O Consello da Xunta deu hoxe o visto e prace a un acordo de bases de colaboración entre o Ministerio de Educación, Cultura e Deportes e a Consellería de Cultura, Educación e Ordenación Universitaria para dotar de auxiliares de conversa a centros educativos públicos e escolas oficiais de idiomas de Galicia. O alcance do acordo mantense nos mesmos termos ca no ano pasado e a el sumaranse arredor de outros 50 auxiliares, que se incorporarán ao sistema de ensino galego, ben contratados pola Consellería, ben a través da colaboración interinstitucional co Instituto Cofuncio, co Instituto Camões e coa Académie de Amiens.

En virtude do acordo aprobado hoxe polo Consello, o departamento dirixido por Román Rodríguez achegará máis de 2,1 millóns de euros para financiar a dotación dun total de 370 auxiliares de conversa de 15 nacionalidades, o que demostra a aposta decidida e o respaldo do Goberno galego ao ensino plurilingüe.

O Ministerio ocuparase de seleccionar os profesionais e enviar a relación detallada antes do inicio do curso escolar, mentres que a Consellería será a encargada de adxudicalos aos diferentes centros plurilingües, con seccións bilingües ou escolas oficiais de idiomas. Ademais, tamén organizará unha xornada de acollida dirixida a todos os auxiliares participantes.

Dentro dos 370 que se seleccionarán, 345 prestarán o seu servizo en lingua inglesa, 14 en francés, 7 en alemán, 2 en portugués e outros 2 en chinés. Todos eles realizarán funcións de apoio á docencia da lingua estranxeira no centro de destino e estarán supervisados por unha persoa profesora titora-coordinadora.

De outubro a maio

A axuda outorgada pola Consellería, que se estenderá ao longo de oito meses –isto é, dende o 1 de outubro deste ano ao 31 de maio de 2016 salvo casuísticas atribuídas ao propio auxiliar-, será de 700 euros mensuais. A maiores, o departamento educativo da Xunta tamén se fará cargo da cobertura sanitaria daquelas persoas que non dispoñan da correspondente tarxeta europea.

Crecemento do ensino plurilingüe

Este acordo de colaboración co Ministerio enmárcase dentro do Plan Galego de Potenciación das Linguas Estranxeiras, que aposta pola introdución dun ensino plurilingüe nos centros educativos da Comunidade. Así as cousas, nestes últimos anos medraron dun xeito exponencial os centros que combinan galego, castelán e unha lingua estranxeira ata chegar cada unha a un terzo do horario lectivo, así como aqueles con seccións bilingües.

De feito, e segundo a resolución provisional publicada este mesmo mes no DOG, para o próximo curso 2015/2016 incorporaranse 36 novos centros á Rede de Plurilingües, o que sumará un total de 256. En canto ás seccións bilingües, estas aumentarán en 317, acadando así as 3.540 en toda Galicia. Ademais, o curso que vén, o ensino plurilingüe tamén se estenderá á etapa de Bacharelato.

Transmisores da realidade cultural do seu país

Neste contexto, a Consellería considera a figura do auxiliar de conversa un elemento clave para acercar a realidade cultural e lingüística do seu país de orixe ao alumnado galego. Deste xeito, estas persoas levan a cabo un importante servizo complementario, ao apoiaren o labor do profesorado, facilitando as prácticas de conversa en linguas estranxeiras.

Ademais, representan un auténtico vehículo de achegamento á cultura dos países onde se fala a lingua obxecto de estudo, polo que contribúen a reforzar o labor docente na compoñente de multiculturalidade, eixo sobre o que pivotan os currículos dos centros implicados no Plan de Potenciación das Linguas Estranxeiras.

O conselleiro de Cultura, Educación e Ordenación Universitaria, Román Rodríguez, visitou esta mañá, no complexo educativo de Os Peares, ós alumnos e alumnas que están participando no programa de estadías de inmersión lingüística en lingua inglesa promovidos polo Goberno galego e que se enmarcan dentro do Plan de Potenciación das Linguas Estranxeiras.

Un total de 63 rapaces e rapazas de 1º e 2º de Bacharelato de toda Galicia -atendidos por 15 profesores nativos e monitores- están participando desde o pasado domingo nestes campamentos, nos que as actividades educativas para mellorar as competencias en lingua inglesa se completan con outras de carácter lúdico para poñer en práctica o uso deste idioma en situacións reais. Trátase, por tanto, de que o alumnado poida desenvolver a súa comunicación en inglés nun contorno real, estimulando a práctica do idioma e a súa utilización en contextos comunicativos máis amplos que os que permite o ámbito escolar.

Na visita ao centro, o conselleiro de Cultura e Educación estivo acompañado do delegado xeral en Galicia do Grupo Gas Natural Fenosa, Manuel Fernández Pellicer; do director xeral de Educación, Manuel Corredoira; o delegado territorial da Xunta en Ourense, Rogelio Martínez; e das xefas territoriais da Consellería en Lugo e Ourense, Maria Carmen Gueimunde e Mercedes Gallego, respectivamente.

Preto de 700 prazas para este verán

A estadía nos Peares súmase ás que tamén se desenvolven nos Centros Residenciais Docentes da Coruña e de Vigo, neste caso para alumnos de 1º, 2º, 3º e 4º de ESO.

Por tanto, en total convocáronse para este verán 682 prazas, das cales 590 son para estudantes de secundaria en réxime residencial en Galicia, mediante estadías de dúas semanas con profesorado nativo. As 92 restantes van dirixidas a alumnos e alumnas de Bacharelato, para mellorar as súas competencias en inglés, con estadías dunha semana en réxime residencial.

A estas prazas hai que sumar arredor doutras 300 máis convocadas para estadías que, como cada ano, se levarán a cabo en outono, entre os meses de novembro e decembro.

Contacto idiomático

O obxectivo desta iniciativa, enmarcada no Plan de Potenciación das Linguas Estranxeiras, non é só que o alumnado unha lingua estranxeira, senón que este o poñan en práctica durante todo o día nas diversas actividades previstas entre as que se inclúen obradoiros de teatro, actividades deportivas, excursións ou veladas nocturnas. Todo isto permitirá darlle unha formación lingüística, social, cultural e ambiental ao alumnado.