Blog da biblioteca

Este curso quixemos adicar a nosa árbore de Nadal á banda deseñada en galego, expoñendo algúns dos títulos máis significativos da nosa colección. Podemos atopar obras de autores consagrados, coma Miguelanxo Prado, e de novísimas debuxantes, coma Anémona del Río. Tampouco falta unha lembranza do ilustrador ribadense Suso Peña ou traducións de clásicos como Astérix e Tintin.

Para mellorar a estética da biblioteca, seguimos enmarcando os cartaces anuais de Bibliotecas Escolares. Ao non dispór de mais espazo no interior, irémolos colocando no corredor de acceso.

A Consellería de Cultura enviou ao centro cinco exemplares do libro Endrina e o segredo do peregrino, de Concha Narváez. Trátase dunha edición non venal froito da colaboración coa Academia Xacobea, cuxo obxectivo é afondar no coñecemento do Camiño de Santiago a través da lectura pracenteira.

Entre o 15 de outubro e o 15  de novembro tiveron lugar as Xornadas de Formación de Nov@s Usuari@s da Biblioteca. O obxectivo desta actividade é familiarizar ao alumnado de 1º de ESO coa organización e funcionamento da biblioteca e permitirlle desenvolverse nela con facilidade á hora de buscar información ou xestionar o préstamo dun libro. As xornadas desenvolvéronse en 4 sesións en cada grupo, tres na aula na hora de titoría dirixidos polas titoras e unha sesión na biblioteca dirixida pola coordinadora onde puxeron en práctica os coñecementos adquiridos. Agradecemos, coma sempre,  a colaboración e boa disposicion das titoras para levar a cabo o proxecto.

Dentro do programa Encontros con Escritores ofrecido polo Ministerio de Educación, e organizado pola Comisión de Igualdade e a Biblioteca, tivo lugar o 9 de novembro de 2021 o obradoiro "Versos para darlle a volta á cabeza", impartido polo poeta Carlos Negro e dirixido ao alumnado de Coeducación de 1º de BAC.

A actividade desenvolveuse en dúas fases. Na primeira Carlos Negro falou do oficio de poeta e de como a poesía pode ser unha arma poderosa para combater a desigualdade de xénero. Para iso deu lectura a textos de poetas de diversas linguas e procedencias. Posteriormente repartiu textos que o se foron lendo e intercambiando para logo reflexionar sobre eles e comentar o seu contido. Na segunda o alumnado, distribuído en varios grupos, creou poemas seguindo unhas pautas establecidas tomando sempre como fío condutor a ruptura dos estereotipos de xénero.

 O acto pechouse coa lectura de varias composicións do poemario de Carlos Masculino singular e o aplauso e agradecemento de alumnado e profesorado acompañante.

Podedes ver algúns momentos do taller nos sequintes enlaces:

Carlos Negro recitando poemas dos seus libros: https://youtu.be/9J0eQjJCmv0

Proposta de creación literaria sobre os personaxes Batman e Robin: https://youtu.be/pJCsxQxQDz4

O alumnado recitando unha das súas creacións: https://youtu.be/SRdkD8MzhII