O conselleiro de Cultura, Educación e Ordenación Universitaria, Xesús Vázquez Abad, salientou hoxe a oportunidade que as estadías lingüísticas de verán e o apoio das auxiliares de conversa – na rede de Centros Plurilingües e Seccións Bilingües- supoñen para que o alumnado galego contacte de forma directa con falantes nativos de linguas estranxeiras. “Trátase dunha oportunidade á que galegas e galegos doutras xeracións non tiveron acceso, moi importante para a mellora das competencias orais en linguas estranxeiras, e pola que o actual Goberno galego ten traballado arreo”, destacou.

Neste sentido, e durante a súa visita ao Centro Residencial Docente da Coruña, onde 410 alumnas e alumnos de 6º de primaria e 1º de ESO están a vivir unha estadía lingüística para mellorar o inglés, o conselleiro lembrou que o vindeiro curso o sistema educativo galego terá multiplicado por máis de 6 o número de auxiliares de conversa que prestan o seu apoio en Escolas Oficiais de Idiomas, centros plurilingües e seccións Bilingües.

Así, haberá máis de 400 auxiliares, dos que 350 son asumidos pola comunidade autónoma e 39 procederán de acordos co Ministerio. Ademais, a comunidade disporá de 18 sénior – nativos xubilados que desenvolven o seu labor nos centros plurilingües do rural galego-. Así mesmo, está previsto que se volva contar co profesor de lingua francesa a tempo completo, froito do convenio de colaboración entre a consellería e a Academie de Amiens.

Respecto da estadía, Vázquez Abad explicou que por este CRD pasarán este verán preto de 1200 alumnas e alumnos, de 6º de primaria, 1º e 2º de ESO; que realizan diversas actividades, desde deportivas ata excursións, para a mellora das competencias orais en lingua inglesa.

Plan de Potenciación das Linguas Estranxeiras

Durante a súa visita á Coruña o conselleiro lembrou que o vindeiro curso recibirán un ensino plurilingüe máis de 21.000 alumnas e alumnos da provincia da Coruña, a través dos 65 Centros Plurilingües – 14 de nova incorporación- e 1007 seccións bilingües da provincia – 200 de nova incorporación-; grazas á colaboración dos 514 profesores implicados. Ademais, na provincia coruñesa desenvolveranse cursos de formación complementaria para a aprendizaxe de linguas estranxeiras (CUALE), en 14 centros de ensino. En total, en estes cursos beneficiarán en toda Galicia a máis de 1.280 estudantes.

Por outra banda, e para apoiar a formación e certificación de persoas adultas, alumnos e docentes, a Consellería vén de crear unha nova sección da Escola Oficial de Idiomas de Ferrol en As Pontes, que ofertará 90 prazas en ensinanzas regradas de inglés.

Neste sentido destacou o éxito do Plan de Potenciación das Linguas Estranxeiras, que ten superado amplamente as expectativas iniciais. Así, en total, a rede de centros plurilingües de Galicia chegará a 148 colexios e institutos da comunidade, e a de seccións bilingües comprenderá un total de 2.362 seccións en 649 centros educativos, dos que 499 son seccións de nova incorporación no vindeiro curso, e 207 son novos centros implicados nesta iniciativa.

6,5 millóns en formación do profesorado

Por outra banda, Vázquez Abad lembrou ademais que a Consellería tamén está a dar a oportunidade aos docentes de mellorar as súas competencias en linguas estranxeiras en estadías, no marco do Plan Integral de Ayuda a las Lenguas Extranjeras (PIALE), que comprende diversas actividades formativas en idiomas para o profesorado, tanto en España como no estranxeiro.

Neste sentido destacou que ao remate co curso 2012/2013, e cun investimento duns 6,5 millóns de euros, a Consellería terá formado a máis de 4.300 profesores en cursos intensivos CALC e en estadías PIALE. “Estamos a falar de preto de 20.000 horas de formación intensiva nos cursos CALC”, dixo. Ademais, lembrou que os docentes tamén poden mellorar as súas competencias en linguas estranxeiras a través das licenzas por estudos e das 296 actividades organizadas pola rede de formación do profesorado.

Para iso, ao longo da presente lexislatura a Consellería ofertou 1.035 prazas para as estadías do PIALE, o que supuxo un investimento superior a 2,5 millóns de euros. Ademais, e contando a oferta do curso 2012/2013, teranse ofertado 3.300 prazas en Cursos de Actualización Lingüística e Comunicación (CALC) para fomentar e facilitar a acreditación do profesorado no dominio das distintas destrezas comunicativas en distintas linguas, de acordo cos niveis de competencia establecidos no Marco Común Europeo de Referencia para a aprendizaxe de linguas (MECRL). Por outra banda, a rede de formación do profesorado ten desenvolvido xa 296 actividades – cursos, xornadas formativas, entre outras- destinadas á mellora do coñecemento das linguas estranxeiras; e xa se convocaron licenzas por estudos para o próximo curso, que poderán oscilar entre as 80 e as 240, dependendo da duración das mesmas.

Durante a visita o conselleiro estivo acompañado polo director xeral de Educación, Formación Profesional e Innovación Educativa, Manuel Corredoira; e pola delegada da Xunta e o xefe territorial de Educación na Coruña, Belén do Campo e Indalecio Cabana, respectivamente.

A Consellería de Cultura, Educación e Ordenación Universitaria reforzará o vindeiro curso a súa aposta polo plurilingüismo coa creación de 6 novas seccións das Escolas Oficiais de Idiomas en vilas das catro provincias galegas, en concreto nas Pontes (A Coruña), Burela e Sarria (Lugo), Ribadavia e Celanova (Ournese), e en Redondela (Pontevedra). Trátase dunha nova iniciativa ao abeiro do Plan de Potenciación das Linguas Estranxeiras, que ten nas EOI un dos seus piares fundamentais, polo seu papel como centros para a cualificación e certificación tanto dos docentes – a través de cursos específicos CALC- como do resto das galegas e galegos.

Esta iniciativa de Cultura e Educación é unha nova mostra do compromiso da Consellería co rural, achegando s galegas e galegos que non viven nas cidades as ensinanzas de linguas estranxeiras que se ofertan nas EOI; unha aposta pola igualdade de oportunidades no acceso ao plurilingüismo.

A creación destas seccións supón por a disposición da cidadanía 660 prazas para a mellora das súas competencias lingüísticas en lingua inglesa. Para iso as novas seccións das provincias da Coruña, Lugo e Ourense ofertarán, cada unha, un grupo no nivel básico e dous no intermedio, un total de 90 prazas cada sección. Pola súa parte, na de Redondela haberá 3 grupos no nivel básico e 4 no intermedio, o que suporá crear 210 prazas.

Na provincia da Coruña a nova sección da EOI situarase no IES Castro da Uz, das Pontes de García Rodríguez, dependendo da EOI de Ferrol. En Burela será o IES Monte Castelo o que acolla a sección, dependente da EOI de Viveiro; mentres que a de Sarria, dependente da EOI de Lugo, instalarase no IES Gregorio Fernández. No caso de Ourense, e tal e como xa anunciou o conselleiro, Xesús Vázquez Abad, abriranse dúas novas seccións, unha delas ubicada no IES de Celanova, e a outra no IES de Ribadavia, ambas as dúas dependentes da EOI de Ourense. Respecto da sección de Redondela, esta instalarase no IES Pedro Floriani, e terá como centro de referencia a EOI de Vigo.

O conselleiro de Cultura, Educación e Ordenación Universitaria, Xesús Vázquez Abad, destacou hoxe que as iniciativas levadas a cabo polo seu departamento na formación de idiomas para docentes xa chegaron a preto de 10.000 docentes. O conselleiro fixo referencia ao compromiso da Xunta de Galicia coa formación do profesorado, ao abeiro do Plan de Potenciación das Linguas Estranxeiras durante a visita que realizou a Allariz, onde 19 profesores están a mellorar as súas competencias en inglés nunha estadía lingüística enmarcada nos plans de formación. De feito ao final do curso 2012/2013 a Consellería de Cultura e Educación terá investido uns 6,5 millóns de euros en formación do profesorado en materia de plurilingüismo.

Ao mesmo tempo, e durante a visita, Vázquez Abad aproveitou para agradecer o esforzo dos docentes galegos a prol do impulso do plurilingüismo no noso sistema educativo. “O feito de que decidan dedicar tempo a actualizar e mellorar os seus coñecementos en linguas estranxeiras dá conta do seu compromiso co alumnado, ao que poderán ofrecer unha mellor formación”, destacou.

O curso, que se desenvolve en Allariz ata o vindeiro día 27 de xullo, constitúe unha das actuacións impulsadas pola Consellería no marco do Plan Integral de Ayuda a las Lenguas Extranjeras (PIALE), que comprende diversas actividades formativas en idiomas para o profesorado, tanto en España como no estranxeiro.

Formación do profesorado

Ao longo da presente lexislatura a Consellería ofertou 1.035 prazas para as estadías do PIALE, o que supuxo un investimento superior a 2,5 millóns de euros; ademais, contando coas prazas que se ofertarán o ano que vén, a Consellería terá disposto 3.280 prazas en Cursos de Actualización Lingüística e Comunicación (CALC) para fomentar e facilitar a acreditación do profesorado no dominio das distintas destrezas comunicativas en distintas linguas, de acordo cos niveis de competencia establecidos no Marco Común Europeo de Referencia para a aprendizaxe de linguas (MECRL). Cómpre recordar que os CALC van dirixidos a aqueles docentes que imparten (ou o queren impartir) clases en centros plurilingües ou con seccións bilingües. Deste xeito, no que vai de lexislatura a Consellería de Cultura e Educación investiu 4,7 millóns de euros en formación do profesorado en linguas estranxeiras.

Estadías para docentes e profesores

Durante a semana de formación os docentes terán a oportunidade de manter conversas individuais e en grupo con persoas nativas de lingua inglesa. Así mesmo, realizaranse actividades de situación, como presentacións ou chamadas telefónicas, e diversos xogos de rol, obras de teatro, etc. Trátase dunha oportunidade para que as profesoras e profesores participantes poidan desenvolver fundamentalmente a competencia oral nun contorno no que permanecen constantemente en contacto co inglés.

Cómpre lembrar que a Consellería convocou ademais 2.568 prazas para estadías lingüística do alumnado, tanto en ‘vilas inglesas’ en Galicia, como no estranxeiro, en Canadá, Reino Unido, Francia e Alemaña.

Novidades en seccións das Escolas de Idiomas

Ademais durante a visita realizada hoxe pola mañá a Allariz o conselleiro anunciou que está prevista a apertura de novas seccións en Ribadavia e Celanova da Escola Oficial de Idiomas de Ourense, o que suporá 180 novas prazas en 6 grupos de inglés, e que se unirán ás que xa funcionan no Barco, O Carballiño e Verín.

Tal e como explicou o conselleiro, o vindeiro curso máis de 5.400 estudantes da provincia de Ourense mellorarán o vindeiro curso as súas competencias lingüísticas ao abeiro do Plan de Potenciación de Linguas Estranxeiras. Arredor dun milleiro deles farano nos 16 centros plurilingües da provincia (3 de nova incorporación este ano); e os restantes nas 261 seccións bilingües coas que contan 54 centros ourensáns (66 de nova creación para o vindeiro curso).

No conxunto do territorio galego, haberá máis de 55.000 estudantes galegos que se beneficien do Plan de Potenciación das Linguas Estranxeiras -segundo os datos actuais-, a través das seccións bilingües os centros plurilingües. En total, a rede de centros plurilingües de Galicia chegará a 148 colexios e institutos da comunidade, e a de seccións bilingües comprenderá un total de 2.362 seccións en 649 centros educativos, dos que 499 son seccións de nova incorporación no vindeiro curso, e 207 son novos centros implicados nesta iniciativa. Deste xeito supéranse amplamente as expectativas iniciais, grazas a este apoio dos centros e dos docentes, ata 1.142 implicados este curso tanto en centros como en seccións.