Skip to Content

AS TIC NA CASA

As Tecnoloxías da Información e a Comunicación (TIC) son unha importante peza da nosa realidade social e educativa. Poden ser moi positivas para a aprendizaxe dos nenos/as xa que permiten adquirir habilidades tecnolóxicas que precisarán no seu futuro. Polo tanto é importante dar a coñecer aos nosos fillos/as que son moitas as vantaxes das TIC, pero que tamén teñen os seu inconvenientes e perigos.

 

Aquí están as normas e recomendacións para facer un bo uso das TIC no cole polos nenos/as.

 

A continuación móstranse unhas recomendacións de bo uso responsable das TIC cos teus fillos/as.

- Un mal uso das TIC pode xerar problemas físicos (incorrectas posicións corporais, dor de costas, fatiga ocular, problemas musculares e articulares derivados do exceso de sedentarismo...), problemas académicos (trastornos do soño, déficit de atención, menor concentración ou rendemento escolar,...) e psicolóxicos (illamento dos amigos, perda de interese por outras actividades, adicción, consumismo innecesario, falsa información...)

- Controlar e limitar o tempo que se conectan a calquera dispositivo dixital tendo en conta o número de horas e días de uso de conexión para evitar posibles problemas.

-  Acordar unhas normas de uso cos nenos/as, establecendo e facendo un horario de uso para que se conecten só durante un tempo determinado, sempre durante o día e non pola noite. Marcar e separar os tempos dedicados para as tarefas escolares, para o ocio e para o ocio dixital.

- Controlar a navegación por internet de forma segura, accedendo só a contidos aptos para a súa idade.

- Ter o ordenador nunha zona común e visible para facilitar a supervisión do seu tempo de utilización e a revisión das web que visita evitando que os nenos/as usen internet sós.

- Utilizar filtros de control de acceso á rede e programas de control parental, cos que se evitará que os nenos/as podan acceder a páxinas de contido inapropiado.

- Explicarlles o que está ben e o que está mal é o mesmo no mundo virtual e no real.

- Débese ensinar o respecto aos demais e ser sempre educado no uso dos medios dixitais como menxasería, chats, etc. Non se debe facer burla, humillar, insultar, ameazar, chantaxear facer comentarios violentos ou discriminatorios,  nin mandar fotos ou vídeos desagradables a través de ningún medio dixital ou rede social. Estas accións poden ter serias repercusións sociais e emocionais para quen o sofre, e repercusións legais para quen o realiza.

- Concienciar de non dar datos persoais nin ningunha información persoal a outra persoa sen o permiso dos teus profesores/as ou padres/nais, sobretodo se esa persoa é descoñecida. Ter coidado cos datos que se comparten nos chat, redes sociais ou por email (imaxes, datos, números de teléfono...)

- Ensinar a ter coidado cos contidos que se soben a internet. O valor da privacidade propia e dos demais é  moi importante xa que o que se sobe á internet pódese modificar ou compartir por outras persoas e pode permanecer alí para sempre.

- Ensinar aos nenos/as a pedir axuda a unha persoa maior cando  algo non lles guste, non sepan que facer ante o que está o ocorrer ou sintan que algo estraño estalle a suceder.

- Ensinar aos nenos/as que non hai que crerse todo o que se ve ou lee en internet.

- Aprender a manexar os dispositivos dixitais para poder compartir experiencias cos nenos/as falando sobre o uso de calquera ferramenta dixital e incluso compartindo o seu uso con eles/as.