Listaxe Provisional de Admitidos/as para o curso 2017-2018

De acordo co establecido na Orde do 12 de Marzo de 2013 (DOG do 15 de marzo de 2013) pola que se regula o procedemento para a admisión do alumnado e a Orde do 25 de Xaneiro que a modifica (DOG do 1 de febreiro de 2017) procedemos a facer pública a LISTAXE PROVISIONAL DE ADMITIDOS/AS para o curso 2017-2018.

Informámoslles que poderán formular reclamacións no prazo de cinco días hábiles contados a partir do seguinte ao da súa publicación no propio centro escolar. 

Ponlle as Pilas ao teu Bocata 2017.

No día de hoxe tivemos unha visita moi agardada por todos/as os/as participantes no Programa dos Plans Proxecta "Aliméntate Ben", os xa famosos bocatas de Ponlle as Pilas ao teu Bocata que podemos degustar grazas á participación do profesorado de Educación Infantil e Primaria neste proxecto e innovación do noso centro.

O alumnado de Educación Infantil e segundo, terceiro e sexto de Primaria recibiron primeiro unha charla informativa sobre as vantaxes dunha alimentación equilibrada e os beneficios que nos aportan os alimentos do mar e envasados en conserva; despois fixemos uns xogos adaptados a cada idade para coñecer máis cousas sobre o mar e todas as posibilidades que nos ofrece; e finalmente cada rapaz tivo a oportunidade de facer o seu propio bocata e cos seus ingredientes favoritos.

Coma sempre botádelle unha ollada ás fotos que sacamos premendo nas imaxes ou visitando a nosa galería de fotos.

                 

Visitamos os Museos de A Coruña

O martes 28 de marzo o alumnado de 5º e 6º de Educación Primaria viaxou A Coruña para visitar os diferentes museos científicos da cidade. Comezaron cunha visita guiada ao Acuario Finisterraea carón do histórico faro da Torre de Hércules. A continuación experimentaron co corpo humano na Domus, onde asistiron ao visionado dun documental de ciencias naturais en 3D titulado "Pequenos xigantes". E despois de comer trasladáronse á Casa das Ciencias para probar os seus módulos interactivos relacionados coa física e viaxar polo espacio e o tempo no seu planetario. 

A viaxe foi moi intensa, ollade que ben o pasaron e canto aprenderon premendo nestas imaxes ou visitando a nosa galería de fotos.

    

Club da Ciencia 2017

No pasado mes de febreiro o noso centro presentou un proxecto para participar no Programa piloto de Innovación Educativa "Club de Ciencia" para centros docentes dependentes da Consellería de Cultura, Educación e Ordenación Universitaria durante o curso 2016/17.

Este mércores 22 de marzo soubemos que o noso centro foi seleccionado con nove máis de toda Galicia para crear de forma experimental este CLUB DA CIENCIA. En breve informaremos da posta en marcha do mesmo e das actividades que levaremos a cabo. 

Neste enlace podedes ver máis información ao respeto: http://www.edu.xunta.gal/portal/node/21144

O sabor da aventura está no mar. Visita a Cambados

Este martes 28 de marzo, cativos e cativas de Educación Infantil fixeron unha visita didáctica á vila de Cambados organizada pola Consellaría de Medio Rural e do Mar ao abeiro do Programa do Plan Proxecta "Aliméntate Ben" no que está a participar por terceiro ano consecutivo unha parte importante do profesorado do noso centro.

Coa colaboración da Asociación das mulleres do Mar de Cambados, Guimatur, visitamos o banco natural de O Serrido para descubrir como traballan as mariscadoras e como fan a extracción e a selección do marisco no punto de control para a súa posterior venta na lonxa. No porto de Tragrove vimos os distintos tipos de embarcacións de pesca e acuicultura, as artes que empregan, as especies que se capturan e comercializan e visitamos a fábrica de xeo. Tamén nos explicaron como se fai o etiquetaxe das especies pesqueiras, como é o proceso de primeira venta na lonxa, simulamos unha poxa de peixe e na nave de redeiras vimos como as mulleres arman e reparan as redes de pesca. E para rematar, e coa finalidade de coñecer os alimentos do mar desde o punto de vista culinario, degustamos unha deliciosa merenda mariñeira a base de produtos do mar.

Coma sempre podedes botarlle un ollo ás fotos que nos sacaron as mestras premendo nestas imaxes ou visitando a nosa galería.

                                  

Saída Teatro " Mr Bullying: todos contra el"

Este luns 27 de marzo o alumnado de 1º da ESO desprazouse a Santiago para ver a obra de teatro: Mr Bullying, ¡todos contra el!

Esta obra da compañía El Replà trata o tema do acoso escolar representando unha situación na que unha alumna chega nova a un instituto onde esperta simpatías con algúns compañeiros e inseguridades con outros, recreando unha situación que se vive nos centros educativos, nos que as bromas deixan de selo, os compañeiros déixanse levar polos comentarios de terceiros e a vida da protagonista vese afectada e prexudicada sen saber moi ben o que está pasando...

A actividade forma parte das actuacións que se desenvolven nas titorías para  reflexionar que é o que leva a uns rapaces e/ou rapazas a exercer a violencia sobre outro/a e poder así, corrixir problemas emocionais e relacionais que poden ter graves consecuencias.

Podedes premer na imaxe para ver algunhas fotos ou visitar a nosa galería de imaxes.

                                      

PREMIOS LINGUA DE NAMORAR 2017

A alumna do noso centro Inés Amado Rodríguez, de 4º da ESO, acadou o SEGUNDO PREMIO DO CONCURSO "LINGUA DE NAMORAR" na categoría de alumnado de Educación Secundaria coa seguinte mensaxe:

"Decidiches escribir poesía comigo, empregando metáforas atopadas nos meu ollos, redactando versos sacados dos meus beizos, engadindo refráns arrincados das nosas vivencias... Desexaches que formase parte desta historia, sendo así o capítulo culminante da túa vida. Decidiches escribir poesía comigo, e nela me enclaustrei para non perderte xamais..."

Moitos parabéns Inés, de parte de todos/as os/as teus compañeiros/as e todo o profesorado do teu colexio.

Se queredes máis información premede nesta imaxe

                                          

ALERTA POR TEMPORAL: SUSPENSIÓN PARCIAL DO SERVIZO DE TRANSPORTE

A Consellaría e Educación ven de comunicarnos que, por mor do temporal, suspéndese parcialmente o servizo de autobuses escolares polo que NON HABERÁ SERVIZO DE TRANSPORTE nos seguintes horarios:

              -O mércores 22 de marzo ao mediodía para volver para a casa.

           -O xoves 23 de marzo á primeira hora para vir para a escola.

Polo tanto, as familias que desexen que os/as seus/as fillos/as asistan á clase terán que vir buscalos/as mañá ao mediodía e deberán traelos/as o xoves á hora de entrada ao colexio.

En caso de que a situación meteorolóxica empeore poderíanse suspender as clases e terían que vir buscar os/as seus/súas fillos/as á hora indicada. Ademais, o alumnado transportado debe ter en conta que poderá asistir ao Servizo de Comedor se a súa familia o vén recoller despois.

Teñen máis información aquí:

http://www.edu.xunta.gal/portal/node/21563

Concurso da Asociación de Profesores de Francés de Galicia para alumnos/as de Francés galegos/as.

O pasado sábado 11 de marzo de 2017, a alumna Blanca Martínez Campos de 1º da ESO gañou o 1º premio do concurso organizado pola APFG na categoría de alumnos/as de 1º e 2º da ESO de Francés, 2º idioma estranxeiro. O concurso foi organizado en Santiago de Compostela pola Asociación de Profesores/as de Francés de Galicia para alumnos/as de Francés de Galicia.

Os traballos seleccionados para participar no concurso foron os seguintes:

Categoría 1º-2º ESO FLE2:

- Blanca Martínez Campos: “La fenêtre de Versailles” (PREMIADA)

- Alejandro Iglesias Sueiro: “La tour Eiffel”

- Nerea Prado Pombo: “Rodin: le penseur moderne”

Categoría 3º ESO FLE2 :

- Sabela Míguez Bouzas : « Le pont du Gard »

Os demáis traballos presentados como proxecto de segundo trimestre están expostos no primeiro andar do centro e no blog do departamento de Francés www.elvifle.blogspot.com

Podedes ver os traballos premendo nesta imaxe ou visitando a nosa galería de fotos.

                                                    

Educación Infantil prantando amorodos no invernadoiro do colexio

Este pasado xoves 16 de marzo o alumnado de Educación Infantil remangouse e púxose máns á terra para facer unha pequena prantación de amorodos no espazo que tan ben nos acondicionaron os compañeiros/as de cuarto da ESO no invernadoiro do colexio.

Premede nestas imaxes ou visitade a nosa galería de fotos para ver canto traballaron os cativos e cativas do colexio e canta caloriña pasamos no invernadoiro.

      

Distribuir contido