Extraescolares e complementarias

O alumnado de 4º  da ESO de Bioloxía do IES de Ribadeo Dionisio Gamallo, acompañados pola profesora Susi Besteiro saíron á Ría de Ribadeo para conmemorar o Día Mundial das Zonas Húmidas, que se  celebra cada 2 de febreiro co obxectivo de visibilizar e crear conciencia acerca da importancia destes ecosistemas para a humanidade e para o planeta.

RESEÑAS NA PRENSA DA ACTIVIDADE

Alumnado do IES Ribadeo Dionisio Gamallo participou, o pasado venres 11 de novembro, nunha Xeoruta financiada polo Concello de Ribadeo. Acompañados por Francisco Canosa, doutor en Xeoloxía e pola profesora de Bioloxía, Susi Besteiro, foron percorrendo dous puntos de interese xeolóxico do concello ribadense: As Catedrais e Piñeira.

O pasado luns 12 de setembro, tivo lugar no IES de Ribadeo Dionisio Gamallo a apertura do curso escolar cunha lección inaugural a cargo de Toni Deaño e coa actuación da Coral Polifónica de RIbadeo.
Baixo o título “Luz Pozo Garza”, Toni Deaño, ex profesor do centro, fixo un resumo da vida e obra da poetisa nacida en Ribadeo no ano 1922 e nomeada filla predilecta do Concello de Ribadeo en xaneiro do 2020, pouco antes do seu falecemento. A interesante lección rematou coa lectura dun poema dedicado á nosa vila, que o propio Toni Deaño custodiou por petición da escritora ata a súa publicación en La Comarca del Eo: “Abrín portas de prata” co subtítulo Ribadeo, Ribadeo.

No IES Ribadeo Dionisio Gamallo non quixeron rematar este curso de volta á normalidade sen celebrar a Feira da Ciencia e Tecnoloxía, unha actividade emblemática que xa vai pola XXVII edición e que baixo o lema “Das Catedrais á Lúa” inclúe traballos moi diversos, algún dos cales xa foron presentados no Día da Ciencia na Rúa en Coruña.

O pasado venres 13 de maio o escritor Gonzalo Moure veu a falar dos seus libros e da súa vida ao alumnado de 1º de ESO que tiña como libro de lectura unha das súas obras, Los Gigantes de la Luna.