Skip to Content

Educación Infantil

Actividades COVID-19 semana 3

Ao igual que a semana pasada, para esta semana (última antes das "vacacións" de Semana Santa) deixámosvos 10 RETOS, máis ideas de ACTIVIDADES (non teñen porqué facelas todas, simplemente intentamos darvos variedade para que teñades onde elixir) e uns VÍDEOS para moverse.

Lembrámosvos o noso correo electrónico para que nos sigades enviando 1 foto ou vídeo dalgún reto ou actividade das que vos propoñemos: infantilvista@gmail.com. Moitísimas grazas!

 

RETOS

1. Fai 10 bolas con papeis usados que xa non necesites (antes de reciclalos no colector azul) e intenta ENCESTAR as máximas posibles nunha papeleira, nunha caixa, nun cubo... Compara o teu resultado cos da túa familia (quen encestou máis, cantas máis, quen encestou menos, cantas menos, empate…). Tamén podedes facer un ranking e intentar superarvos cada día.

2. Aprende a facer unha TRENZA. Podes usar o pelo dun familiar, 3 cordóns, 3 palliñas…

3. MASA DE MODELAR caseira.

 

Fonte: aulasgalegas.org/plastilinas-caseiras

4. Completa 3 sesións de IOGA.

Sesión 1.

Sesión 2.

Sesión 3.

5. Presenta a túa MERENDA dun xeito orixinal, para que semelle un animal ou calquera outra cousa que se che ocurra.

 

6. TRANSFORMA un brick de leite, unha oveira, unha botella de auga… en algo totalmente distinto.

7. Eres capaz de chegar do salón á túa habitación cos OLLOS PECHADOS? A túa familia proporcionarache as indicacións necesarias: 4 pasos cara diante, 3 á dereita (se non saben dereita/esquerda, practicar previamente cal é cal).

8. Creatividade ao poder. Que podes DEBUXAR a partir deste punto? Pódelo colocar no lugar do folio que queiras (non ten porqué estar no centro).

9. ADIVIÑA adiviña. [Unha pista: son cousas relacionadas co proxecto do cole, co mar!]

10. Animais PROGRAMADOS. A onde chega cada animal mariño seguindo as indicacións que nos dan as frechas? Podedes debuxar o panel nun folio e ir movendo unha ficha que simule o animal ou ir debuxando o camiño cun lapis. 


 

ACTIVIDADES

- Identificar EMOCIÓNS ou SENTIMENTOS que exprese un familiar mediante mímica: contento, triste, enfadado…

- Fomentar que os nenos e nenas expresen COMO SE SENTEN en distintos momentos do día: cando se levantan, antes, durante ou despois de bañarse, de realizar algunha actividade ou algún xogo, de ver unha peli, etc.

- O 27 de marzo foi o "Día do TEATRO". Disfrázate e cóntanos un conto ou unha historia!

- Imitar SONS e/ou MOVEMENTOS de animais e que un familiar trate de adiviñalos, ou viceversa.

- Debuxa/grava un vídeo ou audio explicando que cousas vas facer cando poidamos saír das nosas casas.

- CONSTRÚE torres, cidades, esculturas… con material de refugallo que vaiades xerando (rolos de WC, bricks, envases, iogures, caixas de cartón…).

- Elabora a LISTA DA COMPRA escribindo ao lado de cada cousa o número de unidades que necesitamos. Cando chegue a compra, revisar que efectivamente mercamos o mesmo número de unidades que anotamos previamente. 

- Elabora un DOMINÓ de imaxes:

1º: fai fichas do mesmo tamaño e divideas á metade. emprega cartóns (de caixas de cereais, de bricks…).

2º: recorta alimentos dun folleto do súper, necesitarás varias imaxes do mesmo alimento para que o dominó funcione (varias mazás, varias caixas de galletas, varias tabletas de chocolate…). Cando teñas as imaxes recortadas terás que pegar dúas en cada ficha. Por exemplo: plátano-tableta de chocolate, mazá-mazá, botella de auga- xel de baño, tableta de chocolate-xel de baño….

- Tamén podes elaborar un BINGO de imaxes, dividindo cada cartón en 8 casillas e en cada casilla pegando un alimento do folleto do súper. Podes facelos de moitas temáticas: con imaxes de calquera cousa que se che ocorra e teñas á man, con puntos, con números, con letras, con nomes, con símbolos inventados….

- Fai un 3 EN RAIA con material reciclado (papel, cartón, tapóns de botellas...), customízao e a xogar!

- ORDEA obxectos que teñas pola casa seguindo un criterio dado: de máis alto a máis baixo, de máis grande a máis pequeno, de máis groso a máis estreito…

- Forma LETRAS co teu propio corpo.

- Facer DESCRICIÓNS de imaxes, fotos familiares… Por exemplo: hai unha persoa ao lado de _____________ e está facendo _____, leva posto ________ ….

- Pon a proba os teus SENTIDOS: COS OLLOS TAPADOS describir (é grande/pequeno, duro/brando, suave/áspero, liso/rugoso…) e tratar de adiviñar que obxecto é o que nos da un familiar mediante o tacto, escoitar un son e tratar de adiviñar de que se trata, describir unha comida que nos da un familiar (salgado, doce, ácido, amargo…) e intentar adiviñar o que é, describir diferentes aromas (perfume, xel de baño, comidas, especias, flores) e intentar adiviñar o que é…

- Busca 5 cousas de cada COR que haxa na túa casa.

- EXPERIMENTA para intentar atopar unha vacina para o virus (mesturando auga, aceite, colorantes... ou o que se che ocorra). Podes enviarnos un vídeo ou audio explicándonolo!

- Como acabarías ti co virus? Envíanos un audio ou vídeo explicándonolo!

 

Tamén podedes realizar algunha das actividades propostas nas SEMANAS ANTERIORES ou repetir as mesmas, perfeccionándoas.


 

A MOVERSE!

 

 

 

 

 

Actividades COVID-19 semana 2

Esta semana propoñémosvos 10 RETOS e unhas cantas ACTIVIDADES! Ademais, deixámosvos máis VÍDEOS para mover o esqueleto!

Xa que non podemos vernos presencialmente, creamos unha conta de CORREO ELECTRÓNICO para que poidades enviarnos fotos/vídeos dos retos e das actividades (así como das receitas de cociña que sigades facendo ou realizando tarefas domésticas) Así, poderemos preparar unha sorpresiña en forma de vídeo para que as nenas/os vexan que todos/as estamos traballando nas nosas casas! Tamén podedes empregalo como medio para facernos chegar as vosas dúbidas/propostas.

A dirección de correo electrónico é: infantilvista@gmail.com 

RETOS

 

EXPLICACIÓN DOS RETOS

1. Crea un MANDALA con diferentes materiais: comida, tapóns, canicas, ceras, roupa...

2. Segue este RITMO empregando distintos medios para realizalo: partes do corpo, menaxe de cociña... 

3. Forma unha TORRE de rolos de papel hixiénico (5-10). Transpórtaos, de 1 en 1, para formar a torre noutro punto marcado previamente. Es capaz de facelo en 1 minuto?

4. MEMORIA E RAPIDEZ. Busca na casa 5 cousas que che diga outra persoa. En canto tempo eres capaz de facelo

5. Aprende a ATAR os cordóns das zapatillas.

6. Es capaz de facer o SWISH SWISH?

7. Convirte unha CAIXA DE CARTÓN en algo totalmente diferente!

8. SOPRA QUE TE SOPRA. Crea un circuito (con plasti, bloques, tapóns...). Fai unha boliña de papel, colócaa no inicio e, cunha palliña, sopra para levar a bola por todo o circuito. 

9. Pon a proba o teu EQUILIBRIO. Transporta un libro na cabeza polo corredor da túa casa sen que che caia e sen usar as mans. Podes marcar unha liña no chan se queres xogar a ser un/unha equilibrista!

10. Os atrapasonos atrapan pesadelos. Elabora un ATRAPACORONAVIRUS que atrape o famoso bicho con materiais que teñas pola casa e colócao na túa porta/ventá.


 

ACTIVIDADES

  • Elaborar unha AXENDA cos nomes e números de teléfono das persoas que máis nos importan. Cada día imos escoller unha para chamala. Marcaremos o seu número de teléfono dictado por outra persoa (se non sei algún número dos que me dictan empregaremos unha recta numérica contando dende 1 en diante para atopalo). Outro día poden ser as nenas/os as que dicten o número a outra persoa.
  • Humedece un algodón e colócao nun recipiente (vaso, envase de iogur...). Pon 5 garabanzos dentro. Repite a mesma operación con lentellas e fabas. Comproba diariamente a súa evolución e mantén sempre o algodón húmido. Cal é o primeiro en XERMINAR?
  • Busca un envase de 1 litro de capacidade e uns vasos. Enche o envase de AUGA. Cantos vasos poderemos encher coa auga do envase? Comprobemos. E se o recipiente fose de 2 litros, cantos vasos encheríamos? Comprobemos.
  • Realizar SERIES con alimentos ou materiais que teñades na casa. Por exemplo: macarrón-garabanzo, pinza vermella-pinza verde, lentella-lentella-arroz...
  • Debuxar cadrados, rectángulos ou triángulos no chan, cortar ESPAGUETIS do tamaño das liñas e colocalos enriba de cada figura. Cantos lados ten cada figura? Por que non podemos facer un círculo con espaguetis?
  • Inventa un BAILE para a túa canción favorita.
  • Identificar os SENTIMENTOS das persoas que saen en revistas ou xornais. Recortar as fotos e facer un collage con cada sentimento. 
  • Busca letras maiúsculas en xornais (de ser necesario, as familias poden escribir a letra que ten que buscar), recórtaas e pégaas nun papel. Agora recorta cada letra e xa terás un ABECEDARIO de letras móbiles para compoñer palabras.
  • Elixe unha LETRA (podes aproveitar o abecedario móbil da actividade anterior) e pensa/escribe un animal, un nome de persoa (compañeiras/os, familiares...), unha comida e un obxecto que comece por esa letra.
  • Coa APP ChatterPix, gravar unha mensaxe. Poden elixir unha imaxe da propia app ou ben sacar eles unha foto a un peluche, debuxarlle unha boca e falar como se os peluches cobrasen vida!
  • Fai diferentes camiños no chan con cinta e... CARREIRA de coches/chapas!
  • Debuxa unha cara nun folio. Cando remates, colle un folio (se é de cor mellor) e faille cortes sen chegar ao final. Pégao na cara que debuxaches a modo de pelo. Despois colle a tesoira e... CÓRTALLE O PELO!


 

A MOVERSE!

Actividades Educación Infantil COVID-19

Estimadas familias:

 

Debido á suspensión das actividades lectivas por motivo do COVID-19, a Consellería de Educación publicou unhas instruciónsentre as que se atopa a programación de actividades xenéricas relacionadas cos contidos curriculares para que o alumnado as poida realizar no seu domicilio.

 

Dende o equipo de Educación Infantil do CEIP Vista Alegre propoñemos as seguintes actividades para o alumnado desta etapa:

 

ASEMBLEA: a poder ser, en familia. Durante a mesma podedes:

  • Ver no calendario que día é (número, día da semana, mes, estación, ano), cantos días faltan para o comezo da primavera, que día da semana foi onte, que día será mañá… 
  • Botar unha ollada pola ventá para comprobar o tempo atmosférico: se chove, se quenta o Sol, se venta, se fai frío/calor… 
  • Organizar o día, consensuando entre todas/os as actividades a realizar.
  • Conversar, respectando as quendas de palabra e escoitando activamente aos demais. 

ACTIVIDADES: manipulativas, en papel, en formato dixital, tarefas domésticas… A continuación deixamos unha lista de actividades xenéricas (con algún exemplo concreto para clarificar as mesmas) para que vaiades elixindo as que máis vos conveñan para cada día.

 

Lóxica-matemática:

  • Contar cousas da casa (por exemplo: canta froita hai, estimar para cantos días nos chegará, comparar entre froitas, de cal temos máis, cantas mazás hai máis que plátanos…).
  • Facer agrupacións e comparacións. Por exemplo: cantas froitas de cada temos no froiteiro, de cal hai máis, cantas mazás hai máis que plátanos… O mesmo se podería facer con prendas de roupa, xoguetes, útiles de aseo, menaxe de cociña, e todo o que se vos ocorra.
  • Tarefas domésticas: emparellar calcetíns, dobrar a roupa e colocala no seu sitio, axudar a tender a roupa empregando un criterio de cor coas pinzas, axudar a poñer a mesa contando cantos pratos/vasos/cubertos fan falta…
  • Buscar pola casa cousas redondas, cadradas, triangulares, rectangulares e facer agrupacións segundo a forma e/ou tamaño.
  • Xogar ao bingo, podendo elaboralo vós mesmos/as con números, letras, animais, formas xeométricas, medios de transporte...
  • Xogar a xogos de mesa: parchís, oca, dominò, cartas...
  • Elaborar unha receita de cociña.
  • Facer algún experimento.
  • Facer crebacabezas
  • Escribir os números.

Lectoescritura:

  • Actividades relacionadas con palabras que sexan signficativas para elxs (nome dos nenxs da súa clase, personaxes de contos, superheroes/superheroinas, o menú que van comer ese día…), 
  • Intentar escribir/compoñer palabras.
  • Ordenar palabras pola sùa lonxitude (longas/curtas).
  • Buscar letras concretas en certas palabras.
  • Contar cantas letras ten cada palabra.
  • Buscar palabras que comecen/rematen por unha letra determinada.
  • Actividades relacionadas con contos: contar un conto e que faigan un debuxo, falar das personaxes, analizar a portada, o título, inventar un final alternativo…

Actividades artísticas

  • Debuxar.
  • Colorear.
  • Pintar con témperas ou acuarelas.
  • Estampación con diferentes materiais (esponxas, rolos de papel hixiénico, corchos…).
  • Realizar collages recortando e pegando.
  • Modelado de arxila/plastilina.
  • Sinestesias (pintar ao ritmo de diferentes musicais).

MERENDApreparar un aperitivo saudable para media mañá, prestando especial atención á hixiene de mans e á autonomía para comer.

 

HORA DE MOVERSE: se non teñen a opción de saír a un patio/xardín da casa, propoñémosvos facer algo de exercicio dentro con este tipo de vídeos:

 

 

 

 

 

 

 

HORA DO CONTO: lectura dun conto por parte dun adulto ou individualmente.

Neste enlace tedes moitos clásicos con pictogramas como este: 

 

 

Tamén poden ver e escoitar contacontos online, como por exemplo:

 

 

 

XOGO LIBRE: cos xoguetes que consideredes, recollendo os mesmos ao finalizar. 

Esta é unha proposta totalmente flexible a aberta que, loxicamente, cada quen adaptará en función da súa situación laboral e familiar. 

Moito ánimo para todas e todos! Quedémonos na casa. Todo vai ir ben. 

O peixe globo

O alumnado de 5º de Educación Infantil B gravou un vídeo con axuda do croma e a app Green Screen Live Video Recording para explicar todo o que investigaron sobre o peixe globo.  

Distribuir contido


by Dr. Radut