Listaxes de material escolar para os cursos de E. infantil e E. Primaria

Estimadas familias,

Agardámosvos nas reunións coas familias que terán lugar o luns 9 e martes 10 de setembro no salón de actos onde coñeceredes ás titorías, equipo docente e información sobre o centro.

O Departamento de Lingua e Literatura Galegas e Portugués do CPI de Cova Terreña congratúlase da nova anunciada pola Consellería de Educación. Nesta infórmase sobre a acreditación da lingua portuguesa en ESO e Bacharelato. 

Daquela, o noso alumnado de Portugués, unha vez chegado a 4º curso de ESO, poderá certificar os niveis A1, A2 e B1 nunhas probas que poderán levarse a cabo no propio centro, dirixidas polo Instituto Camões.

Máis información en: https://www.edu.xunta.gal/portal/node/43653

Como remate do curso, todo o alumnado da ESO e moitos cursos de Primaria acudiron á praia da Barbeira a disfrutar dunha mañá apacible e soleada. Todo o grupo desprazóuse a pé desde o centro escolar ata a praia.

Na procura da inclusión de todos os participantes ofreceuse un amplo abano de xogos.

Montouse unha carpa para reparto de froita entre todos os escolares.

Estas foron as actividades propostas:

Actividades tranquilas: cartas e petanca.

Actividades dinámicas na area: rugby tag, kinball, voleibol, brilé, ultimate, fútbol, béisbol, palas...

Actividades na auga: iniciaciación á vela, pádel surf e nado libre baixo vixiancia.

O propio alumnado, baixo a supervisión do profesorado, encargouse da organización e xestión dos xogos. Eles mesmos decidían o grao de participación, o tipo de actividade e o tempo de xogo.

A participación foi masiva. O alumnado estivo realizando actividade física durante toda a mañá. O número de conflitos durante os xogos foi practicamente nulo.

Esta actividade forma parte do PVAD (Proxecto de vida activa e deportiva), Inclúe-T, Iguála-T, Convíve-T, Emocióna-T

Para rematar o curso 2023-24, como xa vén sendo tradición, o alumnado de Ed. Secundaria participou o último día nunha xornada de convivencia na praia da Barbeira. O alumnado de 6º Ed. Primaria, que a partir de setembro compartirá etapa, tamén se sumou a esta actividade, así como o 1º Ciclo de Ed. Primaria, que non quixo desaproveitar a ocasión de desfrutar da praia.

Establecéronse diferentes zonas de xogos (volei, petanca, fútbol, etc.). O Monte Real Club de Yates de Baiona cedeunos o uso de táboas de paddle surf e fixo varias quendas de navegación a vela para amosar este deporte á rapazada.

Para recuperar enerxías nesta xornada, o alumnado recibiu unha merenda doada pola familia Barros.

O CEIP de Belesar agasallou o 20 de xuño ao alumnado de Ed. Infantil e Primaria cun pase da súa obra "Camiñando pola Prehistoria", representada pola rapazada de 5º e 6º Ed. Primaria.

En agradecemento, fixémoslle entrega dun presente en forma de árbore.

O Faro da Escola, proxecto multidisciplinar no que traballou boa parte da comunidade educativa, foi repartido o 18 de xuño. Ao mesmo tempo, a directora do centro, Isabel Martínez, e a coordinadora do programa, Antía Monteagudo, acudiron á sede do periódico para recoller os premios que lle foron outorgados ao centro: 1º premio de artigo de opinión, 2º premio de portada e 3º premio ao mellor xornal. Ademais, tamén se recibiu o segundo premio especial CSIC e o segundo premio especial Xerais. 

A ANPA organizou o 19 de xuño un Aquapark por todo o alto no patio do centro para todo o alumnado de Ed. Primaria e Secundaria, que fixo as delicias de grandes e pequenos.

A festa rematou cun baño de escuma para todos.

O centro contou este ano cun grupo de mediadores e mediadoras no que se integraron 14 alumnos e alumnas de Ed. Primaria e 7 de Ed. Secundaria. Tras unha formación inicial realizada ao longo de dúas tardes, estiveron en disposición de colaborar na resolución dos conflitos que foron xurdindo ao longo do curso entre os seus compañeiros e compañeiras.

Esta actividade non só repercutiu na mellora da convivencia, senón que tamén contribuiu a un crecemento persoal dos propios mediadores. Para agradecer as súas actuacións, fíxoselle entrega a todos eles dunha chapa que recoñece o seu labor e tamén se lle fixo un recoñecemento público.

Este proxecto, contou coa coordinación de catro docentes mediadores: Marta Arbones, Sonia Silva, Jose Rivera e Luis Fernández.

O Coro Infantil do centro, integrado por 68 alumnos e alumnas de 1º a 6º de Ed. Primaria, estreará o martes 19 de xuño, ás 19h, o seu musical de fin de curso no Auditorio V Centenario de Baiona. No mesmo, interpretarán 9 cancións do Universo Disney.

https://valminortv.com/2024/06/17/concierto-del-coro-infantil-del-cpi-de-cova-terrena/

O xoves 16 de maio celebramos un acto cultural e musical en honor a Luisa Villalta, homenaxeada polo Día das Letras Galegas 2024.

Vémonos ás 20h no auditorio V Centenario de Baiona.

Convite

Con motivo do Día do Libro, que se celebra como cada ano o 23 de abril, o noso centro celebrou a terceira lectura compartida do curso. Padriños e madriñas foron os encargados de seleccionar unha lectura para os seus afillados e afilladas. 

O alumnado de 1º de ESO e de 3º de ESO de Cultura Clásica visitan o campamento romano de Aquis Querquennis e mais o Parque Natural do Xurés

Na mañá da segunda feira do 22 de abril de 2024 os grupos de 1º de ESO e mais de 3º de ESO que reciben formación en Cultura Clásica se desprazaron ao Centro de Interpretación de Aquis Querquennis, no concello de Bande, acompañados polos docentes Iria, Nieves e Anxo.

Despois do visionado dun vídeo e da visita ao centro expositivo, o grupo desprazouse cara aos restos das instalacións militares, onde parte do alumnado de 1º de ESO, xunto co de Cultura Clásica, descubriron a historia deste magnífico campamento onde se aloxou unha das cohortes da lexión Gemina que se instalara en Legio (León).

Posteriormente, o grupo desprazouse cara á desembocadura do río Caldo, no concello de Lobios, para xantar e gozar da piscina e pozas termais.

Á tarde levouse a cabo a visita aos miliarios que se foran atopando na vía XVIII ou Vía Nova, que unía as localidades de Arturica Augusta (Astorga) con Bracara Augusta (Braga). Ademais, o grupo aproveitou para visitar os restos da mansio de Aquis Originis, unha antiga pousada romana que daba servizo aos comerciantes que percorrían a devandita vía.

No derradeiro punto da xornada, unha parte do alumnado explicou as características do hábitat do Parque Natural do Xurés (Parque Nacional de Peneda-Gerês en Portugal).

O centro celebra a súa IV Semana da Ciencia, na que o alumnado expón as tarefas e investigacións realizadas ao longo do curso, dende o luns 22 ata o martes 30 de abril.

Para comprobar o aprendido poden realizar o cuestionario en liña e tamén un adaptado para o alumnado de menor idade en soporte papel.

Haberá visitas guiadas á exposición e tamén xornada de portas abertas para familias e amizades o luns  29 de abril, en horario de tarde, de 16h a 18h.

Cómpre recordar que as materias pendentes que non se superen iranse sumando ás do curso ordinario suspensas a efectos de promoción de curso e de titulación en 4º de ESO.

As titorías entregarán o boletín de pendentes ao alumnado o venres 26 de abril, ás 11:00h, nas súas aulas de referencia.

Ata o 10 de maio está aberto o prazo para solicitar as bolsas do Ministerio para cursar estudos nas ensinanzas de Bacharelato ou Ciclos formativos. Consultar o seguinte enlace:

Enlace á solicitude: https://www.educacionfpydeportes.gob.es/servicios-al-ciudadano/catalogo/general/05/050130/ficha/050130-2024.html

No seguinte enlace aparece máis información sobre este tipo de bolsas: https://www.becaseducacion.gob.es/becas-y-ayudas/fp-bachillerato-otros/tipos-de-becas.html