Makinaria        Carlos Negro

No mes de novembro o grupo de lectura de 1º Bac B leu e comentou esta obra poética de Carlos Negro.  En principio os alumnos amosáronse reticentes a facer unha lectura  coral e posta en común dun texto poético, pero ao final a experiencia foi moi positiva.

Fíxeron a lectura en alto entre todos e, como eles dicían,  percibiron perfectamente  a musicalidade e o ritmo de rap do texto. Anxo e Irene decatáronse da estrutura do poemario: presentación, nó e desenlace, como se fose unha pequeña narración do que lles sucede aos rapaces que experimentan coa velocidade e o alcohol nas fins de semana con tráxico final. Víctor destaca a introdución de termos en inglés ao inicio de cada parte do poemario que, aludindo ao cine, música ou videoxogos, achega o texto á rapazada da 16-17 anos.

Sofía e Xoel comentan que este poemario, ademais de emocións, conta unha historia e por iso chamoulles a atención xa que, en xeral, á súa idade a poesía non é un xénero que os atraía moito.  A valoración do libro foi moi positiva.

Club de Lectura “A pé de obra”

A Biblioteca e o Club de Lectura “A pé de obra” do IES Castelao convidan o alumnado do centro a participar nalgún dos grupos de lectura que se van desenvolver este curso. Continuaremos cos grupos de banda deseñada / manga, a novela  histórica e a fantástica, Formaremos novos grupos que propoñan os asistentes.

 Reunirémonos nos recreos para ler e intercambiar impresións sobre as lecturas realizadas.

Todos aqueles que o desexen poderán apuntarse na Biblioteca a partir do  10 de novembro.

 Anímate!!

Morning Star                  Xosé Miranda

Na 2º quincena de febrero o 2º grupo de lectura de 1º de Bacharelato A, B e E leron e falaron da novela Morning Star.

 A obra conta a vida de Lourenzo Tasende, un rapaz duns catorce anos que vive cos seus pais nunha taberna cerca de Pontevedra, aillado case por completo da sociedade, sen saber ler e tendo que atender o negocio familiar. Un día chega á súa casa para quedar Lázaro Rivadulla, antigo amigo de seu pai que lle descobre parte do seu pasado, e dende entón a súa vida cambia por completo; a nai ponse enferma e morre, e tras este suceso o pai retorna a formar parte dunha gavela na que participara na súa xuventude e que toma como centro de operacións a taberna da Disputa…

 Alba, de 1º A, comenta que o libro lle gustou moito porque tiña acción, romance e drama. Brais, tamén de A, destaca a estrutura da novela, que é unha sucesión de aventuras e desventuras contada retrospectivamente. Ángel valora moito que a historia está contada con realismo, feitos reais do pasado próximo (séc. XIX) que nos permite coñecer a vida de Galicia nesa época. Uxía e Rubén, de 2º E, resaltan que o obra nos conta unha historia de superación persoal por parte do protagonista, pois de neno levaba unha vida mísera, era analfabeto, delinque, pero co tempo e a axuda dos avós e Helena aprende a ler, deixa o mundo da delincuencia e chega a ser médico e boa persoa. Paula e Pablo de 1º B coinciden en que outro tema importante da novela é a ambición humana, pois cren que a busca do tesouro, os atracos, a loita polos cartos e o que se pode chegar a facer por eles, avísanos das consecuencias e perigos da ambición excesiva. Finalmente, Laura (1º A) salienta que as aventuras e vivencias do protagonista chegaron a emocionala fondamente

O último traballo do señor Luna                       C. Mallorquí

O segundo grupo de lectura de 3º ESO A leu e comentou en febreiro O último traballo do señor Luna.

Un rapaz superdotado intelectualmente, aínda que demasiado vulnerable no plano afectivo, vaise ver involucrado nun complicado plan de vinganza orquestrado por un poderoso narcotraficante boliviano de cocaína. Polas rúas de Madrid, entrecrúzanse as vidas dun asasino a soldo, dunha emigrante latinoamericana e dun adolescente.

Iago destaca da obra o ben articulada que está a trama. Mantén a intriga, engancha dende o primeiro momento e os personaxes son cribles. Destaca tamén que reflicte a realidade das bandas de narcotraficantes, como son e actúan, e  a dos alumnos superdotados, que é descoñecida para a maioría do alumnado. Lucía e Paula concordan con Iago e pareceulles interesante que a trama toque distintos temas como o mundo da droga, o amor e desamor xuvenil e os superdotados. Sergio di que sentiu a historia dos rapaces moi próxima á xente da súa idade. Moitos sentiranse identificados cos distintos grupos de mozos. Tamén ve como positivo a evolución dos personaxes. Naiara destaca a mestura entre a realidade das mafias e a ficción e di que aprendeu  o que poden sufrir os alumnos superdotados.