"I eres a estrela que brila, i eres o vento que zoa. Si cantan, es ti que cantas..." Rosalía de Castro
Complementarias
CRÓNICA DO GALIÑEIRO: a misteriosa desaparición do galo Manuel (6 - 10 - 2022).
Enviado por Noelia o Xov, 06/10/2022 - 21:50Nesta semana vivíronse no noso cole momentos asombrosos! Dende a explosión dun ovo fétido ata a desaparición da parella da nosa galiña Rosalía. Comecemos dende o principio:
A PASADA FIN DE SEMANA chegou a primeira pita habitante do noso galiñeiro, ela é Rosalía, unha pitiña negra que chegou de noite da man de Montse, Diego e Amable (nai, irmán e avoa de Álex) tapadiña nunha caixa e acompañada dos dous ovos que estaba rematando de incubar.
Rosalía estaba destinada a ser a nai adoptiva dos ovos que tiñamos na incubadora. Lastimosamente, os ovos non foron adiante así que depositamos as nosas esperanzas neses outros dous que Rosalía traía consigo.
O LUNS fomos correndo a ver a Rosalía e comprobar se naceran pero o ansiado momento non acababa de chegar.
O MARTES apareceu o galo Manuel, pequeniño pero impetuoso e, dado que os ovos de Rosalía non naceran decidimos abrilos. Aquí é onde se produciu a EXPLOSIÓN INESPERADA que colleu de sorpresa aos alí presentes deixando un aroma indescriptible nos arredores do horto.
Coa idea de que a natureza seguira o seu curso e nos regalara os tan ansiados pitiños, decidimos aumentar as posibilidades traendo ao cole dúas galiñas máis. Hoxe XOVES, Yolanda (nai de Theo), trouxo dúas pitiñas novas que fomos levar a primeira hora ao galiñeiro.
Foi nese momento cando nos decatamos do sorprendente suceso: O GALO MANUEL NON ESTABA NO GALIÑEIRO! Deixamos ás dúas pitiñas dentro e rapidamente iniciamos unha procura que resultou infructuosa.
Precisabamos axuda de todo o cole así que o alumnado de Infantil percorreu todas as aulas informando da desaparición e emprazando a todos e a todas a unha procura exhaustiva na hora do recreo.
Todo o mundo participou e, grazas ás dotes detectivescas do noso alumnado, puidemos atopar as pistas en forma de plumas negras e varios buratos por onde poida que Manuel se fugase.
Seguiremos investigando e informaremos de calquera avance nas nosas pesquisas.
Esta é unha FOTO DE ARQUIVO do noso galo. Rogamos a quen o vexa que avise axiña ao colexio. Grazas pola vosa colaboración.
COLLEITA DO MILLO (4 - 10 - 2022).
Enviado por Noelia o Xov, 06/10/2022 - 21:12O alumnado de 3º e 4º de Primaria coa axuda do profe Félix realizou a colleita do millo do horto escolar e gardaron todos os tomates para que vaian madurando no interior.
Os habitantes do noso galiñeiro darán boa conta desta nosa produción!
VISITA AO ECOMUSEO ARXERIZ (22 - 06 - 2022).
Enviado por Noelia o Mér, 22/06/2022 - 23:40E para rematar o curso, subvencionada pola A.N.P.A., o alumnado do centro realizou unha excursión ao Pazo de Arxeriz no Concello de O Saviñao.
Da man de Sonia, a nosa guía, fomos percorrendo as diferentes estancias, observando todo o que alí había exposto e aprendendo moito do noso pasado e das nosas tradicións. Despois da visita, puidemos merendar nos fermosos xardíns, correr, xogar e camiñar ata o castro que se atopa nas mesmas terras do pazo.
Para rematar a excursión fomos comer á praia fluvial da Cova aínda que a climatoloxía non nos permitiu bañarnos.
Un fantástico día para compartir con todos e todas e despedir este curso que hoxe remata!
Ata setembro rapazas e rapaces!
Feliz verán!!
A OLERÍA TRADICIONAL DE GUNDIVÓS NO NOSO COLE. (21 - 06 - 2022).
Enviado por Noelia o Mér, 22/06/2022 - 22:46Elías, un dos oleiros que conserva este tradicional oficio en Gundivós, visitou o noso centro para levar a cabo un obradoiro de alfarería con todo o alumnado.
A ANPA do colexio agasallounos con esta actividade onde nenos e nenas puideron coñecer de primeira man todo o proceso para converter o barro nun obxecto útil á vez que fermoso.
Moitas grazas Elías por facernos partícipes da túa arte e por regalarnos ese fantástico libro para a nosa biblioteca escolar!
OBRADOIRO DE GRAFITI CO ALUMNADO DE 3º, 4º, 5º E 6º DE PRIMARIA. (16 - 06 - 2022).
Enviado por Noelia o Xov, 16/06/2022 - 20:10Aínda que os ovos que puxemos na incubadora decidiron non nacer, nós non deixaremos de intentalo para o curso que vén.
Mentres tanto seguimos a preparar o espazo para as nosas futuras pitas.
Hoxe, organizado pola A.N.P.A., o alumnado máis grande do centro asistiu a un obradoiro de "grafiti" a cargo de Rubén de "Trecetrazos" no que decoraron a parede do noso galiñeiro.
Quedouvos de marabilla!!
OBRADOIRO DE PINTURA CO ALUMNADO DE INFANTIL, PRIMEIRO E SEGUNDO DE PRIMARIA. (16 - 06 - 2022).
Enviado por Noelia o Xov, 16/06/2022 - 20:02As nenas e os nenos de 3 a 8 anos do noso cole, asistiron a un obradoiro de pintura a cargo de Ana e Alba, onde traballaron coas cores primarias e realizaron diferentes deseños con mesturas de cores e formas.
Moitas grazas a A.N.P.A. por agasallarnos con esta actividade!
COLLEITA DE CHÍCHAROS NO HORTO ESCOLAR (9 - 6 - 2022).
Enviado por Noelia o Xov, 09/06/2022 - 22:06O alumnado de Infantil, primeiro e segundo de Primaria foi ao horto a recoller os chícharos.
En primeiro lugar houbo que sacar todas as plantas, despois escollemos as vaíñas e por último bullamos a colleita para levarlle á nosa cociñeira Silvia.
Estamos desexando probalos!
"TOUPICIENCIA SHOW" NA BIBLIOTECA ESCOLAR. (3 - 6 - 2022).
Enviado por Noelia o Ven, 03/06/2022 - 21:41Mañá de Ciencia na nosa biblioteca por xentileza do Consorcio Editorial Galego!
As nenas e os nenos de Infantil, 1º e 2º de Primaria asistiron hoxe ao espectáculo "Toupiciencia Show" na biblioteca escolar.
A toupiña científica xunto con Petronio, o seu axudante, achegaron a Ciencia aos nosos nenos e nenas dun xeito moi divertido.
Pasámolo de marabilla cos seus experimentos!
Moitas grazas por agasallarnos con esta actividade!
A GARDA CIVIL VISITA O NOSO COLE. (2 - 6 - 2022).
Enviado por Noelia o Xov, 02/06/2022 - 22:46O alumnado de 5º e 6º de Primaria recibiu unha charla sobre o acoso escolar, enmarcada dentro do "Plan Director para a Convivencia e a Mellora da Seguridade nos centros educativos e a súa Contorna" " que, nas zonas rurais, desenvolve a Garda Civil.
Na aula de Infantil tiveron a visita de David (o pai de Anxo e David) quen veu co seu compañeiro a explicarnos en que consiste o seu traballo. Responderon a todas as súas preguntas e foron da man dos máis pequeniños coñecer a horta e o galiñeiro.
Tamén viñeron axentes do SEPRONA e todas as nenas e nenos do colexio puideron baixar a ver os diferentes vehículos oficiais que nos amosaron así como o seu equipamento.
Moitas grazas por vir vernos e ensinarnos tantas cousas!
AS EXCURSIÓNS RELACIONADAS CO PROXECTO "A NOSA HORTA".
Enviado por Noelia o Ven, 27/05/2022 - 21:28O 23 de novembro, levamos o millo da nosa colleita ao muíño. Recibiunos Luisa, atendeunos de marabilla e, mentres acababa de moer, fomos visitar o fermoso lugar de Ribas Pequenas.
E poucos días despois recibiunos Manolo no Mazo de Penacoba. Unha visita onde puidemos aprender a forma tradicional de traballar o ferro para poder ter as ferramentas necesarias nunha sociedade agrícola e gandeira como segue a ser a nosa.
- « primeira
- ‹ anterior
- 1
- 2
- 3
- 4
- 5
- 6
- 7
- seguinte ›
- última »