IES Xoán Montes

O sábado pasado, coincidindo coa chegada do Maio, tivemos a ocasión de desfrutar dunha formidable xornada de convivencia entre familias, profesorado e alumnado organizada pola ANPA do IES Xoán Montes. Desfrutamos dun paseo polo "Lugo descoñecido" acompañados pola moi grata compañía do guía oficial de turismo Guido Álvarez Parga.

Tras comezar a visita no Parque de Rosalía de Castro, adentrámonos no fermosísimo Barrio do Carme. Alí coñecimos a importancia que ten este barrio para a nosa cidade dende o punto de vista natural, etnográfico, histórico...

Sen dúbida foi unha boísima oportunidade para coñecer e querer máis a nosa cidade, así como de coñecernos máis e fortalecer a comunidade educativa do IES Xoán Montes.

Foto de grupo "O Lugo máis descoñecido". ANPA IES Xoán Montes. CC BY-SA

O alumnado de 2ESO visitou a mostra "Afonso X e Galicia" na capela de Santa María e organizada polo Consello da Cultura Galega.

Na exposición celebrada co gallo do 800 aniversario do nacemento de Afonso X, o alumnado tivo a ocasión de coñecer un pouco máis deste monarca medieval tan vencellado a Galicia. Así, puidemos revisar aspectos da súa biografía, o proxecto político e especialmente do legado cultural grazas á reprodución de distintos escritos, miniaturas e instrumentos da época.

Despois da visita guiada, o alumnado tivo que buscar información nos distintos paneis expositivos.

2ESO na mostra Afonso X e Galicia. Marta Coria. CC BY-SA

O alumnado de 2ESO tivo a oportunidade de facer unha videoconferencia co alumnado da Scuola Media Pellico de Lugo en Emilia Romagna (Italia) co que estamos a participar no proxecto eTwinning Lugo connection, much more than a name. Foi unha actividade moi motivadora para poder coñecer á rapazada italiana, ao tempo que intercambiamos información do patrimonio cultural dos nosos Lugo, o galego e o italiano.

Ademáis da animada conversa, Juan Aguado deleitounos cunha fermosa peza con contrabaixo. ¡Moitas grazas Juan!

Videoconferencia cos Lughesi. Marta Coria. CC BY-SA