Visita a Campiño e Lourizán

O alumnado de terceiro e cuarto de educación primaria está a desenvolver unha serie de actividades de concienciación medioambiental e coidado dos montes e árbores de Galicia. Unha das actividades que levaron a cabo e que máis impactou ao alumnado nestes días de traballo foi a visita á base aérea contraincendios de O Campiño onde os brigadistas e demáis persoal desta base lles amosou cómo era o seu traballo e como usaban todo o equipamento do que dispoñen para a prevención e extinción de incendios coma os camións motobombas, o helicóptero, os seus traxes, as mangueiras, etc.

A rapazada desfrutou dun día moi divertido e puido comprobar como era a vida e traballo destes profesionais compartindo con eles/as unha xornada de convivencia moi especial.

Podedes botarlle un ollo ás fotos que sacaron os/as mestres/as e coas que seguirán traballando na aula premendo nas imaxes ou visitando a nosa galería de fotos.

            

Saída ao teatro "Guillermo Tell". 3º ciclo primaria

O pasado martes 31 de outubro o alumnado de 5º e 6º de primaria asistimos ao concerto didáctico da ópera Gullermo Tell de Gioacchino Rossini. Descubrimos a lenda deste heroe medieval a partires da fantástica adaptación realizada pola Compañía de Comediants A Baldufa.

Podedes ver as fotos premendo nas imaxes ou na nosa galería de fotos.

      

Samaín 2017

Rematou o mes de Outubro e con el chegou outro ano máis a festa do Samaín ao noso colexio en forma de cabazas, cabaciñas e cabazóns que viñeron disfrazadas de vermes, de camións da Patrulla Canina, de fadas, de bruxas, de trasnos, demos e un longo etc. Ademáis o alumnado da sección bilingüe en lingua inglesa de terceiro de primaria tamén axudou na decoración emprestándonos os seus deseños terroríficos de gatos, bruxas e meigas.

Moitas grazas ás familias de Educación Infantil que coma sempre respostaron  moi ben ao noso chamado de colaboración e compartiron con seus/as fillos/as un tempo moi importante para eles e para todos/as nós. 

Premede nas imaxes para ver como quedou o corredor principal do colexio.

  

Saída de outono ao Río Gallo. Educación Infantil.

Este xoves 26 de outubro o alumnado de Educación Infantil fixo unha saída ao río Gallo de Cuntis como actividade de convivencia e de traballo dentro do programa dos Plans Proxecta Proxecto Ríos no que estamos a participar cos/as nosos/as compañeiros/as do colexio.

Primeiro fixemos un pequeno roteiro a pé pola beira do río, recollemos materiais para logo traballar na aula, tomamos a merenda todos/as xuntos e aínda tivemos tempo para botar unhas carreiras, xogar cos nosos/as amigos/as e desfrutar dunha xornada diferente coas nosas mestras.

As mestras sacáronnos moitas fotos e podedes botarlle un ollo premendo nestas imaxes ou visitando a nosa galería de fotos.

      

Magosto 2017

Un ano máis chegou ao noso centro o Magosto, un chisco máis cedo do acostumado pero igual de cheo de actividades, obradoiros, xogos, teatro, diversión e por suposto...castañas. Comezamos a xornada con xogos populares para todo o alumnado de Infantil e Primaria, despois viñeron os obradoiros para Primaria e o teatro para Infantil, e pechamos a mañá coa degustación de castañas asadas que tan xenerosamente nos mandaron as familias do noso alumnado.

Un ano máis queremos dar as grazas a todo o profesorado que participou na organización e posta en marcha dos obradoiros, ao alumnado de sexto de primaria por guiar aos cativos/as de Infantil facendo de padriños e madriñas e ao de cuarto da ESO por axudar cos xogos de toda Primaria, aos Piñeiriños por traernos unha vez máis teatro, música e diversión, e por suposto ás familias de todo o alumnado por achegarnos as castañas que puxeron fin a esta xornada de convivencia tan completa.

Coma sempre premede nestas imaxes ou visitade a nosa galería de fotos para ollar algúns dos momentos vividos neste día de festa. 

     

            

     

Xornadas de Educación Vial no CPI de Cuntis. Outubro 2017

O pasado mércores 18 e xoves 19 de outubro o alumnado de cuarto, quinto e sexto de primaria participou dunhas Xornadas de Educación Vial realizadas polos axentes da Policía Local de Cuntis en colaboración coa DXT. Os nosos rapaces e rapazas asistiron a unha serie de charlas informativas sobre comportamentos cívicos nas estradas e rúas e seguidamente puxeron en práctica os coñecementos traballados na pista de cars instalada no pavillón do centro.

Premede nestas imaxes e veredes que ben o pasou a nosa rapazada facendo de peóns e a bordo dos cars.

                   

PRESENTACIÓN D'O CANTEIRO DE SEBIL

Na tarde de onte o alumnado de 3º e 4º da ESO asistiu á presentación do vídeo “O canteiro de Sebil”, realizado pola Asociación Quinteiro e organizado polo Departamento de Xeografía e Historia. Este documental narra a vida de Xohán Xesús González, veciño de Cuntis que viviu no primeiro terzo do século XX, e que destacou pola súa obra literaria e política, o que lle costaría ser asasinado polos fascistas en setembro de 1936.

Foi un luxo poder contar no noso centro con esta actividade grazas á colaboración do colectivo o Quinteiro que pon en valor cunha grande calidade a historia, porque a historia local é tamén a historia global. Grazas por compartir co noso alumnado o voso traballo.

Podedes botar un ollo ás fotos que fixemos desta actividade premendo nestas imaxes ou visitando a nosa galería de fotos.

           

Club de Lectura 2017-2018

O noso Club de Lectura "As Campaiñas" volve abrir as súas portas e desta vez irá dirixido ao alumnado de 3º de primaria até 4º de secundaria. Como teremos dous grupos de lectores faremos os nosos encontros cada quince días, un de primaria e outro de secundaria, cada martes  de 14,30 a 15,30hs.

Aquí vos deixamos o enlace ao noso blogue para que lle botedes un ollo ao que temos pensado facer e ao que xa comezamos a facer na nosa primeira xuntanza deste martes 17 de outubro.

http://ascampainhas.blogspot.com.es/2017/10/comezamos.html

Xornadas de Convivencia do Equipo de Mediación Escolar. Setembro 2017

Os días 6 e 7 de outubro os equipos de Mediación Escolar de primaria e secundaria tivemos unha xornada de convivencia no albergue de Sabucedo na Estrada.

Rodeados dun entorno natural espectacular estivemos traballando e poñéndonos ao día sobre as técnicas de mediación e resolución de conflitos, tamén aproveitamos para coñecernos mellor e coñecer Sabucedo.

 

Foi unha experiencia estupenda e pasámolo moi ben. Premede nas imaxes para ver unhas fotos das xornadas.

           

Comezamos un novo curso. 2017-2018

O alumnado de Infantil e Primaria foi o primeiro en voltar ás aulas o 11 de setembro, seguíulle o de Secundaria o pasado 15 de setembro e finalmente, despois do Período de Adaptación, foron os/as máis cativos/as de tres anos este luns 25 de setembro os/as últimos/as en incorporarse ás rutinas deste novo curso 2017-2018.

Xa tiveron lugar as respectivas reunións informativas para as familias de todo o alumnado, fixemos as presentacións do persoal docente novo e o reencontro cos de sempre, e tamén rematamos o reparto dos libros do Fondo Solidario de Libros de Texto de Primaria e Secundaria.

  

BENVIDOS E BENVIDAS A ESTE NOVO CURSO 2017-2018

Distribuir contido