Filosofía

(15/5/20) Algunhas cousas cambiaron esta semana, pero o noso ritmo segue imperturbable desde o 16 de marzo. A través da AULA VIRTUAL, do correo electrónico (o mínimo posible para non saturar bandexas), da web,.... mantivemos a rutina de traballo, facendo e deixando facer. Fumos punto de encontro cando eramos poucos (únicos incluso), e agora que hai algúns máis seguimos tendo o noso lugar e cumprindo os propósitos para as nosas materias, fundamentalmente para 2º BACH, facilitando e traballando con todos os/as que queredes (e podedes manter este esforzo). Cada materia segundo o seu peso, e a HISTORIA DA FILOSOFÍA o ten. En FILOSOFÍA de 1º BACH houbo actividades para facer e agora temos un encontro semanal para actualizar e contrastar a información. O resto de traballos complementarios e incluso extraescolares seguiu sendo elaborado polo grupo de alumnado que estaba apuntado. Para o alumnado da ESO foi máis doado xa que a nosa presenza no curriculo é de só 1 hora semanal, polo cal as actividades que xa se comezaran en EDIXGAL déuselles continuidade, e ao alumnado de 3º ESO propúxolle un traballo de investigacións que aínda están elaborando (esperemos).

Ademais esta fin de semana celebramos tamén o DÍA DAS LETRAS GALEGAS.... lugares haberá nos que vos falen delo, pero tamén queremos deixar aquí, como fariamos na clase presencial, unha pegada polo autor homenaxeado, con este fragmento da Evocazón da infáncia perdida:

[...]

Eu, neno, matei a miña infáncia

co coitelo da miña gravidade.

No relógio adiantado da miña vida,

a agulla da miña vontade

asinalaba a hora da colleita

cando ainda non era

a hora da sementeira;

asinalaba a hora do roibo amor

cando era a hora do branco jogar;

e ateigado cedo da ciéncia da dor,

o meu rouxinol

puxo-se a cantar ainda antes de aprender a voar.

Cando era a hora do viver,

foi para min a hora do coidar. [...]

#LetrasGalegas  E seguimos coa Filosofía.... Volvamos aos textos!   #encasacoaFilosofía

Hoxe é un día para o recordo. Un 5 de maio de 1945 o campo de Mauthausen foi liberado polas forzas aliadas. A necesaria referencia a esta data é máis cercana no noso caso porque o curso pasado tivemos unha exposición sobre Francesc Boix, o fotógrafo de Mauthausen, dentro das actividades do proxecto ERASMUS+ que coordinamos entre o curso 2017 e o 2019.

A exposición tivo muito eco social (La Voz de Galicia. ORT,...) e estivo aberta a todo o público ata a primeira semana de xullo, e o alumnado da materia de Europa participante no proxecto fixo de guía cos distintos grupos e cidadáns que se achegaron para coñecela.

A nosa propia experiencia como grupo en Dachau durante a visita de intercambio que fixemos a Alemaña, marcou un antes e un despois nas aprendizaxes escolares sobre a historia da humanidade, e a exposición ao final dese proxecto supuxo unha reflexión en torno á necesidade da Paz e a Tolerancia como camiño para garantir un verdadeiro futuro da sociedade. 

Con esta reflexión queremos actualizar o noso compromiso co cosmopolitismo e a cooperación como instrumento fundamental nas nosas vidas. E contamos para elo con todos e cada un dos e das que protagonizaron estas propostas.

Aquí vos deixamos algúns dos paneis da exposición á que facemos referencia, e que a Asociación para la recuperación de la memoria histórica nos fixo chegar como actividade final do noso proxecto. 

 #encasacoaFilosofía

Martes 21 de abril, 2020

Estamos en vésperas de celebracións de lecturas. Do 23 de abril ao 17 de maio son días de Libro e Letras, e conmemoraremos estas datas con lecturas diversas. Fai uns anos colgabamos nas paredes das escaleiras centrais textos de obras e autores universais que todos debiamos recoñecer...

Nestes tempos que vivimos faise necesaria unha mirada distinta, unha mirada tranquila sobre o noso percorrido como seres humanos, e debemos redescubrir todo o pensamento, a creatividade, a esperanza, o progreso,... que a mente axudou a crear na Natureza que nos rodea. Nestes momentos nos que unha fainos guiños de temporalidade debemos refuxiarnos na outra e agardar novos amenceres.

Desde a nosa materia contribuiremos, non só coas lecturas que xa temos no estudo obrigado dos nosos autores, senón tamén a través dos comezos de grandes obras que permanecen como capítulos pasados e xa lidos da Historia da Humanidade, e nos que debemos atopar leccións xa escritas de como seguir avanzando no noso camiño no Universo.

Estes días nas nosas clases de Historia da Filosofía temos como protagonista a José Ortega y Gasset, un dos nosos filósofos máis señeiros e un dos ensaistas máis recomendables, internacionais e recoñecidos. Fundador da Revista de Occidente. e creador de innumerables textos de obrigada lectura. Entre eles figuran para a proba da ABAU un fragmento de ¿Qué es Filosofía? e outro de El tema de nuestro Tiempo.

#encasacoaFilosofía

Comeza abril (hoxe commemórase o nacemento de Andersen, don Hans Christian, así que leeremos máis contos) e seguimos a diario coas clases de Filosofía. Lembrade que tedes a gravación das clases de cada mañá na AULA VIRTUAL, e podedes ler o chat creado coas vosas aportacións.

Xa revisamos os textos de Kant, mañá revisaremos os textos de Marx, e aínda poderemos revisar os de Nietzsche (que o tedes recente). Mentres nada informen nos seguiremos coa nosa boa rutina e bo facer, e miraremos o último dos filósofos do noso temario, un filósofo español de repercusión universal, e sempre unha lectura agradable, sorprendente e rendable para a nosa formación: José Ortega y Gasset (1883-1955).

Tedes documentos e material gráfico e sonoro do autor na AULA VIRTUAL. Máis adiante comezaremos a repasar todo o temario desde un punto cualitativamente distinto, posto que xa temos a base conceptual para falar e comentar. Ordeade os apuntes, respetade as rutinas, revisade todas as materias,... e mantede o espíritu filosófico, así que.... en garde!

#encasacoaFilosofía

Nova cita para rematar o repaso da filosofía kantiana, e para comezar o repaso da filosofía de Marx...

Xa sabedes, traballo previo, 11:00 horas, AULA VIRTUAL.