Skip to Content

Extraescolares

Unha alumna, subcampeona de Galicia

O pasado 31 de outubro celebrouse o Campeonato Galego de Ximnasia Rítmica. Valeria Delgado Domínguez, alumna de 2º da ESO e membro do clube María Barbeito, proclamouse Subcampeona de Galicia na categoría infantil federado ARO.

E máis aínda, clasificáronse para o Campeonato Nacional que se disputará en Valladolid. Parabéns!

Un mural contra a pobreza

O sábado 17 de outubro as arcadas do edificio de Riazor do noso instituto serviron para que a ONG "Ayuda en Acción" realizase un expresivo mural sobre a pobreza. Parabéns!


 

Presentación institucional da Unidade Didáctica "María Wonenburger: unha científica adiantada ao seu tempo"

Hoxe no Salón de Actos do noso instituto presentouse a unidade didáctica “María Wonenburger. Unha científica adiantada ao seu tempo” realizada polas matemáticas Mª José Souto e Ana Dorotea Tarrío.

A famosa matemática, Doutora Honoris Causa pola UDC, foi alumna deste centro, cando aínda era feminino.

(fotos: Pedro R. Porca, fai clic para ver máis)

 

Ao acto asistiron o Sr. Vicepresidente da Xunta de Galicia, don Alfonso Rueda,  o Sr. Alcalde, don Carlos Negreira; a Sra. Secretaria Xeral de Igualdade, dona Susana López Abella, familiares de María Josefa Wonenburger, a Sra. Delegada da Xunta da Coruña, dona Belén Docampo, o Sr. Concelleiro de Educación do Concello da Coruña, don Miguel Mourelo, a Sra. Decana da Facultade de matemáticas, dona Victoria Otero, a Sra. Subdirectora Xeral de Promoción da Igualdade, dona Mª Pilar García-Rodeja, a Sra. inspectora de Educación, dona Berta Estrada, profesores e alumnos de 1º, 2º, 3º e 4º de ESO. 

Proxectouse un vídeo sobre a vida da homenaxeada e mais as liñas mestras da unidade.

 

No seu discurso o Sr. Rueda destacou que as estatísticas de mulleres e homes que optan por unha carreira técnica (15%/VS/40%) aínda son desfavorables á muller. E fixo votos por que as cousa cambien xa que, engadiu, a sociedade está perdendo oportunidades.

 

Actualización: Enlaces á noticia nos medios de comunicación:

 


 

Entrega do donativo á Cociña Económica

Hoxe visitamos a sede da Cociña Económica de A Coruña para facer a entrega do donativo (uns 800 euros) recollido na campaña do Maratón de Lectura Solidaria feita hai meses. Presentes no breve acto estiveron  Mª José Martínez Girón e Mª Rosario Soto Arias -organizadoras do Maratón de Lectura-, Jorge Cambón e Inés Tejero - de 4º da ESO, representando aos alumnos-, Alberto Martí -Presidente do organismo benéfico- e Isabel Ruso de Lago -directora do centro.

Unha vez máis, grazas a todos por participar!

 


 

The Big Challenge 2013-14

 

En 1º de ESO a clasificación foi liderada por Marta Roibás, seguida por Lucía Granados e Juan José Queijeiro.

En 2º de ESO houbo empate entre as catro primeiras: Lucía Yáñez e a súa irmá Lara, Inés Villa e María Vales. Parabéns!


 

Presentación do número 6 da revista "Alén da chuvia"

Celebramos o xoves 19 a festa das letras. Había unha boa razón, presentar o número 6 da revista, auténtico buque-insignia, do Instituto, “Alén da chuvia”. Neste número hai unha nutrida representación do bo facer literario de alumnado e profesorado. Non deixedes de comprobalo. Como vedes nas fotos, actuou o coro do Eusebio da Guarda. 

 

A ocasión era propicia para entregarlle a Lucía Blanco Miguéns o premio como vencedora do concurso “Gañapuntos” que celebramos –unha pregunta semanal- durante as vinte primeiras semanas deste curso, nunha estreita colaboración entre Club de Lectura e Biblioteca do Instituto. O agasallo consistiu nunha magnífica edición en catro volumes dos relatos da coruñesa Emilia Pardo Bazán. Agradecemos desde aquí á Fundación Barrié, sempre ao servizo da nosa cultura, a súa xenerosa contribución en libros para a mellora e estímulo do alumnado participante no Club de Lectura do IES ao que nos honramos de pertencer. Vedes na foto correspondente a Lucía, o Coordinador de “Alén da chuvia” e Xefe de Dinamización Lingüística, Xulio Cuba Orosa e mais a Vicedirectora, Mª Rosario Soto Arias.

 


 

Excursión ás Fragas do Eume.

 

O equipo de fútbol feminino chega á final do torneo Xogos Escolares

O equipo feminino de futbol 7 do IES Eusebio da Guarda chega á final do campionato dos II xogos escolares 2013-2014 . 

Despois de quedar primeiro do seu grupo na liguilla de clasificación ganando todos os partidos disputados, venceu  ó IES Zalaeta en cuartos de final e ó Compañía de María en semifinais. 

 

Carteis do día de Rosalía de Castro

Seguramente recordaredes que hai uns días celebramos o nacemento de Rosalía de Castro cun Maratón de Lectura Solidario. Velaiquí algúns dos carteis que fixeron os alumnos para celebrar esa onomástica.

 

Maratón de lectura

Estase a organizar un maratón de lectura para o vindeiro 24 de febreiro. Toda a comunidade educativa está invitada a participar como lector ou ben coma oínte. Aquí vos poñemos a nota pubricada.

Seguiremos informando.


 

 

II Xogos escolares, curso 2013-14

Nestes días estase a celebrar os II Xogos Escolares - Curso 2013-14, organizados polo Excmo. Concello de A Coruña.

Aquí tedes o enlace aos resultados dos encontros disputados, nos cales participan catro equipos do noso centro.

Ao final desa páxina fai clic nos enlaces a "Resultados Fútbol 7" e "Resultados Fútbol 11" para acceder ao ficheiro.

 


Visita ao MUNCYT (Museo Nacional de Ciencia e Tecnoloxía)

O pasado martes, día 14 de xaneiro, visitamos (seis profesores e máis de cen alumnos de 2º da ESO) o MUNCYT, ese espléndido museo que mira ao mar coruñés. Valoramos a amplitude  de espazos, a riqueza dos contidos, a xentileza no trato, o ben organizado que teñen o tempo para que os rapaces queden prendados e ignoren o aborrecemento. En canto chegamos, distribuíronos por grupos con cadanseu monitor e inmediatamente lles propuxeron un entretido xogo de preguntas e respostas, caderno en man. Así a todos nos voou o tempo. Que destacariamos do que puidemos ver? A sala das maiúsculas, onde hai máquinas dunha beleza pseudo renacentista, dignas de Leonardo, a lanterna que foi do faro brigantino, o acelerador fermosísimo de partículas dos anos 50… Destacamos tamén a sala de robótica, en cuxo frontispicio lemos a famosa frase que coñecemos por Newton, somos case que ananos  levados nos ombros de xigantes. Que grandor o do mundo! Que grandes mulleres e homes deu o mundo! Quedounos clara unha idea na mente: HAI QUE VOLVER VISITAR O MUNCYT.

Concurso Postais Nadal 2013

Foto das gañadoras (autor: Mario S. García)

 

Ganadora:Julia López de la Osa. 2º ESO C

Ganadora: Carlota Suárez Villaverde. 2º ESO C

 

Accésit: Sara Freire Veiga. 1º ESO B


 

CONCERTOS DIDÁCTICOS

Programación dos Concertos Didácticos 2012-2013

Clicka na imaxe para vela mellor.

Agradecemento do Banco de Alimentos Rías Altas

O presidente do Banco de Alimentos Rías Altas ven de agradecer a colaboración do instituto na Campaña Solidaria Operación Kilo que se fixo fai unhas data. Desde aquí queremos facela extensiva a todos os participantes.

Resultados do Big Challenge 2012

Unha vez máis estamos de noraboa: O alumno Nicholas Twine Padín acadou o primeiro premio a nivel provincial, Diploma First Class Honours e Supercopa da provincia. Os alumnos David Baamonde López e Jorge Manuel Blanco Domínguez acadaron o segundo posto na provincia da Coruña.

Parabéns aos nosos alumnos participantes, e especialmente aos premiados!

O MUNCYT está a piques de abrir as portas ao público

O un de xuño a sede do MUNCYT  (Museo Nacional de Ciencia e Tecnoloxía) abrirá definitivamente as portas ao público xeral e aos estudantes en particular. Hai uns días tivemos a oportunidade de facer unha visita. Puidemos comprobar a magnitude do proxecto, e a súa adaptación a un edificio singular e premiado pola arquitectura ensaiada.

Aínda que o "mascarón de proa" do Museo sexa o enorme morro do avión Boeing 747 "Lope de Vega", hai outra sala, 'Mayúsculas", que destaca polo tamaño das súas pezas únicas. Os visitantes poderán desfrutar tamén dunha especie en vías de extinción: a máquina de escribir, multiplicada por numerosas variantes. En realidade, as pezas máis selectas, ás que poderiamos chamar incunables, están no corazón do edificio, protexidos do mundo exterior  nunha atmosfera de silencio, repouso e oscuridade, que lles da unha maior solemnidade.

O Museo garda moitos segredos. Algúns deles iranse descubrindo de cando en vez. Desde aquí animamos á xente a descubrilos, e tamén a Moncho Núñez e o seu equipo a seguir destilando a maxia que teñen "aqueles tolos cachivaches".

Unha medalla de bronce a nivel nacional en Matemáticas

Si fai uns meses dábamos conta con grande ledicia que Gonzalo Cao Labora, alumno de 3º de ESO do noso instituto, conseguira unha medalla de ouro na fase galega da Olimpiada Matemática, agora encheunos de orgullo ao quedar no terceiro posto, medalla de bronce, na olimpiada española de Matemáticas.

Parabéns!

Actualización 29 Abril: Engadimos fotos da entrega do diploma da fase galega.


Distribuir contido


by Dr. Radut