IES Maximino Romero de Lema

O pasado martes 31 de outubro o Departamento de Inglés celebrou o concurso de cabazas de Halloween con temática animal. Foron moitas as ideas orixinais que se viron nas creacións das cabazas por parte dos participantes, mais só se concedían dous premios. Éstes foron para a cabaza máis grande (“Scary Cat” by Hadrián Otero Nieto and Andrea Pastoriza Lema, from 2º BACH) e para a cabaza máis pequena de todas (“Black Bat” by Daniela Vázquez Vázquez, from 1ºESO). Os regalos sorpresa personalizados foron todo un éxito, así que esperamos aínda máis participación nos próximos concursos!

Congratulations everyone for the great work!

O pasado xoves Paula Carballeira conversou arredor d´As alumnas co Club de Lectura de Adultos do IES Maximino Romero de Lema. Froito desa xuntanza e como actividade complementaria da lectura resultou este álbum de fotos a imitación dos que se facían polos anos 60, pero reflectindo a esencia da peza teatral.

O encontro literario que esta tarde mantivo o Club de Lectura de Adultos do IES Maximino Romero de Lema permitiu realizar unha viaxe no tempo a unha época moi próxima a través do libro As alumnas de Paula Carballeira, para coñecer e lembrar o vivido polas mulleres cando estaban predestinadas a cumprir un rol que non respondía nin respectaba os seus sentimentos, necesidades e aspiracións.

As alumnas recibiu o Premio Nacional de Literatura Dramática en 2023, sendo a primeira muller que recibe este galardón por escribir unha obra en galego, e ademais foi merecedora do Premio Follas Novas do Libro Galego 2023. Nela a autora rende unha homenaxe a María Barbeito que, igual que moitas outras mestras da Segunda República, loitaron por lograr unha educación igualitaria, creativa, libre e renovadora.  Unha tarefa que se viu truncada pola ditadura de Franco, que supuxo un retroceso en dereitos de todo tipo e que afectaron, con dureza á educación e ás mulleres.

As protagonistas desta peza teatral son dúas antigas alumnas de María Barbeito que  representan os “posibles camiños” que tiña a muller durante a época de represión: Elvira acaba desempeñando o papel de esposa e nai ideal e renunciando ás súas aspiracións, mentres que Rosa loita por desenvolver esas aspiracións nun contexto de limitación e discriminación especialmente coa muller.

O acto iniciouse cunha sesión de fotos na que, imitando as que se facían nos anos 60 ao alumnado, os e as asistentes retratáronse cun mapa de Galicia, xa que queriamos reflectir o cambio da actualidade. 

A escritora amosouse moi contenta pola pequena recreación dunha escola na que se mesturaban elementos destacados na súa obra. A continuación sentamos arredor dun café e a autora foi explicando aspectos de As alumnas alentada polos comentarios e preguntas das persoas presentes. 

Foi un encontro moi enriquecedor no que se falou do difícil que era para a muller saír do camiño trazado para ela, da lingua vernácula, do medo, da desigualdade, da liberdade e das conquistas das mulleres, cuestións que poden parecer consolidadas pero que sempre penden dun fío.

Onte venres tocoulle a quenda dos almorzos saudables ao alumnado de 2º de Ciclo Medio que degustou unha primeira comida na que se combinou saúde, benestar e pracer.

Saúde polo abano de alimentos variedades e saudables que degustaron, pracer porque compartiron mesa con compañeiros e compañeiras de clase, e benestar porque o realizaron nun ambiente moi distendido, o que tamén axuda a facer grupo.

Que mellor xeito de comezar a xornada de aprendizaxe?

Hoxe o alumnado de 1º Ciclo Medio tivo a oportunidade de gozar dun almorzo equilibrado no Centro seguindo os consellos que lles demos na breve charla inicial.

1º Tomarse tempo para almorzar: o tempo ideal é de 20 a 30 minutos para realizar unha boa dixestión. Eles e elas hoxe cumpriron de xeito sobrado este requisito pois tiveron sobre uns 40 minutos.

2º Elixir ben todos os nutrientes: é fundamental afrontar con enerxía a xornada de aprendizaxe, por iso lles propoñemos proteínas, graxas, hidratos de carbonos, fibra, vitaminas e minerais que conteñen a variedade de alimentos que lles ofrecemos: froita, lácteos, cereais, pan e aceite de oliva entre outros.

3º Dar máis importancia á calidade: os produtos que ofrecemos na súa maioría son galegos e de gran calidade co que tamén cumpriron este requisito. 

4º Fomentar a dieta mediterránea, un dos modelos nutricionais máis saudables a nivel mundial. Por iso servimos aceite de oliva.

5º Planificar o almorzo: no día de hoxe todo o alumnado tiña planificado o seu almorzo abríndolle un abano de propostas diferentes.

Polo tanto, confirmamos o que sinalábamos ao comezo: o alumnado de 1º de Ciclo Medio tomou un almorzo completísimo e moi equilibrado.

O pasado martes, 31 de outubro, co gallo do Samaín excelentes intérpretes de 1º e 2º de ESO realizaron lecturas dramatizadas na Biblioteca. Leron contos e lendas tradicionais arredor da morte que lles transmitiron no seo da familia ou orixinais deles e delas. Mortos, aparecidos, pantasmas... acompañáronos durante a sesión nas que houbo algún que outro sobresalto, arrepío, medo por parte do público asistente... mais tamén un pequeno agasallo que unha leda caveira ofrecía a quen participaba.

Velaquí vos deixamos o arquivo fotográfico no que aparecen os/as principais protagonistas para revelarlle a todas as persoas do Aquén o acontecido nesta sesión de literatura oral.

O día 2 de novembro estiveron con nós Germán e Mélani de Gerca Acero y Metal. O alumnado  de FP Ciclo Medio (1º e 2º curso) participou nunha charla sobre esta empresa da contorna na que traballan máis de 100 persoas e que facturou 5 millóns de euros no exercicio pasado e para este prevé facturar 7 millóns de euros.

A responsable de comunicación de Gerca, Mélani Lois, presentou a empresa ao alumnado: historia, números, fitos.., mentres que Germán Lema falou do futuro, da importancia da formación, da existencia dunha saída profesional no territorio sen ter que marchar de aquí.

O punto de máis interese, na charla, foi cando Germán fixo referencia aos soldos e salarios na empresa: as caras da rapazada tornaron en agradable sorpresa. Sinalou tamén que as situacións de crise, como a da pandemia, ás veces -no seu caso así foi- convértense en oportunidades. Exemplificouno co pedido que recibiran de máis de 30.000 cadeiras para os centros educativos do Goberno de Italia.

Foi unha sesión de descubertas que nos deixou abraiados. 

Grazas por vir; voltade axiña coas vosas novas marabillosas GERCA

Hoxe o alumnado de FPB e o de 2º do Ciclo Superior participaron no programa dos Almorzos saudables, unha iniciativa coa que apostamos por complementar a formación do noso alumnado en nutrición a través de actividades que conxugan saúde, benestar e pracer. 

Nun ambiente agradable gozaron, despois dunha pequena charla, do abano de opcións saudables que lles propuxemos para a primeira comida do día e que, de seguro, lles axudou a enfrontar con enerxía saudable e duradeira a longa xornada de clases que tiveron a continuación rendendo nas mesmas e controlando o apetito.