CEIP Plurilingue de Andrade (Pontedeume, A Coruña) from Bibliotecas Escolares de Galicia on Vimeo.
Unha fiestra aberta á biblioteca escolar do CEIP Plurilingüe de Andrade (Pontedeume) coa intervención do profesorado do equipo da biblioteca e outros membros da comunidade educativa.
A Fundación Germán Sánchez Ruipérez, en colaboración co Ministerio de Educación, Cultura y Deporte, veñen de facer público o resultado do estudo LAS BIBLIOTECAS ESCOLARES EN ESPAÑA. Dinámicas 2005-2011, do que xa avanzara algúns resultados Luis González, director xeral adxunto da FGSR, nas IV Xornadas de Bibliotecas Esolares de Galicia (novembro 2012).
Entre outras conclusións do estudo podemos ler que as bibliotecas están máis profesionalizadas, contan cun plan de traballo que se avalía periodicamente e teñen un tratamento técnico normalizado, pero é preciso profundizar na función da biblioteca como o centro para a aprendizaxe das competencias.
ACCESO Á VERSIÓN COMPLETA DO ESTUDO -- ACCESO AO RESUME
Este estudo vén completar a estatísca sobre as bibliotecas escolares realizada polo Ministerio de Educación, no curso2010-2011 e que se fixera pública en decembro de 2012.
A Conselle
ría de Cultura, Educación e Ordenación Universitaria, no contexto das actuacións do PLAN LÍA de bibliotecas escolares (Lectura, Información e Aprendizaxe), publica cada ano uns carteis divulgativos que pretenden facer visible as distintas posibilidades da biblioteca escolar como apoio ao desenvolvemento do currículo e como instrumento fundamental para a formación das persoas lectoras.
O lema elixido para este curso 2013/2014, LER CIENCIA NA BIBLIOTECA ESCOLAR,trata de sensibilizar sobre a importancia da lectura de textos de carácter científico, de textos divulgativos ou de textos literarios que tratan temas relacionados coa ciencia. Todos estes contidos teñen cabidana biblioteca e enriquecen a bagaxe lectora do alumnado. A ilustración é de PATRICIA CASTELAO.
En brev
e chegará aos centros o cartel que a Consellería de Cultura, Educación e Ordenación Universitaria edita todo os anos para conmemorar o Día da Biblioteca (24 de outubro) e participar da celebración do mes da biblioteca escolar que propón a IASL (Internatioanl Association of School Librarianship). A biblioteca escolar é unha biblioteca específica e así se recolle na actual Lei de bibliotecas de Galicia, no seu artigo 31. Polos seus obxectivos, polos serivzos que presta á comunidade educativa, polo seu funcionamento, a biblioteca escolar, concebida como un centro de recursos de lectura, información e aprendizaxe, xenera contextos educativos fértiles para a adquisición de competencias clave para o alumnado que medra na sociedade da información e contribúe á adquisición de todas as competencias básicas do currículo.
O lema elixido para este ano, LER CIENCIA NA BIBLIOTECA ESCOLAR, trata de sensibilizar sobre a importancia da lectura de textos de carácter científico, de textos divulgativos ou de textos literarios que tratan temas relacionados coa ciencia. Todos estes contidos teñen cabida na biblioteca e enriquecen a bagaxe lectora do alumnado. A ilustración é de PATRICIA CASTELAO.
Por outra parte, a incorporación do profesorado dos departamentos de ciencias aos equipos de biblioteca, diversifica as posibilidades de intervención da mesma e favorece o deseño de actividades plurais en contidos e imprescindibles para o desenvolvemento de todas as competencias básicas.
A biblioteca ten na ciencia unha fonte riquísima para realizar propostas de carácter interdisciplinar, que debe aproveitarse para que este tipo de actividades vaia callando en todo o profesorado e facilite realmente o desenvolvemento do currículo en todas as áreas e materias. É unha oportunidade tamén para avanzar nas estratexias de comprensión lectora de todo tipo de textos, e moi especialmente, un desafío para mellorar as habilidades de uso, selección e produción de información en todos os soportes, moi especialmente os recursos electrónicos. Aprender a valorar a información que se atopa en internet con criterios de credibilidade, veracidade, cientificidade, etc., é imprescindible para o noso alumnado; identificar, por exemplo, a pseudociencia entre a inxente cantidade de contidos audiovisuais que circulan por internet resulta difícil (ás veces incluso para os adultos), pero só a alfabetización mediática e informacional pode dotalos de recursos para poder facelo.
O DOG do 18 de setembro publica a Orde de 2 de setembro de 2013, pola que se resolve a convocatoria do Plan de mellora de bibliotecas escolares en centros públicos non universitarios de titularidade da Consellería de Cultura, Educación e Ordenación Universitaria, para o curso 2013/2014.
Tralas tres baixas habidas con respecto ao curso anterior e coa incorporación de 23 centros novos, esta Rede de bibliotecas escolares galegas consta dun total de 524 centros.
Todos os centros incluídos neste programa reciben axudas para renovar os fondos da colección (sexa en formato impreso ou electrónico); á súa vez, os centros que se incorporan nesta convocatoria e os centros da convoCatoria 2012 reciben axudas significativas para mellorar os equipamentos necesarios de cara á ofrecer servizos e realizar actividades propias das funcIóns que lle corresponden á biblioteca escolar: apoiar o desenvolvemento dos currículos en todas as áreas de aprendizaxe, formar lectores competentes, espertar o gusto pola lectura en todos os sectores da comunidade educativa (é dicir, servir de recurso fundamental ao desenvolvemento dos Proxectos Lectores de Centro); contribuír a adquisición de competencias clave para o alumnado, como son a competencia de aprender a aprender ou a competencia mediática e informacional (lectura crítica das linguaxes dos distintos medios de comunicación actuais, pero tamén o uso e produción de información desde unha perspectiva ética). Todas estas funcións están recollidas no artigo 113 da LOE e na normativa curricular vixente.
A revista ED
UGA (Revista Galega do Ensino), da Conselleíra de Cultura, Educación e Ordenación Universitaria, recolle no seu último número un bo feixe de experiencias de bibliotecas escolares, espallados polas distintas seccións da revista, nunha selección de actividades coordinada desde a Asesoría de Bibliotecas Escolares, en colaboración cos responsables de EDUGA. En total, 14 fiestras para asomármonos a unha realidade potente, innovadora, froito de moitos esforzos compartidos, e moita profesionalidade en xogo. Velaquí os enlaces a todos elas:
Acaba de saír publicada no DOG de hoxe, 29/05/2013, a ORDE do 16 de maio de 2013 pola que se convoca o Plan de mellora de bibliotecas escolares en centros públicos non universitarios de titularidade da Consellería de Cultura, Educación e Ordenación Universitaria para o curso 2013/2014.
A través desta orde preténdese apoiar a continuidade do Plan de mellora de bibliotecas escolares mediante a concesión de novas contías aos centros educativos incluídos neste programa en anteriores convocatorioas así como seleccionar 20 novos proxectos para a súa incorporación.
O prazo para a presentación remata nun mes polo que o último día válido para presentar as instancias será o sábado 29 de xuño de 2013.
Acceso aos ANEXOS (escribir directamente e imprimir)
Os vindeiros 7 e 8 de marzo terán lugar en Compostela os Encontros do Plan de mellora de bibliotecas escolares, unha actividade de formación organizada conxuntamente polo Servizo de Formación do Profesorado (CAFI) e pola Dirección Xeral de Centros e Recursos Humanos (Asesoría de bibliotecas escolares), da Consellería de Cultura, Educación e Ordenación Universitaria, coa colaboración do Ministerio de Educación, Cultura e Deporte.
Estes encontros responden á vontade da consellería de reunir, unha vez máis, ao profesorado que coordina os equipos de biblioteca dos centros integrados no Plan de mellora de b.e (PLAMBE), un programa que procura, desde o ano 2005, a transformación das bibliotecas escolares en auténticos centros de recursos para a lectura, a información e a aprendizaxe, e no que ten sido decisiva a creación de vínculos profesionais entre os integrantes deste colectivo.
Ainda que se tratarán aspectos diversos relacionados cos servizos e o papel das bibliotecas escolares nos centros educativos, farase fincapé na función destas bibliotecas como compensadoras de desigualdades sociais, aspecto que cómpre salientar nun momento en que as diferenzas no acceso aos recursos culturais pode medrar. Outro dos aspectos destacados será a alfabetización mediática e informacional, un contido imprescindible para o alumnado que medra na sociedade da información e que ten na biblioteca escolar un aliado natural.
Daranse cita na segunda xornada destes encontros (día 8) un total de 504 responsables de bibliotecas da Rede de bibliotecas escolares galegas. Na primeira xornada (7) só participarán os responsables das 63 bibliotecas que se integraron no programa neste curso 2012/2013.
PROGRAMA -- ENLACE AO ESPAZO MOODLE COS RECURSOS (entrar como convidado)
Na mañá de hoxe, 20 de febreiro de 2013, o auditorio da Biblioteca de Galicia, na Cidade da Cultura, acolleu a presentación dun proxecto piloto para a incorporación dos lectores electrónicos nas bibliotecas escolares, E-LBE, integrado no PLAN LÍA de bibliotecas escolares, da Consellería de Cultura, Educación e Ordenación Universitaria. En novembro de 2012, a Dirección Xeral de Centros e Recursos Humanos realizou unha convocatoria destinada aos centros incluídos no Plan de mellora de bibliotecas escolares. Recibíronse un total de 327 solicitudes e procedeuse á selección de 25 centros que cumprían os dous requisitos previstos: compromisto coa biblioteca escolar (manifestado na memoria do curso anterior) e instalación en concellos rurais galegos. Cunha sesión informativa e a entrega dos lectores electrónicos aos centros seleccionados botou a andar este pequeno proxecto que busca, fundamentalmente, proporcionar ao alumnado novas experiencias de lectura.
Nesta sesión estiveron presentes os responsables das bibliotecas do CEIP Mestre Valverde Mayo, de Mos (Pontevedra) e do IES Lama das Quendas, de Chantada (Lugo), que xa botaran a andar iniciativas de uso de lectores electrónicos nos seus centros, para comentar a súa experiencia e proporcionar, así, información sobre liñas de actuación posibles.
Os centros incluídos neste proxecto E-LBE contarán cun equipamento de 3/4 dispositivos de lectura electrónica que utilizarán en función dos obxectivos do Proxecto Lector de Centro e coa orientación que o equipo de biblioteca crea máis oportuno. A final de ano participarán, mediante un breve formulario, na elaboración dun informe para a valoración desta experiencia.
Achégase un díptico informativo e unha relación máis ampla de recursos electrónicos relacionados coa lectura dixital e o libro electrónico.
PPT Proxecto E-LBE -- PPT CEIP Valverde Mayo (Mos) -- IES Lama das Quendas (Chantada)
+ Informacións: IMIT (Iniciativas de Modernización e Innovación Tecnolóxica) -- Portal Xunta de Galicia
O luns 10 de decembro tivo lugar en Madrid, na Biblioteca Nacional, o acto de entrega de diplomas acreditativos dos Premios Nacionais de boas prácticas na xestión e dinamización de bibliotecas escolares, correspondente ao ano 2011, e última convocatoria deste premio, ata o momento. Estiveron presentes os representantes dos seis centros galegos galardoados, acompañados do Director Xeral de Centros e Recursos Humanos e o Conselleiro de Cultura, Educación e Ordenación Universitaria.
Modalidade A (centros de ensino infantil, primaria, educ. especial e educ. de adultos):
Súmanse así, aos 29 centros que obtiveran premio nacional nas convocatorias no período 2003-2010:
|
2003
|
IES ANXEL CASAL-MONTE ALTO (A Coruña)
|
|
2004
|
CEIP de Présaras-Vilasantar (A Coruña)
IES Fernando Esquío de Xubia-Neda (A Coruña)
|
|
2005
|
CPI Luis Díaz Moreno, de Baralla (Lugo)
IES Sánchez Cantón, de Pontevedra
IES Terra do Xallas, de Santa Comba (A Coruña)
IES Xulián Magariños, de Negreira (A Coruña)
|
|
2006
|
IES Ramón María Aller Ulloa, de lalín (Pontevedra)
IES Leliadoura, de Ribeira (A Coruña)
|
|
2007
|
CEIP A Ponte, de Lugo.
CEIP San Martiño-Salcedo, Pontevedra
CEIP Milladoiro, de Malpica (A Coruña)
IES Marqués de Suanzes, de Ferrol
|
|
2008
|
IES CARLOS CASARES, Viana do Bolo (Ourense).
IES Afonso X O Sabio, Cambre (A Coruña)
COLEGIO LA SALLE, Santiago de Compostela.
|
|
2009
|
CEIP Frián-Teis, de Vigo (Pontevedra)
CRA Mestre manuel Garcés, de Tomiño (Pontevedra)
CEIP A Pedra, de Bueu (Pontevedra)
IES Sanxenxo (Pontevedra)
IES de Catabois, de Ferrol (A Coruña)
|
|
2010
|
CRA Mestra Clara Torres, de Tui (Pontevedra)
CPI Tino Grandío, de Guntín (Lugo)
CEIP de Cervo, Cervo (Lugo)
CEIP Os Muíños, de Muxía (A Coruña)
CEIP Quintela de Moaña (Pontevedra)
IES de Monterroso, Monterroso (Lugo)
IES de Fene, Fene (A Coruña)
IES Manuel Antonio (actual CIFP) de Vigo (Pontevedra)
|
Parabéns. novamente, ás comunidades educativas que fan posible, día a día, a presenza de bibliotecas escolares ÚTILES para un ensino eficaz e para a tan necesaria construción dunha sociedade lectora .
Desde a Aula Virtual do CAFI (Centro Autonómico de Formación e Innovación) pódese acceder xa aos materiais das IV Xornadas de Bibliotecas Escolares de Galicia, celebradas en Santiago de Compostela os pasados 9 e 10 de novembro. Estes materiais completaranse en breve, unha vez editados os vídeos correspondentes ás diferentes sesións, así como o vídeo resume da xornada. ACCESO aberto (entrar como convidado).
Engadimos desde aquí informacións complementarias e enlaces relacionados coa temática das xornadas, LER PARA VER, relativa á formación para a competencia mediática e informacional, co apoio dos recursos da biblioteca escolar.
Os días 9 e 10 de novembro de 2012 terán lugar, en Santiago de Compostela (Palacio de Congresos), as IV XORNADAS DE BIBLIOTECAS ESCOLARES DE GALICIA, cita anual do colectivo de profesores e profesoras comprometidos coa biblioteca escolar e a lectura nos centros públicos galegos. Logo da paréntese de 2011 (ocasionada pola celebración, nas datas acostumadas, do que fora o congreso Bibliotecas Escolares en Tránsito, con carácter estatal), reanúdase unha actividade que, con periodicidade anual, combinando a fórmula xornadas/encontros, vén reunindo a máis de mil docentes en Compostela, preocupados por mellorar a súa formación en todo o relacionado coa lectura na actual sociedade da información, así como as estratexias necesarias para unha axeitada educación neste terreo, pois as bibliotecas escolares son territorios privilexiados para adquirir competencias imprescindibles para moverse polo mundo da información, son centros de recursos de lectura, información e aprendizaxe, fundamentais en colexios e institutos.
O lema destas xornadas, LER PARA VER, recolle a necesidade de educar para unha lectura comprensiva e crítica dos medios de comunicación, dos medios polos que se transmite información na sociedade actual, máis aló de soportes ou xéneros discursivos. No programa contémplanse conferencias plenarias (Fabio Tropea, Tíscar Lara, Luis González) e mesas de experiencias, coa participación de expertos en distintos medios, relacionándoos coa educación (prensa, radio, cómic, videoxogos, arte, audiovisuais, vídeo, cine, animación....) e responsables de bibliotecas escolares con boas prácticas nestes ámbitos.
Está aberto o prazo para a inscrición nesta xornada de formación (12 horas), na aplicación FPROFE, con data límite do 12 de outubro. O código da actividade é G1202009, e atópase aloxada nas actividades do Plan Anual de formación do profesorado 12/13, do CAFI-Santiago. É unha actividade organizada conxuntamente por este organismo, dependente do Servizo de Formación do Profesorado, e pola Asesoría de Bibliotecas Escolares, da Dirección Xeral de Centros e Recursos Humanos.
Publícase en formato pdf un CADERNO INFORMATIVO 2012/2013 coa relación de todos os centros integrados actualmente no Plan de mellora de bibliotecas escolares, xunto con outras informacións de interese: blogues de bibliotecas escolares galegas, blogues dos clubs de lectura, orientacións sobre o modelo de biblioteca escolar, pautas para a actualización da colección da biblioteca, informacións relacionadas co Proxecto Lector de Centro, propostas da consellería en relación con bibliotecas escolares e lectura, materiais a disposición dos centros para o fomento da lectura, bibliografía e recursos dixitais en relación coas bibliotecas escolares, a alfabetización informacional ou o fomento da lectura... (Trátase dun documento en revisión que se actualizará periódicamente).
 |
|
|
 |
Desde hai algúns anos, a IASL vén instando á celebración do "mes da biblioteca escolar" (anteriormente, Día da biblioteca escolar no cuarto luns de outubro) co fin de difundir as posibilidades deste tipo de bibliotecas e a súa potencialidade como factor de calidade do ensino nos centros. Desde os inicios, a Asesoría de bibliotecas escolares apoiou esta iniciativa internacional cunha chamada á realización de actividades que servisen para facer visible a biblioteca nos centros. O lema deste ano é A biblioteca escolar, unha chave para o pasado, o presente e o futuro. |
|
Desde 2008, a Consellería de Educación vén editando, a comezos de cada curso escolar, un cartel para difundir o modelo de biblioteca escolar polo que se está a traballar, uníndose desta forma á celebración do Día da biblioteca (24 de outubro), no convencemento de que, aínda sendo unha biblioteca específica (cunha misión clara dentro do centro educativo, e uns servizos e actividades acordes á súa definición como "centro de recursos de lectura, información e aprendizaxe"), non deixa de ser unha BIBLIOTECA; máis aínda, é a ÚNICA biblioteca pola que pasa toda a poboación en idade escolar dun país: todos os nenos e todos os mozos teñen no seu centro (ou deberían ter) unha biblioteca escolar.
Galicia conta, desde hai pouco (Lei 5/2012, do 15 de xuño), cunha Lei de Bibliotecas de Galicia que contempla a Rede de Bibliotecas Escolares como integrantes do Sistema Galego de Bibliotecas, xunto coa biblioteca de Galicia, a Rede de Bibliotecas Públicas de Galicia, as Bibliotecas Universitarias e as bibliotecas especializadas entre outras.
Desde o IES Poeta Añón (Outes, A Coruña), chéganos este vídeo que documenta o proceso de transformación dunha zona de paso nun espléndido recuncho de lectura, coa colaboración da rapazada e do Departamento de Plástica do centro: un orzamento mínimo, algún moble reciclado e unha gran dose de imaxinación e ghanas... Gañar espazos para a lectura, unha forma de "mediar" e facilitar que os rapaces e rapazas se sintan a gusto nesa actividade, que é a única forma de habituarse á lectura... Parabéns por esta iniciativa e grazas por compartila!!
As bibliotecas escolares galegas viviron importantes transformacións nos últimos anos, grazas ao esforzo conxunto de comunidades educativas e administración, nunha tarefa que ten como finalidade ofrecer máis e mellores instrumentos ao alumnado para a súa formación académica e persoal. Estas transformacións non foron só físicas (moito profesorado afirma que a biblioteca é o espazo máis fermoso do seu centro); o cambio máis importante é o que se produce no centro educativo cando a biblioteca se activa, porque arredor das súas propostas e dos seus recursos, da actividade que xenera e os apoios que presta, botan a andar (ou cobran forza, asentándose) dinámicas de traballo diferente, prácticas pedagóxicas máis activas, propostas máis colaborativas, proxectos ilusionantes que axudan a construír coñecemento e a construír comunidade tamén. As bibliotecas, ao renovarse e activarse, confírmanse como aceleradores de innovación, de innovación educativa.
Con este lema, Biblioteca escolar, acelerador de innovación, preséntase o cartel que neste curso 2012/2013 edita a Consellería de Cultura, Educación e Ordenación Universitaria, co gallo da celebración do mes da biblioteca escolar (outubro) e do Día da Biblioteca (24 de outubro) e que chegará aos centros en datas próximas. Nesta ocasión, a ilustración correspondeu ao creador galego Andrés Meixide, que vén sumarse así aos ilustradores que teñen colaborado con esta consellería no obxectivo de difundir as posibilidades da biblioteca escolar (Manuel Mariño/2008, Miguelanxo Prado/2009, Marina Seoane/2010, Emma Ríos/2011)
Comunicación presentada no Congreso Iberoamericano de las lenguas en la Educación y la Cultura-IV congreso Leer.es (Salamanca, 5/7 de setembro de 2012)
Encontros Plan de mellora de bibliotecas escolares 2011/2012 from Bibliotecas Escolares de Galicia on Vimeo.
Vídeo resume dos Encontros do Plan de mellora de bibliotecas escolares 2011/2012, celebrados en Santiago de Compostela os días 19 e 20 de abril, coa asistencia de responsables ou membros dos equipos de bibliotecas incluídas neste programa da Consellería de Cultura, Educación e Ordenación Universitaria (nesta ocasión, centros que se integraron nas catro últimas convocatorias). Para a organización desta actividade de formación, no contexto do Plan de mellora de bibliotecas escolares, contouse con financiación do Ministerio de Educación, Cultura e Deporte, en virtude dos convenios de colaboración nesta materia.
O DOG do 7 de maio fai pública a ORDE do 26 de abril de 2012 pola que se convoca o Plan de mellora de bibliotecas escolares en centros públicos non universitarios de titularidade da Consellería de Cultura, Educación e Ordenación Universitsaria, para o curso 2012/2013.
Seleccionaranse 55 novos centros e, así mesmo, poderán continuar no programa aqueles centros xa integrados que presenten a documentación oportuna, en tempo e forma, e acaden valoración positiva na memoria do presente curso 11/12. Esta actuación está cofinanciada polo Ministerio de Educación, en virtude do Convenio de colaboración para a mellora das bibliotecas escolares (Addenda 2010), un programa de cooperación entre as dúas administracións educativas, asinado en 2006.
O prazo de presentación de solicitudes é de UN MES a partir da data de publicación, sendo a data límite o 7 DE XUÑO.
Os días 19 e 20 de abril de 2012 tiveron lugar en Santiago de Compostela (Palacio de Congresos) os Encontros do Plan de mellora de bibliotecas escolares 2011/2012, coa participación de responsables de bibliotecas de 306 centros dos 449 que conforman este programa no presente curso. En breve estarán dispoñibles os vídeos de boa parte das sesións, así como un vídeo resume das dúas xornadas.
Todos os materiais (presentacións dos diferentes relatores e informacións adicionais) están dispiñibles na aula virtual habiliada, a través desta LIGAZÓN (pódese entrar como convidado).
Julia González, responsable do CEIP Mestres Goldar (Vigo) realizou unha reportaxe fotográfica da EXPOSICIÓN DE MATERIAIS que os centros participantes achegaron e que se puido ver durante a celebración dos encontros.
A través da páxina LECTURA LAB (FGSR), coñecemos este estudo realizado a instancia do Departamento de Educación do Estado de Nova Iork en relación coa influencia das bibliotecas escolares nos resultados obtidos polos estudiantes. No estudo, realizado polo New York Comprehensive Center en 2011, obtéñense resultados que falan da importancia de apoiar ás bibliotecas escolares, dados os beneficios que proporciona a docentes e alumnos a súa presenza activa nos centros educativos. Así por exemplo, o "primeiro impacto" do que fala o estudo afirma:
Grazas á colaboración na busca de obxectivos coherentes e a que facilitan aos estudantes o acceso á tecnoloxía, as bibliotecas escolares axudan a mellorar a efectividade dos docentes.
Videoconferencia de Daniel Cassany para a apertura do curso Bibliotecas escolares, cultura escrita y sociedad en red (2011). Corresponde á segunda edición do curso do CAEU da OEI Diplomatura de posgrado en Bibliotecas escolares, cultura escrita y sociedad en red http://www.oei.es/postgrado_bibliotecas/
Á hora de transformar a biblioteca no centro de recursos de lectura, información e aprendizaxe, unha das primeiras accións é a de redistribuír os espazos e crear zonas para as distintas actividades que se poden levar a cabo na biblioteca. Cómpre estudar as posibilidades da superficie dispoñible e, cando non é moita, ver de aproveitala ao máximo e non renunciar a ningunha das zonas (lectura informal, lectura individual, traballo en pequeno grupo, gran grupo, zona de ordenadores, recuncho audiovisual para uso autónomo, exposición de novidades, zona de xestión, préstamo e atención a usuari@s, taboleiro informativo, recuncho de lectura en voz alta ou de presentación de traballos, recitais, etc.), aínda que sexa gañando "terreo colindante": corredores, zonas de paso, recunchos infrautilizados.... Cando a biblioteca dispón dun espazo amplo (coma neste caso, o CPI Manuel Suárez Marquier, de O Rosal, Pontevedra) o deseño das distintas zonas (en función tamén dos recursos dispoñibles), é esencial. Así o están facendo en moitas das bibliotecas escolares galegas, que están a innovar non só os espazos senón, especialmente, as actividades que se levan a cabo nelas e os servizos que ofrecen ás súas comunidades educativas. Estas actuacións permiten a creación de espazos atractivos, onde se pon en valor a lectura en toda a súa extensión, e o encontro "amable" cos recursos culturais e o coñecemento. Non se trata dun luxo senón dun dereito, o dereito á educación de calidade. Un bo exemplo é esta imaxe da zona de lectura informal na biblioteca do CPI Manuel Suárez Marquier.
Ademais de guías de lectura ou recomendacións, as bibliotecas escolares están a difundir diversas publicacións de interese: boletíns trimestrais, guías para colaboradores, guías para pais, boletíns temáticos... Velaquí unha pequena selección:
O Ministerio de Educación vén de comunicarlle á esta consellería que no Concurso Nacional de boas prácticas na xestión e dinamización das bibliotecas escolares, correspondente ao ano 2011, acadaron galardón seis bibliotecas escolares desta comunidade. Por segundo ano consecutivo, o primeiro premio na modalidade de ensino infantil e primario é para un centro galego. Velaquí a relación de centros premiados:
Parabéns ás comunidades educativas destes centros polo esforzo realizado, e polo recoñecemento que estes premios supoñen á profesionalidade e o compromiso do profesorado que pon en marcha e mantén estas bibliotecas, estes espazos educativos de primeiro nivel. As nenas e os nenos que se forman nelas como lectores e como cidadáns, ben o merecen.
