SUBIDA AO XESTEIRAS 2018.

O martes 20 de xuño, o alumnado de 4º ESO realizou unha saída ao monte Xesteiras para levar a cabo unha visita guiada ao único radar meteorolóxico de MeteoGalicia. O percorrido ata alí fíxose camiñando e debido ás altas temperaturas foi un pouco máis duro do esperado, pero gustoulles moito poder acceder ao interior do radar que tantas veces teñen visto, e coñecer de primeira man polos técnicos de MeteoGalicia, o seu funcionamento.

Visitade a galería de fotos ou premede nestas fotos para ver algúns momentos desta xornada....

    

ACTO DESPEDIDA ALUMNADO 4º ESO. CURSO 2017-2018

Este pasado martes 19 de xuño pola tarde tivo lugar no noso centro o acto de despedida do alumnado de 4º da ESO que pronto nos deixará para comenzar unha nova etapa escolar e de vida adulta.

Cada un/ha deles/as tivo a oportunidade de dirixirse ao público presente para compartir as súas lembranzas e historias máis divertidas do seu paso polo colexio, o seu colexio da infancia e o seu colexio para sempre.

Finalmente recibiron un agasallo coa súa foto de orla como recordo da súa estancia con todos os/as seus/as mestras e mestres que lles desexan toda a sorte do mundo.

Coma sempre podedes botarlle un ollo aos momentos máis significativos vividos premendo nesta imaxe ou visitando a nosa galería de fotos. 

 

ANDAINAS FIN DE CURSO 2018

Este luns 18 de xuño o alumnado de educación infantil e de primeiro e segundo de primaria fixo unha andaina dende o centro até Castrolandín e o entorno das Campaiñas. Coa axuda de Manuel, o técnico de turismo do concello, aprendimos cousas dos nosos antepasados que viviron en Castrolandín e desfrutamos dunha mañá de convivencia moi xeitosa cos/as nosos/as compañeiros/as. 

Podedes ver algunhas imaxes da xornada premendo nestas fotos ou visitando a nosa galería de imaxes.

    

 

O CURSO 2017-2018 EN IMAXES DE 2º DE PRIMARIA

Esta é só unha pequena mostra dos momentos vividos neste curso en 2º EP: momentos de ledicia, unión e crecemento. Desexámosvos un divertido verán. As titoras de 2º EP.

             

EXCURSIÓN FIN DE ETAPA 5º E 6º DE PRIMARIA. 2018

Os días 11, 12 e 13 de xuño o alumnado de 5º e 6º de Educación Primaria fixemos unha excursión á granxa

escola Fervenzaventura en Silleda.

Fixemos moitísimas actividades relacionadas coa natureza e a actividade física como sendeirismo, equitación,

tiro con arco, escalada, tirolina...

Pasámolo xenial e convidámosvos a ver as fotos da nosa estancia.

O alumnado de 3º de primaria convértese en cociñeiros e poetas.

O pasado 8 de xuño o alumnado de 3º A e B fixo pinchos pero non calquera pincho. 

Elaboraron canapés de froitas! A continuación explícannos a actividade con detalle. Pasos:

  • 1º Fas unha poesía. Por exemplo: Adios corazón de tiza! Te regalo un beso y una sonrisa.
  • 2º Pásaa a limpo.
  • 3º Colles un pau de pincho e pegas a poesía.
  • 4º Corta a froita, logo pínchaa no pau e tachaaaán .....un canapé listo!!!
  • 5º Degustalos cos compañeiros/as do outro grupo. Agasallando así un montón de pareados e poesías.

Como actividade final fixemos este artigo para a páxina web. Premede nas fotos e ollade que ben o pasamos.

                          

3º E 4º DE PRIMARIA REPOBOANDO EN CUNTIS

O pasado venres 25 de maio o alumnado de 3º e 4º de Educación Primaria desprazouse ao polígono de A Ran para realizar unha plantación de cerdeiras e castiñeiros. Acompañados por un axente forestal e a cuadrilla de incendios da zona aproveitaron para poñer en práctica o aprendido durante este curso co seu proxecto Piteas: Os incendios Forestais.

A actividade resultou moi interesante e divertida xa que tamén tiveron a oportunidade de manexar a mangueira da motobomba e lembrar o material necesario para combater o lume.

O alumnado comprometeuse a coidar as súas árbores e o vindeiro curso continuar coa súa labor de repoboación. 

Premede nestas imaxes para ver alguns dos momentos vividos durante a xornada....

    

 

SAIDA A COMPOSTELA. 4º ESO

O pasado martes 29 de maio os departamentos de Bioloxía e Xeoloxía e Lingua Galega e Literatura organizaron unha saída a Santiago de Compostela co alumnado de 4º ESO e o Grupo de Teatro do centro que durou toda a xornada lectiva.

O programa incluiu unha visita ás instalacións de MeteoGalicia, onde puideron asistir ao lanzamento dunha radiosondaxe, ver como elaboran as súas prediccións e asistir a unha charla sobre meteoroloxía. A continuación acudiron ao Centro de Transfusión de Galicia, que lle ofreceu un pequeno almorzo e un percorrido, guiado por unha médica especialista en hematoloxía, polo seu laboratorio. Finalmente visitaron, tamén acompañados dunha unha guía especializada, a exposición "Galicia Universal" na Cidade da Cultura, que alberga as obras da colección pictórica da Fundación de Abanca.


Para rematar a xornada, xantaron no centro comercial As Cancelas e desfrutaron dun tempo de lecer, despois dunha xornada moi intensa e aproveitada, na que participaron activamente e amosaron moito interese.

Premede nestas imaxes para ver unhas fotos da xornada....

   

EXCURSIÓN FIN DE CURSO EDUCACIÓN INFANTIL

Este pasado martes 29 de maio o alumnado de Educación Infantil do noso centro xunto cos/as compañeiros/as da Escola Unitaria de Arcos de Furcos fixemos a excursión de fin de curso deste ano. Fomos ao Camping Fieitás no Grove e tivemos un día ateigado de actividades, xogamos no monte e fixemos cabanas, aprendimos moitas cancións, fomos á praia tomar un baño, desfrutamos do sol, e moitas outras cousa máis. Ademáis tomamos un bo xantar e unha merenda xeitosa para repoñer forzas porque tivemos un día moi completo.

Voltamos ao colexio moi cansados/as pero tamén cheos/as de historias e anécdotas que contar, velaquí unhas fotos...

     

    

 

EXPOSICIÓN "REXAS, MULLERES BAIXO O TERROR FRANQUISTA". 3º E 4º ESO

 O venres 25 de maio tivo lugar no centro cultural Patelas unha charla, á que asistiu o alumnado de 3º e 4º da ESO, con motivo da inauguración da exposición “Rexas, mulleres baixo o terror franquista”, por parte da escritora Montse Fajardo . É autora, entre outros, de dous libros relacionados coa memoria histórica: Matriarcas, mulleres en pé de vida (2012) protagonizado por mulleres da posguerra galega; e Un cesto de mazás, memoria das vítimas do 36 e do tempo que veu (2015), que recolle dezaseis historias de familias que sufriron a represión tras o golpe de Estado fascista.

Esta exposición, promovida pola Deputación de Pontevedra e coa colaboración do concello, presenta a través de fotografías a historia de pontevedresas perseguidas polas súas ideas de xustiza e liberdade: asasinadas, presas, vexadas, rapadas, violadas, ...

Na charla fíxose referencia aos casos de Cuntis, onde unha muller foi asasinada e varias vexadas. Entre o público estaba presente a filla dunha destas mulleres, que contou a situación vexatoria pola que pasou a súa nai estando embarazada dela.

Premede nestas imaxes para ver algúns momentos da charla e a exposición.

                   

 

Distribuir contido