Radiolao
ANPA
Kiko da Silva visita o Club de Lectura
O pasado 11 de novembro celebramos o primeiro encontro do Club de Lectura do alumnado no presente curso 2022-23.
Visitounos Kiko da Silva, autor de banda deseñada, historietista e director de O garaxe hermético, escola profesional de banda deseñada e ilustración.
Na súa charla realizou un repaso de carácter biográfico sobre os seus comezos no mundo da ilustración e as caricaturas, os seus primeiros pasos profesionais e como chegou a idear e fundar a primeira escola profesional de banda deseñada na cidade de Pontevedra.
Finalmente tamén nos falou brevemente da banda deseñada xaponesa, a manga, e mais doutras tradicións dentro deste xénero. Probablemente, a fin de curso, volverá visitarnos para desenvolver toda esta valiosa información de maneira práctica nun obradoiro.
Moitas grazas, Kiko da Silva, pola túa visita.
Club de Lectura "A pé de obra"
O 16 DE XANEIRO DE 2023, ÁS 19:O0 HORAS, CELEBRAREMOS a primeira sesión dO CLUB DE LECTURA COA VISITA De xesús fraga, CON QUEN MANTEREMOS UN DIÁLOGO SOBRE virtudes (E misterios), novela gañadora do premio nacional de narrativa, premio blanco amor de novela e PREMIO DA CRÍTICA GALICIA.
Nota: cO GRUPO XA EXISTENTE SEGUIREMOS EN CONTACTO POR CORREO ELECTRÓNICO E, SE desexades darvos de alta no club, enviade un correo electrónico a bibliotecaramirofonte@gmail.com.
Encontro con Marilar Aleixandre
Inaugurouse o pasado 21 de febreiro un novo club de lectura, que comparte obxectivos do xa existente e integrado por alumnado do noso centro. Trátase dunha versión específica do club "A pé de obra" orientado cara ao profesorado, pais e nais de alumnado, ex-alumnado e persoal non docente.
Para a súa estrea, tras a lectura da novela As malas mulleres, premio Blanco Amor de Novela 2021, gozamos dun coloquio coa súa autora, Marilar Aleixandre: escritora e académica da RAG que exerceu durante 13 anos a docencia no noso centro e que o dirixiu durante varios anos. Neste encontro a autora abordou diversos asuntos como foron a xestación da novela, o perfil que imprimiu a diversos personaxes, o pouso histórico que incorpora e os personaxes reais que aparecen nela ou os diversos elementos que, a través da ficción, se reinvidican nesta proposta narrativa. Finalmente houbo tempo para un vizoso intercambio de opinións entre os membros do club e Marilar Aleixandre, a quen lle agradecemos a súa visita.
Club de Lectura IES Castelao
Bota a andar o Club de Lectura IES Castelao aberto ao persoal docente, persoal non docente, pais e nais do alumnado e alumnado que xa deixou o centro.
O primeiro libro escollido é a novela As malas mulleres, Premio Blanco-Amor de Novela, de Marilar Aleixandre, ex-directora do centro, que terá un encontro cos integrantes do Club para falar do libro o día 14 de febreiro de 2022, ás sete e media do serán, no Paraninfo Xela Arias (antigo Salón de Actos).
Antes, o 31 de xaneiro, á mesma hora, teremos unha reunión preparatoria para manter un coloquio antes da sesión presencial coa autora.
Contamos coa colaboración da libraría Cartabón -Rúa de Urzaiz, 125- que aplicará o máximo do desconto legal para as persoas que queiran adquirilo. Tamén a nosa biblioteca disporá dalgúns exemplares.
As persoas interesadas en formar parte do Club anotádevos mediante o seguinte formulario:
Jules Verne e a vida secreta das mulleres planta
O grupo de lectura de 3º A e B leu na 1ª quincena de maio Jules Verne e a vida secreta das mulleres planta de Ledicia Costas.
O texto, en xeral, gustou ao alumnado. Ana recomenda a súa lectura por ser moi entretido xa que conta sucesos con personaxes reais como Sanjurjo ou Jules Verne e fantásticos como o tema das mulleres planta. Que se desenvolvese a historia en Vigo e nas Illas Cíes tamén lle dá á historia un punto de realismo. Elisa sostén que a historia, ademais, está presentada como unha intriga ou misterio que se vai desenvolvendo ao longo da novela. Tamén hai emoción e sentimentos, di África, como o que sentiu ela co reencontro de Azucena coa súa filla.
A visita do inspector
A visita do inspector
O outro grupo de lectura de 1º Bacharelato A e B leron e comentaron a peza de J. B. Priestley A visita do inspector.
O suicidio de Eva pon en marcha a acción. Co transcorrer da obra, descóbrese que todos os integrantes da familia e o noivo de Sheila tiveron algunha relación con esa moza, que ía cambiando o nome.
A trama da obra mantívoos, sosteñen, enganchados de principio a fin, por como transcorre a historia. polo papel de xuíz, do falso inspector e a tensión que xera dende que aparece. Ainhoa di que tal e como está estruturada, o autor provoca que desexes coñecer os testemuños dos personaxes e destaca as diferentes maneiras de reaccionar dos mesmos ante o suicidio de Eva.
A súa estrutura circular era algo inesperado. A intriga que se mantén ao longo da obra fai que a nosa mente constrúa un final que en nada se parece ao que elabora o autor, impactante e inesperado.
A obra constitúe unha crítica á sociedade inglesa da época e, di Olaia, fainos ver que os nosos actos sempre teñen consecuencias.
Erros e tánatos
O grupo de lectura de 1º Bacharelato A e B leu no mes de abril o libro de relatos de Gonzalo Navaza Erros e tánatos.
Ao alumnado xa lles chamou a atención o tan suxerente e enigmático título. Na mitoloxía grega, Eros era o deus do amor e Tánatos o da morte. Xuntos e contrapostos conforman os dous instintos básicos do ser humano. Neste libro o autor xoga cos termos Eros e Erros, algo que lle pareceu moi orixinal a Irene, e que responde ao feito de que na maioría dos relatos hai erros que levan a tánatos.
A Xoel, Ainhoa e Bárbara gustoulles o xiro dramático, ás veces, pero sempre sorprendente que teñen os relatos ao final. Tamén ese humor e ironía que presentan, e que desdramatizan as historias, é algo a destacar e que fai o libro moi atraente.
Hugo cre que todos os relatos conseguen manter ao lector pendente dos acontecementos, especulando sobre o que poida ser o seguinte acto das personaxes e imaxinando posibles desenlaces, aínda que á fin e ao cabo a retranca que vén anunciada xa dende o título do libro acaba impoñéndose. Destaca, ademais, que o feito de que sexa unha obra narrativa estruturada en relatos fai que poidamos interpretalos coma partículas separadas entre si pero con elementos comúns, o que contribúe tamén a que a lectura sexa máis interesada.
Non te amola!
Non te amola!, de Xela Arias.
O grupo de lectura de 2º ESO E leu ao longo desta semana coa súa profesora Mónica Soto a obra de Xela Arias Non te amola!
O libro encantoulles e algúns deles expresan a súa opinión a través de cartas á propia autora. Velaquí algunhas:
Esta si que che é desgraza
“Esta si que che é desgraza” Fina Casalderrey
O grupo de lectura de 3º ESO B leu na clase durante a semana do 6 ao 9 de abril a peza de teatro “Esta si que che é desgraza” da obra Recursos teatrais para a expresión dramática na escola, de Fina Casalderrey. Esta peza é unha teatralización libre da Cousa de Castelao “Se eu fose autor teatral”.
Fixemos a lectura teatralizada e os alumnos compararon e comentaron a versión lida.
Nesta descríbese unha situación en dúas accións paralelas: a morte dun animal e a reacción que provoca nas familias de distinta clase. Semellan accións iguais con reaccións similares mais non o son.
Iago cre que o autor explica moi ben o drama que viven os personaxes dos dous lances trala morte dunha vaca, no primeiro caso, e dunha cadela, no segundo. Ainara di que cada grupo sofre pola morte do seu animal pero que é máis grave a da vaca para os labregos, que lles dá o sustento, que a da cadeliña para os de clase social alta, que a teñen como un “xoguete”, aínda que lle teñan cariño.
Xaime ve que o autor consegue describir perfectamente as dúas clases sociais a través deses animais e da súa morte, e que o que é moi importante para unha, a vaca, para a outra non o é e rin dela, e viceversa, os labregos rin da morte da cadela que a eles non lles daría de comer. Cre que todos os protagonistas coinciden nos sentimentos que lles produce a morte de cadanseu animal.
- « primeira
- ‹ anterior
- 1
- 2
- 3
- 4
- 5
- 6
- 7
- 8
- 9
- …
- seguinte ›
- última »
Xunta de Galicia - Consellería de Educación, 2013 | ||
Buscar
Redes sociais
