O ALUMNADO DE FRANCÉS DA ESO VAI AO TEATRO

O alumnado da ESO que cursa a asignatura de Língua francesa no noso centro tivo unha saída ao Teatro Principal de Santiago o pasado 27 de febreiro de 2018 para ver a obra " Vis la vie en rose" da Compañía La Boéme. Ademáis do teatro tamén aproveitaron para facer unha visita guiada ao Parlamento de Galicia para coñecelo un pouco máis de preto.

Aquí vos deixamos unhas fotos da xornada que tan ben aproveitaron os/as nosos/as alumnos/as.

            

Teatro "Garbancito na barriga do boi". 1º e 2º de Primaria.

Este xoves 1 de marzo, os cursos de 1º e 2º de Educación Primaria realizaron unha saída a Pontevedra para ver a obra de teatro "Garbancito na barriga do boi". Unha historia con imaxes representativas e monicreques ,musicada en directo que nos falaba dun diminuto protagonista que se adentra nun reino de mentiras dentro da barriga dun animal.

Podedes botarlle un ollo ás fotos premendo nesta imaxe ou visitando a nosa galería.

ADMISIÓN ALUMNADO NOVO NO CENTRO 2018-2019

O prazo de solicitudes de Admisión para o curso 2018-2019 abrangue dende o 1 até o 20 de marzo ( *de acordo co establecido na Disposición Adicional primeira da orde do 12 de marzo de 2013 (DOG do 15) pola que se regula o procedemento para a admisión do alumnado).

O proceso de admisión pódese facer dende a Sede Electrónica da XUNTA seguindo as instruccións que aparecen neste enlace: https://sede.xunta.gal/detalle-procedemento?codtram=ED550B)

Podedes pasar pola secretaría do centro en horario de 8,45 a 13,45hs de luns a venres para recoller e entregar os documentos necesarios ou descargalos dende este enlace: FORMULARIO ADMISIÓN DO ALUMNADO. ANEXO II

A NUTRICIONISTA LIDIA FOLGAR VISITA AO ALUMNADO DE 2º DE PRIMARIA

O venres 2 de febreiro a nutricionista, exconcursante do programa de televisión Masterchef, e veciña de Caldas de Reis, Lidia Folgar visitou o noso centro para dar unha charla sobre alimentación aos/as nenos/as de 2º de Educación Primaria. Faloulles de hábitos saudables, da importante presenza do azucre en moitos alimentos e bebidas, e da necesidade da concienciación dende rapaces para ter mellor saude no presente e de cara ao futuro.

Foi unha visita moi interesante para os/as cativos/as como podedes ver nas seguintes fotos...

          

ALIMÉNTATE BEN 2018. PONLLE AS PILAS AO TEU BOCATA.

Este venres 16 de febreiro recibimos no colexio unha das visitas máis esperadas dos alumnos/as que participan no Programa Aliméntate Ben cada curso, Os Bocatas que nos poñen as pilas a todos e todas. 

Un ano máis o alumnado participante no Aliméntate Ben que está a traballar nas aulas contidos de alimentación saudable e nutrición puido coñecer moitas cousas acerca das conservas e dos productos que nelas podemos atopar, todo isto coa axuda dunhas mascotas moi mariñeiras que nos amosaron as súas mellores cualidades.

E como remate á xornada tomamos uns bocadillos ben xeitosos, saborosos e saudables, ollade se non as fotos....

    

DESFILE ENTROIDO 2018

O Entroido deste curso 2017-2018 xa chegou e no colexio puxemos todo o noso empeño en facer desfrutar a todo o mundo que nos acompañou neste día de festa. Moitas grazas a todos os/as que viñestes pasar a mañá canda nós e a todos os/as que trouxestes doces, filloas, orellas, etc para por o remate doce á xornada. Tamén moitas grazas á ANPA O Baño por botarnos unha man nesta e noutras máis actividades.

Aquí vos deixamos fotos e vídeos do desfile e actuacións dos nosos/as alumnos/as que con tanto traballo e cariño preparamos.

    

ENTROIDO 2018

Familias, amigos e amigas, veciños e veciñas, un ano máis o alumnado do CPI convídavos a asistir ao seu desfile de entroido que terá lugar partir das 11:00 hs da mañá no patio exterior do colexio; se a choiva nos visita agardamos por todos e todas vós no pavillón de deportes a carón do colexio.

Este ano o tema dos nosos disfraces está relacionado coa concienciación sobre o coidado do noso planeta, dando continuidade así ao traballo do tema transversal " Un planeta feliz: o desenvolvemento sustentable" que estamos a desenvolver nas aulas durante este curso. Esperamos que vos guste.

Teatro "Zapping". 4º-5º-6º de Primaria.

Este mércores 31 de xaneiro o alumnado de 4º, 5º e 6º de Educación Primaria tivo unha clase de Inglés moi especial. Viaxaron a Pontevedra para desfrutar dunha obra de teatro na lingua extranxeira a través da cal puxeron en práctica as destrezas de escoita e fala interaccionando cos protagonistas da obra.

Como podedes ver premendo nestas imaxes, pasárono moi ben e desfrutaron aprendendo dun xeito diferente.

                                  

O ALUMNADO DE 4º DE PRIMARIA COÑECE A LOITA OLÍMPICA

O Programa XOGADE- Deporte Escolar organizou unha xornada para o alumnado de 4º de primaria coa idea de fomentar o interese pola modalidade olímpica da Loita. O profesorado tivo que formarse no Centro de Tecnificación Deportiva en Pontevedra, elaborar unha unidade didáctica e levala a cabo nas súas clases. Despois, na mañá do 25 de xaneiro, todo o alumnado de 4º de primaria do CPI Aurelio Marcelino, xunto co alumnado doutros centros educativos de A Estrada xuntouse no Pavillón Municipal de A Estrada para unha demostración das habilidades de loita olímpica adquiridas na súa formación.

Podedes ver algúns dos momentos vividos desta xornada premendo nestas imaxes ou visitando a nosa galería de fotos.

                   

CONTACONTOS PARA INFANTIL E 1º CURSO DE PRIMARIA

Este martes 30 de Xaneiro o alumnado de Educación Infantil e primeiro curso de Educación Primaria recibiu a visita do mestre, escritor e contacontos Iago López que unha vez máis nos trouxo a maxia dos contos tradicionais á escola.

Esta viaxe polos contos de sempre comezou na casiña dos tres osiños, continuou cara a casa dos sete ananiños e pasou tamén moi pertiño da casiña de chocolate onde a superheroina e axente especial Riciños de Ouro mira pola posta en marcha dun servizo de axuda a personaxes de conto inxenuos e inocentes que andan desorientados.

      

Distribuir contido