplo: A alumna Ánxela Veiga da Costa nada o 5 de abril de 2008 terá:

usuario: anxelaveigadacosta

contrasinal: 05042008

Como medida de seguridade, terás que cambiar o contrasinal a primeira vez que entres.

Por outra parte, os libros de texto de 1º e 3º da ESO entregaranse ao mesmo alumnado durante a presentación que, polo tanto, deberá vir con mochila.

Presentacións e Comezo das Clases

Comezamos o curso 22/23 cunha nova normativa que establece un adianto dunha semana no período lectivo. No noso centro educativo as presentacións terán lugar nas aulas de referencia de cada grupo e seguirán o seguinte horario:

As reunións coas nais e pais do alumnado de 1º da ESO terán lugar no Salón de Actos o 8 de setembro co seguinte horario:

  • 1º ESO A e B ás 17h.
  • 1º ESO C e D ás 18h.

O mércores 7 de setembro especificaranse as aulas de referencia e o grupo ao que pertence cada alumno e alumna a través desta mesma páxina web. 

O luns 12 de setembro comezarán as clases con normalidade co horario achegado nas presentacións.

 

Avaliación Plan Proxecta: actividades no xardín (alumnado)

 

Juan, Rayca, Ezequiel e Eva comentan as actividades que se realizaron no xardín dentro do programa Proxecta de Paisaxe e Sustentabilidade.

Dirixidos por Nati González.

Distribuir contido


by Dr. Radut