O pasado día 9 de outubro, o alumnado de 1º da ESO do IES Virxe do Mar, realizou un roteiro pola ribeira do río Traba para a observación das diferentes especies de árbores e outras plantas características da zona: ameneiro, sabugueiro, salgueiro, freixo, loureiro, castiñeiro, carballo, piñeiro, fieito, xesta, toxo, etc.

Asimesmo analizaron a presenza de especies invasoras no noso monte, coma é o caso do eucalipto.

Os alumnos  recolleron mostras de follas, tomaron notas e atenderon ás explicacións que lles deu o profesor Fernando Martínez.

Foi unha actividade do Departamento de Ciencias, cun percorrido de aproximadamente 2 km de ida e outros 2 km de volta dende a ponte de Traba, na vila de Noia.

Posteriormente nas aulas, realizaron traballos a partir da experiencia vivida pola beira do río.

 O pasado martes 9 de outubro, un grupo de rapaces e rapazas da materia de Tecnoloxía de 4º ESO do IES Virxe do Mar, visitou as instalacións do Escuadrón de Vixilancia Aérea EVA nº10, situada no cume do monte Iroite. Acompañados polos profesores de Tecnoloxía Felipe Roget e Emilio Regueira, puideron ver de primeira man as instalacións e o equipamento de telecomunicacións que utilizan na base, ademais de recibir as explicacións do persoal técnico. Mención especial merece a visita ao radomo (a cúpula) que alberga ao rádar, pola súa espectacularidade, como tamén espectaculares son as vistas que se poden disfrutar dende o alto do monte Iroite.

Este pasado día 6 de Outubro tivo lugar a entrega do premio do XVII Certame de Relato de Aventuras Antón Avilés de Taramancos, convocado pola revista cultural “Casa da Gramática” do IES Virxe do Mar en colaboración co Concello de Noia.

Resultou gañadora a obra Alana do nigranés Francisco Fernández Davila. Unha novela ambientada na época castrexa, na que se fala da busca da identidade galega.

O acto transcorreu no Concello de Noia e asistiron as autoridades locais, familia de Antón Avilés e o xurado do certame, do que forma parte Xavier Castro Rodriguez, profesor do IES Virxe do Mar e codirector da revista Casa da Gramática. Asimesmo, a profesora do Ciclo de Imaxe e Son do IES Antía Figueiras Carballo foi a autora das ilustracións da obra gañadora Alana, así coma tamén autora do diseño do cartel deste Certame literario.

En www.climantica.org acaba de publicarse esta reseña que contén o vídeo resumo do campus, seguido dunha reportaxe ilustrada e comentada por minutos do vídeo, así como as 4 catro curtametraxes elaborados polos grupos de traballo de proxectos audiovisuais. No titulado Conectados colaborou como cámara a alumna de 4º de ESO Aimara Ventoso. Despois das catro curtametraxes elaboradas no tempo de proxectos, pecha a sección de curtas desta  reportaxe o Informe semanal do campus, elaborado no taller de Edición de vídeo para a difusión do campus nas redes sociais. Na súa produción tiveron un papel destacado Pablo Veiras de 2º de Bacharelato, como un dos principais presentadores, e Luis Otero, tamén de 2º de Bacharelato, como editor. A última parte do vídeo está dedicado ao musical Boys, de cuxo libreto é coautor o profesor Carlos Maquieira. Nela participaron Luis Otero no papel de Akhtar, Pablo Veiras no papel de James, e Zaira González de 2º de Bacharelato, no papel de Lockwood. Na banda do musical tivo unha actuación destacada o alumno de 1º Bacharelato César Fernández, que tocou a frauta traveseira e cantou varias das principais cancións. O éxito da iniciativa de Aveiro motivou que o Consejero de Educación para México, América Central e Caribe se dirixira á nosa Directora mediante esta carta, solicitando a colaboración do Instituto para levar este modelo innovador a un campus iberoamericano a celebrar na Universidade para a Paz das Nacións Unidas situada na cidade de San José Costa Rica, un reto no que tamén comparte Universidade de Santiago de Compostela a través desta nova.

O alumnado de 2º Bach de Historia da Arte do IES Virxe do Mar visitou o pasado xoves 27 de setembro a igrexa de Santa Maria a Nova, acompañados pola profesora Concha Sabucedo. Esta é unha das actividades habituais, programadas dentro do Departamento de Historia do centro. Trátase dunha primeira toma de contacto co vocabulario artístico, arquitectónico e escultórico así como o achegamento á obra de arte, neste caso local. Exemplos de columnas, arcos, retablos, laudas, aparellos,... nesta xoia arquitectónica da vila.

Dende o 4 ao 8 de setembro organizamos no centro de investigación, innovación e divulgación científica Fábrica Centro de Ciencia Viva e da Universidade de Aveiro, a doceava edición dos campus de Climántica, que é a sexta edición internacional que organizamos dende que coordinamos a rede escolar de Climántica e a segunda en Fábrica, un centro que nos aportou todas as súas instalación e equipamentos, entre os que destacaron os de luz láser, holografía, proxección 3D e robótica. Os actos plenarios celebrados no auditorio retransmitíronse  por streaming a través do Facebook oficial de Climántica. Os 72 estudantes procedentes da varias autonomías españolas, de varias rexións de Portugal e de México, foron seleccionados entre 470 alumnos que presentaron a súa candidatura mediante a publicación dun produto multimedia para difundir a través dunha web  co obxectivo de sensibilizar á cidadanía sobre o cambio climático. Entre eles resultaron seleccionados os estudantes do noso centro Zaira González, Aimara Ventoso, Luis Otero, Pablo Veiras e César Fernández. Ademáis da dirección e coordinación do campus, o noso instituto estivo representado polos exalumnos Julieta Dix, Aitor Alonso e María Arufe que formaron parte do equipo de monitores; e formando parte dos formadores do seminario docente, polas profesoras Raquel Troitiño e Eva Núñez e polos  profesores Carlos Maquieira e Fernando Vigo.

 www.climantica.org

http://www.educo2cean.org/iesvirxedomarsustainability-international-youth-camp-gallery/

https://www.lavozdegalicia.es/noticia/barbanza/2018/09/08/cuatro-institutos-comarca-regresan-aveiro/0003_201809B8C2992.htm