A Universidade de Santiago, en colaboración coa Dirección Xeral de Educación, Formación Profesional e Innovación Educativa, organiza o VI Seminario nacional de atención educativa ao alumnado inmigrante baixo o lema "Experiencia e Innovación". Esta actividade terá lugar na Escola Galega de Administración Pública (EGAP) de Santiago de Compostela o venres 14 e o sábado 15 de decembro de 2012.

O seminario componse de dúas ponencias impartidas polos profesores da Universidade de Santiago Agustín Godás Otero e María Jesús Agra Pardiñas; dunha conferencia de peche, ofrecida polo Xefe do Departamento de Desenvolvemento Docente e Políticas Educativas da UNESCO (París) Francesc Pedró García; unha mesa redonda baixo o título “As posibilidades dun proxecto social e intercultural desde os centros educativos e a sociedade civil”; 5 obradoiros simultáneos e un panel de "Experiencias e boas prácticas de atención educativa ao alumnado de orixe inmigrante nas escolas".

Pódese consultar o programa completo no arquivo descargable ofrecido aquí e aínda é posible inscribirse gratuítamente mediante unha ficha accesible na ligazón que pecha esta noticia.

Ábrese a convocatoria do concurso de banda deseñada “Historias de Milú”, organizado pola Secretaría Xeral de Política Social en colaboración coa Fundación Meniños.

Este concurso ten por obxecto enriquecer a cultura dos dereitos dos nenos e nenas a través do personaxe de Milú, que podemos coñecer a través da web educativa da Fundación Meniños, ou a través do conto “Milu” de Manuel Rivas, editado por Kalandraka.
Poderán participar o alumnado de ESO dos centros escolares públicos, privados ou concertados da Comunidade Autónoma de Galicia.
Categorías:

• Individual: traballos presentados por unha soa persoa.
• Colectiva: traballos presentados por un grupo de entre dúas e catro persoas.

O prazo para a recepción dos traballos comezou o 1 de decembro de 2012 e remata o 22 de marzo de 2013.
Os premios consistirán en:

• 1º premio: unha tablet e un lote de libros para cada participante.
• 2º premio: un mp5 e un lote de libros para cada participante.

Ademais, entre todo o alumnado premiado en calquera das categorías sortearase un curso gratuíto de Banda deseñada no Garaxe Hermético, Escola profesional de banda deseñada e ilustración dirixida por Kiko Da Silva na cidade de Pontevedra.

Nos arquivos anexos pódese descargar:

• Bases do concurso "Historias de Milú".
• Anexo I: ficha de inscrición.
   

O Equipo de Orientación Específico da Coruña (EOE) ven de impulsar a elaboración dun protocolo de coordinación entre os servizos educativos e sanitarios para a atención interdisciplinar ao alumnado con necesidades educativas especiais que o precise. Este protocolo foi consensuado polo EOE da Coruña cos departamentos de orientación, as tres unidades de saúde mental infanto xuvenil (USM-IX) da provincia  (CHUAC, CHUS e ASPANEPS) e con representación do servizo de pediatría.

A finalidade deste protocolo de colaboración é axilizar e mellorar a coordinación para a atención ao alumnado que presenta necesidades específicas de apoio educativo entre os profesionais dos departamentos de orientación dos centros educativos, co asesoramento do EOE, se procede, e as Unidades de Saúde Mental Infanto-Xuvenil, a través do correspondente servizo de pediatría de atención primaria, sempre coa conformidade da familia, que actuará como canle de comunicación e coordinación do intercambio de información.

Unha vez aplicadas as medidas de atención á diversidade por parte do centro educativo, poderá iniciarse o Protocolo de Derivación á USM-IX co obxecto de solicitar aos servizos médicos unha valoración que permita completar a intervención global. O/a orientador/a do centro educativo cumprimentará este protocolo para que a familia o entregue ao médico pediatra, por se este estima necesario derivar a consulta á correspondente USM-IX.

Para as sucesivas consultas na USM-IX, utilizarase o Protocolo de Seguimento Psicopedagóxico no que se reflectirá a evolución do/a alumno/a dende a anterior cita do servizo de saúde mental infanto-xuvenil.

Trátase de tres publicacións, en forma de folleto descargable, nas que se trata de orientar ás persoas adultas das posibilidades de acceso, continuidade e formación que lles ofrece o actual sistema educativo.

Entre as súas finalidades teñen a de informar a este alumnado de:

• Ensinanzas de persoas adultas: informa sobre as distintos estudos que se poden cursar nos centros de ensinanzas para persoas adultas.
• Probas para a obtención de títulos: informa dos requisitos para presentarse ás probas para a obtención do título da ESO e do título de Bacharelato.
• O bacharelato para as persoas adultas: informa dos requisitos e modalidades da ensinanza de Bacharelato nesta modalidade.

Trátase dunha publicación, en forma de folleto descargable, na que se trata de orientar ao alumnado no acceso, modalidades e saídas da formación profesional do actual sistema educativo.

Entre as súas finalidades ten a de axudar ao alumnado a coñecer a formación profesional no actual sistema educativo, como o conxunto de accións formativas estreitamente relacionadas coas ocupacións, as profesións e o mercado de traballo.

Na actualidade, a formación profesional, debido á súa ampla oferta, ao seu carácter modular e ás facilidades para a súa realización, mesmo a través de internet, preséntanse como unha opción moi atractiva cunha alta porcentaxe de inserción laboral.