Complementarias

Aprendendo xeoloxía con Fran Canosa

Sáb, 2021-12-18 22:01 — admin

O xoves 16 de decembro o xeólogo e divulgador científico Fran Canosa visitou o noso centro para impartir uns obradoiros de minerais e unha charla sobre tectónica e xeoparques:

- As alumnas e os alumnos de 1º ESO repasaron as propiedades máis chamativas dos minerais que xa estudaron nesta avaliación. Iso si, gozando da colección dos espectaculares exemplares que Fran trouxo ao IES, dos que observaron a cor, a forma, o brillo, a ferromagnetismo, a raia... e, do que máis lles chamou a atención, a fluorescencia.

- Pola súa banda, o alumnado de 1º Bacharelato, ao que finalmente tamén se uniu o de Ciencias da Terra de 2º Bacharelato, asistiu a unha charla sobre aspectos xerais de tectónica e sobre a singularidade xeolóxica dunha das zonas galegas máis fermosas: o xeoparque do Cabo Ortegal.

Quedamos con ganas de xeorruta!

6 adxuntos

Xoves de charlas na FP

Sáb, 2021-12-18 21:03 — admin

O pasado xoves 16 de decembro foi unha xornada intensa no centro, pois nesta data desenvolvéronse, entre outras, as seguintes actividades destinadas ao alumnado de Formación Profesional:

- Para 2º curso de CM e CS das familias de Electricidade e Electrónica e de Administración e Xestión: charla Paradores.

Paradores é unha empresa pública con máis de 90 hoteis repartidos por toda a xeografía española, na que traballan 400 profesionais e cuxa misión é promocionar o turismo do país e protexer o patrimonio histórico e cultural.

D. José Antonio Cerdana, en representación da citada empresa, impartiu unha charla a este alumnado co obxectivo de darlla a coñecer como opción para a súa próxima inserción no mercado laboral.

- Para 1º e 2º curso de CM e 1º curso de CS da familia de Administración e Xestión: charla sobre seguridade informática, impartida por Jacob Fernández, enxeñeiro informático da empresa Repsol.

Neste caso, a conferencia enfocouse na importancia de manter os dispositivos electrónicos (móbiles, PCs, tablets...) seguros. Achegáronse distintas técnicas e recomendacións mínimas que calquera persoa usuaria pode poñer na práctica na súa vida cotiá.

1 adxunto

Saída ao cine e ao museo do alumnado 1º ESO

Mér, 2021-12-01 23:35 — admin

Onte o alumnado de 1º ESO realizou unha saída organizada polo EDLG, en colaboración co departamento de Bioloxía e Xeoloxía.

- Na primeira parte da visita, as rapazas e rapaces visitaron o cinema NUMAX, onde gozaron da película O principiño.

O noso centro participa así por segunda vez no seu programa NUMAX na escola.

- Completouse a saída coa visita guiada no Museo de Historia Natural Luís Iglesias, no que o alumnado percorreu as seccións de xeoloxía, botánica e zooloxía, unha maneira diferente de completar o aprendido sobre minerais e rochas durante este trimestre.

3 adxuntos

Visita do alumnado de 1º FPB ao Concello de Padrón

Xov, 2021-11-25 15:41 — admin

Onte, mércores 24 de novembro, o alumnado do primeiro curso do ciclo de Administrativo do IES Macías o Namorado realizou unha visita de estudos ao Concello de Padrón, onde foron recibidos polo alcalde, Antonio Fernández Angueira, e a concelleira de Xuventude e Voluntariado, Lorena Couso. Unha visita que ten como obxectivo achegar ao alumnado á realidade do mundo laboral, neste caso unha administración local como o Concello de Padrón.

O alumnado puido coñecer así a estrutura do Concello, o funcionamento dos distintos departamentos e servizos municipais así como o operativo dos órganos de Goberno municipal da man do propio alcalde.

Tamén a concelleira de Xuventude e Voluntariado, pola súa parte, amosoulles o programa de voluntariado local, animándoos a participar nel.

Unha visita totalmente enriquecedora para estas rapazas e rapaces!

Somos pandeireteiras!

Xov, 2021-11-18 01:00 — admin

Onte tivemos o privilexio de acoller no noso centro unha proposta diferente para o alumnado de 3º ESO. Realizar este obradoiro foi unha suxestión do EDLG e, co apoio da Vicedirección, foi desenvolvido na tarde de onte no salón de actos. Deste xeito, puidemos formar parte do proxecto SOMOS PANDEIRETEIRAS, dirixido por Ana Fernández, da asociación cultural Rosalía de Castro de Padrón, e Mercedes Peón.

Despois de darlle un contexto teórico á historia das mulleres pandeireteiras, poñendo en valor a música, as tradicións e a transmisión oral galegas, Ana e Mercedes, axudadas por cinco rapazas tamén pandeireteiras, impartiron a parte máis práctica do obradoiro, animando a alumnado e profesorado a crear unha peza musical, que rematamos cantando e bailando.

Agradecemos aos departamentos colaboradores toda a axuda prestada: Música, Bioloxía e Xeoloxía e Lingua Galega.

Transmitimos tamén os nosos parabéns ás organizadoras da actividade (Ana, Mercedes e Natalia) e ás cinco rapazas da asociación cultural, foi unha experiencia sen dúbida para repetir. Apostando polo noso!

1 adxunto

Vista a Noia e ás Minas de San Fins

Ven, 2021-11-12 14:33 — admin

O pasada semana o alumnado de 4º ESO asistiu a unha visita guiada a Noia e ás minas de San FIns, en Lousame.

Organizado polos departamentos de Lingua Gelaga e Bioloxía e Xeoloxía, a rapazada puido coñecer a vila de Noia e a historia da explotación mineira de San Fins. Unha saída moi interesante que complementa a súa formación, pois este alumnado está a ler Febre, de Héctor Carré (novela que recrea a febre do volframio na Galiza dos anos da Segunda Guerra Mundial), e, asemade, estudando os aspectos xeolóxicos do noso planeta.

Se queredes saber máis sobre esta segunda novela de Héctor Carré, premede aquí.

Días de cinema para 2º ESO

Xov, 2021-10-21 19:51 — admin

Hoxe o alumnado de 2º ESO abriu unha nova etapa. Despois dun curso sen actividades, por fin nos centros de ensino podemos comezar a organizar algunhas, devolvendo á comunidade educativa a normalidade que tanto esperabamos.

O departamento de Francés preparou esta saída a Santiago de Compostela, que consistiu no visionado da película de animación Calamity (en francés) no cine Numax, seguido dunha visita ao Museo do Pobo Galego, onde as rapazas e rapaces participaron nun xogo de pistas sobre celebracións e tradicións galegas.

Acompañou e colaborou nesta actividade o departamento de Educación Física.

Visita a Lousame e minas de San Finx

Xov, 2019-10-24 17:26 — anabelen.ignacio

O pasado venres 18 de outubro o alumnado de 4ºESO das materias de Bioloxía e Xeoloxía e Física e Química visitou o complexo medioambiental Serra do Barbanza e as minas de San Finx.

Así puideron coñecer o impacto da problemática dos residuos, e atender á importancia da recollida selectiva dos mesmos e da práctida dos 3R (especialmente de REDUCIR, o primeiro R no que debemos traballar). Tamén reflexionaron sobre un novo R no que cómpre facer cada vez máis fincapé: REPENSAR os nosos hábitos de consumo, estreitamente relacionados cos residuos xerados.

En San Finx os rapaces/as adentráronse no centro de interpretación das minas de estaño e wolframio, onde lles relataron a historia do lugar, con anécdotas da época de máxima explotación destes minerais.

Os amantes da natureza gozaron tamén dos arredores, incluso puideron ver unha especie de musgo bioluminiscente, Schistostega pennata.

Premendo aquí podes ver máis fotos desta visita.