Obradoiros de Igualdade de Xénero para Educación Infantil

O alumnado de Educación Infantil do noso centro está a participar dunha serie de Obradoiros, " Xogos, xoguetes e videoxogos", que está a impartir unha técnico do Concello de Cuntis ao abeiro da temática da Igualdade de Xénero neste mes de novembro.

Entre contos, cancións, xogos, xoguetes e moita diversión os máis cativos e cativas do colexio están aprendendo que a igualdade é posible e que comeza dende o máis simple xesto, a nosa persoa.

Premede nestas imaxes e veredes algúns dos momentos que vivimos en igualdade de xogos....

                 

Froitos de Outono 2017.

O alumnado de Educación Infantil leva todo o mes de outubro e novembro traballando sobre o Outono e todas as posibilidades que nos ofrece esta estación. A última destas actividades que fixeron foi unha exposición de froitos típicos de outono e despois unha merenda degustación no comedor do colexio. 

Para a merenda-degustación contamos coa axuda e colaboración dos nosos/as compañeiros/as de cuarto de primaria que lle botaron unha man ben xeitosa ás mestras para desfrutar dos riquísimos froitos que nos trouxeron as familias do alumnado.

Moitas grazas ás familias que nos axudades a facer actividades que tanto lles gustan aos nosos/as cativos/as. Aquí vos deixamos unhas imaxes da xornada que viviron os/as máis pequerrechos/as de infantil cos seus/as compañeiros/as de primaria.

    

Mes da Ciencia 2017. Experimentos 3º-4ºA de EP e 1º de ESO

Comezamos esta segunda semana do mes da Ciencia cos tradicionais experimentos impartidos polo alumnado de 3° PMAR e 4° ESO para o de Educación Primaria. Estes días pasaron polo laboratorio 3° e 4°A EP (durante os recreos do martes e do mércores) e 1° ESO (nos dous recreos do xoves), realizando novos experimentos relacionados coas materias de Bioloxía e Xeoloxía, Tecnoloxía e Física e Química.

Este curso, como novidade, o alumnado de 1° ESO colaborou tamén nestas sesións amosando aos/ás seus/súas compañeiros/as os coñecementos sobre Robótica que adquiriron durante o curso pasado. É sen dúbida a actividade formativa para ambas etapas que goza de maior éxito entre o alumnado, “sacrificando” incluso con gusto o seu tempo de ocio no centro, que non lle chegou a nada. 

Coma sempre podedes visitar a nosa galería de fotos ou premendo nestas imaxes...

      

            3º de Primaria                          4ºA de Primaria                          1º de ESO

Mes da Ciencia 2017. Visita José Viñas

O pasado martes 7 de novembro o alumnado de 3° e 4° ESO realizou un obradoiro, en dúas tandas, guiado por José Viñas, profesor de Bioloxía e Xeoloxía do IES David Buján de Cambre, coordinador do Club de Ciencia de dito centro e gran divulgador científico. O esquema do obradoiro foi o seguinte: Introducción á ciencia cidadá. Teoría e demostración; Novas tecnoloxías aplicadas a participación cidadá; Exemplos de participación cidadá; Participar nun proxecto de ciencia cidadá; Open Science. Empregaron a aplicación para móbil Epicollet 5 coa que puideron crear unha app de ciencia cidadá no momento e practicar con outras. 
Foi unha actividade moi interesante e innovadora como podedes ver premendo nestas imaxe...
 
     

Mes da Ciencia 2017. Exposición

O alumnado de 3° ESO visitou onte durante a clase de Bioloxía e Xeoloxía a exposición sobre especies invasoras ubicada no corredor principal do noso centro. Este alumnado traballou o contido da exposición coa axuda dunhas fichas que tiveron que cubrir e que foron elaboradas para tal efecto polo profesorado. Dita exposición foi cedida temporalmente pola asociación ecoloxista ADEGA e estará a disposición de quen visite o noso colexio até o vindeiro martes 14 de Novembro incluído. É moi recomendable adicar uns minutos do noso tempo a observar os seus paneis para descubrir a enorme cantidade de exemplares invasores tanto animais como vexetais que abundan na nosa paisaxe e que están desprazando ás especies autóctonas.

Coma sempre premede nestas imaxes ou visitade a nosa galería de fotos para botarlle un ollo á exposición.

        

Mes da Ciencia 2017. Visita á adega Terras Gauda.

O alumnado de 3° ESO e 3° PMAR que participa activamente nas actividades organizadas durante o "Mes da Ciencia" foi convidado a unha excursión á adega Terras Gauda (Tui) que tivo lugar o pasado luns 6 de Novembro, para realizar un “Obradoiro de Viticultura de Precisión” organizado polo CSIC (Centro Superior de Investigacións Científicas). O programa da saída foi moi completo (Ollos no aire sobre o cultivo da vide, os Drons,Xestiona o viñedo cunha tablet,As cores e a luz na vide,Descobre os mostos...) 

A excursión durou toda a mañá e aínda que foi moi apurada desfrutárona moito. Premede nas imaxes e veredes como foi a xornada... 

        

Mes da Ciencia 2017.Visita ás colmeas.1º ESO

O pasado martes 31 de Outubro arrancaron as actividades organizadas dentro da V edición do Mes da Ciencia coa visita do alumnado de 1° ESO ás colmeas do noso colaborador e veciño Xosé Torres. Con este motivo achegámonos até a parroquia de O Pazo dando un bo paseo desde o colexio e xa na súa casa poidemos ver in situ toda a súa labor como apicultor de ampla experiencia. Tamén nos falou de todo o mal que fan as vespas velutinas que se alimentan das abellas autóctonas, das trampas que fai para poder exterminalas e que non ataquen ás súas, e incluso probar o seu delicioso mel.

Foi unha tarde moi aproveitada e desfrutada polo alumnado como podedes ver nas seguintes fotos...

  

Mes da Ciencia 2017

Un ano máis chega o mes de novembro e con el chega ao noso centro o MES DA CIENCIA cargado de actividades moi diversas: exposicións, roteiros, experimentos, xogos de pistas, concursos, charlas e un longo etc. 

Aquí vos deixamos o cartel de actividades deste mes cheo de ciencia por se vos queredes apuntar...

 

Visita a Campiño e Lourizán

O alumnado de terceiro e cuarto de educación primaria está a desenvolver unha serie de actividades de concienciación medioambiental e coidado dos montes e árbores de Galicia. Unha das actividades que levaron a cabo e que máis impactou ao alumnado nestes días de traballo foi a visita á base aérea contraincendios de O Campiño onde os brigadistas e demáis persoal desta base lles amosou cómo era o seu traballo e como usaban todo o equipamento do que dispoñen para a prevención e extinción de incendios coma os camións motobombas, o helicóptero, os seus traxes, as mangueiras, etc.

A rapazada desfrutou dun día moi divertido e puido comprobar como era a vida e traballo destes profesionais compartindo con eles/as unha xornada de convivencia moi especial.

Podedes botarlle un ollo ás fotos que sacaron os/as mestres/as e coas que seguirán traballando na aula premendo nas imaxes ou visitando a nosa galería de fotos.

            

Saída ao teatro "Guillermo Tell". 3º ciclo primaria

O pasado martes 31 de outubro o alumnado de 5º e 6º de primaria asistimos ao concerto didáctico da ópera Gullermo Tell de Gioacchino Rossini. Descubrimos a lenda deste heroe medieval a partires da fantástica adaptación realizada pola Compañía de Comediants A Baldufa.

Podedes ver as fotos premendo nas imaxes ou na nosa galería de fotos.

      

Distribuir contido