O vindeiro martes 25 de outubro ás 20:00 h. terá lugar na aula de usos múltiples do IES de Brión a charla divulgativa "Coñece o  espazo Abalar”, dirixida as familias do alumnado que está cursando 1º ESO e 2º ESO. A charla correrá a cargo de  Fernando Pizarro.
Esta iniciativa, desenvolvida pola Secretaria Xeral de Modernización e Innovación Tecnolóxica e a Consellería de Educación e Ordenación Universitaria da Xunta de Galicia en colaboración co Colexio Profesional de Enxeñaría e Informática de Galicia (CPEIG), ten como obxectivo dar a coñecer ás familias do alumnado dos centros públicos da Rede Abalar, da que este IES forma parte, as funcionalidades do portal espazo Abalar e o seu uso, tanto na comunicación en liña entre o centro e as familias, como na obtención de información sobre a evolución académica do alumnado.

Aprobou o 100% do alumnado de 2º de Bacharelato do IES de Brión que se presentou este mes de setembro á Proba de Acceso á Universidade.

Parabéns.

Día 16 de setembro ás 12:00 h. presentación de 1º ESO e 2º ESO.

Día 19 de setembro ás 11:00 h. presentación de 3º ESO, 4º ESO e Bacharelato.

Día 20 de setembro ás 08:25 h. comezo das clases en horario ordinario (de luns a venres de 08:25 a 14:05 e os martes pola tarde de 16:15 a 17:55).

A USC recoñeceu os froitos do traballo da alumna deste centro Mónica Garrido Lavandeira outorgándolle o premio á excelencia académica, logo de realizar con inmellorables resultados a Proba de Acceso á Universidade.

Aprobou o 100% do alumnado de 2º de Bacharelato do IES de Brión que se presentou este mes de xuño á Proba de Acceso á Universidade.

Parabéns ao alumnado, e parabéns tamén a todos os que confiamos en poder seguir adiante cun proxecto educativo de calidade no concello de Brión.

O alumnado do CEIP de Pedrouzos está visitando estes días a exposición sobre os bosques no IES de Brión.

Esta exposición recolle traballos do alumnado de primaria, secundaria obrigatoria e bacharelato.

O alumnado implicado na construción do invernadoiro xeodésico exposto explicou ao alumnado de primaria diferentes cuestións relativas ao traballo e mesmo dirixiu unha serie de actividades deseñadas para a ocasión.

O alumnado do CEIP voltará de novo ao IES para seguir traballando coa exposición e para coñecer a nosa plantación de árbores autóctonas.

O martes 12 celebrouse no IES de Brión unha mesa redonda sobre os bosques. O alumnado e demais público asistente puido disfrutar das magníficas intervencións dos relatores, así como dun pequeno coloquio posterior.

Queremos agradecer unha vez máis aos ponentes, e por suposto ao público, ter participado neste encontro no que, a través de tres sendas diferentes, fumos quen de achegarnos un pouco máis aos nosos bosques.

Escoita as intervencións:

Adolfo Cordero

Eduardo Rico

Constantino Canosa

Preguntas

Recordamos que este acto tivo lugar dentro das xornadas anuais, desta volta adicadas aos bosques, que se veñen desenvolvendo no IES esta semana. No mesmo contexto presentamos xunto ao CEIP de Pedrouzos unha exposición de traballos realizados en aula ao redor dos bosques.

Dentro das xornadas están tamén enmarcadas diferentes actividades, como unha visita a Finsa (alumnado de 2º PDC e Tecnoloxía Industrial I), sendeirismo polas Fragas do Eume (alumnado de 3º ESO), ou unha charla sobre as mamoas de Rañalonga a cargo do profesor Federico Silva.

Os departamentos de Tecnoloxía e Debuxo veñen de presentar o traballo realizado polo alumnado de Tecnoloxía Industrial I e Debuxo Técnico I: o deseño e construción dun prototipo de invernadoiro baseado nunha estructura de cúpula xeodésica. Este é o seu segundo proxecto de colaboración interdepartamental logo de que o ano pasado o alumnado destas materias resolvese o deseño e construcción dunha cociña solar de reflector parabólico.

Durante o periodo de exposición a estructura de madeira irase recubrindo con plástico, e finalmente será instalado no exterior do centro para que poida ser usado polo Departamento de CCNN, Bioloxía e Xeoloxía.

Visita a web do proxecto

O invernadoiro en "Tecnoloxía na rúa"

Accede a un documento con información sobre o seu deseño.