Educación física

O martes, 3 de decembro, tivo lugar a xornada de toma de contacto coa actividade deportiva de Campo a través. Foron arredor de 1.200 os/as corredores/as de clubs e centros educativos da nosa contorna.

Afortunadamente, a xornada de competicións da categoría benxamín á cadete (feminina e masculina) transcorreu sen incidencias.

Do noso centro participaron 73 corredores/as, aínda que nun primeiro momento había algúns/has máis inscritos/as, pero por diversas razón non puideron participar nesta ocasión.

En canto aos resultados acadados, dicir que houbo dous equipos que quedaron campións, outro que quedou terceiro, logo un cuarto e tamén dous sextos postos... Polo que, non estiveron nada mal, pois non debemos esquecer que competimos con clubs soados na especialidade e con outros centros educativos, que coma nós lle poñen moitas ganas e ilusión.

Queremos agradecer o apoio de familiares e amizades de diferentes nenos e nenas, que acodiron ao Estadio Julio Mato "Matito" en San Lázaro (Noia) para darnos o seu apoio.

Parabéns para os cinco nenos e a nena que acadaron metais e para o resto polo seu esforzo, aínda que non lograsen o desexado meta !!!.

Os nenos e nenas de E Infantil percorreron boa parte do paseo fluvial do río Tines, camiñando na compaña das súas mestras o venres, 11 de outubro. Durante a mañá, ademais de realizar exercicio físico, foron recoñecendo a contorna e recollendo distintos elementos da Natureza coma: follas, landras, garabullos, castañas,..., típicos do outono. A finalidade dos elementos recollidos era a elaboración de diversos cadros, que logo exporían nas paredes exteriores das súas aulas para adornar os corredores da súa zona e, que ao mesmo tempo, o resto do centro puidésemos apreciar os marabillosos resultados.

O xoves, 3 de outubro, a iso das 10:15h o alumnado de 5º de EP, as súas titoras e a mestra de EF subiron a un autobús, nas inmediacións do centro educativo, para dirixirse ao Estaleiro Hermanos Abeijón no Freixo. Unha vez alí, visitaron as instalacións e observaron como distintos operarios realizaban diversas tarefas. Nesta ocasión, un grupo traballaba en tarefas de reparación e posta ao día de dous barcos (un arrastreiro de pesca e un bateeiro) e o outro grupo afanábase no desmantelamento dunha terceira embarcación.Respecto ao material de refugallo, que ían obtendo ao desfacer dita embarcación, aprenderon que iría parar a unha pranta de reciclaxe. Por certo, máis dun dos visitantes, sorprendéronse ao comprobar como o bateeiro, que estaban desguazando, levaba cemento na parte baixa coma contrapeso para proporcionarlle a estabilidade precisa ao porlle enriba a carga de mexilóns.

Coma noutras ocasións, unha das persoas responsables de sacar adiante o estaleiro, Fátima, fixo de guía. Ela estivo pendente, en todo momento, de explicar as tarefas que alí se levan a cabo e de responder a cantas preguntas foron xurdindo.

Logo, nenos/as e mestras dirixíronse á lonxa e, tras preguntar se podían visitala, fixeron tres grupos e entraron, por quendas para vela e comprobar o seu funcionamento. Xa dentro, viron como os afamados berberechos da Ría de Muros e Noia, que enchían os capachos dos mariscadores e mariscadoras, así coma as ameixas, aínda que en menor medida, pasaban ás cintas clasificadoras nas que separaban os bivalvos, segundo a talla. Como cabía esperar, algúns nenos/as atopáronse con familiares e/ou veciños aos que saudaron con entusiasmo.

Máis tarde, tomaron dirección Broña. Foron a pé dende o porto do Freixo, percorrendo tamén o paseo marítimo e ao chegar subiron ao autobús, que os/as estaba agardando para retornar ao centro.

Queremos darlle as grazas aos donos do estaleiro en xeral e a Fátima, en concreto, pola súa paciencia, a amabilidade coa que sempre nos trata e polo tempo que nos adica e tamén aos/ás traballadores/as da lonxa por permitir a visita.    

O venres, 3 de maio, o alumnado e parte do profesorado de 5º e 6º niveis de E.Primaria foron os/as anfitrións/oas na xornada de convivencia e xogos populares cos rapaces/zas e mestres/as dos C.E.I.P Alexandre Rodríguez Cadarso e Felipe de Castro de Noia e do C.P.I Cernadas de Castro de Lousame.

Este ano incorporouse unha pequena andaina, desde o centro á zona do parque do Areal (ida e volta) polas marxes do Tines. Dita actividade tivo moi boa acollida entre o alumnado e profesorado participante.

No centro leváronse a cabo seis xornadas de toma de contacto coa técnica de R.C.P (reanimación cardiopulmonar), desde mediados do primeiro trimestre a mediados do segundo.

As xornadas teórico-prácticas impartiunas, Álex Liñayo (bombeiro e membro de Protección civli), de forma altruista. Deste xeito, os/as nenos e nenas de 4º a 6º niveis de E.Primaria recibiron unha serie de nocións teóricas, que foron combinando coa práctica da xa mencionada técnica de R.C.P. As sesións tiveron lugar no cuarto de audiovisuais en horas de E.F, por ser desta área de onde partiu a idea e ser coa que máis relación ten dita temática.

Hai que dicir que o alumnado manifestou interese no tema e participou de forma activa en cada unha das sesións.

Moitas grazas, Álex, por adicarnos parte do teu tempo de lecer e compartir con nós algúns dos teus coñecementos.