Coñecendo a contorna do noso cole: do Areal de Santo Estevo á Fonte de Touro, os muíños do río de Baíña.

A ANPA do CEIP Fontes, organiza a segunda saída guiada polo ex alumno Anxo Rodríguez Lemos (estudante de Historia na Universidade de Santiago de Compostela) polos muíños do río de Baíña o sábado 28 de marzo. Se o tempo o permite, quedaremos ás 17.00 h na praia de Santa Marta.

Partiremos da praia de Santa Marta (antigamente denominada Areal de Santo Estevo) desde onde coñeceremos os diferentes usos da auga. Visitaremos o Lavadouro do río da Maré e o da Ponte do Burgo, e mergullarémonos no mundo dos muíños. Ademais de poder ver o exterior dos muíños que se conservan, veremos tamén os restos xa case arqueolóxicos dalgúns deles e, o máis importante, veremos en funcionamento o único muíño que moe en toda a parroquia de Baíña: o muíño de Agrelo, máis coñecido na actualidade como muíño de Nita e Nicanor.

Os nenos e nenas coñecerán como funciona un muíño, destinado sobre todo á moenda de cereais, desde que a auga do río se deriva á canle coñecida como levada, ata que chega ao edificio do muíño e fai mover as penas do reducio.

Os nenos e nenas deberán ir acompañados/as dun pai/nai/titor ou responsable.

Todo o alumnado, as familias e o profesorado están convidados!

Para máis información: 625 53 93 62