Actividades conxuntas

Outro ano máis, o 23 de abril, Día Internacional do Libro, fixemos por compartir lecturas co resto da escola e coa veciñanza que quixese escoitar.

Cada titoría escolleu os textos que quería ler, houbo quen remexeu na biblio á procura daquel conto que tanto lle gustara cando aínda era bebé, ensaiou para non trabar nas sílabas e veña!, de paseo pola Vila do Baño para lermos ao aire libre. O día solleiro axudou a que a actividade fose pracenteira, aínda que o nordés ás veces turraba para pasar páxina e acabarmos antes.

Repartímonos en grupos que mesturaban etapas (EI, EP, e ESO) e concentrámonos na Praza das Árbores, no palco da música, no paseo do río, no 3x3, no Convento… Compartimos adiviñas, dramatizacións de contos, poemas rimados, poemas cantados, e mesmo cocoricos e vacas victorias.

Porque non hai mellor libro que aquel que compartimos.

Álbum: Curso 23-24 -> Lecturas na Rúa

O mércores 17 de abril conmemorouse como cada ano o Día da Educación Física na Rúa promovido polo COLEF de Galicia. A idea da conmemoración desta data é dar a coñecer a importancia da actividade física diaria e a promoción da saúde na escola a través das diferentes sesións da área de Educación Física. Con este obxectivo propuxéronse diferentes actividades en diferentes rúas do concello de Cuntis.

O alumnado de Educación Infantil realizou un percorrido de habilidades motores na Rúa Xosé María Lastra.

O alumnado do 1º ciclo de Educación Primaria combinou o traballo de habilidades motoras básicas e actividades con paracaídas.

O alumnado do 2º ciclo de Educación Primaria xogou ao Twincon na praza da Constitución.

O alumnado do 3º ciclo de Educación Primaria xogou ao Datchball no 3x3 situado na zona do Espadenal.

Aquí tedes unha mostra das actividades realizadas.

Álbum: Curso 23-24 -> DÍA DA EF NA RÚA

Este luns 11 de marzo, boa parte das integrantes dos Clubs de lectura (e escritura) do centro participou nunha saída ao Salón do Libro Infantil e Xuvenil de Pontevedra. 
Por unha parte, participamos no Encontro de Clubs de Lectura que organiza o Salón, xunto con centros de Pontevedra e Poio. Puidemos escoitar ao poeta Lois Pérez, presentamos as nosas lecturas e actividades, coñecemos o traballo dos outros Clubs e participamos nun concurso en que gañamos libros para a nosa biblio. 
Ademais, despois de xantar, no Salón tiveron a ben abrir a exposición un pouco antes da hora para que nós poidesemos facer a visita e ver a nosa colaboración: o kamishibai elaborado polo alumnado do Club de EP. 
Aínda tivemos tempo para dar un paseo pola Illa das Esculturas.

Álbum: Curso 23-24 -> Encontro Clubs de Lectura

Por mor do aniversario do nacemento de Rosalía de Castro celebramos no cole o día de Rosalía.

Houbo diversas actividades centradas na figura da poetisa.

Unha delas e, relacionada co tema transversal: Que quero ser?, chamámola: Quero ser... Rosalía, na que o alumnado da ESO participou no seguinte vídeo dando as razóns polas que lle gustaría ser a poetisa.

Outra delas foi a realización do Caldo de Gloria. Partindo do poema de Rosalía: "Miña casiña, meu lar" o alumnado de 5º de Educación Primaria elaborou este caldo seguindo a receita orixinal que marca o poema. Queremos agradecer a colaboración de Rubén Navia que nos visitou nesta xornada e dounos consellos moi valiosos de como elaborar este caldo.

Aquí vos deixamos unha pequena mostra fotográfica desta xornada.

Álbum: Curso 23-24 -> Día_de_Rosalía (Caldo de Gloria)