Novas portal educativo

Summary: 

Os estudantes de 1º e 2º de Bacharelato mellorarán as súas competencias lingüísticas en Canadá, Reino Unido, Francia, Portugal e Alemaña

O Goberno galego destina preto de 2M€ a esta actividade, de tal xeito que se subvenciona ata o 92% da mesma para as tres semanas de estadía

O titular de Educación sinala que esta iniciativa é “unha porta de entrada a unha nova cultura, a outra forma de ver e entender o mundo”

Idioma Gallego

O conselleiro de Educación, Ciencia, Universidades e FP, Román Rodríguez, participou hoxe na xornada de benvida para os estudantes de Bacharelato que este verán viaxan ao estranxeiro para perfeccionar o seu nivel en diferentes linguas estranxeiras grazas ás bolsas da Xunta. En concreto, un total de 645 alumnos e alumnas de toda a Comunidade realizarán estadías en cinco países ao longo destes meses. A todos eles desexoulles “a mellor formación e experiencia”.

 

Como recordou o conselleiro, o propósito destas estadías “non é só que o alumnado asistente aprenda un idioma estranxeiro, senón tamén que entre en contacto con outras linguas, persoas, culturas e realidades” nun contexto de inmersión ou integración nun país estranxeiro, “o que contribúe á súa formación integral e ao seu desenvolvemento persoal en plena adolescencia”. O titular de Educación sinalou que esta iniciativa é “unha porta de entrada a unha nova cultura, a outra forma de ver e entender o mundo”.

 

Fíxoo estas declaracións durante unha xornada de benvida para o alumnado beneficiario destas bolsas -o denominado programa AxudasLe- e para as súas familias co fin de proporcionar orientacións sobre a viaxe e a estadía e resolver dúbidas. No acto, estivo acompañado da directora xeral de Ordenación e Innovación Educativa, Judith Fernández.

 

Complemento ao traballo na aula

Román Rodríguez explicou que o Goberno galego está comprometido co avance das competencias en linguas estranxeiras do alumnado. “Mellorar a capacidade de comunicarse noutros idiomas é un incentivo imprescindible hoxe en día”, afirmou. Por iso, logo de traballar intensamente nas aulas grazas a medidas como os auxiliares de conversa, ofrécense tamén outras alternativas como os campamentos de inmersión en Galicia durante a primavera e o outono, e as propias estadías lingüísticas estivais.

 

O representante autonómico animou aos alumnos participantes neste programa de verán a representar Galicia no estranxeiro, exercendo como bos embaixadores da nosa Comunidade. De feito, convidounos “a falar con todo o mundo, a integrarvos e participar activamente no programa formativo dentro e fóra das aulas”.

 

Distribución por cursos e países

Para o programa de estadías lingüísticas en países estranxeiros este verán, foron seleccionados un total de 407 alumnos de 1º de Bacharelato e outros 238 de 2º de Bacharelato, que gozarán de tres semanas en réxime residencial ou familiar en Reino Unido, Francia, Portugal, Canadá e Alemaña no período estival, entre xullo e agosto.

 

Así pois, 339 estudantes desprazaranse a Reino Unido e 230 a Canadá para mellorar as súas competencias en inglés; 60 farano a Francia para facelo co seu francés; dez irán a Alemaña para perfeccionar o alemán, e seis a Portugal para reforzar o seu portugués.

 

Curso

Modalidade

Prazas

2º de Bacharelato

Inglés en Canadá

90

Inglés no Reino Unido

120

Francés en Francia

20

Portugués en Portugal

3

Alemán en Alemaña

5

1º de Bacharelato

Inglés en Canadá

140

Inglés no Reino Unido

219

Francés en Francia

40

Portugués en Portugal

3

Alemán en Alemaña

5

 

O Goberno galego destina preto de 2M€ a esta actividade, de tal xeito que se subvenciona entre o 92% e o 62% do custo das estancias dos estudantes. Con cargo a esta partida, a Consellería de Educación sufraga parte dos gastos de contratación dos monitores que acompañan a cada grupo, mantemento e aloxamento, traslados para actividades, docencia e material escolar, actividades culturais, deportivas e complementarias dos cursos, seguros de accidentes e certificado de realización do curso.

 

Información xeral Consellería de Educación, Ciencia, Universidades e Formación Profesional

Summary: 

É o centro da Xunta onde se pode cursar ensinanzas elementais e profesionais de danza e o único en Galicia coa especialidade de contemporánea

Desde a súa creación, duplicou a matrícula e organiza numerosas actividades culturais e de promoción das ensinanzas dentro e fóra de Galicia

Idioma Gallego

A directora xeral de FP, Eugenia Pérez, asistiu hoxe á gala do 20 aniversario do Conservatorio Profesional de Danza de Lugo, o centro dependente da Xunta onde se poden cursar as ensinanzas elementais e profesionais de danza na nosa Comunidade e as ensinanzas profesionais de danza na especialidade danza contemporánea

No evento, celebrado no Auditorio Municipal Gustavo Freire de Lugo, participou unha pequena representación do ex alumnado do centro que na actualidade está a desenvolver a súa carreira no eido da danza, e que no seu momento formou parte da canteira desta disciplina que o Conservatorio leva dúas décadas formando

O centro iniciou a súa actividade no ano 2003 e foi medrando ata que no curso 2011/2012 acadou a implantación definitiva das ensinanzas de danza, cos catro cursos de grao elemental e os seis cursos de grao profesional nas especialidades de Danza clásica e Danza contemporánea. Este crecemento reflíctese tamén no alumnado matriculado, que hoxe é o dobre que hai 20 anos.

O Conservatorio Profesional de Danza conta, ademais, coa única biblioteca especializada en danza de Galicia e cunha comunidade educativa moi dinámica, que programa unha grande cantidade de actividades culturais e de promoción e organiza obradoiros con coreógrafos galegos de prestixio internacional, ofrecendo ao alumnado a oportunidade de entrar en contacto coa creación coreográfica máis actual.

Información xeral Consellería de Educación, Ciencia, Universidades e Formación Profesional

Summary: 

A participación galega está liderada pola Fundación Kaertor, ademais da presenza das tres universidades públicas e das tres fundacións de investigación sanitaria

Galicia coordina a liña de cribado de fármacos e está a desenvolver 15 proxectos disruptivos sobre descubrimento de fármacos, nanotecnoloxía, terapia celular e aplicación biomédica das TIC e da intelixencia artificial (IA) cunha dotación de 3M€

Román Rodríguez subliña o apoio económico da Xunta de Galicia a este proxecto para contribuír ao progreso da medicina a través da innovación

Idioma Gallego

O conselleiro de Educación, Ciencia, Universidades e Formación Profesional, Román Rodríguez, destacou esta mañá que o traballo cohesionado de todos os axentes de coñecemento con capacidades no eido da biotecnoloxía “contribuirá ao avance da medicina personalizada de precisión e, polo tanto, a facer fronte aos grandes desafíos aos que nos enfrontamos”, como a mellora nos diagnósticos e nos tratamentos avanzados.

 

O representante da Xunta de Galicia fixo estas declaracións na inauguración da xornada de presentación do Plan Complementario de Biotecnoloxía aplicada á Saúde en Galicia, onde tamén gabou “o gran labor que está a realizar a Fundación Kaertor”, a encargada de liderar a participación galega. Xunto ao conselleiro, interviñeron tamén Josep Samitier, coordinador do Plan Complementario de Biotecnoloxía Aplicada á Saúde; Mabel Loza, coordinadora para Galicia do Plan, e Raquel Yotti, comisionada do PERTE de Saúde de Vangarda.

 

“Este traballo faime reflexionar na importancia do carácter aglutinador, pois o feito de que neste plan esteamos sete comunidades coordinadas a través do Ministerio e na que todos os implicados tratan de aportar o seu valor e coñecemento ao proxecto é algo a destacar”, subliñou o titular de Ciencia, quen tamén valorou o papel de Galicia neste eido: “O traballo dos nosos investigadores é moi importante para lograr mellorar a calidade de vida das persoas, algo polo que temos que seguir traballando sen descanso, pois a ciencia non é un fin en si mesmo, senón un medio”.

 

Román Rodríguez, que estivo acompañado pola directora da Axencia Galega de Innovación, Carmen Cotelo, apuntou que a biotecnoloxía seguirá sendo “o aspecto diferencial da prosperidade médica e innovadora e, por este motivo, Galicia continuará apoiando as iniciativas vencelladas ao seu desenvolvemento”, como a participación neste Plan ou a Estratexia Galega de Consolidación da Biotecnoloxía. Dito plan, elaborado por sete comunidades e o Ministerio de Ciencia, Innovación e Universidades ten como obxectivo desenvolver ferramentas para a medicina personalizada a través de seis liñas de actuación.

 

A participación galega, dotada con 3M€ procedentes do Plan de Recuperación, Transformación e Resiliencia e de fondos propios da Xunta de Galicia, agrupa ás tres universidades públicas e ás tres fundacións de investigación sanitaria, baixo a coordinación da Fundación Kaertor e o cofinanciamento da Xunta de Galicia. Os axentes galegos desenvolven 15 proxectos de investigación disruptivos sobre descubrimento de fármacos, nanotecnoloxía, terapia celular e aplicación biomédica das TIC e da intelixencia artificial (IA) e coordinan a liña de cribado de fármacos. Esta última liña traballa na identificación de novas dianas terapéuticas e no desenvolvemento de fármacos específicos personalizados que maximicen o seu potencial terapéutico minimizando os efectos adversos.

 

Investimento de 45,6M€ en catro plans

Galicia participa noutros tres plans complementarios: Comunicación
Cuántica, Ciencias Mariñas e Biodiversidade. Para os catro plans, incluído o de Biotecnoloxía aplicada á Saúde, conta cun orzamento global de 45,6M€, dos que 26,5M€ son de fondos europeos do Mecanismo de Recuperación e Resiliencia e 19,1 de fondos propios. Os plans complementarios son unha ferramenta para a posta en marcha de programas de investigación en áreas estratéxicas, cogobernados e cofinanciados polo Estado e as comunidades autónomas. Estes plans aspiran a fortalecer o sistema español de I+D+i establecendo colaboracións e aliñando os esforzos da administración central, as comunidades autónomas e os fondos europeos ante retos clave.

 

O compromiso da Xunta de Galicia coa biotecnoloxía recóllese na Estratexia de Consolidación da Biotecnoloxía en Galicia que aspira a converter Galicia nunha biorrexión de referencia no horizonte do 2025.

 

Información xeral Consellería de Educación, Ciencia, Universidades e Formación Profesional

Summary: 

O obxectivo deste xogo de mesa é divulgar os principios básicos da mecánica cuántica ao tempo que se entreteñen os xogadores

A súa creación é parte dos esforzos de divulgación do Polo de Tecnoloxías Cuánticas de Galicia, impulsado pola Xunta e cofinanciado con fondos europeos

Idioma Gallego

Mañá, sábado 29 de xuño, ás 10,30h e no marco da celebración da X Maker Faire Galicia en Área Central en Santiago de Compostela, o Centro de Supercomputación de Galicia (CESGA) e a empresa de deseño e comercialización de xogos de mesa Brazolinda presentan QLAB Laboratorio cuántico. Na presentación participarán a directora da Axencia Galega de Innovación, Carmen Cotelo; Lois Orosa, director do CESGA, e Irimia Fernández, creadora de Brazolinda.

 

QLAB, Laboratorio cuántico é un xogo de mesa colaborativo que ten como principal obxectivo aprender os principios básicos da Mecánica cuántica nos que se basea o deseño e funcionamento dos computadores cuánticos. Para iso, incorpora nas normas do xogo conceptos como a superposición ou o entrelazamento, facilitando que os xogadores gañen comprensión destas propiedades da materia que adoitan resultar pouco intuitivas para o común dos mortais.

 

Tras a presentación do xogo, os asistentes á Maker Faire Galicia, terán oportunidade de testar o xogo nunha partida dirixida polos seus creadores.

 

Material educativo desde Compostela

QLAB pretende ser pasatempo educativo para os xogadores e unha ferramenta de apoio para educadores e formadores en Física. Está deseñado especificamente para servir como material educativo en etapas de Secundaria, aínda que é apto para ser xogado por calquera que teña interese en gañar coñecemento sobre os conceptos cuánticos e mesmo para quen simplemente goce xogando a xogos de mesa.

 

A idea orixinal é de Irimia e Brais Fernández Álvarez, da empresa de deseño e comercialización de xogos con sede en Compostela Brazolinda. No deseño do xogo contaron co asesoramento científico de Mariamo Mussa Juane e Guillermo Díaz Camacho, ambos doutores en Física e investigadores en Computación cuántica no CESGA. Os creadores e deseñadores de xogos de Brazolinda e os investigadores do CESGA mantiveron intensas interaccións durante todo o proceso de deseño e testeo de QLAB.

 

A creación de QLAB é parte dos esforzos de divulgación do Polo de Tecnoloxías Cuánticas de Galicia, impulsado pola Xunta de Galicia e que conta con financiamento europeo como parte da resposta da Unión Europea á pandemia da COVID-19.

 

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación participa na inauguración do foro internacional sobre innovación Ecosystems2030 baixo o título ‘Mulleres en liderado’

Idioma Gallego

A Xunta de Galicia vai apostar polo impulso e aproveitamento dos avances tecnolóxicos, como a intelixencia artificial, para poñelos ao servizo do desenvolvemento produtivo e a cohesión social. Así se comprometeu o conselleiro de Educación, Ciencia, Universidades e FP, Román Rodríguez, con motivo da inauguración do foro Ecosystems2030 baixo o título Mulleres en liderado.

 

O titular de Ciencia da Xunta avogou por priorizar “as novas tecnoloxías como ferramentas que benefician a inclusión e o fomento das oportunidades” co obxectivo de “lograr a transmisión de coñecemento e repercutir no avance social e económico”.

 

Román Rodríguez fixo fincapé “na importancia dun desenvolvemento sostible da dixitalización das novas tecnoloxías e no uso adecuado dos recursos”. Isto posibilitará un maior “crecemento económico, melloras na sociedade e combater a brecha de xénero”, engadiu o conselleiro. Non en balde, aproveitou o foro para invitar aos asistentes e relatores a deseñar e programar as novas tecnoloxías dirixíndose a toda a poboación, sen estereotipos e prexuízos. Ao longo do congreso, moitas mulleres líderes nos seus respectivos ámbitos servirán de inspiración para avanzar neste traballo.

 

Información xeral Consellería de Educación, Ciencia, Universidades e Formación Profesional

Summary: 

Salienta o esforzo e dedicación dos 209 estudantes galardoados por contar cun expediente sobresaínte

Subliña a creación de novos másteres, a conxelación das taxas universitarias e a gratuidade da primeira matrícula como algunhas das medidas impulsadas para fortalecer o Sistema Universitario Galego

Idioma Gallego

O presidente da Xunta, Alfonso Rueda, destacou hoxe o “talento e esforzo” dos universitarios galegos, asegurando que son “a Galicia do futuro”. Así se referiu no acto de entrega dos Premios Fin de Carreira correspondentes aos cursos 2021/2022 e 2022/2023, onde destacou as “horas de estudo e as renuncias a moitas cousas” dos 209 estudantes galardoados polos seus expedientes sobresaíntes.

 

“Parabéns por acadar este éxito enorme e por ter sido os mellores nun mundo competitivo”, asegurou, ao mesmo tempo que quixo tamén felicitar ás familias e ás tres universidades públicas galegas.

 

No acto, Rueda comprometeu o apoio da Xunta para seguir fortalecendo un Sistema Universitario galego “excelente”, axustando a oferta académica ás necesidades do tecido produtivo e do propio alumnado. Así, o ano que vén estrearanse 5 másteres novos –Biofabricación, Internet das Cousas e Ensino do Español como Lingua Estranxeira (de carácter interuniversitario entre as tres universidades públicas galegas); Biociencias Moleculares (USC): e Tecnoloxía Téxtil e Moda Sostible (UDC)–.

 

Ademais, o titular do Goberno galego lembrou que as taxas universitarias levan “conxeladas” 13 anos consecutivos e que, a partir do vindeiro curso, a primeira matrícula para os alumnos de grao e de ensinanzas artísticas superiores será gratis. Unha medida ratificada esta mesma semana no Consello da Xunta, que fará que a comunidade sexa a única na que os estudantes que aproben e vaian cumprindo os requisitos, poidan estudar unha carreira totalmente de balde.

 

O presidente enmarcou todas estas iniciativas no afán do Goberno galego por impulsar a igualdade de oportunidades e desexoulles moita sorte aos galardoados na nova etapa que hoxe comezan. “Hai talento, hai esforzo e hai futuro en Galicia grazas a vós”, manifestou.

 

Información xeral Consellería de Educación, Ciencia, Universidades e Formación Profesional

Summary: 

Este proxecto europeo, que aglutina 15 socios científicos, ten como obxectivo introducir tecnoloxías dixitais no tecido produtivo

Idioma Gallego

A directora da Axencia Galega de Innovación da Xunta de Galicia, Carmen Cotelo, clausurou esta mañá o evento anual de presentación de resultados e accións futuras do proxecto Hub de Innovación Dixital Europeo EDIH DATAlife. Na súa intervención, Cotelo destacou o amplo abano de servizos e instrumentos de apoio que ofrece ao ecosistema galego de I+D+i co obxectivo de apoiar a incorporación de tecnoloxías dixitais no tecido empresarial galego.

 

En concreto, 98 entidades solicitaron os servizos que o Hub ofrece no marco do proxecto europeo EDIH DATAlife e 44 participaron nas tres primeiras formacións ofrecidas. Entre os servizos que ofrece, Carmen Cotelo destacou o asesoramento técnico para a implantación de tecnoloxías disruptivas, formación específica, o desenvolvemento de diversas mesas de traballo sectoriais para identificar colaborativamente as necesidades e profundizar nos retos dos diferentes sectores -350 entidades asistiron a estas mesas-, asesoramento sobre financiamento e un labor de comunicación para difundir os instrumentos de apoio entre as empresas e o potencial destas tecnoloxías entre a sociedade en xeral.

 

A representante da Consellería de Educación, Ciencia, Universidades e FP destacou especialmente o labor de escoita activa e de análise que se fai contando directamente co ecosistema, un enfoque que garante que os resultados do proxecto estean aliñados coa demanda dos diferentes sectores que integran o Hub, e animou aos seus socios a seguir traballando na mesma liña.

 

Información xeral Consellería de Educación, Ciencia, Universidades e Formación Profesional

Summary: 

A partir de setembro sumaranse 38 novas aulas, cunha achega de 55.000€ para cada un delas

O conselleiro explica que o programa é unha “oportunidade única para dotar aos centros de equipamento tecnolóxico ao nivel do que atoparán os alumnos nas empresas, o que redunde nunha mellora significativa da súa formación”

Idioma Gallego

O conselleiro de Educación, Ciencia, Universidades e FP, Román Rodríguez, visitou hoxe o Centro Integrado de FP Politécnico de Lugo, onde anunciou que os centros que imparten estas ensinanzas contarán o vindeiro curso con 80 espazos de tecnoloxía aplicada co obxectivo de mellorar a cualificación dos estudantes, permitíndolles a simulación de centros de traballo e contornas laborais reais. Durante a visita estivo acompañado polo delegado territorial da Xunta en Lugo, Javier Arias, e pola directora xeral de FP, Eugenia Pérez.

 

A Xunta de Galicia vén resolver a convocatoria deste programa para o curso que vén, coa incorporación de 38 novos espazos. Na provincia da Coruña atópanse 14 aulas, dos concellos das Pontes, A Coruña, Betanzos, Carballo, Ferrol, Pontedeume, Ponteceso, Ribeira e Santiago de Compostela; na provincia de Lugo son sete espazos dos concellos de Burela, A Pontenova, Foz, Lugo, Mondoñedo e Monforte de Lemos; en Ourense son seis, de Vilamarín, O Barco de Valdeorras e Ourense, e en Pontevedra hai 11, dos municipios de Cangas, Valga, Vilagarcía de Arousa, Vigo, Moaña, Pontevedra e O Porriño.

 

Estes súmanse aos 42 xa en funcionamento, a maior parte deles (36) situados en Centros Integrados de FP. Cada un deles recibirá un orzamento de 55.000€, conformando un investimento total de 4,4M€ nesta iniciativa.

 

O titular do departamento educativo da Xunta puxo en valor este programa como “unha oportunidade única para dotar aos centros de equipamento tecnolóxico ao nivel do que se van atopar despois os alumnos nas empresas, de tal forma que isto redunde nunha mellora significativa da formación dos titulados da FP galega”.

 

Empregabilidade e conexión coas empresas

“Esta iniciativa entronca directamente cos obxectivos da Estratexia FP Galicia 2030 e do Plan Innova FP Galicia que, xunto co Plan FPGal360 de orientación profesional integral, son as follas de ruta da Xunta para que o noso modelo de FP acade novas cotas de éxito e, sobre todo de empregabilidade e conexión co tecido produtivo”, afirmou o conselleiro.

 

O CIFP Politécnico de Lugo é un dos centros que participan xa no programa e que incorporará o vindeiro curso un novo espazo de tecnoloxía aplicada. O novo proxecto consiste nunha aula tecnolóxica de dixitalización, escaneado e fabricación aditiva (Proxecto AT DIESFA). Estará equipada con impresoras 3D, tanto de filamento como de resina, e tecnoloxía de escaneado tridimensional, xunto con software específico para maximizar o uso destes equipos. Ademais, incorporarase unha máquina de medición por coordenadas para complementar as capacidades de verificación e control de calidade dos produtos fabricados.

 

“Este espazo non só beneficiará ao alumnado de fabricación mecánica, senón tamén a outras áreas como saúde e edificación, apoiando unha ampla gama de disciplinas profesionais e técnicas dentro do centro”, sinalou Román Rodríguez.

 

Neste sentido, o conselleiro destacou que o Politécnico de Lugo vai incorporar novos ciclos o ano que vén, como o superior de FP Dual Intensiva en Procesos e Calidade na Industria Alimentaria, o máster de FP en Instalación e Mantemento de Sistemas Conectados a Internet e a oferta parcial do ciclo de grao superior en Dietética na modalidade de adultos.

 

No transcurso da visita, Román Rodríguez tivo a oportunidade de coñecer de primeira man o funcionamento do espazo de tecnoloxía aplicada que xa está en funcionamento no CIFP Politécnico de Lugo, pensado para facilitar a formación do alumnado en aspectos da Industria 4.0, simulando as contornas laborais a través de recursos didácticos reais e virtuais, software de simulación e xeración de xemelgos dixitais. Isto permite ao alumnado traballar nas principais áreas tecnolóxicas da dixitalización da industria.

 

Novos espazos

A través do programa de espazos de tecnoloxía aplicada, os centros de FP poden dotar as súas aulas con ferramentas e elementos que simulan as contornas laborais, nas que se poden empregar metodoloxías baseadas en proxectos ou retos próximos a cada sector produtivo, incorporando recursos apoiados en tecnoloxías dixitais tales como simuladores ou xemelgos dixitais.

 

Así, os espazos están dotados de equipamento como impresoras 3D, sistemas de realidades inmersivas e de realidade mixta/virtual, sistemas holográficos, recursos de intelixencia artificial aplicada ou equipos informáticos de altas prestacións, entre outros, en función das especialidades e familias profesionais.

 

O obxectivo é reforzar a conexión das ensinanzas de FP coa realidade dos centros de traballo e dinamizar a transferencia tecnolóxica entre os centros e o tecido produtivo.

 

Os centros que incorporan os novos espazos para o vindeiro curso son os seguintes:

Concello

Centro

Proxecto

A Coruña

CIFP Imaxe e son

Aula de radio 360 con produción multimedia inmersiva ambisónica e aumentada

A Coruña

CIFP Universidade Laboral

Aula inmervisa VR e de aplicacións AI

A Coruña

IES Urbano Lugrís

Aula de sites 5G

A Pobra do Caramiñal

IES da Pobra do Caramiñal

Espazo tecnolóxico integrado para os coidados auxiliares de enfermaría

A Pontenova

IES Enrique Muruais

Aula tecnolóxica “O Regazal”

As Pontes

IES Plurilingüe Castro da Uz

Aula tecnolóxica de simulación aumentada na FP

Betanzos

IES As Mariñas

Aula automatizada con control virtual, SCADA e realidade aumentada

Burela

IES Perdouro

DixitAula. Operacións e intervencións de alta tecnoloxía

Cangas

IES de Rodeira

Laboratorio de audio e gravación.

Carballo

IES Monte Neme

OnDaS IoTLAB

Ferrol

CIFP Ferrolterra

TERA: Espazo tecnolóxico de enerxías renovables e auga

Ferrol

CIFP Leixa

Leixa saúde 4.0

Ferrol

CIFP Rodolfo Ucha Piñeiro

Espazo de investigación e innovación de edificación (EiiE)

Foz

IES de Foz

Aula tecnolóxica do torrado do café

Lugo

CIFP As Mercedes

Conversión de aula eléctrica tradicional en aula tecnolóxica de control e simulación industrial

Lugo

CIFP Politécnico de Lugo

Aula tecnolóxica de dixitalización, escaneado e fabricación aditiva (Proxecto AT DIESFA)

Maceda

IES San Mamede

Lab Tech de programación multiplataforma

Moaña

IES Plurilingüe A Paralaia

Aula 4.0

Mondoñedo

IES Plurilingüe San Rosendo

Espazo de produción tecnificado

Monforte de Lemos

IES A Pinguela

Techno Shoemakers

O Barco de Valdeorras

IES Lauro Olmo

Aula Tech para peiteado

O Porriño

IES Ribeira do Louro

Aula-obradoiro polivalente intelixente orientado á pedra natural

Ourense

CIFP A Carballeira-Marcos Valcárcel

Espazo tecnolóxico de Intelixencia Artificial e Realidade Estendida

Ourense

CIFP A Farixa

Escenario Virtual Múltiple

Ourense

IES Universidade Laboral

Espazo de Tecnoloxía Aplicada no IES Universidade Laboral

Pontedeume

CIFP Fraga do Eume

Aula Multisensorial Polivalente

Ponteceso

IES Eduardo Pondal

Aula tecnolóxica para a calibración e aliñación de vehículos

Pontevedra

CIFP A Xunqueira

Aula tecnolóxica para a simulación de procesos produtivos na industria da madeira.

Pontevedra

IES Frei Martín Sarmiento

Aula CAD-CAM 4.0

Ribeira

CIFP Coroso

Aceleración Eco: Innovación en electromobilidade

Santiago de Compostela

CIFP Politécnico de Santiago

Aula de automatización industrial, robótica e dixitalización do mantemento

Valga

IES Plurilingüe de Valga

Espazo multifuncional de robótica aplicada a soldadura, ensaios, automatismos e impresión 3D.

Vilagarcía de Arousa

CIFP Fontecarmoa

Simulación de tenda e RV para os ciclos de comercio

Vigo

CIFP Audiovisual de Vigo

A aula inmersiva da EAV, ensinando cos tempos

Vigo

CIFP Manuel Antonio

Hotel Lab 5.0: centro de innovación hoteleira

Vigo

CIFP Valentín Paz Andrade

Aula Robótica 4.0

Vigo

IES Politécnico de Vigo

Aula colaborativa intelixente

Vilamarín

CIFP de Vilamarín

Aula Labintec Laboratorio de investigación tecnolóxica

 

File: 

Espazos de tecnoloxía aplicada na FP Información xeral Consellería de Educación, Ciencia, Universidades e Formación Profesional

Summary: 

O director territorial de Educación en Pontevedra, César Pérez, presidiu a reunión da comisión de seguimento dos traballos, que avanzan a bo ritmo

Xa se actuou sobre o 74% da superficie de cubertas e agora estase traballando no interior do edificio

Prevese que a mediados de xullo estean desmontadas as aulas móbiles

Idioma Gallego

O director territorial da Consellería de Educación, Ciencia, Universidades e Formación Profesional na provincia de Pontevedra, César Pérez Ares, participou hoxe na reunión da comisión de seguimento das obras do instituto IES Valle Inclán, de Pontevedra, onde se analizou o avance dos traballos co fin de que todas as aulas estean operativas para o inicio do curso escolar en setembro.

 

Segundo expuxeron os técnicos que participaron na xuntanza, nestes momentos xa están rematadas as obras das cubertas planificadas para a primeira e a segunda fase, o que supuxo actuar nunha superficie de 1.700 metros, que representa o 74% dos 2.300 metros totais de teito.

 

Agora durante a época estival estanse desenvolvendo as actuacións das cubertas previstas nas fases terceira e cuarta. Paralelamente, no interior do edificio estase traballando na segunda e terceira fase e desde a próxima semana comezarase coa montaxe da carpintaría exterior ata completar todas as fachadas do centro.

 

Por outra parte está previsto que a próxima semana se proceda á retirada de todas as pizarras e conexións dixitais das aulas móbiles do exterior e posteriormente, iniciar a desmontaxe das mesmas co obxectivo de que a mediados de xullo quede xa libre o espazo frontal do instituto. Xa en setembro, coas aulas completamente habilitadas e reformadas, iniciaranse as obras da zona administrativa do centro.

 

A Consellería de Educación, Ciencia, Universidades e Formación Profesional inviste un total de 4,7M€ nesta rehabilitación integral da que é a maior obra que se está realizando nestes momentos nun centro educativo galego. A intervención arrancou a mediados de setembro do ano pasado e prevese que estea totalmente rematada a comezos de 2025.

 

Información xeral Consellería de Educación, Ciencia, Universidades e Formación Profesional

Summary: 

A Consellería completará a rehabilitación integral do Colexio CEIP Plurilingüe Gregorio Sanz cun novo peche perimetral demandado pola comunidade escolar

A Xunta leva investidos case 3,8M€ na mellora dos centros deste concello desde 2009

Idioma Gallego

O conselleiro de Educación, Ciencia, Universidades e FP, Román Rodríguez, reuniuse esta mañá co alcalde de Ribadeo, Daniel Vega, e coas direccións dos colexios CEIP Plurilingüe Gregorio Sanz e CPR Sagrado Corazón de Jesús, do Instituto IES de Ribadeo Dionisio Gamallo e do Centro Integrado de FP Porta da Auga. No transcurso do encontro, ao que tamén asistiu unha representación da anpa co Gregorio Sanz, analizáronse as necesidades desta localidade lucense en materia de ensino.

 

O titular do departamento educativo da Xunta explicou que se va completar a rehabilitación integral do Colexio CEIP Plurilingüe Gregorio Sanz, na que o Goberno galego investiu case 1M€, coa execución dun novo peche perimetral demandado pola comunidade escolar. Así mesmo, tamén se está a valorar a adaptación dunha casa do consorcio municipal como lugar de encontro da anpa.

 

“Desde 2009 levamos investidos case 3,8M€ na mellora dos centros educativos de Ribadeo, coa reformas tanto do colexio como do instituto”, destacou Román Rodríguez. Así mesmo, o conselleiro salientou que se vén de instalar un ascensor e está previsto arranxar a casa do conserxe no Centro Integrado de FP Porta da Auga, cuxa oferta formativa se verá incrementada o vindeiro curso cun novo ciclo de FP Dual Intensiva, o de grao superior en Automoción, con 22 prazas.

 

A visita á Casa Consistorial rematou coa sinatura no libro de honra por parte do representante da Xunta de Galicia.

 

Información xeral Consellería de Educación, Ciencia, Universidades e Formación Profesional

Summary: 

Os centros contarán cun instrumento de mellora da convivencia tamén para as persoas LGTBI e actualizarase o Protocolo de atención á diversidade de identidade de xénero

O conselleiro de Educación, Ciencia, Universidades e FP dá conta no Parlamento do traballo da Xunta de Galicia a prol da igualdade e a convivencia nas aulas

Idioma Gallego

Todos os centros educativos contarán o vindeiro curso con novas ferramentas para seguir mellorando a convivencia nos centros a prol da igualdade e para protexer os dereitos das persoas LGTBI. Así o anunciou o conselleiro de Educación, Ciencia, Universidades e FP, Román Rodríguez, hoxe no Parlamento galego. “Levamos anos abordando a non discriminación e a igualdade por razón de orientación sexual ou identidade de xénero, e seguimos traballando para avanzar nesta materia”, asegurou.

 

A Xunta de Galicia porá en marcha no curso 2024/25 unha ferramenta para a detección concreta de casos de acoso ou ciberacoso, que inclúe especificamente as persoas LGTBI, o que permitirá “coñecer a situación en cada centro e realizar unha avaliación máis próxima ao alumnado”, sinalou Román Rodríguez.

 

Así mesmo, o Goberno galego actualizará o Protocolo de atención educativa á diversidade de identidade de xénero, co que se busca dar seguridade a moitas persoas e garantir a súa plena inclusión dentro das aulas. “Estará centrado en principios reitores como a seguridade e o interese superior de todos os menores, establecendo o centro educativo como un espazo seguro”, engadiu o titular da Consellería de Educación.

 

Prevención, detección e intervención

“Somos conscientes da importancia de actuar desde as escolas”, remarcou Román Rodríguez durante a súa intervención no Pleno, referíndose ao traballo de Educación en materia de prevención, detección e intervención.

 

Existen ferramentas de detección que permiten coñecer o clima de convivencia no sistema educativo, como é o caso das enquisas, e son fundamentais para que a partir deles cada centro implemente medidas concretas. De feito, “no último informe de convivencia”, dixo o conselleiro, “constatase que case o 90% do sistema considera que os conflitos nas aulas son pouco frecuentes”. Tamén alumnado, familias e profesorado observan que existe receptividade diante da diversidade nas aulas, con cifras por riba do 80%.

 

A través da Estratexia Galega de Convivencia 2025 a Consellería de Educación pon á disposición do conxunto do sistema educativo todos os instrumentos necesarios para garantir a igualdade nas aulas. Entre os proxectos máis destacados atópase o Plan contra o acoso e o ciberacoso, mentres que outros dos programas centrados na igualdade das persoas que se desenvolven nas aulas galegas son os Contratos Programa, onde máis de 300 centros desenvolven accións a prol da coeduación; o Plan Proxecta+, no que participan máis de 150 centros con numerosas iniciativas, ou os programas Que non te líen ti elixes, Cinema con perspectiva e Edureferentes.

 

Ademais, a Consellería de Educación vai lanzar un Plan de coeducación para crear espazos sen estereotipos que favorezan a liberdade do alumnado. E para completar toda a batería de medidas coas que se traballa, tamén se pon o foco na formación do profesorado e na información ás familias.

 

Información xeral Consellería de Educación, Ciencia, Universidades e Formación Profesional

Idioma Gallego

O conselleiro de Educación, Ciencia, Universidades e Formación Profesional, Román Rodríguez, mantivo hoxe unha reunión con Omar Hatamleh, presidente executivo de Ecosystems 2030, un dos foros de maior prestixio no campo da innovación, que celebrará este venres na Coruña un congreso con preto de 50 relatoras de todo o mundo baixo o título Mulleres en liderado.

 

Durante a recepción, o titular de Educación e Ciencia da Xunta puxo de relevo a importancia de apostar pola innovación e o desenvolvemento da intelixencia artificial en Galicia, unha tecnoloxía que será obxecto de análise no foro. Así mesmo, agradeceu a oportunidade que supón esta cita para reflexionar sobre a súa repercusión na seguridade, sobre as redes sociais ou a transformación de diversos sectores económicos.

 

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación anuncia a licitación, hoxe mesmo, da obra do centro, que será dotado de oito novas aulas e outros espazos e a mellora dos existentes

A actuación enmárcase no Plan de Nova Arquitectura Pedagóxica, a folla de ruta da Xunta para a modernización dos centros adaptándoos ás novas necesidades

Idioma Gallego

O conselleiro de Educación, Ciencia, Universidades e FP, Román Rodríguez, visitou esta mañá o Instituto IES Eduardo Pondal de Santiago de Compostela co gallo da licitación das obras de ampliación do centro, que abre o proceso hoxe. Neste senso, explicou que o investimento final superará os 3M€, máis do previsto inicialmente. O obxectivo é dotar ao instituto de oito aulas novas e outros espazos, ao tempo que se remodela o edificio xa existente.

 

A obra enmárcase no Plan de Nova Arquitectura Pedagóxica, un programa posto en marcha polo Goberno galego para renovar os colexios e os institutos, co fin de adaptalos ás esixencias actuais. No caso do Eduardo Pondal, “a obra responde ao crecemento demográfico dos barrios que comprende o instituto. Por iso, se amplía o espazo educativo aproximadamente 1.000 m²”, sinalou o conselleiro.

 

A ampliación, que se prevé que este rematada para o inicio do curso 2025/2026, realizarase sobre o edificio existente, en tres andares. Na planta baixa situaranse catro aulas, cunha saída nova ao espazo exterior; mentres que na primeira estarán as dúas aulas restantes e unha de tecnoloxía. No semisoto atoparase a clase de música, o almacén e o sistema de telecomunicacións. Ademais, se construirá un espazo cuberto de 140 m² con comunicación directa á nova pista deportiva e un soportal con acceso á zona de patio, para facilitar a entrada e saída do centro, ampliando así os espazos cubertos do centro.

 

Mellora das instalacións existentes

O proxecto de ampliación tamén contempla actuacións no edificio xa existente como a reforma dos aseos e a súa mellora instalando, entre outros, un baño accesible; e a substitución da cuberta da actual aula de tecnoloxía. Ademais, tamén se levarán a cabo diversos traballos de redistribución de espazos, facendo un desdobramento de oito aulas, entre elas, a clase de plástica.

 

A maiores, ampliarase a biblioteca, substituiranse as caldeiras de gasóleo por unhas novas de biomasa, eliminaranse os estrados de madeira de varias aulas e acometeranse outras melloras no relativo á seguridade do centro. Finalmente, recolocarase a pista polideportiva descuberta e darase solución ao desnivel.

 

Información xeral Consellería de Educación, Ciencia, Universidades e Formación Profesional

Summary: 

Os cursos de especialización nesta materia pasan de 6 a 14, e impartiranse en centros das catro provincias

O director da Axencia para a Modernización Tecnolóxica de Galicia e a directora de Formación Profesional presentaron hoxe os másteres nunha xornada en Ourense

Idioma Gallego

A Xunta reforza a especialización en ciberseguridade na Formación Profesional con 14 másteres e 340 prazas para o curso 2024/2025. Esta oferta formativa supón un incremento de 8 cursos de especialización e 200 prazas, ademais de ampliar o alcance xeográfico desta formación, que agora se impartirá en centros das catro provincias. Os cursos foron presentados esta mañá en Ourense polo director da Axencia para a Modernización Tecnolóxica, Julián Cerviño, e a directora xeral de Formación Profesional da Consellería de Educación, Ciencia, Universidades e FP, Eugenia Pérez.

 

A ampliación desta formación busca dar resposta á elevada demanda destes perfís por parte do sector tecnolóxico. Son dous os cursos de especialización ofertados: Ciberseguridade en contornos das tecnoloxías da información e Ciberseguridade en contornos das tecnoloxías de operación, que se impartirán en modalidade presencial e online en centros da Coruña, Ferrol, Vigo, Ourense, Marín, A Estrada, Vilagarcía, Lugo e Monforte.

 

Este reforzo da especialización en ciberseguridade na FP é unha das liñas de actuación do Proxecto Galego de Programas Superiores de Formación en Ciberseguridade, impulsado pola Axencia para a Modernización Tecnolóxica de Galicia e a Consellería de Educacion, Ciencia, Universidades e Formación Profesional, e conta cun investimento total de 2,5 millóns de euros que permitirá dotar aos centros cos equipamentos de última tecnoloxía neste ámbito.

 

A iniciativa abrangue, tamén, a creación dun espazo de alta especialización en ciberseguridade no Centro Galego da Innovación da FP Eduardo Barreiros para conseguir a máis alta formación e especialización do profesorado e a xeración de proxectos de I+D+i que sexan de transferencia directa ás empresas e institucións.

 

O Proxecto Galego de Programas Superiores de Formación en Ciberseguridade enmárcase nas actuacións do programa RETECH (Redes Territoriais de Especialización Tecnolóxica) e do Plan de Recuperación, Transformación e Resiliencia, financiado pola Unión Europea con fondos Next Generation.

 

O director da Axencia para Modernización Tecnolóxica de Galicia, Julián Cerviño, sinalou que que os especialistas en ciberseguridade “son un dos perfís máis demandados polo sector tecnolóxico” e que “todas as organizacións”, dende as administracións públicas ás empresas de tódolos tamaños, “precisan cada vez máis profesionais que velen pola seguridade da súa información.”

 

A directora xeral de FP, Eugenia Pérez, salientou que desde o seu departamento se está traballando para “responder a todos os ámbitos onde xorden necesidades” como é o caso do da ciberseguridade, cunha oferta reforzada para “dar resposta á demanda de profesionais que garantan a seguridade das persoas e dos procesos produtivos”.

 

Información xeral Consellería de Educación, Ciencia, Universidades e Formación Profesional

Summary: 

O conselleiro de Educación, Ciencia, Universidades e FP abre a xornada de presentación dos proxectos beneficiarios do programa Fábrica Intelixente e Sustentable 2023

Os nove proxectos apoiados nesta última edición forman parte de sectores clave da economía galega como a automoción, madeira, TIC ou alimentación, e están liderados por empresas referentes nos seus respectivos eidos

Idioma Gallego

O conselleiro de Educación, Ciencia, Universidades e Formación Profesional, Román Rodríguez, apuntou esta mañá na xornada de presentación dos proxectos beneficiarios da última edición do programa Fábrica Intelixente e Sustentable que a investigación industrial, o desenvolvemento experimental e a innovación son os puntais que deben guiar aos sectores produtivos, na medida en que permitirán mellorar a produtividade e optimizar os recursos, e que as tecnoloxías da Industria 4.0 como a intelixencia artificial, a fabricación aditiva ou o blockchain son unha oportunidade única para aumentar o valor engadido e crear unha vantaxe competitiva sobre os demais.

 

Por iso, o titular de Ciencia convidou ao tecido empresarial galego a seguir modernizándose a través da I+D+i e da adopción de tecnoloxías punteiras para consolidar a Galicia como unha potencia en I+D+i nos principais sectores da nosa economía, nun encontro celebrado na Cidade da Cultura de Galicia cos nove proxectos apoiados na última edición desta convocatoria.

 

Precisamente, Rodríguez subliñou que os nove proxectos apoiados a través de Fábrica Intelixente e Sustentable 2023 forman parte de sectores clave da nosa economía como a automoción, a madeira, as TIC ou a alimentación e que están liderados por empresas referentes nos seus respectivos eidos. Ademais, apuntou que máis da metade destas iniciativas se apoian nos principais centros de investigación e centros tecnolóxicos de Galicia, o que recalca a importancia de fortalecer ese vínculo entre ambos axentes que se vai seguir fomentando dende o seu departamento.

 

327M€ mobilizados desde 2016

Na xornada, na que o conselleiro estivo acompañado pola directora da Axencia Galega de Innovación, Carmen Cotelo, presentáronse tamén os proxectos Plástic Tu Oil (Plastic2Oil), liderado por Tecnología y Reciclaje de Materiales (Tyrma) para a obtención de residuos cero en reciclaxe de plásticos e, o proxecto Fisterra, promovido por Norvento xunto á Universidade de Vigo e ao CTAG, que ofrece unha solución para embarcacións que permitirá ás autoridades portuarias dispor dun subministro eléctrico descarbonizado e adaptado ao seu tráfico marítimo. Finalmente, tamén se celebrou unha sesión formativa de xustificación da axuda dirixida aos beneficiarios.

 

En total, a través das cinco edicións deste programa, apoiáronse un total de 33 proxectos, cunha axuda de 100 M€ e un investimento mobilizado que supera os 327 M€. As axudas desta convocatoria están cofinanciadas pola Unión Europea no marco do programa Feder Galicia 2021-2027.

 

Información xeral Consellería de Educación, Ciencia, Universidades e Formación Profesional

Idioma Gallego

A Xunta de Galicia recolle as achegas das organizacións sindicais sobre a nova regulación da Formación Profesional para o curso 2024-25. A directora xeral de FP, Eugenia Pérez, e o director xeral de Centros e Recursos Humanos, Jesús Álvarez, reuníronse hoxe coa Mesa Sectorial Docente para analizar as instrucións sobre a ordenación e a organización da FP en Galicia. Unha normativa que, ante os retrasos do Ministerio, ten por obxectivo dar certezas a centros, equipo docente e alumnado sobre os cambios que leva consigo a lei estatal de FP que se aplicará a partir de setembro.

Os representantes da Consellería de Educación, Ciencia, Universidades e FP explicáronlle aos presentes na reunión que estas instrucións son de carácter transitorio, debido a que o Goberno galego non poderá concretar o decreto de ordenación da FP e o seu desenvolvemento, no que xa se está a traballar, ata que se publique o estatal.

Información xeral Consellería de Educación, Ciencia, Universidades e Formación Profesional

Idioma Gallego

O presidente da Xunta, Alfonso Rueda, reuniuse esta tarde cos reitores das tres universidades galegas para darlles conta dos detalles da gratuidade da matrícula para estudantes de grao, que se aplicará tamén nas ensinanzas artísticas superiores. Ambos decretos de prezos públicos aprobáronse hoxe no Consello da Xunta co obxectivo de que estean vixentes xa no próximo curso.

Durante a reunión tamén abordaron outras cuestións de interese e vías de colaboración entre as universidades e a Administración autonómica.

Información xeral Consellería de Educación, Ciencia, Universidades e Formación Profesional

Summary: 

Rueda resalta a prioridade do Executivo autonómico de “garantir a igualdade de oportunidades” e lembra que Galicia foi “pionera na conxelación de taxas universitarias hai 13 anos”

Galicia convértese na “única comunidade na que os alumnos que aproben poderán estudar unha carreira totalmente de balde se cumpren os requisitos”

Terán matrícula de balde todos os que inicien estudos en primeiro curso, así como os de segundo e posteriores cursos que superen unha porcentaxe de créditos entre o 65% e o 90%, segundo a área de coñecemento

A maiores, as taxas de máster continuarán conxeladas para o conxunto do alumnado, ao igual que as de grao para aqueles que non cumpran con requisitos da gratuidade

Idioma Gallego

O presidente da Xunta, Alfonso Rueda, indicou hoxe que o Consello de Goberno vén de dar luz verde á “gratuidade da matrícula para os estudos de grao universitario, así como para os de ensinanzas artísticas superiores (Música, Arte Dramática, Deseño e Conservación e Restauración de Bens Culturais) en centros públicos galegos”, tanto no caso de novo ingreso como no de continuidade de estudos, unha medida que será aplicable para o próximo curso e coa que, ademais, se cumpre un “compromiso adquirido para os primeiros 100 días de goberno”.

 

Así pois, as familias cuxos fillos e fillas inicien por primeira vez estudos de grao universitario ou de grao en ensinanzas artísticas superiores o próximo curso terán bonificado o prezo da matrícula, o que contribúe, tal e como indicou Rueda, “a garantir a igualdade de oportunidades”, ao mesmo tempo que lembrou que Galicia foi “pioneira na conxelación de taxas universitarias hai 13 anos”.

 

O Consello ratificou hoxe os dous decretos de prezos públicos a través dos cales se implanta esta acción que, na práctica, blinda que todos os universitarios e estudantes de ensinanzas artísticas superiores que aproben teñan asegurada a matrícula gratuíta ao longo de toda a súa carreira universitaria desde a primeira chamada para a matrícula de xullo en diante. Isto converte a Galicia na “única comunidade autónoma na que os alumnos que aproben poderán estudar unha carreira totalmente de balde se cumpren os requisitos”.

 

Bonificación do 99%

No que atinxe aos estudos de grao, todo o alumnado de novo ingreso obterá unha bonificación equivalente ao 99% da matrícula para iniciar os seus estudos nas tres universidades públicas galegas ou nun centro público galego de ensinanzas artísticas superiores. Isto supón que os alumnos que cumpran os requisitos tan só aboarán o 1% do custo da matrícula, o que se traduce nunha cantidade simbólica de 7,1 euros ao ano de media como taxa. É dicir, 0,6€ de media ao mes.

 

Para iso, deberán cumprir co requisito de ter superado a ABAU nas convocatorias de 2024 ou ben as probas específicas para maiores de entre 25 e 45 anos organizadas pola Comisión Interuniversitaria de Galicia (CIUG), ou ter superado un ciclo formativo de grao superior no curso 2024.

 

No caso do alumnado de continuidade de 2º curso en diante, deberá ter cursado estudos de grao en Galicia no curso 2023/24 e matricularse no curso 2024/25 na totalidade dos créditos correspondentes ás materias previstas para o curso de que se trate, nunha das tres universidades públicas galegas.

 

A maiores, deberá ter superado as porcentaxes de créditos matriculados, algo que varía segundo a área de coñecemento: 90% dos créditos para as áreas de Artes e Humanidades e de Ciencias Sociais e Xurídicas, 80% para Ciencias da Saúde e 65% para as de Ciencias e Enxeñaría e Arquitectura.

 

Continuidade na conxelación das taxas

Doutra banda, para aqueles alumnos universitarios que non cumpran cos requisitos de gratuidade, o decreto aprobado hoxe tamén ratifica de novo a conxelación das taxas de grao e máster para o vindeiro curso, co que Galicia levará 14 anos consecutivos coas taxas universitarias conxeladas. Así pois, todos os alumnos que cursen un máster universitario e aqueles que cursen un grao e queden excluídos da gratuidade por non cumpriren os requisitos aboarán un prezo medio de 11,89 €/crédito.

 

Deste xeito, Galicia continuará a ter a universidade máis accesible de toda España, coa matrícula de grao gratuíta e os másteres máis baratos do Estado. “O que queremos é premiar e estimular o esforzo do alumnado”, asegurou Rueda.

 

Ensinanzas artísticas superiores

Así mesmo, o alumnado de ensinanzas artísticas superiores tamén se beneficia da gratuidade da matrícula destes estudos que, no caso dos de novo ingreso, deberán ter superado as probas específicas de acceso en Galicia. Quedan exentos deste requisito os que acceden directamente aos estudos superiores de Grao en Deseño ou en Conservación e Restauración de Bens Culturais sen necesidade de realizar a proba específica de acceso ao ter acadado un título de técnico superior de Artes Plásticas e Deseño.

 

Para o alumnado de continuidade (de 2º a 4º curso), para optar á bonificación do 99%, requírese estar matriculado en curso completo nun centro público de Galicia no curso anterior e ter superado en primeira matrícula como mínimo o 90% da totalidade deses créditos.

 

Estas medidas aprobadas hoxe supoñen redobrar a aposta da Xunta de Galicia polo apoio ás familias coa gratuidade da educación para o alumnado desde que entra na gardaría, na etapa 0-3 anos, ata que remata os seus estudos universitarios, ao tempo que se fomenta a cultura do esforzo, premiando o interese, a dedicación e o bo aproveitamento académico.

 

Información xeral Consellería de Educación, Ciencia, Universidades e Formación Profesional

Summary: 

Román Rodríguez agradece a colaboración portuguesa para mellorar a formación dos estudantes galegos, poñendo en valor os vínculos coa lusofonía

Trátase dun acordo pioneiro do que se poderán beneficiar estudantes de 4º de ESO e 2º de Bacharelato

Farán as probas Camões Júnior desde os seus propios centros e poderán certificar os niveis A1, A2 e B1

Idioma Gallego

O alumnado que estude portugués como primeira ou segunda lingua estranxeira nos centros educativos galegos poderá acreditar de xeito gratuíto o seu nivel lingüístico a partir do vindeiro curso, a través do Instituto Camões. O conselleiro de Educación, Ciencia, Universidades e FP, Román Rodríguez, e o embaixador de Portugal en España, João Mira, asinaron hoxe un acordo de colaboración para impulsar esta medida, entre outras dirixidas a difusión da lingua e a cultura lusas no ensino. No acto participaron tamén o secretario xeral da Lingua, Valentín García, a directora xeral de Ordenación e Innovación Educativa, Judith Fernández.

 

A medida está pensada para que o alumnado que estude a lingua do país veciño poida acreditar ata tres niveis de competencia lingüística do Marco Común Europeo de Referencia para as linguas (A1, A2 e B1) ao remate das etapas de ESO e Bacharelato.

 

Cómpre salientar que se trata dun acordo pioneiro xa que Galicia é a primeira Comunidade Autónoma en subscribir un acordo deste tipo co Instiuto Camões que, ademais, deriva da aplicación da Lei Valentín Paz Andrade para o aproveitamento da lingua portuguesa ou vínculos coa lusofonía.

 

Román Rodríguez quixo agradecer ao embaixador luso a colaboración do Instituto Camões para mellorar a formación do alumnado galego, tanto a través desta nova liña de acción como do acordo que existe desde hai anos polo que a entidade portuguesa contribúe con varios auxiliares de conversa a centros educativos galegos.

 

Neste sentido, puxo en valor a proximidade das linguas e culturas galega e portuguesa e a importancia de fortalecer estes vínculos para abrir novas oportunidades de presente e de futuro, seguindo o espírito da mencionada Lei Paz Andrade.

 

Probas no propio centro

Para acadar a certificación os estudantes terán que superar as probas do Exame de Portugués Lingua Estranxeira Camões Júnior, pero non terán que desprazarse para facelo, senón que as farán desde o seu centro educativo a través dunha plataforma electrónica.

 

O exame ten unha duración de 120 minutos e consta de catro partes: comprensión oral, expresión oral, comprensión escrita e expresión escrita. Ten un carácter progresivo polo que, dependendo da puntuación acadada pola persoa que se examina, a puntuación equivale a un dos devanditos tres niveis. Seis semanas despois da realización do exame, emitirase a certificación Camões Júnior de xeito telemático a cada participante que acadase un nivel mínimo de A1.

 

Accións de divulgación

O acordo asinado hoxe inclúe, así mesmo, cooperación na divulgación de actividades dirixidas ao profesorado que imparte portugués como lingua estranxeira ou materia non lingüística en lingua portuguesa. Tamén en todo tipo de accións neste sentido dirixidas ao alumnado, como cursos, seminarios ou actividades culturais.

 

Así mesmo, a Consellería e o Instituto Camões comprométense a promover a difundir este novo medio de certificación da lingua portuguesa.

 

Información xeral Consellería de Educación, Ciencia, Universidades e Formación Profesional

Summary: 

As persoas interesadas teñen ata o 4 de xullo para tramitar a petición nalgunha das 214 titulacións diferentes que se imparten en Galicia

Idioma Gallego

Desde mañá e ata o 4 de xullo estará aberto o prazo de solicitude para cursar unha titulación de Formación Profesional nas preto de 47.000 prazas de novo ingreso que vén de habilitar a Xunta de Galicia para o próximo curso 2024-25, un 11% máis que no presente curso.

 

Os interesados poderán escoller entre 214 titulacións diferentes -17 delas de nova implantación- repartidas en 153 ciclos de grao medio, básico e superior, 22 másteres, 24 títulos de alta especialización e 15 programas formativos orientados a persoas con necesidades educativas especiais.

 

Así pois, quen desexe estudar un ciclo de FP o próximo curso, a través do Portal Educativo ten dispoñibles as instrucións cos detalles específicos para cada unha das modalidades. En todo caso, as principais datas son as seguintes:

 

Oferta

Presentación de solicitudes

Resolución provisional de solicitudes

1ª adxudicación de prazas

Período de matrícula para as persoas admitidas

Ordinaria/modular

 

Do 24 de xuño ás 9:00 h. ao 4 de xullo ás 13:00 h.

10 de xullo

17 de xullo

Do 17 de xullo desde as 9:00 h. ao 22 de xullo ás 13:00 h. (para a 1ª adxudicación)

FP Dual Intensiva

Do 24 de xuño ás 9:00 h. ao 4 de xullo ás 13:00 h.

8 de xullo

15 de xullo

(do 8 ao 12 de xullo haberá un período de selección polo centro educativo e as empresas)

Prazas adxudicadas e en espera o 15 de xullo

Do 16 de xullo ás 9:00 h. ao 24 de xullo ás 13:00 h.

Másteres de FP

Do 24 de xuño ás 9:00 h. ao 4 de xullo ás 13:00 h.

10 de xullo

17 de xullo

Do 17 de xullo ás 9:00 h. ao 22 de xullo ás 13:00 h.

 

Cómpre lembrar que a Xunta vén de ampliar a oferta de FP para o vindeiro curso acadando de novo un máximo histórico cun total de 46.714 prazas de novo ingreso, cun reforzo na práctica totalidade das familias profesionais así como en todas as áreas territoriais.

 

Información xeral Consellería de Educación, Ciencia, Universidades e Formación Profesional