Dinamización lingüística

Sicixia

Mar, 20/12/2016 - 14:53 — admin2

O alumnado de 4º de ESO e 1º de BAC asistiu no Cine-Teatro de Ribadeo á proxección de Sicixia, un documental ficcionado sobre a Costa da Morte, dirixido por Ignacio Vilar. A actividade organizouna o Departamento de Lingua Galega en colaboración co Concello de Ribadeo, que sufragou o 50% do prezo da entrada.

Un grupo de alumnas diante do cartel de Sicixia

A última viaxe do afiador

Dom, 18/12/2016 - 12:39 — admin2

O alumnado de 3º de ESO asistiu á proxección de "A última viaxe do afiador", organizada polo Concello de Ribadeo. A actividade complementouse cunha exposición de rodas de afiar, un elemento descoñecido para boa parte do alumnado, e cun coloquio no que estivo presente Aitor Rei, dirección do documental.

Conferencia inaugural: Xavier Rodríguez Baixeras

Lun, 19/09/2016 - 06:50 — admin2

O poeta Xavier Rodríguez Baixeras pronunciou o venres, día 16, a conferencia inaugural do curso 2016-17. O tema foi "Algúns aspectos da poesía de Luz Pozo".

O acto estivo aberto ó público en xeral e, ademais do alumnado e profesorado do centro, asistiron veciños e amigos do conferenciante.

[PREME NA IMAXE PARA ACCEDER Ó VÍDEO]

FOTOS: Pablo Villapol

A palabra perdida

Mar, 21/06/2016 - 05:11 — admin2

O martes, 21 de xuño, tivo lugar o acto de entrega dos premios correspondentes ó concurso A palabra perdida. Durante varias semanas, os equipos foron investigando a partir de pistas, ata dar coa solución, que este ano era "Manuel María". As alumnas gañadoras foron Cristina Pérez, Inés Canto, Ana Rico e Clara García.

Coordinou a actividade a profesora Susana Díaz Orol, do departamento de Lingua galega e literatura.

Parabéns ás vencedoras!

Viaxe cultural a Santiago

Lun, 20/06/2016 - 13:25 — admin2

O día 17 de xuño, o alumnado de 2º da ESO viaxou a Santiago para realizar unha visita ó Museo do Pobo Galego e a outros lugares de interese. O grupo estivo acompañado por Isabel López, Mª José Álvarez, Mª Carmen Rañón e Suso Fernández. Organizou a actividade o Equipo de Dinamización Lingüística.

[MÁIS IMAXES]

Manuel María noutros idiomas

Xov, 02/06/2016 - 11:57 — admin2

Nas últimas semanas fomos escribindo nun lugar ben visible do centro uns versos de Manuel María traducidos ós idiomas dos distintos lugares de procedencia do noso alumnado. Rematado o proceso, elaboramos un VÍDEO que se pode ver premendo na imaxe.

Día das Letras Galegas: Manuel María traducido

Ven, 13/05/2016 - 19:47 — admin

Durante esta semana e a que vén, nunha parede ben visible iremos escribindo unha estrofa de Manuel María traucida ós idiomas dos lugares de procedencia do noso alumnado. Unha homenaxe a Manuel María e á multiculturalidade que promovemos. [VÍDEO] [MÁIS IMAXES]

Día das Letras Galegas: ilustrando a Manuel María

Ven, 13/05/2016 - 07:35 — admin

O alumnado de 1º e 2º da ESO ilustrou textos de Manuel María. Coordinaron a actividade as profesoras Isabel López e Mª José Álvarez Amor.

Día das Letras Galegas: láminas

Ven, 13/05/2016 - 06:50 — admin

Durante esta semana e a que vén, mantemos expostas nunha das escaleiras do noso centro as láminas sobre Manuel María que nos enviou a SXPL.

Ó longo da semana, o alumnado vai pasando a revisalas para responder un cuestionario relacionado co autor.

Día das Letras Galegas: exposición sobre Manuel María

Ven, 13/05/2016 - 06:45 — admin

O mércores, o alumnado da ESO visitou unha exposición sobre Manuel María na EOI de Ribadeo para a cal cedemos os fondos relacionados co autor que temos na nosa biblioteca.