Este ano adicouselle o Día das Letras Galegas a escritora e música, Luísa Villalta (1957-2004) e, dende o noso cole, fixemos diversas actividades para conmemorar este día.

O xoves día 16 acudimos ao Centro Sociocultural do noso Concello a realizar un obradoiro de ilustración creativa sobre a homenaxeada a cargo de Sheila García Prado.

Primeiro tocoulle a quenda ao alumnado de Infantil e 1º e 2º de primaria quen realizaou estas verdadeiras obras de arte!

A continuación, o alumnado de 3º a 6º de primaria elaborou un libriño sobre a vida e obra da autora. Guiados en todo momento por Sheila.

Ese mesmo día, na hora de lectura, realizamos un contacontos sobre a vida de Luísa Villalta. Neste caso o encargado de contarlles a historia aos seus compeñirxs foron os alumnxs de 3º e 4º que lle leron o libro Sempre Infinita de Eva Mejuto e Bea Gregores da Editorial Miudiñas.

Como traballo previo para coñecer con maior detalle a vida da autora, nas aulas visualizamos o vídeo que realizou o alumnado do colexio San Pío X de Ourense sobre Luísa Villalta.

No "Taboleiro das conmemoracións" o alumnado de 3º e 4º foi o encargado de colgar o seu mural conmemorativo. Mirade que ben lles quedou!

Ademais, de todo isto, como produto final de todas as actividades, na materia de Art realizamos un mural colaborativo, no que cada un de nós pintou unha das pezas que compañen o retrato da escritora.

O alumnado de infantil estampou empregando diversas técnicas palabras que definen a Luísa. Quedou precioso!!!

O mes de maio foi un mes de dúas despedidas moi importantes para nós. A primeira delas, foi a de Noa, alumna de prácticas da carreira de Educación Infantil, que estivo no noso cole dende principios de febreiro colaborando coa mestra Noelia.

Aproveitamos un momentiño antes do xantar para darlle un detalle de recordo e agradacerlle a súa labor con aplausos e abrazos!

A segunda despedida do mes foi a de Parveen, a nosa auxiliar de conversa, que axuda as "teachers" nas materias de Lingua Inglesa e Art. Parveen regresa ao seu país á India, logo de estar con nós dende o pasado mes de outubro. Tamén, lle fixemos unha despedida na biblioteca e lle regalamos un libriño cheo de debuxos realizados por nós.

A súa última sesión de Art, impartiuna ela, e elaborou unha manualidade sobre a canción Pete the cat, que tanto lle gusta ao noso alumnado.

Esperamos que todos os vosos desexos se fagan realidade! Xa sabedes que este sempre será o voso cole!

 Estamos encantadxs e súper emocionadxs atendendo aos seis poliños que naceron estes días. Están vivindo nunha caixa de madeira que Julián (o papá de Liza) construiu para que poidan estar quentiños nas primeiras semanas de vida. Moitísimas grazas Julián!! A caixa ten instalada unha lámpada incandescente que lles proporciona calor e luz.

Neste proceso tivemos un importante contratempo: un corte de luz que deixou sen funcinar a incubadora unha noite. Pero, grazas ao ovoscopio, puidemos seleccionar aos ovos vivos, retiramos os que se estropearan e decidimos incluír dous ovos máis.

Despois de 22 días, o 15 de maio comezaron a nacer e asistimos, emocionadxs, á eclosión de catro ovos.

Na incubadora quedaron unha semana máis os ovos que puxemos máis tarde e, porfin, o pasado martes, tamén naceron estes outros dous poliños!!!

Agora os nosos seis poliños están sendo coidados e atendidos polo alumnado que continuará con esta labor ata o mes de xuño.

Os poliños precisan un fogar agora que remata o curso e, por isto, iniciamos a campaña: "ADOPTA UN POLIÑO".

Todas aquelas familias que desexen participar no proceso de adopción poden mandar ao cole o formulario que se mandou ás casas cuberto. Rapartiremos os poliños entre as familias adoptivas e, se hai moitas solicitudes, realizaremos un sorteo público para determinar a que casas van os poliños.

Foi unha experiencia incrible! Estamos aprendendo moitas cousas novas!

Desde o martes 21 DE MAIO ata o venres 21 DE XUÑO está aberto o prazo para a participación no fondo solidario de libros de texto e a solicitude de axudas para adquirir libros de texto e material escolar destinadas ao alumnado de Educación Primaria e ESO para o próximo curso 2024/2025. 

QUE LEXISLACIÓN REXE O PROCEDEMENTO?

   - Orde do 7 de maio de 2024.

QUEN SON OS BENEFICIARIOS?

Aquelas familias con alumnado matriculado en centros docentes da Comunidade Autónoma Galicia sostidos con fondos públicos nas modalidades de gratuidade solidaria que se relacionan a continuación:

• Fondo solidario de libros de texto do alumnado matriculado en 3º, 4º, 5º e 6º de Educación Primaria (EP). O alumnado matriculado no noso centro en 5º e 6º de EP que participa no proxecto educación dixital (E-DIXGAL) no curso 2024/2025 está excluído da participación no fondo solidario de libros de texto e das axudas para adquirir libros de texto. Non obstante, terá dereito á axuda para adquirir material escolar, así como as establecidas nas disposicións adicionais primeira e segunda, se reunen os requisitos establecidos na ORDE do 7 de maio de 2024.

• Axudas para adquirir libros de texto destinados ao alumnado de 1º e 2º de EP, e en Educación Especial (EE), así como axudas que pode recibir o alumnado incluído nas disposicións adicionais primeira e segunda da orde do 7 de maio de 2024.

• Axudas para adquirir material escolar: alumnado matriculado en Educación Primaria e ESO.

COMO PRESENTAR A SOLICITUDE?

As solicitudes poderán ser presentadas dos seguintes xeitos antes do 21 de xuño, día no que remata o prazo:

• Electrónica: a través da sede electrónica da Xunta de Galicia, accedendo ao procedemento ED330B, que enlazará coa aplicación Fondolibros. Unha vez gardada, poderá gardala e obter o número de solicitude.

IMPORTANTE: na presentación electrónica deberá presentar unha solicitude individual par cada un dos seus fillxs.

NECESITARÁ ter: conta de Chave365 ou ter instalado certificado dixital ou DNI electrónico e máis a aplicación Autofirma.

• Presencialmente no centro de xeito manual: cubra os Anexos I e II da Orde da convocatoria e presénteos no centro educativo, acompañada da copia do libro de familia e resto de documentación.
  

QUE DOCUMENTACIÓN DEBO PRESENTAR?

1. Participación no fondo solidario de libros de texto e axudas para adquirir libros de texto e material escolar ED330B (Anexo I).

 2. Comprobación de datos dos membros computables da unidade familiar (Anexo II).

 3. Copia do libro de familia ou documento equivalente, onde figure o/a alumno/a e os demais membros computables da unidade familiar. Soamente, en caso de cambio na unidade familiar.

 4. En caso de separación ou divorcio, ademais, deberán aportar a sentenza xudicial e/ou convenio regulador onde conste a atribución da custodia do/da menor.

NOTA: O alumnado de 6º de Primaria que pase de curso deberá facer a solicitude ou ben no Instituto ou ben no noso centro educativo. Encargarémonos de trasladar dita solicitude ao IES Daviña Rey (instituto adscrito).

RESUMO DO FONDE E DAS AXUDAS

O pasado mes xs profes do centro estivemos a realizar unha formación sobre Polos Creativos, espacios educativos innovadores cun deseño modular e innovador, dotados de equipación especializada, que ocupan espacios físicos definidos nos centros educativos.    

Solicitamos ao noso centro de recursos de refrencia uns lapis 3D de préstamos, que estiveron no noso centro uns días. Este dispositivo permite crear figuras en tres dimensións. 

Aquí vos deixamos algunhas fotografías das actividades realizadas. Elaboramos pequenas figuriñas en diversas cores e marcapáxinas.       

Como xa sabedes, este curso queremos seguir colaborando coa iniciativa da ONG "Hospitaleros sin fronteras" na recollida de fondos solidarios para axudar á escolarización e mellora das condicións de vida dxs nenxs talibé do Senegal.

Neste caso, realizamos un obradoiro de xabón natural que ofrecemos a toda a comunidade educativa a cambio dun donativo.

Logo de deixar secar o xabón, o alumnado de 3º e 4º foi o encargado de cortalo en pequenos trozos de igual tamaño.

O alumnado de 1º e 2º de primaria realizou as etiquetas informativas para poñer nos xabóns.

Por outra banda, o alumnado de 5º e 6º de primaria axudou ao de Infantil a empaquetar o xabón empregando os xornais que chegan ao centro a diario, reutilizando deste modo estes materiais.

Na materia de Proxecto Competencial de 5º e 6º e axudados polas ideas proporcionadas polo alumnado de 1º e 2º de primaria, elaboraron empregando Canva, aplicación online de deseño gráfico, o tríptico informtivo que vos presentamos a continuación. 

Todo o excedente de xabón que non consigamos vender irá destinado ao mercadiño solidario que a ONG organiza o día 1 de xuño en Sarria co fin de obter máis fondos para esta iniciativa tan necesaria. 

XABÓN SOLIDARIO CON "X" DE XUNTOS PODEMOS CONSEGUILO!!

Coa chegada do bo tempo é necesario planificar o proceso de sementado dos cultivos do horto escolar.

Por dita razón, no tempo de lecer de despois do xantar, aquel alumnado que se ofreceu voluntario para participar en dita iniciativa reúnese periodicamente no xa coñecido por todxs como Comité agrogandeiro. Nesta sesión, estivéronse a decicir cales serán os cultivos a poñer no horto e a súa distribución.

Andrea, ao ser a maior do alumnado presente, fixo de secretaría e cubriu a acta correspondente aos acordos establecidos.

Así, quedou a distribución ideada dos cultivos.

Dende este organismo, queremos agradecer tamén a colaboración das familias que se prestaron voluntarias para poñer o noso horto ao día!

Aproveitando que na área de Ciencias da Natureza de 1º e 2º de primaria estamos a coñecer o reino vexetal, baixamos a zona verde do noso patio a recoller os amorodos das nosas plantas.

O máis interesante foi observar unha planta de amorodo. Estivemos a repasar as súas partes (raíces, talo, follas, flores e froito).

Na materia de Ciencias Sociais de 2º de primaria acabamos de rematar unha das unidades máis interesantes para nós: O Sistema Solar.

Para afianzar e interiorizar aínda mellor os contidos realizamos dúas actividades de avaliación e repaso final. A primeira delas, foi a creación da nosa propia maqueta do Sistema Solar.

E, por último, realizamos unha avaliación do aprendido a través da plataforma de aprendizaxe online Kahoot, que permite a creación por parte do profesorado de cuestionarios de opción múltiple sobre contidos vistos na aula. Encantounos repasar todo o aprendido con Kahoot, empregamos as tabletas e os ordenadores da biblio. Deste modo, tamén melloramos a nosa competencia dixital!