O plástico está presente nas nosas vidas desde que nos levantamos ata que nos deitamos. Trátase dun termo que engloba unha gran variedade de polímeros químicos e, polo tanto, unha gran variedade de materiais cunha enorme versatilidade. Sen embargo, a súa lenta degradabilidade fai dos residuos plásticos un dos máis agresivos para o medioambiente.
Nestas datas onde o plástico que está aparecer nas nosas costas en forma de pellets trae de novo á actualidade a problemática medioambiental asociada a este material, o alumnado do Club de ciencias foi quen de obter un plástico biodegradable a partir dun produto natural. Acidificando leite por adición de vinagre precipitamos as caseínas do leite e, separando o sólido por filtración, obtemos un termoplástico que se pode modelar e permite obter obxectos con diferentes formas. Ao engadir colorante de diferentes cores conséguense plásticos coloreados e naturais. Que mellor forma de contribuír ao desenvolvemento da sociedade que buscando materiais alternativos e biodegradables?
