2015-2016

Unha vivenda bioclimática con domótica instalada, un coche 100% eléctrico, os diferentes muíños de vento que se construíron ao longo da historia, o interior dun aeroxerador... Todo isto puideron ver os rapaces de 3º e 4º que o martes visitaron o parque eólico experimental de Sotavento.

Ademais, descubriron pequenos xestos que permiten conseguir, de xeito doado, aforro enerxético e de auga no día a día, como eliminar o stand-by e os consumos ocultos nos aparellos eléctricos (hai que desenchufar os cargadores!), usar lámpadas LED ou instalar aireadores nas billas. Foi unha viaxe longa, pero resultou ben proveitosa.

Durante os segundos recreos desta semana, temos á nosa disposición froita na entrada do instituto, dentro do Plan de Consumo de Froita na Escola, con financiamento da U.E.

Podemos escoller unha peza enteira ou pinchos con combinados de varias froitas e tamén botar unha ollada ás composicións artísticas que irán aparecendo. Fixástesvos nas palmeiras que había hoxe?

Duro combate, dialéctico, claro, o que están librando Gabriel, Fran, Mónica e Sol. Polo momento gañaron un dos debates e perderon outro, aínda que con moi boa puntuación, polo que están ben situados na clasificación xeral.

Pola tarde teñen que verse as caras cun dos finalistas da edición pasada, pero seguro que iso non os intimida porque o están a facer cada vez mellor. Moito ánimo e seguide así!