IES Escolas Proval

Conovócase o IV Certame de Micropoesía Beatriz da Serra, organizado polos equipos de Dinamización da Lingua Galega dos centros do Val Miñor: IES Escolas Proval, IES Plurilingüe Terra de Turon, CEIP Carlos Casares, CEIP Plurilingüe Chano Piñeiro, CPI Plurilingüe Arquitecto Palacios, IES Primeiro de Marzo e IES Val Miñor, en colaboración cos concellos de Gondomar, Nigrán e Baiona

Poderá participar todo o alumnado dos centros educativos do Val Miñor nas seguintes categorías: 

• a -Alumnado de 4º, 5º e 6º de primaria
• b -Alumnado de 1º, 2º, 3º de ESO e de FP básica 
• c -Alumnado de 4º de ESO, 1º, 2º de bacharelato e ciclos formativos.

Os poemas presentados deberán ser orixinais e inéditos, de temática libre, e estarán escritos en lingua galega. Terán unha extensión mínima de 3 versos e máxima de 8. Cada participante presentará catro poemas que se enviarán ao correo:poesiaminhora@gmail.com antes do 17 de maio de 2023. O envío incluirá dous documentos escritos en Arial 12, en formato PDF. Nun irán os poemas presentados, que deberán conter título ou lema. Noutro, figurarán o título da obra presentada e os datos persoais da autora ou autor (nome, apelidos, idade, curso, centro de estudos, teléfono de contacto e enderezo postal).

• 1º premio: dotado con dúas antoloxías poéticas das voces máis novas, certificación acreditativa, unha peza cerámica conmemorativa de Antón Román e mais dez exemplares do libro do certame.
• 2º premio: dotado con dúas antoloxías poéticas das voces máis novas, certificación acreditativa e mais dez exemplares do libro do certame

Os premios serán entregados nun acto poético organizado polos centros e concellos convocantes, e os poemas premiados serán publicados nas webs dos centros convocantes e enviados aos medios dixitais do Val Miñor. Tamén se fará unha publicación impresa, que servirá para lembrar a Beatriz da Serra e para a difusión dos traballos premiados.

Máis información na ligazón.

Como cada 23 de febreiro, festexamos, e gozamos, do Día de Rosalía, con múltiples actos de homenaxe, tanto dentro como fóra do centro. O departamento de galego, así como os equipos de Dinamización da Lingua Galega ou da Biblioteca traballaron arreo para visibilizar a súa figura e a súa obra por todos os recunchos do centro, involucrando a toda a comunidade educativa na lembranza e recoñecemento da nosa poeta máis universal. Murais, recitados, charlas, obradoiros de manualidades desenvolvéronse ao longo de toda a semana de celebración do aniversario de Rosalía de Castro.

E este ano, ademais, recuperamos un evento ben fermoso de homenaxe poético-musical, en colaboración co IES Val Miñor, celebrado o pasado 3 de marzo no Auditorio de Nigrán, no que participaron, alén do alumnado de ambos os centros, as corais Ecos do Castelo de Parada e Novos Aires de Nigrán e o Teatro do Ar. Grazas a Pilar, a Marisa e ao concello de Nigrán. Para o ano repetiremos!

O 2 de febreiro é o verdadeiro día do amor: a Candeloria   Escribíronme unha carta nas alas dun paxariño, quen che me dera saber quen me ten tanto cariño.

Na cultura popular galega a tradición simboliza neste día a festa do amor e do apareamento de todo o reino animal, terminan as xaneiras dos gatos e disque os paxariños casan. Tradicionalmente, os mozos, neste día, deixaban  unha notiña de amor na porta da súa namorada e as mozas bordaban un paniño con coplas que lle ofrecían ao seu amor. Esta tradición consérvase no norte de Portugal nos “lenços dos namorados”.  Non te quixen nin te quero  nin teño tal intención,  que outros paxariños voan  dentro do meu corazón.   Na Candeloria tamén se lle dá a benvida á primavera: Día da Candeloria, inverno fóra. Se chove ou venta, aínda entra. Que a Candeloria chore, que deixe de chorar, metade do inverno está por pasar.

• Desde o Equipo de Dinamización da Lingua Galega e o departamento de Galego recuperamos tradicións ben lindas,  coma a Candeloria, e seguimos gozando delas, creando coplas de amor e celebrando a alegría da primavera que se achega.Non te esquezas de meter a túa copla na caixa que estará no primeiro andar desde o 2 deica o 10 de febreiro. Escribe cantas mensaxes de amor queiras, en catro versos seguindo o modelo das nosas coplas populares. Xa sabedes que podedes acompañalas de debuxos, como nos lenços. Animádevos a depositar as vosas mensaxes -indicando pola parte de atrás o voso nome e curso- na caixa do amor situada no primeiro andar antes do 10 de febreiro!

• Haberá premios de 15, 10 e 5€ en cada categoría: a) 1º/2º/3º ESO (PMAR+PDC) e 1º FPB e b) 4º ESO, 2º FPB, BAC, ESA, ciclos.

• Cantidade e calidade este ano foi a colleita de coplas de amor que recibimos polo Día da Candeloria. Velaquí a listaxe de alumnado premiado:

Na categoría A outorgáronse dous 1º PREMIOS para ENOLA FERNÁNDEZ PENELA e ADRIANA GRANDAL ALONSO; dous 2º PREMIOS para PABLO RODRÍGUEZ ALAMEDA e RHAYLLA PEREIRA SILVA; e sete 3º PREMIOS para MARCO CONDE FRANCISCO, SIMÓN PORTO COVELO, LARA CARNEIRO CONDE, JAVIER RODRÍGUEZ SÁNCHEZ, BRAIS RODRÍGUEZ FIGUEROA, LARA LONGRES COMESAÑA e JULIA SENRA FERNÁNDEZ. Na categoría B dúas foron as gañadoras: 1º PREMIO para ISIS ACEA e 2º PREMIO para CARLA SALGUEIRO DIEGO. 

Parabéns pola vosa creatividade e grazas a todo o alumnado participante na nosa tradicional voda dos paxariños! Agardámovos o febreiro que vén!

CONCURSO DE RELATOS CONTRA A VIOLENCIA DE XÉNERO

"Doulle voz ás silenciadas"

Alumnado e relatos premiados (premede nas ligazóns para lerdes os textos):

Sara Pina, de Ezequiel de Saa Pérez e Abraham Iglesias Cabral (1º premio)
Claudia, de Rhaylla Cristine Pereira Silva (2º premio)

Imane Saadoui, de Edna García Pereira (3º premio)

Parabéns ao alumnado gañador e a todo o alumnado participante neste concurso, que ten como fin visibilizar as vítimas da violencia de xénero 

e concienciar a toda a comunidade educativa sobre esta lacra.

 CONCURSO DE RELATO ORAL. 

 Contos de medo: “Do Samaín ao san Martiño andan as almas polo camiño”

Xa coñecemos o alumnado gañador!!!

• CATEGORÍA A: alumnado 1º/2º ESO e PMAR

    1º PREMIO (vale cafetería 20€) para Yago Vives Rubio (1º ESO B)

CATEGORÍA B: alumnado 3º/4º ESO, FPBÁSICA e PDC

    2º PREMIO (vale cafetería 15€) para Rita Álvarez Araújo e Isis Acea.

Parabéns polos vosos relatos e agradecemento a todas e a todos os participantes un ano máis de parte da organización!!

Equipo de Dinamización da Lingua Galega, departamento de Galego, Equipo de Dinamización da Biblioteca.

DÍA DE CASTELAO. CONCURSO DE ILUSTRACIÓN E BANDA DESEÑADA

O 30 de xaneiro é o aniversario do nacemento de Castelao. Para lembrar o escritor e debuxante convocamos un concurso de ilustración e banda deseñada inspirándonos en catro dos seus relatos.

CATEGORÍAS: 

• A) 1º/2º/3º ESO-FPB1
• B) 4º ESO-FPB2-BAC-CICLOS e ESA

MODALIDADES:

• Banda Deseñada. Elaboración dun cómic inspirado nos relatos de Castelao: "Peito de Lobo" ou "O Rifante"
• Ilustración. Debuxo para ilustrar os relatos de Castelao: “O ichaviño" e "Dous vellos que tamén tiveron mocedade".

PREMIOS: Haberá tres premios por cada categoría.

BANDA DESEÑADA

• 1º premio: 50 €
• 2º premio: 20 €
• 3º premio: 10 € 

ILUSTRACIÓN

• 1º premio: 20 €
• 2º premio: 10 €
• 3º premio: 5 € 

PRAZOS E ENTREGA DOS TRABALLOS

Os traballos entregaranse ás profesoras de lingua galega ou plástica. Tamén poden enviarse ao seguinte enderezo de correo electrónico: equipoedlproval@gmail.com

A data límite de entrega é o 3 de febreiro.

• Nos deseños pódese empregar calquera técnica segundo as preferencias do autor ou autora.
• Os textos deberán estar en lingua galega.
• Os premios entregaranse en vales para librarías ou para a cafetaría do instituto.

CONCURSO DE RELATOS CONTRA A VIOLENCIA DE XÉNERO “DOULLE VOZ ÁS SILENCIADAS”

Trinta e sete mulleres foron asasinadas no que vai de ano polas súas parellas ou exparellas. As noticias ás veces dinnos o seu nome, ás veces non; pasan a ser un número máis, unha vítima sen rostro, sen vida. Nos nosos relatos imos honrar estas mulleres, facéndoas visibles, lembrando que tiñan persoas queridas, ilusións, desexos, preocupacións, familia..., lembrando que tiñan rostro e que estaban vivas.

Para crear o noso relato, lemos o texto coas breves noticias sobre os asasinatos de todas esas mulleres e escollemos unha delas para sermos a súa voz. Destacamos o seu nome, ou se non aparece, poñémoslle nós un nome, que será o título do relato. Logo contamos quen era, que lle gustaba, que facía, a quen amaba. Imaxinamos a súa historia, imaxinámola viva. E falamos por ela, en primeira persoa  ou acompañándoa como unha voz amiga.

O relato terá un mínimo de 200 palabras e un máximo de 300. Presentarase nun documento de texto (word, pdf, odt...) e enviarase ao correo equipoedlproval@gmail.com Data límite de envío: 30 de novembro.

O concurso está dirixido a todo o alumnado e divídese en dúas categorías: A: 1º, 2º e 3º de ESO e 1º FPB /  B: 4º de ESO, 2º FPB, bacharelato, ESA  e ciclos.

Haberá tres premios por cada categoría: 1º premio: 15€ /2º premio: 10€ /3º premio: 5€ Os premios entregaranse en vales para consumir na cafetaría do instituto.

Organiza: Departamento de galego, Equipo de Dinamización da Lingua Galega e Equipo de Igualdade