O sábado 23 de outubro ás 12:00 no salón de actos tivo lugar o acto de entrega das Becas-Premio da Fundación Fernando Blanco de Lema correspondentes ao curso 2020-21.
Nesta edición o alumnado premiado foi:
Andrés Rodríguez Suárez, que cursou o curso pasado 1º CB de electricidade e electrónica.
David Santabaya Paz, que cursou o ano pasado 2º da ESO.
Martín Hernández Abad, que cursou o ano pasado 1º de bacharelato.
Tamara Martíns Lago, que cursou o ano pasado 1º CS de admininistración e finanzas.
Juan Alejandro Ferrío Correia, que cursou o ano pasado 1º CM de xestión administrativa.
O alumnado estivo acompañado no acto polos seus familiares, titores/as do curso pasado e profesorado. A asistencia ao acto estivo condicionada pola limitación de aforo pola pandemia.
A este fermoso acto, onde os protagonistas son a alumna e alumnos que foron premiados, tamén asistiu o Secretario xeral de educación e formación profesional, don José Luis Mira Lema, a inspectora de educación, dona Magdalena Duarte Blanco, representantes das empresas patrocinadoras e todos os grupos municipais do Concello de Cee.
As empresas que patrocinan estas Becas-Premio son: Santitel, O semáforo de Fisterra, Compucee, Centro comercial Finisterrae, Inforneria, Roberto G. Rigaut - Agencia Mapfre, Cabo Sport, Librerías Ler, Parques y jardines Manuel García, Papelería Fersi e Abanca
O acto deu comezo cunha intervención do secretario da Fundación Fernando Blanco de Lema, don Darío Areas, que fixo unha semblanza de Fernando Blanco, recordando que neste ano 2021 cúmprense 135 anos da inauguración do Instituto Fernando Blanco e 225 anos do nacemento do filántropo ceense.
A continuación proxectouse un vídeo sobre a historia do Instituto e da Fundación, que foi realizado polos que foron profesores do IES Fernando Blanco, Marcos Eijo e Elvio Antelo, este vídeo ten como banda sonora un vals interpretado ao acordeón por Fernando Fraga director da escola de música e da Banda Municipal de Cee.
Despois do visionado do vídeo interviu a directora do centro, dona Chelo Trillo, que recordou ao alumando premiado a importancia da formación para poder alcanzar as metas e soños que se propoñan.
Posteriormente procedeuse á entrega das becas-premio ao alumnado por parte dos representantes das empresas patrocinadoras e da Consellería.
Para rematar a cerimonia houbo unha intervención do Secretario xeral de educación e formación profesional, don José Luis Mira Lema, que recordou o seu paso polo Fernando Blanco como profesor, no ano 1979, cando só había ensinanzas de FP e o gran cambio que se produciu no centro desde aqueles anos coa incorporación de máis ensinanzas. Tamén salientou a importancia da colaboración co mundo da empresa nas ensinanzas de Formación Profesional e a participación en proxectos e plans educativos, nos que o IES Fernando Blanco é un exemplo pois participa en moitos dos que convoca a Consellería.
Despois todos os asistentes se desprazaron á capela do instituto onde o alumnado fixo unha ofrenda floral no sartego onde repousan as cinzas de Fernando Blanco.
Unha vez rematado o acto, don José Luis Mira Lema visitou os talleres dos departamentos de Mantemento, Electricidade e Automoción acompañado por membros do equipo directivo e profesorado dos devanditos departamentos.
