Excursión a Marcelle 2017

O alumnado de 3º e 4º de Educación Primaria visitou este martes 23 de maio o Parque da Natureza de Marcelle. Os nenos e nenas tiveron ocasión de coñecer as características e hábitos de diferentes especies animais. Desfrutaron dun día ao aire libre, en plena natureza no que non faltou o compañeirismo e a felicidade.

Aquí deixamos unhas fotos que amosan os momentos vividos.

                

 

EXCURSIÓN FIN DE CURSO 5º E 6º PRIMARIA. 2017

Os días 15 e 16 de maio o alumnado de 5º e 6º de Educación Primaria realizaron unha viaxe ao Campamento Fieitás (O Grove). Alí, desenrolaron unha serie de actividades dirixidas na praia da Lanzada (bodyboard, atrapa a bandeira) así coma no campamento (camiño da morte e destrución, tirolina...).

Pasárono moi ben e aquí vos deixamos unhas imaxes que o demostran.

                            

                           

*Redactoras/es e editoras/es desta noticia: Diana, Carla, Isabel, Laura, Lucía, Marta, Paula, Jorge, Noelia e Valentina (6ºA)

Os cativos e cativas do colexio de visita no Grove

Este martes 23 de maio o alumnado de Educación Infantil xuntos cos compañeiros e compañeiras da Escola Unitaria de Arcos de Furcos fomos de excursión de fin de curso ao Grove; divididos en catro grupos, e por turnos, primeiro fixemos unha visita guiada ao Acuario e participamos de dous obradoiros de concienciación medioambiental e coidado dos nosos mares; despois baixamos ao porto do Grove e no paseo marítimo recargamos as pilas cunha comida campestre á beiriña do mar e xogamos un cachiño nun dos parques infantís que había moi perto; e finalmente, pola tardiña, subímonos no turitren e visitamos a península do Grove e a Illa da Toxa. 

Coma sempre premede nas imaxes ou visitade a nosa galería de fotos para ver canto aprendemos, o moito que nos divertimos e canta caloriña pasamos.

                                

                               

 

FONDO SOLIDARIO DE LIBROS DE TEXTO E AXUDAS PARA ADQUIRIR LIBROS DE TEXTO E MATERIAL ESCOLAR

De acordo coas instrucións da Consellaría de Cultura, Educación e Ordenación Universitaria e a Orde do Fondo Solidario de Libros de texto e Axudas para adquirir libros de texto e Material escolar ( Orde do 16 de maio de 2017- DOG do 22-05-2017)procedemos a facer público o contido desta orde a todos os sectores da comunidade educativa.

Para o curso 2017-2018 o alumnado matriculado nos centros educativos públicos poderán beneficiarse das diversas modalidades de gratuidade solidaria dos libros de texto dos niveis obrigatorios de ensino:

1.- Fondo solidario de libros de texto: alumnado matriculado en 3º,4º, 5º e 6º de EP e en 1º,2º, 3º e 4º da ESO, nos que se manterán os libros de texto do curso 2016-2017.

2.- Axudas para adquirir libros de texto: alumnado matriculado en 1º e 2º de EP.

3.- Axudas para a adquisición de material escolar: todo o alumnado matriculado en EP e ESO.

O prazo de presentación de solicitudes será dende o 23 de maio ata o 23 de xuño. Podedes pasar a recoller os FORMULARIOS correspondentes pola secretaría do centro en horario de mañá, de 8,45 a 13,45 horas, na páxina do centro ou na páxina da xunta.

Ante calquera dúbida ou aclaración póñanse en contacto co centro

Festa da Lingua 2017.

Un ano máis celebramos no centro a Festa da lingua na ESO coa entrega do V premio de poesía Carme de Xinzal, que convoca a Asociación O Fervedoiro, e a representación da obra de teatro Conversas coa lingua (adaptación da peza teatral Conversas coa nobre dama de Olimpio Arca).

Educación Primaria tamén participou coas súas actuacións, murais e co photocall da Galiña Azul de Carlos Casares.

Aquí vos deixamos os vídeos e as fotografías. E que dure mil primaveras máis!

  

SAÍDA AO GROVE 1º CICLO EP

O alumnado de 1º e 2º de primaria fomos de excursión de fin de curso ao Grove. Primeiramente visitamos o acuario, onde puidemos ver e coñecer máis sobre as distintas especies das augas frías, cálidas e doces. Despois leváronnos de paseo no turitren polo pobo, cruzando tamén a ponte que nos levaba á illa da Toxa. Por último subimos no catamarán que nos levou pola ría ata unha batea, onde puidemos ver tres tipos de cultivos mariños e dar de comer ás gaivotas. Pasámolo moi ben!

Premede na imaxe ou visitade a nosa galería de fotos para ver as cousas que fixemos.

                    

A Froita tamén é doce

O alumnado de  6º de Educación Infantil disfrutou onte coa degustación de diferentes froitas para merendar logo de divertirse  a través de xogos e dinámicas para descubrir sabores. Para esta actividade as titoras levaron aos nenos e nenas ao comedor do cole onde Julia, a Técnica de Prevención do Concello, lles preparou unha colorida merenda baixo o título A FROITA TAMÉN É DOCE!

Premede nas imaxes ou visitade a nosa galería de fotos para ver a merendola preparada e papada.

                               

Obradoiro de Poesía con Yolanda Castaño. 3º e 4º da ESO

Pensando nese día das Letras Galegas que só homenaxeou tres mulleres en 64 anos, a Concellaría de Igualdade do Concello de Cuntis trouxo á poeta Yolanda Castaño ao noso centro para que se contase ao alumnado de 3º e 4º da ESO da cantidade de poetas con A maiúsculo que temos na literatura galega.

Premede na imaxe ou visitade a nosa galería de fotos para ver algunha das actividades que fixemos.

                                                          

ENTREGA DE PREMIOS DO CERTAME LINGUA DE NAMORAR

Esta pasada fin de semana tivo lugar a entrega dos Premios do Certame de Declaracións de Amor na rede Lingua de Namorar, organizado pola Secretaría Xeral e pola Dirección xeral de Xuventude, Participación e Voluntariado. A alumna do noso centro INES AMADO RODRÍGUEZ de 4º da ESO acadou o 2º Premio na categoría de alumnado de Educación secundaria coa mensaxe "Escribindo poesía". 

Unha vez máis, Moitos Parabéns Inés!!! Aquí vos deixamos uns enlaces da noticia á TVG e á páxina da xunta e Consellaría correspondente.

                                          

TVG: http://www.crtvg.es/informativos/lingua-de-namorar

Xogo Interactivo Carlos Casares.

Este pasado venres 12 de maio, o alumnado de 2º da ESO do noso centro acercouse ata a Biblioteca Municipal de Cuntis onde participou dun xogo interactivo arredor da figura de Carlos Casares, autor homenaxeado este ano no Día das letras Galegas. A través de xogos de preguntas e actividades varias os/as nosos/as alumnos/as coñeceron un pouco máis da vida e obra de Carlos Casares así como o funcionamento e instalacións da Bilioteca Municipal.

Premede nestas imaxes ou visitade a nosa galería de fotos e veredes algúns dos momentos vividos polo noso alumnado da ESO.

              

Distribuir contido