O conselleiro de Cultura, Educación e Ordenación Universitaria, Xesús Vázquez Abad; e o reitor da Universidade de Santiago de Compostela (USC), Juan Casares Long; asinaron hoxe un protocolo de colaboración para optimizar a atención ao alumnado con alta capacidade intelectual de Galicia. Un acordo ao abeiro do que se constituirá unha rede virtual de traballo para o intercambio de experiencias referidas a este eido.

O obxectivo da colaboración é elaborar un protocolo para a identificación das alumnas e alumnos de Galicia que presenten este tipo de necesidades específicas de apoio educativo. Para iso, a Consellería comprométese a constituír un grupo de traballo mixto de expertos, no que participarán investigadores da USC.

De forma complementaria, desde o departamento educativo da Xunta de Galicia impulsaranse actividades de formación para profesionais do ensino no eido das altas capacidades actuais, nas que tamén participará a universidade de Santiago de Compostela.

Educación inclusiva

Desta forma a Consellería continúa a avanzar na estratexia que vén desenvolvendo en aras dunha educación inclusiva, e que se reforzou coa publicación en 2011 do Decreto 229/2011 polo que se regula a atención á diversidade do alumnado dos centros docentes galegos.

Pola súa parte, a USC contribúe así á transferencia do coñecemento, poñendo a disposición da sociedade galega os froitos derivados da investigación académica que se realiza na universidade neste eido.

A Consellería de Cultura, Educación e Ordenación Universitaria facilitará o transporte escolar de 122 alumnas e alumnos con discapacidades, a través da renovación dos convenios coa Asociación de Atención á Parálise Cerebral e Afíns Amencer-Aspace, coa Asociación en Favor das Persoas con Discapacidade Intelectual (AXPANAEX) e coa Cruz Vermella, coas que se vén colaborando para tal fin. O Consello da Xunta deu hoxe o visto e prace á sinatura das correspondentes addendas, das que se beneficiarán no curso 2012/2013 académico estudantes das catro provincias galegas.

Trátase de escolares con distintos tipos de discapacidades que precisan nos seus traslados ao centro educativo dunha atención específica e personalizada, de acordo coas súas necesidades físicas e psíquicas particulares. Así, os convenios cobren os desprazamentos de ida e volta desde os domicilios dos rapaces aos seus centros escolares, así como a ou desde os centros en que reciban tratamento rehabilitador, cando este coincida co horario escolar. Ademais, o servizo obxecto do convenio estará adaptado ás necesidades horarias das alumnas e alumnos, moitas veces condicionadas polos tratamentos médicos que estes necesitan.

Ao abeiro dos convenio, as ditas asociacións comprométense a facilitar os desprazamentos cos vehículos adaptados que sexan necesarios, así como a prestar os pertinentes servizos de acompañamento e atención ao alumnado trasladado. Pola súa banda, a consellería farase cargo do 80% do gasto derivado da prestación destes servizos.

Coa sinatura deste convenio, a Consellería de Cultura e Educación continúa a dar cumprimento ao seu compromiso coa atención á diversidade do alumnado galego, reforzado a partir da publicación do Decreto 229/2011, do 7 de decembro, polo que se regula a atención á diversidade do alumnado dos centros docentes da Comunidade Autónoma de Galicia. Neste sentido cómpre lembrar que se vén de autorizar a sinatura dun acordo de colaboración coa Asociación Grupo de Persoas con Discapacidade da Coruña (Grumico) para o traslado de 15 alumnos con discapacidade aos seus respectivos centros educativos.

A Consellería de Cultura, Educación e Ordenación Universitaria continúa a apostar pola educación inclusiva, desta vez a través da organización da gala Arte pola Igualdade, celebrada hoxe no Conservatorio Profesional de Música da Coruña. O secretario xeral de Política Lingüística, Valentín García, asistiu a este concerto, interpretado por alumnos con necesidades educativas especiais do Centro de Educación Especial María Mariño (A Coruña) que realizaron o curso preparatorio para o exame de acceso ao Grao Elemental que se vén desenvolvendo dende o mes de marzo no Conservatorio herculino. Ao concerto asistiu ademais o xefe territorial da Consellería na provincia da Coruña, Indalecio Cabana.

No recital os alumnos do CEE María Mariño interpretaron O Velorio. A continuación un grupo de profesores e alumnos do Conservatorio Profesional de Música interpretaron Ce heures la, de D. Dene Cheau; Cumbia, de Catiplana; La route des avaloirs, de B. Le Tron; Canción de Berce, de Celso Emilio Ferreiro con música de Bieito Romero; e Troquemos, canción tradicional. Finalmente, houbo unha actuación conxunta do conservatorio Profesional de Música e os alumnos do CEE María Mariño, os que interpretaron Redonda de Bande, Ribeirana, Fandango de Redondela e Danza entrelazada de Allariz.

Atención á diversidade

Deste xeito a Consellería pon manifesto o seu compromiso coa atención á diversidade do alumnado galego, á súa integración social e laboral, poñendo á súa disposición os mesmos servizos educativos e formativos cos que conta o resto da cidadanía, entre eles e neste caso, as ensinanzas reguladas de música.

Neste sentido cómpre salientar o labor do CEE María Mariño para facilitar a integración social e laboral dos seus 37 alumnas e alumnos alumnado, fomentando que cada un dos estudantes acade o máximo nivel de autonomía posible. Para acadar estes obxectivos de normalización e inclusión educativa, o CEE promove valores como a tolerancia, o respecto ás diferenzas e as actitudes de colaboración e axuda, para o que é imprescindible a profesionalidade dos 19 mestres que traballan no centro.

O curso preparatorio supuxo unha aposta pola innovación educativa, así como polo nivel de autonomía dos centros escolares. Así, este proxecto significou a incorporación de once estudantes, de entre 12 e 18 anos, con necesidades educativas especiais, tales como síndrome de Down ou síndrome de Williams, a sesións de formación musical de cara á proba de acceso ao Grao Elemental que se realiza o 21 deste mes. Un exame no que se avalían as aptitudes auditivas e vocais, rítmicas e psicomotrices dos alumnos,  aptitudes que estes alumnos desenvolveron ó longo deste cursiño.

A Consellería de Cultura, Educación e Ordenación Universitaria e a Asociación Grupo de Persoas con Discapacidade da Coruña (Grumico) asinarán un acordo de colaboración para que o alumnado con discapacidade poida desprazarse aos seus respectivos centros educativos. A reunión semanal do Goberno galego deu hoxe o visto e prace a este acordo, do cal se beneficiarán no curso 2012/2013 académico 15 escolares.

Trátase de escolares con distintos tipos de discapacidades que precisan nos seus traslados ao centro educativo dunha atención específica e personalizada, de acordo coas súas necesidades físicas e psíquicas particulares. Así, o convenio cobre os desprazamentos de ida e volta desde os domicilios do alumnado aos seus centros escolares, así como a ou desde os centros en que reciban tratamento rehabilitador cando este coincida co horario escolar. Ademais, o servizo obxecto do convenio estará adaptado ás necesidades horarias das alumnas e dos alumnos, moitas veces condicionadas polos tratamentos médicos que estes necesitan.

Ao abeiro do convenio, Grumico comprométese a facilitar os desprazamentos cos vehículos adaptados que sexan necesarios, así como a prestar os pertinentes servizos de acompañamento e atención ao alumnado trasladado. Ademais, nos vehículos poderán viaxar os coidadores daquelas persoas que precisen atención individualizada, continua e permanente. Pola súa banda, a Consellería farase cargo do 80% do gasto derivado da prestación destes servizos.

A Asociación Grumico é unha entidade sen ánimo de lucro que ten como fin estatutario a defensa dos intereses das persoas discapacitadas, co fin de acadar a máxima atención social aos problemas que presentan, así como a súa propia recuperación, rehabilitación e integración na sociedade, para o cal colabora con organismos e entidades que teñen relación coa problemática dos discapacitados.

Coa sinatura deste convenio, a Consellería de Cultura e Educación facilita o acceso á escolarización ao alumnado galego, de acordo co compromiso reflectido no Decreto para a atención á diversidade, publicado polo actual departamento educativo da Xunta de Galicia.