Escolares, Ed. Infantil, 1º Curso, 2º Curso, 3º Curso, 4º Curso, 5º Curso, 6º Curso, Idioma estranxeiro, Ed. Física, Ed. Musical

PROXECTO CIENCIAS SOCIAIS E CIENCIAS DA NATUREZA

Queredes ver como resultou o proxecto de Ciencias Sociais e Ciencias da Natureza do 2º trimestre?

Podemos dicirvos que estamos moi contentos/as porque aos nenos/as lles encantou e ademais de aprenderen moitísimo o pasaron fenomenal!

Comezamos á volta das vacacións de Nadal apadriñando un pingüín na Antártida, un xesto simbólico pero que lles fixo entender que todos os seres vivos de calquera punto do noso planeta dependen do bo comportamento de todos e cada un de nós. Por iso investigamos sobre o 3 Rs: Reciclar, reducir e reutilizar.

Logo pasamos a investigar sobre o Big-bang e a orixe do universo, o sistema solar e as constelacións. Esta parte quedou moi ben reforzada coa visita do planetario ao noso centro.

Centrámonos despois no noso planeta e aprendemos sobre as súas partes: atmosfera, hidrosfera e xeosfera.

Achegámonos á investigación científica con experimentos sobre a auga, o aire, materiais como o azucre...e aprendemos sobre aparatos e instrumentos como o reloxo de sol, a rosa dos ventos, a estación metereolóxica, a solarigrafía e a cámara estenopeica.

Como podedes ver foi unha vez máis unha aprendizaxe globalizada xa que as linguas estiveron presentes traballando as biografías de astronautas, inventando planetas e as súas características, lendo sobre as historias das constelacións, escribindo definicións cun pasapalabra...

A expresión oral tamén a traballamos elaborando vídeos onde os alumno/as explicaban os movementos da Terra, as fases da Lúa...

En matemáticas calculamos o noso peso nos diferentes planetas, medidas de capacidade, volume, masa...

En informática tivemos que investigar e redactar.

En música aprendemos moitas cancións e coa plástica puidemos construír todo o que vedes nas imaxes.

Aprendemos moito uns dos outros e pasámolo xenial xogando coas actividades expostas nos corredores de cada nivel.

Que nos traerá o 3º trimestre...?

Seremos EXPLORADORES DE VIDA!

DÍA INTERNACIONAL DA SAÚDE

Esta semana celebramos no cole o Día internacional da Saúde (7 de abril)

Como xa sabedes, este curso temos como eixe común os "Hábitos Saudables", así que lles propuxemos aos neno/as que se converteran en chefs e se prepararan unha merenda saudable a base de froita.

Tamén falamos destes alimentos e das vitaminas e minerais que nos aportan en contra doutros produtos que só aportan calorías ocas e graxas saturadas. Queremos conciencialos e que saiban distinguir entre alimento e produto.

Houbo moita creatividade, moito colorido e gozaron dun bo festín!

Esta actividade estivo organizada polo equipo de Convivencia e Imaxe.

8M - DÍA DA MULLER 2022

Hoxe é o día internacional da MULLER

Data na que se celebran os logros acadados na loita pola igualdade. Bo día para todas!

ENTROIDO 2022

BO MARTES DE ENTROIDO!

Así vivimos nós a semana de Entroido: obedecemos as ordes do Meco extraterrestre, pintamos 2 murais xigantes con motivos do universo e para finalizar, o venres co noso disfrace fixemos o desfile e a chocolatada!

FESTA RACHADA!

Esta actividade estivo organizada polo equipo de actividades complementarias e extraescolares.

DÍA DE ROSALÍA - CALDO DE GLORIA

O pasado 23 de febreiro, Día de Rosalía, os nenos e nenas que quedan no comedor puideron comer o CALDO DE GLORIA.

Marga, a encargada do comedor do cole, e Dimitri, o noso cociñeiro, amósannos como se fai este caldo tradicional.

Estaba boísimo!

DÍA DE ROSALÍA 2022

No noso cole temos uns verdadeiros artistas!

Mirade que traballos máis bonitos fixeron con distintas técnicas sobre o rostro da nosa escritora máis universal...

Tamén aprendemos moito sobre a súa vida e obra como podedes ver.

Esta actividade estivo organizada polo equipo de Biblioteca.

APADRIÑAMENTO DE PINGÜÍNS

Escolares

Apadriñamento de pingüíns na XXXV Campaña Antártica

DÍA INTERNACIONAL DA MULLER E A NENA NA CIENCIA

Así investigamos no cole ás mulleres científicas no Día internacional da muller e a nena na ciencia.

DÍA DA PAZ E DA NON VIOLENCIA 2022

Festexamos o venres 28 este día tan especial elaborando un colgante que decoramos e no que escribimos frases a prol da Paz e dos Hábitos Saudables que será o tema central das actividades deste curso. Tamén bailamos e cantamos coa voz e co LSE a canción "De festa" todos á vez, nenos e nenas, mestres e mestras, antes de ir ao recreo. No recreo puxemos música variada sobre a Paz. Aínda que as actividades comúns tiveron que ser anuladas por precaución debido á situación Covid, traballamos durante a semana cos titores na aula este tema de varias maneiras!!!

Porque non queremos guerras nin violencia!

E como di a canción: "berramos coma toliños" que QUEREMOS A PAZ!

Esta actividade estivo organizada polo equipo de Convivencia e Imaxe.

PREMIO BOAS PRÁCTICAS DE EDUCACIÓN INCLUSIVA

Bo día! Onte domingo, no Faro de Vigo, falaron do noso premio en boas prácticas de inclusión.

https://www.farodevigo.es/comarcas/2022/01/30/patio-colegio-caras-tristes

Tamén nos chegaron nestes días un Diploma de Solidariedade da man de Global Humanitaria e Mariola Solidaria, pola recollida de roupa do pasado mes de novembro e outro Diploma en recoñecemento ao noso destacado traballo en prol do recordo e divulgación da vida e obra de Xela Arias na Semana das Letras Galegas 2021, da man da Real Academia Galega a través da súa iniciativa "Primavera das Letras".