Grazas ao concurso de "Búscase talento" que celebrou a Deputación de Pontevedra, un dos nosos alumnos, Goro de 3ºA foi premiado con varios agasallos e un deles foi unha representación teatral para os dous cursos de 3º. Pasamos unha sesión moi divertida con MIGALLAS TEATRO, como sempre fixéronnos gozar dos contos, da música e do galego, porque sempre aprendemos algunha palabra nova, que bonito idioma temos! 

Ollade que ben o pasamos!

MOITAS GRAZAS, DEICA OUTRA!

Cada 5 maio, celébrase o DÍA MUNDIAL DA HIXIENE DE MANS.

E para celebralo, esta mañá visitáronnos unha chea de enfermeirxs e médicxs do Centro de Saúde.

Ensináronnos varias cuestións moi importantes:

·     POR QUE DEBEMOS LAVAR AS MANS?

Porque, ao lavalas, evitamos que entren no noso corpo os xermes, as bacterias, os virus e todos eses bechiños “invisibles” que transmiten enfermidades.

·     CANDO DEBEMOS FACELO?

• Despois de ir ao baño.
• Antes de comer.
• Despois de sonar os mocos.
• Despois de tocar un animal.
• Antes e despois de manipular froitas ou hortalizas.
• Despois de xogar coa terra.
• ...

·     DURANTE CANTO TEMPO?

O recomendable é facelo, polo menos, durante 30 segundos.

·     COMO?

Ensináronnos a seguir 8 pasos, tantos como os tentáculos do noso querido Papirus:

1º Mollar moi ben as mans.

2º Botar xabón.

3º Frotar moi ben as palmas.

4º Logo, os dorsos das mans.

5º A continuación, os dedos.

6º Despois, as unllas.

7º Enxaugar ben as mans con auga abondosa.

8º Secar moi ben as mans cunha toalla de papel e antes de tirar con ela á papeleira, utilizalo para asegurarnos de que a billa da auga queda pechada.

O mellor de todo foi que non só nos explicaron como facelo; senón que puxemos en práctica o que aprenderamos e para iso, manchamos as mans de pintura!!!

RESULTOU IGUAL

DE INTERESANTE QUE DE DIVERTIDO!!!!

ADEMAIS, ERAN TODXS

MOI SIMPÁTICXS E AMABLES!!!

 PUXEMOS AS NOSAS MANS

NAS MELLORES MANS!!!

FOI ESTUPENDO!! MOITAS GRAZAS!!!

 CELEBRAMOS O DÍA  MUNDIAL DO LIBRO

CON ANXO GONZÁLEZ GUERRA, O AVÓ DE ALDÁN!!!

E como colofón a un día do máis intenso, tivemos a fortuna de gozar da sabedoría popular da nosa tradición oral da man de Anxo González Guerra.

Que delicia, poder escoitar dunha voz tan tenra e amable as historias antigamente se contaban nas casas a carón da lareira!!

Contounos tres fermosos contos nos que os seus personaxes vivían acontecementos da vida cotiá que transmitían con claridade importantes reflexións que perfectamente nos valen hoxe en día:

·     O valor da independencia que nos dá a lectura, que nos permite buscar información cando o necesitemos.

·     A importancia dicir a verdade cando se conta algo e non crear falsas noticias.

·     O valor de cumprir a palabra dada, porque para relacionarnos con outras persoas é necesario que confíen en nós.

QUE SORTE, TER UN AVÓ QUE CONTA HISTORIAS TAN SABIAS, CON TANTA MESTRÍA E DELICADEZA QUE RESULTAN DOADAS DE COMPRENDER!!

QUE SORTE TEMOS!!!!

Ah!! Admais, agasallounos cunha tarxeta do “LUAR” (o programa da TVG dos venres pola noite) dedicada!!! E díxonos que o venres da semana que vén, cando vaia contar contos ao programa, vaille dicir a GALLOSO, o presentador, que envíe un saúdo para a rapazada do colexio da Pedra!!!

MOITAS GRAZAS, DE CORAZÓN,

FOI UN ENORME PRACER CELEBRAR ASÍ O DÍA MUNDIAL DO LIBRO!!

Co gallo da conmemoración do día do libro, o alumnado de 4º B, estivo elaborando unha chea de relatos e contos nos seus diarios. Todo isto que co seu maxín e creatividade crearon, quixemos compartilo, convertíndoos en audiocontos, que fomos a grabar a radio. Foi unha semana chea de letras, arte e literatura para conmemorar ese día tan importante, e cunha data tan sinalada no calendario como é o DÍA DO LIBRO, que cada 23 de abril celebramos.

"Un libro é unha proba de que os seres humanos son quen de facer maxia" Carl Sagan.

A continuación podedes escoitar o resultado final do traballo tan bo que fixeron os rapaces e rapazas.