Hora zulú Santiago Lopo
O grupo de lectura de 1º de bacharelato A e B leu e comentou no mes de decembro Hora zulú, novela de Santiago Lopo.
Un home aparece ferido e nu ao pé dun acantilado. Ninguén sabe quen é. É ingresado nun psiquiátrico e, a través de informes, correos electrónicos e outros textos, vaise descubrindo pouco a pouco a súa identidade e o que en realidade lle aconteceu.
A obra, que nun principio lles pareceu algo complicada de ler, acabou gustándolles moito aos alumnos pola súa orixinal estrutura, que mantén a intriga ata o final, e pola historia que se conta, relacionada co paso do tempo eo ecoloxismo.
David di que se sentiu atraído polo tratamento filosófico do tempo, o que lle fixo reflexionar sobre el. As historias dos cadernos que viven os seus protagonistas e a detención do tempo á mesma hora mantívoo intrigado ao longo da novela, que di que devorou en dous días.Olaia destaca a orixinalidade da estrutura narrativa, que a implicou máis na lectura, xa que dende o principio hai bastantes incognitas por resolver. Estas vanse aclarando conforme les os correos e cadernos, que dan pistas sobre a identidade do Profesor, coma pezas dun crebacabezas, ata chegarmos ao caderno final no que se aclara todo. A Pablo a novela resultoulle interesante. Cre que, á parte dos elementos sobrenaturais e de ciencia ficción, é unha historia crible cun toque científico. Os distintos tipos de texto que aparecen para contar o que sucede fan que a historia se presente como algo real.