Por outro ano de FERMOSAS LECTURAS

Para acabar o ano...

para empezalo...

porque sí...

porque nos peta...

porque non fan falta escusas...

FERMOSAS LECTURAS... TODO O ANO!

 

Resolución da convocatoria de clubs de lectura para o curso 2019/2020

O Portal Educativo publicou xa a resolución definitiva da Convocatoria de Clubs de Lectura para o curso 2019/2020, segundo Resolución da Dirección Xeral de Centros e Recursos Humanos do 13 de decembro de 2019. Distribúense contías, por un importe global de 220.000€, para o funcionamento de grupos de lectura en 247 centros públicos que matriculan alumnado de ensino secundario, bacharelato, formación profesional ou ensinanzas de réxime xeral. Estas asignacións estarán destinadas nun mínimo do 75% á adquisición de libros para o desenvolvemento da actividade propia do club, a lectura (os libros que se adquirirán pasarán a integrarse na colección da biblioteca escolar); un máximo do 25% poderá destinarse a costear actividades complementarias do club tales como encontros con creadores/as, visitas culturais relacionadas con librerías, bibliotecas, encontros con outros clubs, visionado de películas ou asistenca ao teatro, sempre relacionadas coa actividade dos grupos de lectura.

 

Novembro, Mes da Ciencia en Galego nas Bibliotecas- 2019

Unha sociedade ben informada é máis difícil que sexa manipulada. Alicia Estévez Toranzo.

Desde a Consellería de Educación, Universidade e Formación Profesional, en colaboración coa Secretaría Xeral de Política Lingüística e a Dirección Xeral de Políticas Culturais (Subdirección Xeral de Bibliotecas), da Consellería de Cultura, vense impulsando a celebración anual do mes de novembro como MES DA CIENCIA EN GALEGO NAS BIBLIOTECAS. Iníciase esta actuación coa elección dunha imaxe e a difusión dun texto, a modo de MANIFESTO,  da científica Alicia Estévez Taranzo, microbióloga, académica da RAGC e da RAFG e premio María Josefa Wonenburger Planells (2018). A científica resalta a importancia das bibliotecas “para que moitos dos coñecementos rigorosamente contrastados sexan accesibles ao público”.

Desde a Asesoría de bibliotecas escolares realizouse unha recompilación de recursos dixitais relacionados coa ciencia, en galego, que se pon a disposición de todas as bibliotecas: libros e unidades didácticas descargables en formato pdf, páxinas web de institucións, museos e asociacións de profesores e divulgadores científicos, convocatorias e propostas, blogues de ciencia dos centros educativos, experiencias de bibliotecas escolares, etc. 

Acitividades das bibliotecas escolares galegas no mes de novembro:

Biblioteca Inclusiva: Día Internacional das Persoas con Discapacidade

 

 

"... o instrumento perfecto para que o noso alumnado poida expresarse a través dos seus talentos" reflexión do profesorado do CPI Manuel Suárez Marquier (O Rosal-Pontevedra) sobre o valor inclusivo do programa Radio na Biblio. 

Neste 3 de decembro, Día Internacional das Persoas con Discapacidade queremos facer nosa esa reflexión  e pensar en como as bibliotecas escolares galegas deben ser espazos nos que o alumnado atope o seu sitio para traballar en proxectos comúns, espazos que integren a todas e todos, espazos que sexan auténticos viveiros de cidadanía.

Hai dous cursos, a Consellería de Educación, Universidade e Formación Profesional iniciou o programa Biblioteca Inclusiva, dentro do Plan LÍA 2016-2020 de Biblioteca Escolares. Este programa pretende avanzar cara a unha biblioteca que responda ás necesidades de todo o alumnado do centro e enfronte o reto da diversidade. Queda moito por facer, pero a inclusión e a diversidade é unha realidade nas nosas bibliotecas que chegou para quedarse.

Estos son algúns dos materiais do programa:

Actividades das bibliotecas escolares galegas neste 3 de decembro:

Resolución provisional da convocatoria de clubs de lectura para o curso 2019/2020

 

O Portal Educativo publicou xa a resolución provisional da convocatoria de Clubs de Lectura para o curso 2019/2020, segundo Resolución da Dirección Xeral de Centros e Recursos Humanos de 25 de novembro de 2019.

Ábrese un prazo de 5 días naturais para a presentación de alegacións, contados a partir da data de publicación desta Resolución no Portal Educativo.

 

 

  Na imaxe, club de lectura do IES Valadares (Vigo-Pontevedra)

25 N: accións para denunciar a violencia de xénero e educar en igualdade, desde as bibliotecas escolares

Un curso máis, seguimos necesitando accións para denunciar a violencia sistémica contra  as mulleres e as violencias cotiás exercidas contra nenas, mozas e mulleres de toda idade e condición en distintos espazos e ámbitos, tanto privados como públicos. Desde a ONU, un ano máis, lanzan a campaña de 16 días de activismo contra a violencia de xénero baixo o lema "Pinta o mundo de laranxa: Xeración Igualdade condena a violación", centrada na existencia dunha impunidade xeralizada na violencia sexual e na violación.

Os centros educativos e as bibliotecas escolares súmanse á conmemoración do 25 de Novembro con múltiples actividades destinadas a educar en igualdade e contribuir a unha maior consciencia do problema por parte dos distintos sectores da comunidade educativa. O #25N non é unha celebración, é unha data a borrar do noso calendario e imaxinario, pero até entón queda moito por facer, moitos muros por derrubar, non podemos, nin debemos, permitir una paso atrás.

Recollemos aquí algunhas das accións levadas a cabo arredor desta data nas bibliotecas escolares galegas:

Traballos seleccionados no VI Concurso de Traballos por Proxectos coordinados ou co apoio da biblioteca escolar

 

 

Está xa publicada no Portal Educativo a resolución do VI CONCURSO DE TRABALLO POR PROXECTOS realizados durante o curso 2018/2019, baixo a coordinación (ou coa participación) da biblioteca escolar.

Seleccionáronse 19 traballos de entre os 84  presentados desde diferentes centros. Algunhas sub-modalidades ficaron desertas pero distribuíronse os premios dispoñibles seleccionando máis centros de modalidades con moita participación e alto nivel de calidade.

 

Este concurso busca estimular, mediante o recoñecemento de boas prácticas, o deseño e desenvolvemento de proxectos de carácter interdisciplinario ou de proxectos de investigación, baixo a coordinación da biblioteca ou co apoio desta, na liña da metodoloxía de aprendizaxe baseada en proxectos (ABP). Estos proxectos están propiciando profundos cambios nas dinámicas de traballo dos centros, nos usos dos espazos educativos, na distribución de horarios e grupos, no aproveitamento dos recursos, promovendo unha cultura participativa e colaborativa, emancipadora do alumnado. Parabenizamos ás comunidades educativas que botan a andar estas experiencias, e ao profesorado que as impulsa, deseña, guía, enriquece coa súa profesionalidade e experiencia, e ademáis as difunde e comparte para beneficio común. Existen tamén excelentes exemplos de prácticas de investigación nas modalidades de grupo/nivel ou ciclo/departamento, así como os traballos realizados na materia de libre confuguración de Secundaria "Investigaión e Tratamento da Información" ("Aprender a Investigar en Primaria), que poden servir de orientación para outros proxectos. Da mesma forma, os proxectos de investigación intercentros son unha práctica que cómpre estender e que pode dar lugar a experiencias educativas moi enriquecedoras.

 

Na imaxe, o alumnado de ITI do IES Valadares (Vigo-Pontevedra)

 

 

 Modalidade  Temática  Centro Seleccionado
  Concello  Provincia  Proxecto
 1. Proxectos Documentais Integrados, coordinados desde a biblioteca escolar  Xenérica  CEIP P. Graxal  Cambre  A Coruña  Construímos
 CEIP Milladoiro  Malpica de B.  A Coruña  O mar que nos dá...!
 EOI de Lugo  Lugo  Lugo  FalArte
 IES P. Aquis Celenis  Caldas de Reis  Pontevedra  As palabras no Camiño
 CEIP P. de Meaño-As Covas  Meaño  Pontevedra  Puro teatro
 CEIP A.D.R. Castelao  Vigo  Pontevedra  Pinga a pinga, pensa en verde
 Ciencias  IES Francisco Aguiar  Betanzos  A Coruña  Betanzos 800 anos
 CEIP Canosa-Rus  Coristanco  A Coruña  ConCIENCIAte
 2.a. Proxectos de investigación grupo/nivel  Xenérica  CEIP O Coto  Negreira  A Coruña  A voltas por Galicia
 CEIP de Prácticas López Ferreiro  Santiago de Compostela  A Coruña  Pontes para coñecérmonos
 IES Xoán Montes  Lugo  Lugo  (A)rroupArte
 Ciencias  CEIP Quintela  Moaña  Pontevedra  Os Canciños
 2.b. Proxectos de investigación ciclo/departamento  Xenérica  CEIP P. Enrique Barreiro Piñeiro  Cambados  Pontevedra  Coidamos do noso para coidar o de todas e todos
 Ciencias  IES Xoán Montes  Lugo  Lugo  O xardín das Hespérides
 2.c. Proxectos realizados na materia de 1º/2º da ESO  Xenérica  IES Valadarés  Vigo  Pontevedra  Youtubers por un día
 3. Proxectos de investigación intercentros  Xenérica ou científica  CEIP Nicolás del Río  Cedeira  A Coruña "Pegadas na iauga". Patrimonio inmaterial: a semente
 IES Punta Candieira  Cedeira  A Coruña  "Pegadas na iauga". Patrimonio inmaterial: a semente
 CEIP de Santiago de Oliveira  Ponteareas  Pontevedra  Xogamos?
 CEIP de Leirado  Salvaterra de Miño  Pontevedra  Xogamos?

 

 

Radio na Biblio informa: Biblioteca Inclusiva

Na Xornada Biblioteca Inclusiva. Cidadanía na Diversidade, celebrada o pasado 15 de novembro na EGAP,  presentouse un tríptico que achega o valor inclusivo do programa Radio na Biblio. Este documento recolle as opinións de profesorado, alumnado e familias que reflicten o valor da radio como unha ferramenta de inclusión. A radio proporciona múltiples oportunidades para o desenvolvemneto de competencias clave a través de tarefas complexas que involucran diversas habilidades e destrezas, un espazo que permite ao alumnado desenvolver os seus talentos e capacidades.

Viñetas Biblioteca escolar, viveiro de cidadanía

No mes de outubro de 2019, todas as bibliotecas escolares galegas recibiron o cartel co lema deste curso: BIBLIOTECA ESCOLAR, VIVEIRO DE CIDADANÍA, creado polo ilustrador Óscar Villán. O cartel nos ofrece unha imaxe múltiple e evocadora de diversas situacións que unha biblioteca escolar pode facilitar. Situacións que contribúen a crear ese "viveiro de cidadanía" no que medren en confianza as novas xeracións.

Continuando con esta liña de traballo, dende a Asesoría de Bibliotecas Escolares poñemos a disposición dos centros as viñetas desagregadas do citado cartel, para que cada equipo as poida empregar do xeito que consedere máis oportuno.

Enlace de descarga:

Biblioteca creativa. As Bibliotecas gañan espazos

Entrando no cuarto ano de desenvolvemento do programa Biblioteca Creativa, considerouse necesaria unha avaliación para saber o momento no que se está. Con este motivo elaborouse unha enquisa que se trasladou aos centros que estaban a participar nos programas "Biblioteca Creativa" e "Radio na Biblio". Os resultados deste cuestionario promoveron unha reflexión compartida durante a xornada de formación que se celebrou na EGAP de Compostela o pasado día 25 de outubro.

 

Falouse sobre:

  • Espazos novos que as Bibliotecas están conquistando
  • Os materiais diversos que enriquecen as coleccións
  • A formación e asesoramento recibidos e/ou necesarios
  • A implicación da comunidade educativa
  • A visibilidade destes novos espazos
  • As melloras observadas: no alumnado, no profesorado, no cambio do propio concepto da biblioteca escolar, no cambio das dinámicas de ensino e aprendizaxe, o impulso do traballo colaborativo/cooperativo...

LIGAZÓN AOS RESULTADOS DA ENQUISA SOBRE BIBLIOTECA CREATIVA 

Biblioteca Inclusiva. Cidadanía na diversidade: xornada formativa

 

 

O venres 15 de novembro a EGAP (Escola Galega de Administración Pública)  de Santiago de Compostela acollerá a xornada formativa BIBLIOTECA INCLUSIVA. CIDADANÍA NA DIVERSIDADE, organizada pola D.X. de Centros e Recursos Humanos da Consellería de Educación, Universidade e Formación Profesional, dentro do seu programa BIBLIOTECA INCLUSIVA, en colaboración co Servizo de Formación do Profesorado.

Asistirá profesorado vinculado á biblioteca escolar de centros públicos e concertados de educación especial, de centros con unidades específicas de atención a alumnado NEAE, así como  centros de escolarización preferente, especificamente convocados pola dirección xeral organizadora. Ampliouse a posibilidade de asistencia a profesorado dos departamentos de Orientación destes centros. En total unhas 230 persoas compartirán experiencias e participarán das charlas e talleres previstos no programa que prevé a intervención, entre outros, de Susana Peix, bibliotecaria especialista en accesibilidade e inclusión; Rosa Piquín, experta en materia de bibliotecas escolares e atención da diversidade, e Blanca Mata, xornalista e coordinadora da Asociación "Lectura Fácil Euskadi". 

Os talleres correrán a cargo de Paola Guimeráns (Libros pop-up e circuítos), Blanca Mata (Lectura fácil), Felo Couto (Recursos tecnolóxicos e atención da diversidade) e Susana Peix (Unha colección para a biblioteca inclusiva).

Compartirán a súa experiencia no ámbito da atención á diversidade desde a biblioteca escolar os responsables das bibliotecas do CEIP Escultor Acuña, IES Valadares, CEE Manuel López Navalón e CEEPR Juan María. 

 

- PROGRAMA

- POR UNHA BIBLIOTECA INCLUSIVA  (documento descargable)

 

CEIP Saco e Arce, de Toén (Ourense). Unha biblioteca LÍA.2

A biblioteca do CEIP Saco e Arce, de Toén (Ourense) incorporouse ao proxecto LÍA.2 en 2018. A través do alumnado, de dúas nais e do equipo directivo accedemos a algunhas escenas que falan dunha biblioteca activa na que as nenas e os nenos atopan recursos e oportunidades para vincularse á lectura pero tamén para desenvolver habilidades de traballo colaborativo, para investigar e explorar, para crear e expresarse de formas moi diversas. Como todas as bibliotecas integradas neste programa, a biblitoeca de Toén é unha "biblioteca viva" que seguirá a súa evolución, que vai continuar a explorar as posibilidades de adaptación dun modelo que debe incluír o traballo cos medios de comunicación para formar ao alumnado nas competencias no uso e produción dos medios,  tan importante para medrar como cidadáns activos e lectores críticos de mensaxes e textos, sexan estes escritos, orais, audivisuais, científicos, xornalísticos ou artísticos.

IES Santiago Basanta Silva (Vilalba, Lugo). Centro LÍA.2

O IES Basanta Silva, de Vilalba, é un centro cunha traxectoria moi notoria na dinámica de atención da bibiblioteca escolar. Existía xa unha biblioteca, integrada no PLAN de mellora de biblitotecas escolares desde o curso 2015/2016, cunha importante actividade, con espazos amplos e recursos renovados, pero ao entrar a formar parte do Plan LÍA. 2 modificouse a distribución dos recunchos da biblioteca cara a construír un espazo creativo no que dispoñen, por exemplo dun recuncho maker, retiráronse vellos mobles pouco versátiles e ampliándose o espazo de circulación e de lectura informal, entre outras actuacións. Así acadaron unha biblioteca escolar chea de oportunidades e posibilidades para aprender argallando, cun gran atractivo para a rapazada. Da man de alumnado de distintos niveis, usuario da biblioteca escolar e dos seus servizos,  e de profesorado do centro, podemos achegarnos á realidade desta biblioteca situada nunha vila do interior de Galicia: unha biblioteca viva onde a lectura, a cultura, a comunicación e a exploración son unha realidade cotiá que axuda a tecer complicidades entre os distintos membros da comunidade educativa. 

CEIP Milladoiro (Malpica de Bergantiños, A Coruña). Un centro LIA.2

O CEIP Milladoiro, de Malpica de Bergantiños é un centro con longa traxectoria no coidado e atención á súa biblioteca escolar e ao traballo para a formación lectora, literaria e nas competencias informacionais e mediáticas do seu alumnado. Xa fora un centro tomado como referencia anteriormente, cando se gravaron vídeos en bibliotecas escolares galegas en colaboración co Ministerio de Educación.  Actualmente o CEIP Milladoiro é un dos 20 centros incluídos no proxecto CENTROS LÍA.2, a través do que a consellería de Educación, Universidade e Formación Profesional explora a evolución do modelo de biblioteca escolar acorde coas necesidades do alumnado actual e coas tendencias en materia bibliotecaria e educativa.

A través desta nova produción audiovisual, coa axuda das alumnas voluntarias, visitamos de novo a biblioteca escolar dun centro da Galicia rural que pon ao servizo do seu alumnado todos os recursos posibles, pero que sobre todo ofrece oportunidades de aprendizaxe variadas, significativas e imprescindibles na actual sociedade da comunicación e da información. 

Convocatoria do programa Bibliotecas Escolares Solidarias para o curso 2019/2020

O Portal Educativo publica hoxe a Resolución de 4 de novembro de 2019, da Dirección Xeral de Centros e Recursos Humanos, pola que se convoca o programa "Bibliotecas Escolares Solidarias" para o curso 2019/2020.

TEXTO DA CONVOCATORIA

No curso pasado realizaron voluntariado na biblioteca escolar un total de 1.245 alumnos e alumnas de secundaria, así como 2.245 alumnos e alumnas de primaria (5º e 6º). O seguinte cadro resume o contido do programa e as datas clave para cada unha das modalidades: 

 

 

Iniciativa

Finalidade

Características

1

Concesión do Selo “Biblioteca Escolar Solidaria”

Recoñecer a bibliotecas que traballan de forma salientable a compensación de desigualdades e fomentan ovoluntariado cultural entre os integrantes da comunidade escolar. 

-  Convocatoria anual.

-   Presentación de memorias por parte dos centros interesados: 10 de maio de 2020.

-   Concesión dos selos (un máximo de 15 selos por curso escolar)

-  As candidaturas deberán responder aos obxectivos da Axenda 2030 da ONU, de desenvolvemento sustentable.

2

Voluntariado na biblioteca escolar (Secundaria)

-  Recoñecemento de horas de voluntariado na biblioteca escolar, para
o alumnado colaborador, mediante a emisión de diplomas de acción
voluntaria correspondentes.

-  Destinado a alumnado de ESO, BAC, FP ou ensinanzas de réxime especial.

-  As bibliotecas escolares deberán adherirse ao programa no momento que se estipule e levar rexistro das actividades do alumnado (data límite: 30/11/2019).

-  Remitir datos alumnado  (data límite: 28/05/2020)

3

Voluntariado de lectura – A

(Primaria)

Estimular o voluntariado cultural relacionado coa biblioteca e a lectura entre o alumnado de 5º e 6º de primaria.

-  Inscrición con data límite 30/11/2019

-  Os centros inscritos presentarán memoria de actividades (data límite 27/04/2020).

-  Seleccionaranse  un mínimo de 10 experiencias.Concreción en convocatoria complementaria (febreiro 2020)

 

Maletas viaxeiras 2019/2020

 

O programa "Maletas Viaxeiras" da Asesoría de bibliotecas escolares ofrece moitas novidades para o curso 2019/2020.

Ofrécense 4 novas maletas denominadas  "Biblioteca Creativa" con recursos moi variados que permiten configurar a colección dos espazos creativos das nosas bibliotecas, nos que os materiais deben ir acompañados por bibliografía que apoie e optimice o seu uso. Falamos de xogos manipulativos e fondos documentais que contemplan todo tipo de linguaxes e posibilitan ao alumnado múltiples oportunidades de aprendizaxe, de expresión e de creación en ambientes de cooperación.

 

Neste curso a Asesoría de bibliotecas escolares aumentou o persoal de atención a centros incorporando un novo posto que se ven a sumar aos dous existentes quedando localizados nos seguintes emprazamentos:

Asesoría Zona Norte

  • Asesora:  Chelo Gundín Rey
  • Enderezo: CFR Ferrol
    R/ O Galego Soto, s/n
    15403 Ferrol (A Coruña)
  • Teléfono: 981 370 541
  • E-mail: abe.zonanorte@edu.xunta.es

 Asesoría Zona Sur

  • Asesor: Paco Díaz Rey
  • Enderezo: Xefatura Territorial de Educación
    R/ Avda. Fernández Ladreda, 43
    36003 Pontevedra (Pontevedra)
  • Teléfono: 986 805 209
  • E-mail: abe.zonasur@edu.xunta.es

Asesoría Zona Sueste

  • Asesor: Loli Nieto Campos
  • Enderezo: CFR Ourense
    R/ Avda. da Universidade, 18
    32005 Ourense (Ourense)
  • Teléfono: 988 241 533
  • E-mail: abe.zonasueste@edu.xunta.es
 

Algunhas das maletas están localizadas nestas seccións para facilitar o achegamento deste material aos centros que o desexen empregar.

Os centros interesados poden solicitar estas maletas na aplicación MALETAS VIAXEIRAS, desta mesma páxina: https://www.edu.xunta.gal/biblioteca/maletas

 

Xornada Biblioteca Creativa “Comunicación e Cidadanía”

 

O vindeiro venres 25 de outubro reuniranse en Compostela (EGAP) profesores e profesoras dos centros integrados nos programas BIBLIOTECA CREATIVA, RADIO NA BIBLIO e Bibliotecas LÍA.2, da Consellería de Educación, Universidade e Formación Profesional, nunha xornada formativa. 200 representantes dos centros incluídos nos diferentes planes, distribuiranse en catro grupos ao longo da mañá, en función dos anos que levan integrados no programa, para construír os escornabots e coñecer as súas aplicacións didácticas, formarse no manexo e utilidades da impresión 3D, achegarse a experiencias de radio por parte de centros e de profesionais do medio e participar nun taller de creación con Pablo Otero. Xa pola tarde, en sesión conxunta, haberá oportunidade para coñecer experiencias que xa están levando a cabo algúns centros pioneiros nestes programas, así como reflexionar sobre os datos dunha enquisa web para coñecer os novos espazos das nosas bibliotecas. Pechará a xornada Arantxa Mariscal, directora da biblioteca de creación UBIK, de Donostia, para falar da incorporación do comunitario á biblioteca.


PROGRAMA

ACCESO AOS MATERIAIS

 

24 de outubro, Día da Biblioteca, de todas as bibliotecas.

Dende 1997 celébrase o Día da Biblioteca o 24 de outubro, una conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administracións autonómicas. Esta asociación, membro da OEPLI, facilita na súa páxina o cartel e o pregón para esta conmemoración nas diferentes linguas do Estado, obra desta vez do ilustrador Miguel Calatayud e  a escritora Gemma Pasqual.

Pola súa parte, o Ministerio de Cultura e Deporte propón este ano 2019 a incorporación do lema "aptas para todos os públicos", co obxectivo de salientar o papel das bibliotecas na promoción da igualdade de xénero.

As bibliotecas escolares galegas teñen o seu propio lema para este curso 2018/2019, BIBLIOTECA ESCOLAR, VIVEIRO DE CIDADANÍA,  que conta cunha imaxe propia creada por Óscar Villán. Os carteis editados con este lema están xa en todos os centros educativos. As bibliotecas escolares están xa en plena celebración do seu día, unha oportunidade para inaugurar novos espazos, abrir as portas á comunidade educativa e  presentar ás familias os recursos e as actividades da biblioteca, programar actos específicos nos que lembrar as oportunidades que ofrece a biblioteca para estimular a formación lectora do alumnado e reforzar a adquisición de todas as competencias e contidos incluídos no currículo. 

A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar as outras, que os pon en contacto con eses outros espazos do coñecemento e do lecer, eses lugares nos que pasan moitas cousas (e todas boas), que son as bibliotecas públicas, eses lugares para a igualdade e a diversidade que son as BIBLIOTECAS. 

 

Actividades nas bibliotecas escolares de Galicia:

CEIP Plurilingüe A PEDRA (Bueu, Pontevedra). Centros LÍA.2

Gravación realizada no CEIP Plurilingüe A PEDRA, de Bueu (Pontevedra) en xuño de 2019. Este centro de educación infantil e primaria está integrado no Plan de mellora de bibliotecas escolares e foi seleccionado pola D. X. De Centros e Recursos Humanos, da Consellería de Educación, Universidade e Formación Profesional como “Centro LÍA.2”, un programa no que se está explorando as posibilidades da biblioteca escolar como “Centro Creativo das Aprendizaxes”.

Guiados polo alumnado voluntario da biblioteca escolar, podemos coñecer os diferentes espazos desta bibliotecaque, como centro LÍA.2, incorpora recunchos para a investigación, a manipulación, a creación, a expresión, o traballo colaborativo e o xogo. Os libros e a lectura vehiculizan toda a actividade da biblioteca, gañan presenza e conseguen involucrar a toda a comunidade educativa. Os equipamentos están ao servizo das prácticas que se pretenden incentivar, coa vista posta sempre no reforzo das competencias clave contempladas no currículo e, especialmente, no desenvolvemento persoal do alumnado e a creación de vínculos coa lectura, a escrita, a comunicación, o coñecemento e a cultura en xeral. Finalmente, estas bibliotecas son espazos que atenden á dimensión social, constituíndo un factor de igualdade no acceso aos bens culturais dispoñibles.

Avaliación crítica dos fondos (expurgación)

 

Desde a Asesoría de Bibliotecas Escolares elaborouse un pequeno documento en relación coa expurgación dos fondos. Este material de apoio pretende matizar e resolver dúbidas sobre estes labores, básicos na xestión técnica da coleccion das bibliotecas escolares. É fundamental a súa lectura e difusión entre os membros dos equipos de bibliotecas.

AVALIACIÓN CRÍTICA DOS FONDOS

24 outubro - 31 outubro: Semana Mundial da Alfabetización en Medios e Información (AMI) a proposta da UNESCO

 

 

A UNESCO propón a celebración da Semana Mundial AMI 2019 baixo o lema CIDADANÍA AMI: INFORMADA, COMPROMETIDA, EMPODERADA como un medio para visibilizar as experiencias en materia de educación nas linguaxes dos diferentes medios de comunicación, nun contexto de alfabetizacións múltiples e coa intención de formar ao alumnado como consumidores pero, especialmente, como produtores de información a través dos diversos medios de comunicación: prensa, radio, televisión, vídeo, fotografía, audio, produtos transmedia, internet...  

 

Toda a cidadanía europea ten dereito á alfabetización. Os estados membros da UE deben asegurar que os cidadáns de todas as idades, independentemente da súa clase social, relixión, etnia ou sexo, contan cos recursos e oportunidades necesarios para desenvolver un nivel de alfabetización suficiente e sostible a fin de comprender e utilizar con eficacia a comunicación escrita, tanto en medios impresos como dixitais. (Declaración ELINET sobre Dereito á Alfabetización)

 

 PROPOSTA PARA AS BIBLIOTECAS ESCOLARES QUE QUEIRAN PARTICIPAR DESTA SEMANA

Día das Escritoras

O día das escritoras é unha conmemoración promovida pola Biblioteca Nacional de España xunto á  Federación Española de Mujeres Directivas, Ejecutivas, Profesionales y Empresarias (FEDEPE) e a Asociación Clásicas y Modernas. Desde 2016 búscase reivindicar o labor e o legado das autoras a través da historia a partir da lectura de fragmentos representativos das súas obras.

Esta celebración lévase a cabo o luns máis próximo á festividade de Teresa de Jesús, o 15 de outubro. A IV edición celébrase este ano 2019 o 14 de outubro baixo o lema “Mulleres, amor e liberdade”. O amor entendido desde a perspectiva das mulleres: “un territorio amplo, complexo, contradictorio, laberíntico, atravesado por luces e sombras, grandes paixóns, mais tamén as coitas”, como explica Clara Sanchís, comisaria desta convocatoria.

Desde as bibliotecas escolares propomos que se visibilice a obra das escritoras galegas, ben a través dunha exposición de libros, ben lendo fragmentos dos mesmos nunha maratón literaria ou mesmo nos clubs de lectura.

 

 

Begoña Caamaño: Morgana en Esmelle

"Na comunide druídica achou a nena a vida que desexaba […] destacou pola súa intelixencia e sagacidade e polo seu amor e dedicación ao estudo".


A Asesoría de Bibliotecas Escolares anima a que toda a comunidade educativa colabore na ampliación desta lista, e con este fin lánzase unha proposta en Twitter: lembrar a todas as escritoras galegas que traballen estas temáticas nas súas obras. Para iso usaranse os cancelos #DíadasEscritorasgalegas #DíadelasEscritoras e #bescolaresgal para darlles visibilidade.

 

RECOMPILACIÓN DE FRAGMENTOS DE ESCRITORAS GALEGAS

Lecturas no Canmiño

A Dirección Xeral de Centros e RR.HH. en colaboración coa entidade Golfo e Dama puxo en marcha neste mes de outubro unha iniciativa integrada no programa Biblioteca Inclusiva, destinada a favorecer experiencias de lectura apoiada con cans. Este programa ten o patrocinio do Xacobeo 2021.

Baixo o lema Lecturas no Canmiño, a psicoterapeuta Marta Jaquet e o seu can Brus van visitar ao longo do mes do outubro cinco centros PLAMBE: CEIP Lamas de Abade, CEIP O Camiño Inglés, CEE Navalón, CEE Nosa Señora do Rosario e EEI Barrionovo onde realizarán diferentes sesións de lectura coas que practicar e mellorar as habilidades lectoras e de comunicación do alumnado.

Unha vez avaliada a idoneidade da proposta e escoitados tanto o profesorado como o alumnado que participou nesta iniciativa, valorarase desde esta Consellería a implementación dun programa destas características noutras bibliotecas escolares. As primeiras noticias que nos chegan dos centros son altamente positivas.

Pódense ver aquí as imaxes nos blogs dalgúns dos centros participantes neste proxecto piloto. Seguirase ampliando toda a información.                                                      

 

Radio na Biblio. Resolución da convocatoria. Curso 2019/2020

 

 

O Portal Educativo publica a Resolución de 7 de outubro de 2019, da Dirección Xeral de Centros e Recursos Humanos pola que se relacionan os centros de nova incorporación ao programa RADIO NA BIBLIO para o curso 2019/2020, unha ver resolta a convocatoria publicada con data de 3 de setembro de 2019. Tamén se detallan os centros  integrados en convocatorias anteriores  e que solicitaron continuidade. Desta forma, aparecen incluídos neste programa un total de 80 centros con alumnado de ensino infantil, primaria, ESO, bacharelato ou formación profesional e pertencentes ao Plan de mellora de bibliotecas escolares no actual curso 2019/2020 . 

 

Biblioteca creativa. Resolución da convocatoria. Curso 2019/2020

 

O Portal Educativo publica a Resolución de 3 de outubro de 2019, da Dirección Xeral de Centros e Recursos Humanos pola que se relacionan os centros de nova incorporación ao programa BIBLIOTECA CREATIVA para o curso 2019/2020, unha ver resolta a convocatoria publicada con data de 3 de setembro de 2019. Tamén se detallan os centros  integrados en convocatorias anteriores  e que solicitaron continuidade. Desta forma, aparecen incluídos neste programa un total de 79 centros con alumnado de ensino infantil e primaria e pertencentes ao Plan de mellora de bibliotecas escolares no actual curso 2019/2020 . 

« primeira‹ anterior…8910111213141516…seguinte ›última »