Escoitar, Aprender e Compartir

Saída Charla Alzhéimer APSD

 

O pasado luns, alumnado de APSD ordinario e modular do IES de Chapela, acudiu en Vigo a unha charla formativa dentro do programa DIVULGAMENTE da Fundación Barrié. Nela puidéronse sensibilizar e coñecer que é o Alzheimer e outros tipos de demencias, que partes do cerebro se ven afectada en cada unha delas, por que se producen e cales son as principais diferenzas entre elas.

 

 

Xubilación de Esther Mato Méndez

Hoxe, 29 de setembro, toca despedirnos da nosa compañeira Esther Mato Méndez pola súa xubilación. Quixo o azar (ou o destino?) que Esther, orientadora do noso centro anos atrás, volvese este curso á que é sen dúbida a súa casa para rematar aquí a súa andadura profesional tras varios anos dedicada á educación en Marrocos. O IES de Chapela estará sempre en débeda con ela polo seu gran labor como orientadora durante tantos anos, colleitando para a nosa comunidade educativa importantes éxitos que aínda seguen a dar os seus froitos e forman xa parte do mellor da historia do IES de Chapela. Compañeira, moitas grazas por todo e ata pronto!   

 

Curso de capacitación dixital

Dende o IES Pedro Floriani ofértase un curso de capacitación dixital, orientado principalmente a persoas adultas que non teñan un nivel alto en medios dixitais e queiran aprender a darse de alta en aplicacións (Sergas, Ministerio, Xunta...), usar apps para solicitar citas, enviar correos electrónicos, facer documentos, realizar videochamadas, etc. As clases serían os luns e xoves polas tardes durante o mes de outubro e principios de novembro. O prazo de matrícula remata o mércores 4 de outubro. As persoas interesadas poden chamar ao 886 12 04 13.

 

SEMANA DA MOBILIDADE 23

DENTRO DAS ACTIVIDADES PARA PROMOCIONAR A MOBILIDADE FIXEMOS CO ALUMNADO DE 1º DE ESO UNHA ANDAINA POLA SENDA DA AUGA PARA RECOLLER LANDRAS QUE DESPOIS PLANTAREMOS. CO ALUMNADO DE 4º DE ESO PLANTAREMOS ÁRBORES MAIS ADIANTE, CON 4º CHEGAMOS ATA O BANCO DAS VISTAS POLA RÍA. 

 

 

 

ESTE ANO A SEMANA EUROPEA DA MOBILIDADE ESTÁ DEDICADA AO AFORRO DE ENERXÍA, DEIXAMOS AQUÍ UNS ENLACES PARA QUE POIDAS VER A INFORMACIÓN. NON O DUBIDES MÁIS... PONTE EN ACCIÓN!

NO IES CHAPELA QUEREMOS FOMENTAR A MOBILIDADE ACTIVA, O TRANSPORTE PÚBLICO E O USO DE ENERXÍAS LIMPAS. 

Semana Europea de la Movilidad 2023 (miteco.gob.es)

EUROPEAN MOBILITY WEEK |  Home

Validación de módulos profesionais

Lémbrase ao alumnado de ciclos formativos que pode solicitar a validación de módulos profesionais.

As solicitudes de validación de ciclos LOXSE/LOE a ciclos LOE e de ciclos LOXSE a ciclos LOXSE (así como a validación do módulo de FOL de calquera ciclo LOXSE ou LOE e as validacións a partir da acreditación de unidades de competencia e os certificados profesionais) son competencia da Dirección do centro educativo e deberán presentarse nos 20 primeiros días de clase. Para iso cubrirase o Anexo XIV e achegarase orixinal e copia do certificado académico.

As demais solicitudes de validación (de ciclos LOE a ciclos LOXSE, de estudos universitarios, dunha FP I ou FP II) son competencia do Ministerio de Educación e poden presentarse ao longo de todo o curso, pero terán preferencia para a súa resolución as presentadas ata outubro. Para estas solicitudes cubrirase o Anexo V e achegarase orixinal e copia do certificado académico en castelán. No caso de solicitar a validación a partir de estudos universitarios, haberá que presentar a maiores a seguinte documentación:

  • Copia do programa oficial das materias cursadas, selada ou asinada electronicamente en cada cara, a unha cara e en castelán.
  • Certificado da universidade onde conste que o programa que se achega é o realmente cursado e superado pola persoa interesada, tamén en castelán.

As solicitudes de validación presentaranse nas ventás de secretaría do centro de luns a venres en horario de 9:00 a 13:00 horas ou os luns e venres pola tarde na xefatura de estudos en horario de 17:00 a 20:00 horas.

Ligazón para a presentación dos ciclos a distancia

Para acceder á presentación dos ciclos a distancia, que terá lugar este martes 12 de setembro ás 19:00 horas de forma telemática, preme na seguinte ligazón:

Ligazón presentación distancia

Corrixido o 08/09/23 tras detectar un erro na data (a presentación será o 12, non o 11).

Presentación e inicio de clases curso 2023-24

Listaxe definitiva da concesión de cheques de material escolar

A partir de hoxe, mércores 26 de xullo, está dispoñible na entrada do centro a listaxe definitiva de alumnado admitido e excluído da axuda para material escolar (cheques de 60 e 75 euros).

As persoas SOLICITANTES poden recoller os cheques a partir do 1 de setembro. Se algunha das persoas beneficiarias precisa recollelo antes da data indicada, pode solicitalo presencialmente os días 27 e 28 de xullo e recollelo o seguinte día hábil. 

Cheque material escolar

A partir de hoxe, mércores 12 de xullo está dispoñible na entrada do centro o listado provisional de alumnado admitido e excluído da axuda para material escolar.

O período de reclamacións estará aberto ata o vindeiro mércores, 19 de xullo, e o 26 de xullo publicarase a listaxe definitiva. Os cheques poderán recollerse en conserxería a partir do 1 de setembro.

Acto de Graduación AFD 2023

O pasado xoves 6 de Xullo, o alumnado do IES de Chapela que cursa o Certificado de profesionalidade de Atención Sociosanitaria a Persoas Dependentes en Institucións Sociais celebrou un íntimo acto de graduación acompañado dos seus familiares, amigos e amigas, profesorado e equipo directivo que os acompañou durante toda a súa etapa formativa. Esperamos que este acto servise de alento para o período de prácticas que agora comeza e futura incorporación no ámbito laboral.

Desexámosvos moita sorte neste novo camiño que emprendedes e agardamos que a formación acadada no IES de Chapela vos axude a ser uns bos e boas profesionais empapando de sorrisos, coidados, amor e cariño aos vosos futuros residentes e familiares.

Distribuir contido