Skip to Content

ADMISIÓN 2019-2020

 

O 1 de marzo ábrese o prazo para solicitar praza nos centros sostidos con fondos públicos, regulado pola Orde do 12 de marzo de 2013, a Orde de 25 de xaneiro de 2017 e polo Decreto 254/2012. Aqueles que estean interesados deberán presentar no centro:

  • Anexo II da Orde do 25 de xaneiro de 2017, que se facilitará no centro. Tamén se pode descargar da páxina web da consellería. A solicitude terá que estar asinada por calquera dos titulares da patria potestade ou representantes legais do alumno/a. No caso de separación ou divorcio será necesaria a sinatura de ambos proxenitores, agás que a patria potestade estea atribuída, con carácter exclusivo, a un deles.

  • Fotocopia do libro de familia ou DNI do alumno/a.

  • No caso de que o alumno/a proceda doutro centro será preciso o certificado de estudos no que conste o curso no que estivo matriculado no ano académico 2018-19.

  • Ademais, segundo a Orde de 25 de xaneiro de 2017, poderase solicitar admisión no centro educativo por vía telemática, dando cumprimento a nova lei 39/2015 de procedemento administrativo común.https://www.edu.xunta.es/admisionalumnado/PaxinaInicio.action

 

O prazo de entrega das solicitudes será do 1 ao 20 de marzo.

Tal e como recolle a normativa actual, recordámosvos que:

  • Cada alumno/a so pode presentar unha única solicitude no centro onde solicita praza en primeiro lugar. De non ser así perderá os dereitos de prioridade que lle corresponden.

  • O alumnado que quere permanecer no mesmo centro ten garantida a praza nese centro. De querer cambiar de centro deberá comunicar a renuncia á reserva antes do inicio do prazo de presentación das solicitudes de admisión.

  • O alumnado que ten garantía de permanencia nun centro, se presenta solicitude de admisión noutro centro distinto, deberá comunicalo, ao mesmo tempo, ao centro de orixe.

  • A zona de escolarización abrangue todo o Concello de Fene.

  • Para os alumnos/as que pasan a 1º da ESO recordarvos que estamos adscritos ao IES de Fene.

  • Os Servizos Complementarios do centro son:

Comedor, xestionado pola consellería.

Transporte gratuíto dende Maniños, todo Barallobre, Magalofes e Perlío.

Ampla oferta de Actividades Extraescolares: patinaxe, obradoiro de cociña, ximnasia rítmica, robótica, fútbol sala, zumba, baile moderno e proxecto Voz Natura, entre outras.

Servizo de Madrugadores,xestionados polo centro e o ANPA.

 

BENVIDAS E BENVIDOS AO NOVO CURSO 2018/19

 Estimadas familias , alumnas e alumnos:

O curso 2018/19 comeza xa, e temos mais gañas que nunca de recibirvos e comezar a traballar con vos nun curso que sen dúbida será apaixonante. 
Ademais da benvida, queremos comentarvos:
 
  • INICIO DE CURSO: coma vos transmitimos a finais do pasado curso, o curso iniciarase o 12 de setembro. As reunións iniciais coas titoras serán o día 18 de setembro pola tarde. As familias de 3 anos seredes convocadas pola vosa titora na primeira semana de setembro.
  • FONDO LIBROS: as familias de 3º, 4º e 6º de EP poderedes recoller os libros en secretaría dende o 3 de setembro en horario de 9:30 a 10:30 horas e de 12:30 a 14 30 horas preferentemente. Os alumnos de 5º de EP comezan este curso co proxecto EDIXGAL (do que teredes cumprida información en breve)
  • MATERIAL ESCOLAR:  dentro da nosa política de centro, a cooperativa de material de Educación Infantil proporciónaa o centro. O alumnado de Educación Primaria, aportará o material que cada titora indique na reunión respectiva.
  • SERVIZOS COMPLEMENTARIOS: coma sempre os servizos complementarios de Transporte Escolar, Comedor, Ludoteca e Madrugadores, comezan a funcionar dende o 1º día de clase ata o último. As Actividades Extraescolares comezarán o 1 de outubro de 2018, e coma xa é tradicional, contaremos cunha semana de portas abertas do 17 ao 24 de setembro (ambos incluídos).
  • CONSULTAS: na nosa web tedes cumprida información dos servizos, filosofía e Plans de Centro para calquera dúbida no noso correo: ceip.oramo@edu.xunta.es, nos teléfonos do centro 881930136/37/38 ou no teléfono 981101007, e, coma sempre, en secretaría e dirección, teredes cumprida información do que precisedes
 
 
 
Estamos ilusionadas e ilusionados por comezar un novo curso con vós.
 
Benvidos a este novo curso 2018/19¡¡¡

 

ACTIVIDADES EXTRAESCOLARES CURSO 2018/19

ACTIVIDADES EXTRAESCOLARES CURSO 2018/19

 

Estimadas familias, amigos e simpatizantes:

 

Xa están deseñadas as Actividades Extraescolares para o vindeiro curso 2018/19, que se ampliarán en algunha actividade mais que solicitastes..... Eiquí podedes consultar a oferta..... Lembrade son abertas para todos os nenos entre 3 e 12 anos da comarca de Ferrolterra.... Vide probar e coñecernos¡¡¡

 Para calquera consula, coma sabedes estamos na Secretaría e Direción do centro, coma sempre e no correo: ceip.oramo@edu.xunta.es, ou nos teléfonos: 881930137/38 - 981101007

SERVIZO DE MADRUGADORES CURSO 2018/19

Estimadas familias:

Xa temos listo o servizo de madrugadores para o vindeiro curso 2018/19. Este servizo coma é habitual comezará a funcionar o 12 de setembro de 2018, o primeiro día de curso ata o 21 de xuño de 2019, ultimo día do mesmo con total normalidade.

Para calquera consula, coma sabedes estamos na Secretaría e Direción do centro, coma sempre e no correo: ceip.oramo@edu.xunta.es, ou nos teléfonos: 881930137/38 - 981101007.

Eiquí tedes as tarifas e condicións, que se manteñen coma o pasado curso...

 

LISTAXE DEFINITIVA FONDO LIBROS CURSO 2018/19

Estimadas Familias:

A continuación podedes consultar as listaxes definitivas de Fondo Libros (anexadas en PDF), para o vindeiro curso 2018/19. Aqueles que non teñades concedidos todos os libros, e esteades na listaxe de admitidos, serán aportados polo centro educativo, tal e coma reflicte a nosa política de apoio as familias reflectida no noso P.E., que podedes consultar nesta mesma páxina....

O alumnado de 1º e 2º de Primaria, será chamado dende secretaría para recoller os cheques de libros e axudas libros (neste último caso para os alumnos de 3º, 4º, 5º e 6º de EP, tamén).

Calquera dúbida atoparédesnos na secretaría do centro de 9:30 a 14:30 horas, nos teléfonos do cole 881930137/38, no mail ceip.oramo@edu.xunta.es ou no teléfono directo 981101007

ADMISIÓNS COMEDOR CURSO 2018/19

Estimadas familias:

No seguinte documento podedes ver as admisións para o servizo de comedor durante o curso 2018/19 . Os que estades en listaxe de espera, non vos preocupedes, probablemente contaremos con mais prazas a principios de curso e todos poderedes desfrutar deste servizo..... (Adxunto podedes consultar a listaxe en pdf)

Para calquera dúbida podedes poñervos en contacto con nos no centro de 9:30 a 14:30, nos teléfonos e correos da nosa escola e no teléfono de atención 981101007....

Maio 2018

A celebración do Maio e das Letras Galegas son fundamentais na nosa escola, parte do noso código xenético coma escola que aposta pola innovación e mellora da calidade, asentada nos seus valores principios e tradicións.....coma a festa do maio, que vimos celebrando dende a apertura da nosa escola no ano 1979.....

Durante esta semana o traballo, diversión e aprendizaxe e intenso.... Deseño da alfombra floral, preparación do maio, actuacións, cánticos....explicando e comprendendo a tradición, e por suposto, traballando as competencias clave que melloran o rendemento do noso alumnado, dun xeito divertido e fomentando o traballo e sentimento grupal...

 

 

Os nenos parten dun deseño e, coa supervisión das mestras e mestres, deseñan a fermosa alfombra floral do centro.......

Utilizamos flores diversas e serrín tintado, que nos mesmos facemos, buscando tonalidades de cores, deseños....

 

No seguinte video Brais explícanos como fan a alfombra, usando o boceto/deseño e traballan: proporcións, dimensións, calculos, operacións.... Levan a cabo unha excelente organización da tarefa....

Mirade que fermosas alfombras fixemos¡¡¡¡ Moito traballo e diversión = Aprendizaxe e satisfacción....

Tamén preparamos e decoramos o maio... Que fermoso¡¡¡

 

Mirade que ben nos quedou¡¡¡¡

Todos participamos na elaboración do maio e fixemos tributo, as frores, as nosas letras e cultura e a chegada da primavera.....

 

Fixemos un mercadillo, que tivo un obxectivo: financiar a Ópera que estrearemos o vindeiro 15 de xuño , pola compañía de Ópera Big Bang, composta polo alumnado de 5º e 6º de Primaria, titulada Xuntos pola Carballeira....

Fixemos unhas fermosas actuacións as que asistiron as familias, amigos e simpatizantes.... Grazas por vir e participar¡¡¡¡

 

 Rematamos cantando e bailando o Maio 2018 ... Fermosa tradición e fermosas experiencias e aprendizaxes..... Aprendemos moitísimo e pasámolo xenial, coma sempre¡¡¡

 

FONDO LIBROS E AXUDAS LIBROS

Estimadas familias:

Acaba de saír a resolución do 9 de maio de 2018 pola que se regula:

- A participación nas Axudas a Libros, destinada para os cursos de e de Educación primaria, coa cal poderedes optar a un cheque, para a compra dos libros do próximo curso de 90 euros, no caso de familias cunha renda per cápita superior a 5400 euros e inferior a 9000 euros, ou de 170 euros no caso de familias cunha renta per cápita inferior a 5400 euros.

O alumnado en situación de garda e/ou tutela da Xunta de Galicia ou cunha discapacidade igual ou superior a un 65% optará a máxima axuda con independencia da renda.

- A participación en Fondo Libros, destinada para os cursos de , , e de Educación Primaria, coa cal poderedes optar a un préstamo de 4 libros, no caso de familias cunha renda per cápita superior a 5400 euros e inferior a 9000 euros, ou de 6 libros no caso de familias cunha renta per cápita inferior a 5400 euros.

O alumnado en situación de garda e/ou tutela da Xunta de Galicia ou cunha discapacidade igual ou superior a un 65% optará a 6 libros con independencia da renda.

- Axudas a material escolar, mediante cheque de 50 euros, esta axuda está destinada aos alumnos matriculados en primaria, con familias con renda per cáptita inferior a 5400 euros.

 

Para optar as axudas deberedes presentar o impreso  ED330B, que remitiremos dende o centro, na secretaría, coma sempre ou por sede electrónica. Se tedes algunha dúbida atenderémosvos coma sempre en secretaría ou dirección.

 

RECOMENDAMOS QUE TODAS AS FAMILIAS QUE VAIAN A TER ALUMNOS EN PRIMARIA O VINDEIRO CURSO 2018/19 SOLICITEN O FONDO LIBROS, XA QUE ADEMAIS ASÍ OPTARÁN AS AXUDAS COMPENSATORIAS QUE PROPORCIONA O CENTRO, CANDO A CONSELLERÍA DE CULTURA, EDUCACIÓN E O.U NON O FAGA.

DATAS E REQUISITOS: 

Prazo límite para presentar a solicitude a FONDO LIBROS E AXUDAS LIBROS ata o 22 de xuño de 2018.

Entrega dos libros de 3º, 4º, 5º e 6º de EP: As familias de 3º, 4º, 5º e 6º de Educación Primaria que obtiveran préstamo de libros de texto, deberán entregalos antes do 21 de xuño de 2018, coma data límite. Este é un requisito imprescindible para poder optar ao Fondo de libros de Texto e as Axudas a material escolar do próximo curso 2018/19. Quedan excluídos desta obriga as alumnas e alumnos que presenten unha discapacidade igual e ou superior a un 65%. Os libros deberán estar nun bó estado, o desgaste polo normal uso non se entende coma desperfecto.

A recollida de libros de texto, no caso de 3º, 4º, 5º e 6º de EP, para o vindeiro curso 2018/19 realizaráse a partires do 10 de setembro de 2019.

O cheque de Axudas a material de 50 euros, poderáse cobrar coma data límite, o 5 de abril de 2018. Este cheque deberá cobrarse integro de unha soa vez e nunha única tenda, non poderá fraccionarse.

As listaxes de admitidos e excluídos provisionais de FONDO LIBROS sairán na web e taboleiro do centro, coma data límite o 12 de xullo de 2018, habendo 2 días hábiles de reclamación e as listaxes definitivas sairán o 20 de xullo de 2018.

COMPATIBILIDADE:

Optar a estas axudas e fondo é compatible con outras as que podades optar.

PRESENTACIÓN DE SOLICITUDES:

En secretaría ou sede electrónica ata o 22 de xuño de 2018, cando remata o prazo.

 

APORTACIÓN E POLÍTICA DO CENTRO:

O CEIP Plurilingüe O Ramo, de acordo co establecido no seu PE, aprobado en Claustro e Consello Escolar o día 23 de xaneiro de 2018, APORTARÁ:

- Os libros ao alumnado de 3º, 4º, 5º e 6º de Primaria, que queden fóra do Fondo Libros que realiza a administración. Para esto é fundamental facer a solicitude de participación no Fondo antes do 22 de xuño de 2018.

- O material escolar para o alumnado de Educación Infantil necesario para a súa formación ao longo da súa estancia nesta etapa.

Estas axudas do centro desenvolveránse sempre que a dispoñibilidade económica do centro o posibilite. Esta política é unha liña prioritaria para o mesmo.

REFERÉNDUM NO RAMO

Como sabedes hai uns dias ( durante a Semana Santa) fomos partícipes dun acontecemento moi especial : o nacemento dunha oca ( filla dos nosos Romeo e Xulieta).
Para poñerllle nome decidimos facer un REFERÉNDUM, e recreamos un proceso electoral: cada aula decidiu un nome, constituíuse unha mesa electoral, revisouse o censo, votouse o nome,... a partires de agora podémoslle chamar a nosa pequena oca: CJ. Así se chamará por mandato popular....
Que mellor para coñecer os procesos democráticos que exercelos e recrealos!!!!!

 

Constituíuse unha mesa electoral que contrastou o censo, supervisou a votación e preservou a transparencia democrática...

Asesoraron aos votantes... a participación foi un éxito cunha participación do 100%...

 

Desfrutamos a festa democrática e coñecemos en persoa coma se desenvolve un proceso democrático de votación e elección en equipo....

Pasámolo xenial... e puidemos entender en que consisten unhas eleccións democráticas e comparalas coas do noso País e Comunidade Autónoma de Galiza....

 

E por fin a nosa pequena oca ten nome CJ.... que axiña irá ao Galiñeiro Pedagóxico con Romeo e Xulieta....

Grazas pola gran participación e ilusión.... Foi un fermoso día, cheo de aprendizaxes¡¡¡

 

 

HORTO ESCOLAR

O traballo no entorno natural ten unhas posibilidades educativas óptimas para o desenvolvemento e aprendizaxe do alumnado. Debido ao magnífico entorno natural que ten a nosa escola as posibilidades de traballar na natureza son moi amplas.

Dentro do noso proxecto educativo é un principio básico o coñecemento e coidado do entorno... para isto unha das actividades que promovemos é o cultivo, coñecemento e seguimento (estudo) das prantas, a través da realización de un horto escolar tanto a nivel curricular (en horario lectivo) coma a nivel extraescolar, na nosa actividade de obradoiro da natureza....

Mirade o traballo do noso alumnado na hortiña do Ramo...

Eiquí temos as prantas que levamos ao noso invernadoiro... esperamos que saian prantaremolas con moita ilusión...

Regamolas e prantamolas....

Estudamos e preparamos o terreo....

Cada día a nosa hortiña foi tomando mais forma e este bò tempo vai facer que as nosas leituguiñas nazan mais fortes e sás....

A terra fértil foi fundamental no bó resultado....

O mellor é o ben que o pasamos¡¡¡¡ O traballo en contacto co entorno, ademais dos bos resultados educativos, fai que volvamos as nosas orixes, estemos ledos e en contacto co espazo natural.....

E  velaiquí tedes o resultado: Tachán¡¡¡¡ Leitugas fresquiñas e ecolóxicas.......

E por suposto Romeo e Xulieta probaron as nosas magníficas leitugas¡¡¡¡¡

 

Que ben o pasamos e aprendimos moitísimo neste proceso, coma sempre¡¡¡¡

 

Queridos amigos, familias e simpatizantes, estade atentos... pronto veredes as nosas fresas.... e un horto moi especial dos alumnos e alumnas de 6º de Primaria......

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Distribuir contido


by Dr. Radut