INTERVENCIÓN DO EOE

Correspóndelle á inspección educativa a coordinación destes equipos, coa finalidade de garantir a uniformidade das súas actuacións e dar cumprimento ao plan xeral elaborado con carácter anual, tendo en conta as directrices emanadas da Consellería de Educación e Ordenación Universitaria.

As intervencións das persoas especialistas do Equipo de Orientación Específico nun determinado centro educativo poden seguir tres liñas básicas de actuación:

• Como desenvolvemento ou execución do establecido no plan anual (tanto na parte xeral como na referida a cada especialidade), elaborado ao inicio do curso escolar.
• En resposta ás demandas concretas da comunidade educativa, seguindo o procedemento previsto no punto 2 do artigo 24º da Orde do 24 de xullo de 1998, que sinala o seguinte: “Por motivos debidamente xustificados, a intervención das persoas integrantes dos equipos de orientación específicos nun determinado centro poderá producirse por requirimento do/a xefe/a do departamento de orientación, do/a director/a do centro (xuntando o informe do/a xefe/a do departamento de orientación), co visto e prace do/a inspector/a de zona, ou por proposta deste/a último/a. Estas intervencións organizaranse en función das prioridades establecidas no plan anual dos ditos equipos”.
• Por requirimento da Administración Educativa, canalizado a través do/da Inspector/a.

Cada centro educativo deberá facer a súa solicitude no formulario que se xunta, e dirixilo ao EOE do seu ámbito de actuación.

Na actualidade existen 4 Equipos de Orientación Específica de ámbito provincial coa estrutura e composición regulamentariamente establecida (varios especialistas, de entre estes un coordinador do Equipo e un Inspector/a-Coordinador/a).

As necesidades da sociedade e os cambios na concepción actual dos proceso de ensino-aprendizaxe necesitan que o sistema educativo fomente a participación nos procesos de innovación e investigación co propósito de introducir novidades e renovar a práctica docente como elemento de mellora.

Ao mesmo tempo, a eficacia da educación depende en gran medida da capacidade do profesorado e do sistema educativo para renovarse de acordo coas novas demandas sociais, as circunstancias sempre cambiantes do alumnado, os novos coñecementos científicos e didácticos e os correspondentes métodos e instrumentos utilizados que potencien a aproximación do sistema educativo á realidade social.

A Consellería de Educación e Ordenación Universitaria valora aquelas experiencias innovadoras que se están desenvolvendo nos centros educativos galegos e que supoñen unha mellora da calidade da ensinanza, entre outras, en especial na atención a la diversidade.

Así, nesta convocatoria,  recóllese unha modalidade C coa temática de “Atención á diversidade”, para a elaboración de materiais e/ou ferramentas de reforzo educativo que favorezan a accesibilidade ao currículo do alumnado con necesidades específicas de apoio educativo.

• Proposta de recursos para o alumnado con necesidade específica de apoio educativo. Integración desde a área de Educación Física (1º Premio - Categoría Infantil/Primaria).

“Proposta de recursos educativos para o alumnado con NEAE. Integración desde a área de EF” do CEIP Portofaro - Cambre - A Coruña.- Aplicación práctica de diversos recursos para o alumnado con Necesidades Específicas de Apoio Educativo, en concreto con Necesidades Educativas Especiais. Trata aplicacións prácticas para este alumnado fomentando a integración na comunidade educativa en xeral.

Máis información:   Proposta de recursos para o alumnado con NEAE. Integración desde a área de EF

• Programa de intervención educativa desde a perspectiva da diversidade (2º Premio - Categoría Infantil/Primaria)

"Programa de intervención educativa desde a perspectiva da diversidade” do CEIP Rogelio García Yáñez - Ramirás - Ourense.- Na actualidade son moitos os nenos e nenas con trastornos xeneralizados do desenvolvemento que se poden incorporar a clases con alumnado sen discapacidade. Esta investigación tenta achegar á comunidade educativa as peculiaridades do alumnado con Trastornos do Espectro Autista. Este programa de intervención educativa en Educación Infantil permite realizar unha breve discusión sobre a relevancia destas aplicacións educativas, co fin de que poidan servir para realizar inducións válidas aplicables a outras situacións similares.

Máis información:  Programa de intervención educativa desde la perspectiva de la diversidad

• CADT : o profesor de Tecnoloxía en internet (1º Premio - Categoría Secundaria/Bacharelato)

"CADT. O profesor de tecnoloxía en internet" do IES Concepción Arenal - Ferrol - A Coruña.-  CADT, é un sitio en internet que trata de facilitar a tarefa de introducir as competencias básicas na aula de tecnoloxía. O alumnado pode traballar a materia de tecnoloxía en calquera lugar simplemente entrando na web. A mellor maneira de aprender para o alumnado é divertíndose e CADT tenta que desta maneira se alcancen as competencias básicas. Ademais de fomentar a lectura e o uso das TICs.

Máis información:   CADT: o profeosr de Tecnoloxía en internet

• Polizóns a bordo. Traballando por proxectos no CPI de Panxón. (2º Premio - Categoría Secundaria/Bacharelato)

"Polizóns a bordo. Traballando por proxectos no CPI de Panxón" - Pontevedra.- Proxecto documental encamiñado á modificación de estratexias metodolóxicas na aula, desenvolvendo contidos curriculares que atenden á diversidade e empregando diferentes recursos, en especial as TIC, o traballo colaborativo e a biblioteca. Persigue desenvolver as competencias básicas e conseguir un maior éxito escolar.

Máis información:  Polizóns a bordo

• Proposta didáctica na área de Ciencias Sociais para o alumnado con necesidades educativas especiais asociadas a discapacidade auditiva  (2º Premio - Categoría Secundaria/Bacharelato)

"Proposta didáctica na área de CCSS para alumnado con NEE asociadas a discapacidade auditiva" do CEE Nosa Señora do Rosario - A Coruña.- Desenvolvemento de estratexias metodolóxicas,recursos e actividades na Área de Ciencias Sociais na ESO, co obxecto de dar resposta ás NEE do alumnado derivadas da súa discapacidade sensorial auditiva e/ou con outros déficits asociados.

Máis información:  Proposta didáctica na área de CCSS para o alumnado con NEE asociadas a discapacidade auditiva

FADEMGA Plena inclusión Galicia é a Federación de Asociacións en favor das Persoas con Discapacidade Intelectual de Galicia.

Conta na actualiddae con 40 entidades galegas federadas que prestan servizo personas con discapacidade intelectual. As entidades de FADEMGA contan cunha rede 113 centros ubicados polas catro provincias galegas nos que traballan un elevado número de profesionais coa axuda de numerosos voluntarios.

Os servizos que ofrece FADEMGA Plena inclusión Galicia a través das súas entidades son:

• Servizo de atención temperá.
• Servizo de intermediación para a inserción socio-laboral.
• Servizo de apoio para o desenvolvemento profesional e social no centro especial de emprego.
• Servizo de apoio para o desenvolvemento profesional e social en empresa convencional e outras modalidades.
• Servizo de apoio a familias.
• Servizo ocupacional.
• Servizo de atención de día.
• Servizo de apoio á vida independente.
• Servizo de vivenda ou residenciais para persoas con necesidades de apoio intermitente ou limitado e Servizo de vivenda ou residenciais para persoas con necesidades de apoio extenso ou xeralizado,.
• Servizo multiprofesional de diagnóstico, seguemento, avaliación, planificación e coordinación.
• Servizo de tutela.
• Servizo de ocio.

Por otra parte FADEMGA Plena inclusión Galicia ofrece unha serie de servizos e programas ás súas entidades federadas a través das diferentes áreas que integran a Federación como son: Administración, Calidade, Ocio, Comunicación, Emprego e Formación, e Familia.

O fin último que persegue AUXILIA  é o de promocionar a  persoas con discapacidade e enferm@s, nen@s, rapaces/as e adult@s, para conseguir a súa plena incorporación ou reincorporación á sociedade, mediante a prestación de axuda cultural a través da ensinanza, actividades deportivas e de tempo libre, en todas aquelas áreas que se consideren necesarias, a través da metodoloxía de Atención Integral.

AUXILIA configúrase como unha asociación de voluntarios preocupados poa integración social e cultural dos diminuidos físicos e enfermos crónicos.

ANHIDA é unha asociación que traballa na defensa e salvagarda dos dereitos das persoas con hiperactividade e/ou déficit de atención, coa finalidade de facilitar a integración das persoas na sociedade e dar apoio, orientación e información ás familias afectadas.

Esta asociación ten un manual on-line para pais e profesores, avalado pola ADHD Europea (Asociación Europea de TDAH) e presentado en versión española.

Conta con varias sedes na Comunidade Autónoma de Galicia:

• ANHIDA Vigo
• ANHIDA Ferrolterra
• ANHIDA Coruña

A Federación Galega de Institucións para a Síndrome de Down (DOWN GALICIA), ten como finalidade a de coordinar, apoiar e impulsar o labor de contribución das entidades membro á mellora da calidade da vida de cada persoa coa síndrome de Down e con discapacidade intelectual e das súas familias, promovendo o exercicio efectivo dos seus dereitos, deberes e liberdades fundamentais para o seu desenvolvemento integral como persoas.

A misión da Federación Autismo Galicia é mellorar a calidade de vida das persoas con Trastornos do Espectro do Autismo, (TEA) e das súas familias. Os/as destinatarios/as dos servizos da federación son as entidades galegas que desenvolven o seu labor coas persoas con TEA e coas súas familias, e que son membro da Federación.

Autismo Galicia basea a súa actuación nos principios de transparencia informativa, participación, solidariedade, igualdade e de democracia interna, e os valores que defende son:

• Consideración da persoa con TEA como suxeito con dereitos e deberes en igualdade de condicións ao resto das persoas.
• Calidade total nas entidades e servizos.
• Importancia da familia en todos os programas orientados á intervención coas persoas con TEA.
• Necesidade de colaboración entre profesionais e familias para un funcionamento eficiente e de calidade das entidades.

A Asociación Galega de Atención Temperá (AGAT) ten como obxecto a promoción da mellor calidade na atención temperá dos nenos e nenas de Galicia en pro de facilitar o seu desenvolvemento persoal, así como a de facilitar a promoción e a difusión da formación e a investigación a todos os niveis da atención temperá.

Ademais, pretende fomentar a cooperación e colaboración, achegando á comunidade e ás Administracións Públicas a máxima colaboración para estudiar todas as medidas que contribúan á promoción e á asistencia da infancia con discapacidades ou problemas no desenvolvemento.