IES Plurilingüe Antón Losada Diéguez

CELEBRACIÓN DO 25N NO LOSADA

Taboleiro

ACTIVIDADES PROGRAMADAS PARA O 25 NOVEMBRO DE 2022. DÍA INTERNACIONAL POLA ELIMINACIÓN DA VIOLENCIA CONTRA AS MULLERES

1. Participación na Estación da Igualdade, actividade promovida polo CIM do Concello da Estrada.
Horarios e grupos:
-8:45 a 10:25_3º ESO A e B
-10:45 a 12:25_4º ESO A e B
Lugar: Fundación de Exposicións da Estrada

2. Concentración da comunidade educativa no patio posterior do centro na que o alumnado de 1º e 2º ESO mostrará os lemas elaborados arredor do día pola eliminación da violencia contra as mulleres. Lectura de manifesto.
Horario: 12:25 horas.

3. Concurso de deseños para o alumnado de 4º ESO
4. Charlas nas diferentes titorías de FPB
5. Distribución de adhesivos conmemorativos.
6. Mesa violeta na entrada do centro, con publicacións arredor da igualdade.

RECOLLIDA DO PREMIO EMOVE EN MADRID

Taboleiro

O pasado sábado 12 de novembro, no Teatro Lope de Vega de Madrid, Iria Pérez e Lara Rey (3º ESO) acompañadas do profe Emilio Villanueva recolleron o premio na sección reportaxe polo vídeo realizado o curso pasado "As tics con xeito: contrasinais" outorgado polo Festival EMOVE (Festival escolar y universitario de las artes audiovisuales).

Entrega do premio no Teatro Lope de Vega de Madrid

A concesión e entrega do premio tivo unha calorosa acollida nos medios de comunicación locais. Destacamos esta interesante entrevista emitida en Radio Estrada:

MAGOSTO NO LOSADA

Celebración da Festa do magosto. Asado de castañas e reparto entre o alumnado e profesorado. Organiza o alumnado de 4º ESO B.

Horario: De 13:15 a 14:25 horas.

Lugar: Patio do centro.

ELECCIÓNS AO CONSELLO ESCOLAR 2022

Taboleiro

Xa está iniciado o proceso de renovación do Consello Escolar do IES Plurilingüe Antón Losada Diéguez.

As votacións para renovar os/as representantes nos diferentes sectores que o compoñen terán lugar o vindeiro 24 de novembro de 2022.

Os postos que van ser renovados son os seguintes:

Profesorado: 40% (3 representantes)

Alumnado: 50% (2 representantes) Na elección os/as 2 máis votados/as substituirán aos 2 que rematan mandato, e terán nomeamento ate o 2026.

Nais e pais: Toca renovar aos 2 pais que son electos. O representante da ANPA non se renova xa que ten nomeamento ata o 2024.

Persoal de administración e servizos: Non se renova xa que a actual representante ten nomeamento ata o 2024.

O prazo de presentación de candidaturas remata o venres 11 de novembro ás 14:00 horas e dita presentación debe facerse na Secretaría do centro.

O LOSADA FOI SELECIONADO PARA PARTICIPAR NA LIGA MAKER DRONE

O IES Plurilingüe Antón Losada Diéguez foi seleccionado como un dos 18 centros de Galicia que van participar na LIGA MAKER DRONE, organizada e patrocinada pola Fundación Barrié e o Instituto Tecnolóxico de Galicia. Trátase da segunda edición do campionato e é o único destas características en todo o estado.

A actividade iniciouse cunha xornada de introdución e presentación aos drons e o seu funcionamento, destinada a todo o alumnado de Tecnolóxia de 2º ESO no salón de actos do centro e no Pavillón Coto Ferreiro.

En próximas datas será escollido un equipo de 9 rapaces e rapazas de 2º de ESO, coordinados polo profe Emilio Villanueva terán que resolver un reto coa axuda dun dron que terán que deseñar, construír, programar e pilotar eles e elas mesmas.

O día 4 de novembro o equipo desprazarase ao Auditorio da Fundación Barrié, na Coruña onde terá lugar a presentación do reto.

Despois dunha serie de sesións de preparación e de resolución do reto, o 5 de maio, todo o alumnado de 2º acudirá ao Coliseum da Coruña para a xornada de exhibición de todos os drons dos 18 centros educativos.

A inciciativa foi amplamente recollida nos xornais: La Voz de Galicia e Faro de Vigo.

Podes ver máis imaxes da xornada inicial AQUÍ

#LIGAMAKERDRONE

https://ligamakerdrone.com/

O ALUMNADO DO LOSADA PARTICIPA NA RECOLLIDA DE LIXO MARIÑO DAS PRAIAS GALEGAS

O alumnado de 3º de ESO, por iniciativa da profe María Villanueva (Departamento de Bioloxía e Xeoloxía) participou no día de hoxe na limpeza de lixo mariño da praia América, en Lourido, Nigrán. O noso alumnado compartiu a xornada de recollida con persoas da Asociación de dano cerebral Alento.
A actividade enmárcase no proxecto STOP AND HELP! Que o lixo no chegue ao mar promovido polo Colexio de Biólogos de Galicia cuxo principal obxectivo consiste en fomentar a conservación do patrimonio natural do Camiño de Santiago implicando tanto á poboación local como ás peregrinas e peregrinos, tecido asociativo etc.
O lixo recollido (un total de 27 quilos nunha hora) foi clasificado en diferentes categorías polos participantes, destacando a inxente cantidade de cabichas de tabaco encontradas. Plásticos de todo tipo, máscaras covid, botellas, e mesmo unha dentadura postiza completaron o arsenal recollido.
Cos restos obtidos realizarase unha intervención artística final levada a cabo por reputadas personalidades do mundo da arte en Galicia que será exposta no Centro de Visitantes do Parque Nacional Marítimo-Terrestre das Illas Atlánticas deGalicia coa finalidade de servir de memoria viva na loita contra os lixos mariños e as súas consecuencias sobre o medio ambiente.

Podes ver máis imaxes AQUÍ

O ALUMNADO DOS CICLOS DE MADEIRA PARTICIPA NUNHAS XORNADAS FORMATIVAS EN FEXDEGA

O alumnado e profesorado do Departamento de Madeira asistiu á Xornada Tecnolóxica do sector que tivo lugar os pasados venres e sábado no recinto de FEXDEGA, en Vilagarcía. Participaron encharlas de formación dos programas e máquinas e dispuxeron de asesoramento e explicacións técnicas das características e manexo das máquinas (Galimaq, Homag). Unha parte do alumnado tivo a ocasión de realizar a montaxe de mobles cos elementos fabricados nas máquinas e que foron doados ao centro.

Parabéns pola iniciativa e polo traballo.

Máis imaxes AQUí

PREMIO PARA UN VÍDEO REALIZADO POR ALUMNAS DO LOSADA

O video AS TICS CON XEITO:CONTRASINAIS, realizado polas alumnas Iria Pérez e Lara Rey a finais do curso pasado, coa colaboración do seu profe Emilio Villanueva foi premiado no certame estatal EMOVE FESTIVAL. O magnífico traballo foi premiado na categoría Reportaxes, 1º ciclo ESO. e o premio será entregado en datas vindeiras na capital do estado. Moitos parabéns!!! Aí queda o vídeo:

ASÍ SERÁ O INICIO DO CURSO 2022-2023

Taboleiro

Estes serán os horarios de inicio dos diferentes grupos:

O alumnado correspondente agardará no patio dianteiro do centro, no exterior do edificio para entrar no mesmo cando sexa convocado. Será recibido polo Equipo Directivo e os titores e titoras correspondentes.

Unha vez feita a presentación, o alumnado continuará no centro no horario e aula que lle corresponda, ata o final da xornada.

Pode descargarse o horario en PDF AQUÍ.