Secretaría

No marco das actividades vinculadas ao “mes da muller”, este próximo luns visitaranos o realizador gondomareño Antonio Caeiro, quen nos vén presentar “Eu tamén necesito amar”. Este documental amósanos en primeira persoa a historia íntima de dezasete mulleres da nosa contorna nunha sociedade que, coas feridas aínda abertas da Guerra Civil, estrea unha ditadura que duraría máis de corenta anos.

Trátase, xa que logo, da memoria oral do amor e a represión -política, relixiosa e social- vividos, e sufridos, en tempos de guerra e miseria, de pensamentos e vivencias testemuños dunha época escura, non tan afastada, que cómpre visibilizarmos porque, como reivindica o director “a historia deste país está chea de mulleres, invisibles na maioría das veces, que levantan a súa casa sen precisar de home á sua beira”. Fermosa e necesaria homenaxe á afouteza, afectividade e á liberdade das nosas mulleres! 

Este venres celebrouse na Facultade de Ciencias do Mar de Vigo a fase local da Olimpíada Internacional de Física, e a ela acudiu o noso alumno de 2º de bacharelato Pedro Martínez Rajoy. Aínda que teremos que agardar uns días para saber se consegue ser un dos dous alumnos seleccionados pola Universidade de Vigo para competir na fase nacional -previa á internacional e iberoamericana-, sentímonos moi orgullos@s del, pois chegar aquí xa é todo un triunfo de talento e esforzo. Parabéns a Pedro e ao seu profesor César Rodríguez!

Esta semana os grupos de 1º ESO visitaron o Museo Etnográfico Liste de Vigo, nunha saída lúdico-didáctica organizada polos departamentos de música e galego, alén do Equipo de Dinaminazión da Lingua Galega. Á parte de coñecer a colección de pezas vinculadas coa etnografía galega (oficios tradicionais, crenzas...), o alumnado realizou diversas actividades teórico-prácticas que lles permitiu afondar no coñecemento da nosa tradición. No obradoiro “Entroido: madamas e galáns na outra banda do río” coñeceron as personaxes máis destacadas do noso Entroido e mesmo tiveron a oportunidade de confeccionaren o seu propio sombreiro. No obradoiro “Instrumentos humildes”, alén de afondaren na clasificación, xeitos de tocar e historia de instrumentos de noso e doutras culturas, chegaron a elaborar un sinxelo instrumento tradicional. Diversión e aprendizaxe nunha xornada única!